Lukâs 13
13
Kyèmi ŋwòə bə̀ anə bɛb tyiə̀
1Anə sòŋə fə ghà fə̀, aghê liy yiy kə də̀ awote, ghu dzày yə̀ àyiə â Yesù kwùmə̀ yə̀ nə̀ àyiə yə Paylèt wiy myiʼà àghě Galìlî yìy ate nə̀ ghu sâ yə̀ tə̀nyàm â Zə̀kìy. 2Yesù bəb yə̀ a ghu nə, “Yəə aghee Galìlî yə̀ kə pfə nəniy ghii, ghà moʼò tsə nə̀ i dê tsə nə̀ ghu bɛb tsìy fyi ŋwô aghee Galìlî àliy yə ə̀? 3À wày dzə ghii. Mə dzîy bə̀ â ghà nə̀ abu ghà də kə̀ nyəli maʼà soʼò ìbɛb ghəli, ghà nî pfə mìyà sòʼò yəə à də̌ ghu. 4Abû aghù yə̀ àvəm nə̀ àghè famə ndaŋ kə ndaw kiy kə bəlì kwi nəniy ghu a Silwàm, ghà moʼò nə̀ ghu kə ghî pfə yəə ghu bɛb tsîy fyi nəniy aghê liy yə a Yèlusalèm ə̀? 5À wày dzə ghi. Mə dzìy bə̀ â ghà nə̀ abu ghà də kə̀ kyemì ŋwô bə̂ anə ayiə ghi àbɛbə yiy, ghà nî pfə sòʼò yəə à də̌ ghu.”
Fə̀zə̀zə̌ kwùmə̀ yə̀ nə̀ kàʼ fə̀ fə də muə way utam wiy
6Yesù ə dzày yə̀ zə̀zə̌ fə â ghu nə̀, Wù lìy wìy kə kwu uswum u we nə̀ ù mə̀ zu na kâʼ fə utam fə ghu zəŋə nəniy nlwù mìy ate. A ntsuk ù liy wiy, u zù ani zù kwà ùtam anə kàʼ fə te fiy, kə̀ kôʼ nəway. 7U dzày yə̀ awò wù wə̀ ù yèmə̀ nəniy anə uswum u te wiy a we nə̀, “À nyə̀ də̀ tə ŋəmə̀ ìti, mə bê fəə ani bù kwà ùtam u fəkàʼ anə kàʼ fə̀ mə kə̀ kôʼ nəway. Fòŋə màʼà kâʼ fə ghà fə̀, fə tyamì na kəloʼo.” 8Wù wə̀ ù yèmə̀ nəniy anə uswum wə ə bə̀lì yə̀ a we nə, “A mwe, na kòʼo tsə kə nyiə nə̀ ŋə̀m kə̀. Mə ki tsôʼ tsîy yə̂, tə̀ mə fəlì yə̂ ùdzə a dəŋə kàʼ fə te fiy. 9Ani bu fə mu nə̀ ŋə̀m kìy, ŋgà ni na, nə̀ fə kə̀ mu, ŋgà ni fôŋ maʼà.”
Yesù ə zəŋi taw kə wìyəŋi ù lìy wìy a tsuk ù zwaa wiy
10Yesù kə tyi dè àyiə a ndàw dzəŋə kə aghě Dzû, a ntsuk u aghě Dzû ù zwaa wiy. 11Wìyəŋi ù lìy wìy ə də̀ awote nə̀ usîy ùbɛbə wiy mə zəŋi nə̀ ù si dzaŋə anə tə ŋə̀mə̀ ìvəm nə̀ ghe tiy ifamə. U zòʼ dòʼò təŋ kə ŋwò kwu way ani təmi kə tsitsi. 12Abù Yesù kòʼ tsə nəniy wìyəŋi ùghà wə̀, u toŋə tsə we dzày tsə a we nə, “Idzâŋ yə̂ yìy mə̀ mày.” 13U gaʼ tsə awo ə we azoŋə̀ wìyəŋi ù te wiy, wìyəŋi wə dyaŋi təmi kə idoŋ kaʼ yə̀ ani nyə̀ ùkali â Zə̀kìy.
14Wù wə̀ ù kə də nəniy tuw kiy awote a ndàw dzəŋə kə aghě Dzû, u kaʼ yə̀ ani fwu nə̀ fòŋ, dzìy Yesù zəŋi taw wù a tsuk ù zwaa wiy. U bwoʼ fyi kə kəbôŋ dzìy tsə nə̀, “Ŋgà kwu məntsukə intìfoŋ ŋgà faʼà nəniy ate, ghà kwu ani bù tə̀ ghu byaŋi gha anə ntsukə mə̀ ghà mə̀. À wày dzə a tsuk ù zwaa wiy.”
15Mwe ə̀ Mbyi ə bə̀lì kə a we nə, “Ghà də mə̀ nə̀ nyi mbe imbè! Gha yə gha nîy fyiə yə̂ mbòŋ tìy anə mbà moo ndzàkâs kìy ani zù nyə̀ nə̀ mwi anə tsuk fə̀ zwaa fiy gha kwu way ə̀? 16À yù də wàwà Ablàhâm, Satàn kwù na nəniy anə təŋə̀mə̀ ivəm nə̀ ŋə̀mə̀ tìy ìfamə, a way ani zè màʼà we a tsuk fə̀ zwaa fiy ə̀?” 17Abù ù dzày tsə ghi, utuw wiy də̀d yə̀ aghù yə̀ ghu dzwəə nə̀ we. Aghê liyi ə kwunə dwoʼo anə kwab tə yiə tə ù zəŋə nəniy.
Zə̀zə̌ fə nyàŋə fəsam
(Matìyò 7.13-14,21-23)
18Yesù ə bəb tsə nə̀, “Loʼo kə Zə̀kìy saʼa ate kə də te kyiə̀? Mə də ni ba tyi tsə nə̀ kə də yəə à də kyìə̀? 19Kə də yəə wù nə̀ zee yə̂ nyàŋə fə sam fə fə tɛb tsîy fyi nəniy sam tə ufyiə tə tə̀dzə̀m anə mbyi zu yə̀ anə uswum. Fə nɛmə dòʼò yə̀ fə̀kàʼ, ŋwùni bè zəŋə ndaw tə ghu anə ŋkwè tə we.”
Zə̀zə̌ fə mbùŋ
(Matìyò 13.33)
20Yesù ə kàm bəb fwuli tsə nə̀, “Mə də ani ba tyi tsə nə̀ Zə̀kìy saʼa mə̀yə aghee we yiy ə? 21Kə də yəə wìyəŋi nì nìy tsə̀lì kə mbwùŋ kwe tsə anə mfòŋ mə̀ kyaŋə̀ mə̀ ùfyiə miy, u na tsə mfòŋ mə̀ ghè mə ə kwoʼ kpe dzwàb tsə.”
Zə̀zə̌ fə ufə̀b u ndaw ù tɛbə wiy
(Matìyò 7.13,14,21-23)
22Yesù ə bwì tsìy yə̀ tə̀nàʼà nə̀ nàʼà mìy, tyi dè yə̀ àyiə awò àghè, tsìy zù dyaŋi a Yèlusalèm. 23Wù lìy wìy ə bɛb yə̀ â we nə̀, “A mwe ə̀ mbyi, Zə̀kìy nî bii fyiə kə ə̀ səfə aghù ə̀?”
Yesù ə̀ bə̀lì yə̀ a we nə, 24“Kaw dzəd yə̂ ani tsìy nyi anə kwali fə ufə̀b u mbà, aŋwòə ndə̀mə̀ àghè nî liə ŋwò ani tsìy nyi ate, ghu ni kwuni də̂m kê ani tsìy nyi.” 25Ani buu mwe ə̀ ndaw ù ghè wə̀ nì fè tsə dzəə ufə̀b ndaw, ghà ni təmi doʼò kə a bee, ghà ni bwoʼo ndaw, dzìy nə̀, “Dzwə̀ə tsə ndaw a mwe ə̀ ndaw.” Mwe ə̀ ndaw ù te wiy ni dziy nə̀, “Mə kwu way gha, kwu way loʼo kə ghà ŋwô bə̂ nəniy ate.” 26Ghà ni dziy nə̀, “Ghè kə baŋ nyi dzəŋi nə̀ wò, wô tyi dè sòʼò àyiə anə inaʼ ghələ!” 27Ù nî nam dzày fəli bə̀ kə nə̀, “Mə kwu way loʼo kə ghà ŋwô bə̂ nəniy ate, ŋwò nənìy fəə asə̀ ə̀ mìə̀, ghà də aghê àbɛbə yiy.” 28Ghà ni diy awote, fələ àsooŋ, ani buu ghà nî kòʼ yə̂ nəniy Ablàhâm, nə̀ Ayzìk, nə̀ Dzàkôb, nə̀ àghě ntwùm ə̀ Kə̀zə̀ yìy a lòʼo kə Zə̀kìy saʼa nəniy ate, nə̀ ghu mə kwuni nìy màʼà fyi gha. 29Aghê nî ŋwò bə̀ anə nàʼà tə mbyi tə̀dzə̀m ghu bû nyi iwee a lòʼo kə Zə̀kìy saʼa nəniy ate. 30Kəli tsə nə̀, aghû yə̀ aghê koʼò nəniy nə̀ ghu də aghê soŋə̀ yìy nyiə, ghu nî dyòʼò ŋgwò mə̀ ghù, à yuu ghu koʼò nə̀ ghu də ŋgwò mə̀ ghù nyiə, ghu nî dyòʼò àghè soŋə̀ yìy.
Yesù ə mwe awò ìnaʼ i Yèlusalèm
(Matìyò 23.37-39)
31Anə soŋə fə te fiy, aghee Falàsî àliy yiy zù bù dzày yə̀ â Yesù a we nə, “Wò kwu ani ŋwò fə̀ aŋwòə Helòd khu dzəd ani wiy màʼà wò.”
32Yesù ə bə̀lì yə̀ aghu nə, “Ghà zû dzây yə̂ â kəŋ kiy a we nə, Mə kwu ani dzwùm fyi nsìy mə̀bɛbə̀ mìy, mə zəŋi sòʼò nə̀ aghê taw zii nə̀ tsutsu. Nə̀ ambə̀lì kìy mə ki mây kə fàʼ kam.” 33Mə kwu ani ŋwò yə̀ kə nə̀ ìbwìy yam yiy zii, nə̀ tsutsu, nə̀ nàambə̀lì kìy. Wè ntwùm ə̀ Kə̀zə̀ wày dzə ani pfə a lòʼo kə̀ liy kiy, a mày kə a Yèlusalèm.
34A Yèlusalèm, a Yèlusalèm. Ghà tsəŋə̀ wiy yə̀ kə aghee ntwum ə̀ Kə̀zə̀, tyimə wiy sòʼò aghù yə̀ ghu niʼà nəniy gha nə̀ ayiə yiy! À də nsòŋə in sə̀ki mə dziy kəd na bə̂ awa ghii yəə mbvu nə̀ kələ nia bə̂ nəniy awa we nə̀ ghàw tìy, ghà də kwuni byemə way. 35Yəə i də nəniy ghi, Zə̀kìy kî kàm ə̀ nia way isə yiy anə ndàw Kə̀zə̀ ghi. Mə ndzəmə̀ dzìy bə̀ ŋwò â ghà nə̀, ghà ki kàm kòʼò fwulə wày miə zù kwùm soŋə fə ghà nî dzìy nəniy nə̀, “Zə̀kìy lwîy wù wə̀ ù bè nəniy anə izəd i mwe ə̀ mbyi.”
Valgt i Øjeblikket:
Lukâs 13: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
