Lukâs 11
11
Yesù ə tyi dè àyiə kwùmə̀ yə̀ nə̀ ìgwùŋì
(Matìyò 6.9-13; 7.7-11)
1A ntsuk fə̀liy fiy Yesù ə gwùŋə̀ a lòʼo kə̀liy kiy. Abù ù gwùŋì mâ tsə nəniy, tsə̀ndii we ùlìy wìy ə dzày yə̀ a we nə, “A Mwe ə̀ mbyi, tyi dě bə̀ ghəd nə̀ ayiə yə ghè kwu nəniy ani gwùŋə ate anə yiə yə Dzwan kə tyi dê soʼò nəniy awò tsə̀təndii tə we tiy” 2Yesù ə dzày yə̀ aghu nə, Abu ghà dziy gwùŋì ghà si dziy tsə nə̀.
“A təli, ghè gwuŋə̀ nə̀ aghê nyiə̀ mə̀ŋkwiʼi anə izəd yiə̀ ì zwe yiy.
Ghè gwuŋə̀ sòʼò nə̀ wò bû saʼ muə tə aghè àdzə̀m.
3Nyìə bə̀ ghəd nə̀ nə̀ ùfànyiə wə u kpe doʼò nəniy â ghə̀d ani nyi.
Ntsukə indzə̀m.#11.3 Nyə̀ ghə̀d nə̀ fyiə kə ghè kwu ani nyi tsutsu.
4Nǐyzə̀ ibɛbə yə ghè zəŋi nəniy
anə yiə yə ghè nîyzə̀ nəniy bɛb tə aghê zəŋi azoŋə̀ ghə̀d.
Kə̀ bɛmə dzə̀ nə̀ ghè zəŋi ibɛb abu ghè bvə̂ nyi tswi tsə anə imwâmkòʼ.”
5Yesù dzày yə̀ a ghu nə, “Abu wò bwì zû nəniy a ndàw fwu yə̂ nə̀ fòŋə̀ ntsukə, dzày yə̀ a we nə̀, ‘A fwu wam, fwǐy nyìə̀ miə nə̀ ghɛbə tə ubatiy ìtii.’ 6Fwu wam ù lìy màŋ kə̀lə̀ bə̀ mìə̀ nyiə ghi nə̀ mə taʼà kwu way ufanyiə wiy yə ù nə nyi.” 7Abu ù sì kpaʼa dzây fyi bə̂ â wò nə̀, “Kə̀ miə fyimi, Mə mə fèe ndaw, mə nəŋì dòʼò nə̀ àwa yamə, mə way ani ŋwò kə dzə̀ nyìə̀ idoŋ, mə nyiə̀ wò nə̀ fyiə kə̀ likiy.” 8Mə dzîy bə̀ â ghà nə̀, abu ù mə də wày kə ani ŋwò kə dzə̀ ani nyə̀ wò nə̀ bakiy, aŋwòə wə̀ də fə̀lə̀ ìghe, ù kì ŋwò nyə̀ bə̀ ufyiə udzə̀m wò làʼà nəniy bòʼ yəə wò də kə̀ də̂d nə̀ tuw kiy tsə̀ŋə̀ ŋwa kə ŋwô. 9À də̀ sòʼò ighəd mə dzîy bə â ghà i tsəŋə̀ ŋwa yə kə ŋwô, wò kì kyilə ŋwò, i tsəŋə khu kə ŋwô, wò kî kòʼò ŋwò fyiə kə ghà kə̀. I tsəŋə bwoʼo kə ŋwô bâʼ kìy, ghu ki fwiy maʼà tsə bâʼ kə ghà kə̀ awò wò. 10Wù wə̀ ù tsəb ŋwa yə̂ dzə̂ â Zə̀kìy, ù kì kyilə ŋwò fyiə kə ù làʼà nəniy, wù wə̀ ù tsə̀ŋə̀ khu yə̂ kə ŋwoə̀, Zə̀kìy kî zəŋə ŋwò nə̀ ù kòʼ fyiə kə ù khu nəniy, wù wə̀ ù tsə̀ŋə̀ bwoʼo yə̂ kəə bâʼ kìy, Zə̀kìy kî fwukə tsə ŋwò bâʼ kìy awò we. 11À də̌ ndiə anə uzə ghii nə̀ tě wa, abu wa niə̀ ŋwa bə̂ nəniy itsi awò wò, wò də̀ ŋwô ani fə̀d nìy kə zwə wò nyiə̀ yə̂ â we ə̀? 12Moo wò də ani fə̀d nyə̀ yə̀ nàŋ awò we, abù ù ŋwa bə̂ nəniy ìwuum i mbvu yiy â wò ə? 13Bəə aghê àbɛbə yəə à də̀ gha, ghà də ani nyə̀ ùfyiə ùdzoŋə̀ wìy awò awa ghi, mòʼo tsə təli ghi wə ù də nəniy an-a-vələ yəə ù kì də ani nyə̀ Zwàykə̀zwekiy awò àghù yə̀ ghu ŋwa yə̂ nəniy â we!
Yesù dzày tsə nə̀ ghe faʼà dzə̀ wày anə daʼa kə Bezebù
(Matìyò 12.22-30; Mâk 3.20-27)
14A ntsuk ù liy, Yesù kə dzwùm fyi tsə usîy ù bɛbə wiy azoŋə̀ wù lìy u kə zəŋə nə̀ ù kə dzə̀ŋì, wù wə̀ ə kaʼ tsə ani dzə̀ŋì. Adzwə zwum ŋwàâ kə aghù yə̀ ghu kə də nəniy awo. 15Aghê àliy yiy ə kwunə dzìy nə̀, “Bezebù, dòŋ kə, nsìy mə̀bɛbə̀ mìy à nyìə̀ we Yesù nə̀ daʼa kiy nə̀ ù si dzwumə fyiə nsìy mə̀bɛbə̀ mìy.” 16À liy yiy kə khu dzəd ani kwiy Yesù anə ayiə we à dziy yiy. Ghu dzày tsə a we nə̀ ù zəŋi tsə mali kə iyiə kə̀ liy kiy ani dè tsə nə̀ à we twum bə̀ Kə̀zə̀. 17Yesù kə kwuni kwu ŋwô àyiə yə ghu kə moʼò nəniy, u dyaŋi dzày yə̀ a ghu nə, “Inaʼ yə i dzâw doʼò nəniy anə məŋkaʼa, ŋwà kwùnə̀ anə iwè, i way ani təmi lwùŋì. Isəd i ndaw yə soʼo i dzâw doʼò nəniy ŋwà anə iwè, i kî səàlə̀ dyòʼò ŋwò.” 18Ghà dzîy nə̀, “À də̀ Satàn ù nyìə̀ miə nə̀ daʼa kiy. Abu Satàn dzwàw doʼò, kàmə̀ tyìmə̀ ŋwà kwùnə̀ anə uwè, loʼo kə Satàn saʼa nəniy ate kə də mə̀yə ani təmi ə?” Mə ghî dzìy aŋwòə ghà dzîy nə̀ “Mə dzwumə̀ fyiə nsìy mə̀bɛbə̀ mìy anə daʼa kə Bezebù. 19Abu mə dzwumə̀ fyiə nsìy mə̀bɛbə̀ mìy anə daʼa kə Bezebù, aghû yə̀ ghu bwî tsə̂ nəniy adzəmə̀ ghà ghu dzwumə̀ fyiə nəniy nsìy mə̀bɛbə̀ mìy, ghu kwuni nìy bə̀ yə̀ daʼa kə ghu kiy ə? À ki də̀ kə ghu, ghu kî dè bə̂ nəniy â ghà nə̀ môʼ təli tiy way dzə tsitsi. 20Abu mə kwuni dzwumə̀ fyiə nəniy nsìy mə̀bɛbə̀ mìy anə daʼa k-a-zə̀, à ki fiy də nə̀, Zə̀kìy mə bù nə ìsaʼ yiy fə anə fwumi khii. 21Abu wù kwu nəniy daʼa kiy kyìŋə̀ ndàw we nə̀ ufyiə u tsam wiy, ufyiə u we wiy ki də kədzôŋ. 22Abu wù lìy kwuni kwu nəniy daʼa kiy tsìy fyi we, ù zù kway yə̂ nəniy we, ù kì taw tsìy tsə we tə̀ ù nìy ŋwò kə ufyiə u tsam wə wù wə̀ gaʼ na nəniy fòŋ ate, ù nìy dzàw ŋwò tsə ufyiə wə wù ù taw wə̀ kə kwu nəniy. 23Abu wù də taʼa way nə̀ mìə̀, ù ghî dzwə nə̀ mìə. Wù wə̀ ù də fìy wày miə ani zəŋə nə̀ aghê kəli tsə Kəzə̀, ù ghi zəŋə nə̀ ghu kə bû dzə̀ akə̀lə̀ Kə̀zə̀.”
Usîy ù bɛbə̀ wiy fyiə tsə azoŋə̀ wù u zù dzwoŋi bə̀ nə̀ a àwizə̂ yiy
24Abu usîy ù bɛbə wiy fyi tsə a zoŋə̀ wù lìy, u làʼ ŋwò này yə̀ a mbvə̀n ə̀ kə̀sisi, khu tsə̀ loʼo kə u dziy muə̀ ate. Abù u kaw kê tsə nəniy, u dzày tsə nə̀, “Mə kî zè dzwəŋə anə lòʼo kə mə kə fyi tsə nəniy ate. 25Abù u dzwoŋi bû kòʼ tsə nə̀ ndàw ìghà yə̀ nam də̌ ìzwumə̀ yìy nə̀ ghu mə zwùbì na dzwàb, 26u kàm zù kaw fwuli tsə nsìy mə̀bɛbə̀ mìy ì nsèmbe ìn bɛb tsîy nəniy we ghu bù dòʼò dzwoŋi bə̀ azoŋə̀ wù ghè wə̀, wù ghè wə̀ ə kàm ba bɛb fyày mà yə̀ tsìy fyi tsə yəə ù kə bôʼ də tsə nəniy ate.”
Ayiə yə a bê nə̀ lwì kə̀soŋə̀ kìy
27Anə yiə yə ù namə dzəŋə̀ nəniy, wìyəŋi ù lìy ə dzày fyi kə anə ŋwàâ kə̀ nə̀, “Zə̀kìy lwîy wìyəŋi wə ù byi nəniy wô ŋwuŋi sòʼò wò.” 28Yesù ə bə̀lì tsìy yə̀ we nə̀, “Zə̀kiy lwîy tsîy fyi tsə àghû yə̀ ghu zuw nəniy ayiə Kəzə̀ yìy fàʼə yə̀.”
Aghû yə̀ ghu muə nəniy nyiə ghu liə kətsəe
(Matìyò 12.38-42; Mâk 8.12)
29Yəə ŋwàâ kə ghù kìy lwe bə̂ a kə̀lə̀ Yesù, Yesù ə dzày tsə nə̀, “Aghû yə̀ nyiə anə ŋə̀mə̀ tə̀ ghu bɛb fyày ŋwò, ghà bəbə tsə̀ mali tə yiə mə kî dè dzə̀ wày. Mə kî kwuni dè yə̀ kə ghu nə̀ ndzòʼò tsəe kə kə kə fyi nə̀ Dzonà. 30Yəə Dzonà kə də nəniy tsəe kiy awò àghě Ninevèh yìy, à də̀ sòʼò ighəd Wà Wù də nəniy tsəe kiy awò àghù yə̀ nyiə anə ŋə̀mə̀ tə̀. 31Nàʼtwùm ə̀ ìnaʼ i Shebà nì tyimə kə ani saʼ wiy aghû yə̀ nyiə nə̀ ŋə̀mə̀ tə̀ anə ntsuk fə isaʼ, aŋwòə ù kə loʼo ŋwò bə̀ ndaŋ kə dzəd ani ŋwa zuw utwab u Kəzə̀ awò Solomùn, ù kə də Dòŋ kə̀ twabə kiy. Mə dzîy bə̀ â ghà nə̀ wù lìy də̀ ŋwò nyiə ù tsìy fyi nəniy Solomùn, ghà kwuni twe ani zwuli ayiə we à dziy yiy. 32Ani buu ntsuk fə isaʼ, aghee inaʼ i Ninevèh ni saʼ wiy gha ule wə nyiə, aŋwòə ghu maa tu kyèmì ŋwò fyi bə̀ anə bɛb tə ghu anə ayiə yə Dzonà kə̀ naʼà nəniy. Nyiə, wù wə̀ ù tsìy fyi nəniy Dzonà ù də fəə nə̀ ghà. Ghà kwuni twe ani kyèmì ŋwò fyi bə̀ anə bɛb təli.
Kaʼì tə̀ uwe
33Wù lìy dà tsə dzə̀ wày kaʼì tìy u kəd na nyi yə̀ a təŋə kəŋkhìy, ù tyilə nia kə anə lòʼo kə kaʼì tìy kwu nəniy ani dòʼò ate tə̀ abu wù tsìy nyi bə̂ a ndaw, ù si koʼo tsə asə ə ate. 34Asə yiə̀ yìy də yəə à də̀ təkaʼì anə uwè niə̀. Abu asə yiə̀ yìy dzwabə̀ nəniy, loʼo tiy ki zwe anə uwè niə̀ ùdzə̀m. Abu asə yiə̀ yìy kwuni bɛb doʼò nəniy, uwe niə̀ ùdzə̀m ù də an-a-ləm. 35Zəŋi tsə nə̀ kaʼì tə̀ wò kwu nəniy, à kə fə̂d dòʼò dzə̀ nə̀ wò kwu kələm. 36Abu uwe niə̀ ùdzə̀m u kwu nəniy kaʼì tìy, nə̀ ləm kiy way a bə̀d kə̀ liy kiy, uwe niə̀ ùdzə̀m ki mwaa yəə kaʼì tìy mwâ bə̀ azòŋə̀ wò.”
Yesù ə kwà aghě Falàsî nə̀ àghè tyi de ulàŋ wìy
(Matìyò 23.1-36; Mâk 12.38-40; Lukâs 20.45-47)
37Abù Yesù sì dzày mâ tsə nəniy ayiə yiy, wè Falàsî ù lìy ə nàm zù nə̀ we a ndaw nə̀ ghu zû nyi. U zù dòʼò tswi tsə a loʼo kə nyiə kiy. 38Idzwə i zwum yə̀ wè Falàsî wə̀ anə yiə yə ù kòʼ nəniy Yesù kaʼ yə̂ ìnyi yiy nə̀ ù kə̀ sûw àwo yiy anə yiə yə byiə kə aghě Dzû kìy dzîy nəniy. 39Mwe ə̀ Mbyi ə dyaŋi dzày yə̀ nə̀, “Gha aghee Falàsî mwàmə məli miy də yəə wù nì sùw bwaam tiy nə̀ ùkaŋ wiy abee, a kwuni bû anə fôŋ, ghà də nə̀ nə̀ dùw mə̀mwìy, də̀ sòʼò aghê bə̂bɛbə. 40Ghà lyaʼà ŋwò, à wày Kəzə̀ ù zəŋi nəniy ùwee niə̀ wìy nə̀ fòŋ yə̂ ə̀? 41Abu gha a mə̀ də ani nìy kə ufyiə wə ghà kwu nəniy tə̀ ghà nyiə̀ yə̂ awò aghe à la yiy, ayiə ghi àzəŋə yiy àdzə̀m a ki zwe anə asə ə Kə̀zə̀. 42Ndzòʼò ŋgoʼ yə ì lyimə nəniy gha aghee Falàsî yìy anə yiə yə Ghà nîy kə bə̀lə̀ fə̀mòʼ anə ubə̀d ùvəm anə ufyiə ùlyimə wə ghà faʼà nəniy, ghǎ nyə̀ yə̀ awò Zə̀kìy, nə̀ ndzòʼò mpfə̀ mə̀ ghà vələ̀, ghǎ kwuni twe ani saʼ koŋə yə̀ àyiə tsitsi, liə way Zə̀kìy soʼo. Ghà kwu ani zəŋə yəə ayiə yiə àdzə̀m nə̀ ghà nia səə way iyiə ìliy yiy. 43Ndzòʼo ŋgoʼ yə ì lyimə nəniy gha aghě Falàsî yìy, ghà toʼò liə tsə ani sii yə loʼo tə̀ soŋə̀ tìy ani dòʼò anə ndaw tə udzəŋə tə aghě Dzû, ghà zê kə anə bekivən ghǎ liə nə̀ aghê si tyoŋə zuw gha nyə̀ ghà nə̀ ŋkwiʼi miy. 44Ndzòʼò ŋgoʼ yə ì lyimə nəniy gha, ghà də kə yəə à də̀ isây yə̀ ghu də kə̀ tsəlì na nəway aghê màŋə̀ bwîy tsîy sòʼò nəniy ate nə̀ ghu kwu way ufyiə wə u fwây dòʼo nəniy ate.” 45Wù lìy, ù kə tyi dê ùlâŋ u Musîs wìy ə ŋwò dzày kə a we nə, “Àtyi dè, abu wò dzìy nəniy ayiə yiy ghii, wò ghî nyìʼà sòʼò ghə̀d.” 46Yesù ə bèlì kə a we nə, “Ndzòʼò ŋgoʼ yə ì lyimə nəniy gha, gha yə ghà tyi dê ùlâŋ wìy! Aŋwòə ghǎ byoʼò zòʼò tsə àghè nə̀ ùfyiə ù dələ wiy ghu də wày ani bòʼò, nə̀ gha soʼo ghà way ani twàm kòʼ dzə̀ ghu nə̀ wà kə̀wo â ghu ani bòʼò ùfyiə u ghè wə̀.” 47Ndzòʼò ŋgoʼ yə ì lyimə nəniy gha, anə yiə yə ghǎ bwamə dzwabə̀ sây tə aghě ntwùm ə̀ Kə̀zə̀ yə̀ nə̀ təli ghi a səsə kə wiy maʼà nəniy. 48I dê tsə nə̀ ghà bɛmə ŋwô nə̀ nə̀ təli ghi asəsə yə̀ kə fàʼ dzwàb ŋwò, yəə ghu wiy maʼà aghee ntwùm ə̀ Kə̀zə̀ yìy, ghà kwuni bwam kə sây tə ghà tə̀. 49À yù də̀ ighe Zə̀kìy dzây tsə anə utwabə we nə̀, “Mə kî twumə bə̀ àghě ntwum ə̀ Kə̀zə̀ nə̀ àghě ntwùm ə̀ Yesù yìy awò ghu, ghu ki wiy maʼà àliy yiy, ghu zəŋi nə̀ àliy yiy toʼò fii dzwàb tsə.” 50Ì yû dè tsə nə̀, ghu kî bəbə bə̀ kàŋ tə aghě ntwùm ə̀ Kə̀zə̀ àdzə̀m ghu kə wiy nəniy ghu anə wokə mbyi kə kaʼ bə̂ nəniy, kâŋ tə ghu Zə̀kìy nî bəbə bə̀ awò àghè yə̀ ghu də nəniy anə ŋə̀mə̀ tə̀ nyiə, ù nì nyə̀ ghu nə mfəm ate. 51Ani fukə bə̀ anə ipfə i Ebèl bù kwùm tsə anə ipfə i Zàkàliyà wə̀ ghu kə wiy nəniy we anə uzə u kətà nə̀ ndàw Kə̀zə̀. In dzây bə̂ â ghà nə̀, aghee ŋə̀mə̀ tə̀ nyiə, ghu nî fyaʼa ŋwò anə ayiə ghè yə̀ àdzə̀m. 52“Ndzòʼò ŋgoʼ yə ì lyimə nəniy gha, gha yə ghà tyi dê ulâŋ wìy! Aŋwòə ghà mə nìy nùw na ayiə àsoŋə̀ yə̀ a də nəniy yəə à də̌ dzwə̀ kə̀ ghu fukə nəniy ufə̀b u ndaw wiy ate ani zù kəli utwab u Kəzə̀ awò aghè à liy. Ghà taʼà nyiə yə̀ dzə̀ wày a loʼo kə Zə̀kìy saʼa nəniy ate, ghà fê dòʼò tsə nəniy anə dzəd nə̀ aghê liy kə bû tsìy nyi kwoʼ.” 53Abù Yesù ŋwò tsə nəniy awote, aghê tyi dee ulàŋ nə̀ àghě Falàsî yìy ə kaʼ yə̀ ani saʼ dzə̀ŋì nə̀ we, bəbə we nə̀ ndə̀mə̀ ndə̀mə̀ tə yiə tiy. 54Ghu khu tsə̀ dzəd ani bè kwi we abu ù bəlì bɛb kə iyiə ìliy yiy.
Valgt i Øjeblikket:
Lukâs 11: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
