Lukâs 10
10
Yesù ə twum fyi yə̀ tsə̀təndii tə we mə̀mvəm in sèmbe nə̀ ghe tiy ì bè
1Abù ì yû tsìy tsə nəniy, Mwe ə̀ Mbyi ə tiay fyi bə̀ tsə̀təndii tə we tə̀liy tiy mə̀mvəm insèmbe nə̀ ghe tiy ibè twum fyi yə̀ ghu àbe abè anə nàʼà tə̀, nə̀ anə lòʼo tə ù liə nəniy ani bwìy zù ate. 2U dzày yə̀ a ghu nə, “Ndə̀mə̀ ufyiə wiy biy dòʼò anə uswum, aghê kə fàʼ yìy dûw wày ani kpìy. Ghà bwoʼ yə̂ kə̀wo awò Mwe ə̀ mbyi à də nəniy we mwe ə̀ ùswum tə̀ ù twum fyi yə̀ aghee kəfàʼ ghu nyi kpîy bə̂. 3Zù nə nyiə, mə twumə yə̀ ghà yəə à də̀ awa təndzwù anə uzə ukəŋ. 4Kəə ghǎ nì nìy dzə̂ ùkhiy wiy, nə̀ wab kiy moo təgûw. Kəə ghǎ nì bòʼò tyimə fələ̀ ikwe yiy anə dzəd nə̀ ghà twoŋə suw tsə wù.” 5Abu ghà suki yə̂ a ndàw wù lìy, ghǎ dzày tsə ibvay dòʼò fə̀ a ndaw. 6Abu aghee ndaw ghà yə̀ də nəniy aghê àdzoŋə̀, ibvay yə̀ kî dòʼò nə̀ ghu, abu ghu kwuni də nəniy aghê àbɛbə yiy ibvay i ghi yə̀ ki bû dzwoŋi awò ghà. 7Kəə ghà nì bwiy kyabə tsə̂ dzə̂ ndaw tə ndaw, ghà doʼò yə̂ kə a ndaw imòʼ, ghà ki nyiə dzəŋə yəə, mwoə fwumə yə̀ sòʼo ùfyiə wə ghu nyiə̀ bə̂ awò ghà. Aŋwòə aghee kəfàʼà kwu ani kəli kənamə anə fàʼ kə ghu. 8Abu ghà zû nyi yə̂ kə anə inaʼ ì ghaa yiy, ghu ŋgwam na dzə̂ gha awote nyi nənìy ufyiə wə ùdzə̀m ghu kî nyiə̀ bə̂ awò ghà. 9Ghà zəŋi taw kə nənìy aghê àdzaŋə yə ghu də nəniy awo, ghà ə dzây yə̂ soʼò a ghu nə, “loʼo kə Zə̀kìy saʼa nəniy ate kə mə swəd.” 10A kwuni bû inaʼ yə i twe maʼà gha, ghà tsìy fyi twali yə̂ anə dzədlə tə ghu, ghà dzây yə̂ nə̀, 11“Ghee bwoʼ màʼà dzə̀ bvù kə inaʼ kəli kə anə awù ghələ, ani dè tsə nə̀ abu ntiə kiy bû nəniy kə bê awò ghu, Ghà namə dzìy yə̀ kə ŋwò nə̀ ghu ə kəli tsə nə̀ loʼo kə Zə̀kìy saʼa nəniy ate kə mə swəd.” 12Mə ndzəmə̀ dzìy bə̀ ŋwò ani bu a tsuk fə isaʼ Zə̀kìy nî ŋge dè mwuli kə̀ kwoʼo kiy azoŋə̀ àghě inaʼ i Sodòm yìy tsìy fyi aghee inaʼ ighè yə̀.
Mfəm yə ì də nəniy anə nàʼà tə̀ tə də kə̀ bɛmə nəway Zə̀kiy
(Matìyò 11.20-24)
13Ndzòʼò ŋgoʼ yə ì lyimə nəniy gha aghě Kòlàzin, nə̀ ghà aghě Bètsaydà yìy ì nì ŋge fyà ŋwò. Mali tə yiə tə mə kə zəŋi anə nàʼà təli bəə mə kə fə̀ zəŋə anə inaʼ i Taylè, nə̀ ìnaʼ i Sidòn yìy, təə aghee ghà yə̀ kə dzǐy kyemə̀ ŋwò fyiə bə̀ ŋwò anə bɛb tə ghu kwukwu nə̀ ghu mə dzə̀ŋì kə usâʼ u tə ndzwu wiy anə iwè, nə̀ ùdzə̀m wìy ghu mə kyili anə iwè, ani dè tsə nə̀ ghu ndzəmə̀ mwe ŋwò. 14Anə tsuk fə isaʼ Zə̀kìy nî dè mwuli kə̀ kwoʼo kiy awò aghee Taylì nə̀ aghee inaʼ i Sidòn yìy tsìy fyi gha. 15Gha soʼo aghee inaʼ i Kàpanùm! “Ghà moʼò nə̀ Zə̀kìy nî nìy kwoʼo ŋwò gha an-a-vələ ə̀? Hǎy! Zə̀kìy nî myìʼà ghà anə uvə̀lə̀ anə lòʼo kə aghê pfə zê dyòʼò nəniy ate.” 16U dyaŋi dzày tsə awò tsə̀təndii tə we tiy nə̀, “Wù wə̀ ù bɛmə ntwum yə awò ghà, ù ghî bɛmə sòʼò à miə̀. A kwuni bû wù wə̀ ù twe maʼa ntwum yə awò ghà, ù ghî twe màʼà mìə̀, twe màʼà sòʼò wù wə̀ ù twum nəniy miə.”
Tsə̀təndii tə Yesù mə̀vəm in sèmbe nə̀ ghe tiy ibè ə dzwoŋi bə̀
17Abù yəə tsə̀təndii tə we tə mə̀mvəm ìnsèmbe nə̀ ghe tiy ibè dzwoŋi bə̂, ghu ə dwoʼo təŋə ghi, ghu dzày yə̀ awò Yesù a we nə, “A Mwe ə̀ Mbyi, nsìy mə̀bɛbə̀ mìy tsəŋə dyaŋə sòʼò ghə̀d abu ghè twoŋə tsə izəd yiə̀ yìy.” 18U dzày yə̀ awò ghu nə̀, “Mə kə kòʼ Satàn bvwə̀ tswi bə̂ an-a-vələ yəə iwe nə̀ mwàa. 19Mə mə nyə̀ gha nə̀ daʼa kiy, ani dyemi màʼà tə̀ zwə nə̀ nàŋ tìy, nə̀ gha kəli sòʼò kə̀daʼa ghà tsîy tsə Satàn wə̀ ù dzwəə nəniy nə̀ ghà, fyiə kə̀ liy kiy way ani mwàm ghà. 20Kə̀ nənìy kwuni dwiʼi dzə̀ nə̀ nsìy mə̀bɛbə̀ mìy tsəŋə gha, ghà kwu ani dwiʼi aŋwòə azəd ghi twâ dòʼò an-a-vələ.”
Yesù ə dwiʼi
(Matìyò 11.25-27; 13.16-17)
21Anə sòŋə fə ghà fə̀ Yesù kwu kədwiʼi Zwàykə̀zwekiy zəŋi nəniy, u dzày tsə nə̀, “A təli wam mwe ə̀ kə̀vələ nə̀ mbvə̀dintsə kiy, mə nyiə̀ zòŋə̀ kiə̀ anə yiə yə wò nù na nəniy ayiə àsoŋə̀ awò àghù yə̀ ghu dziy ghu ŋge twabə ŋwò, dzìy sòʼò nə̀ ghu mə ŋge zwiʼi na ayiə anə utuw u ghu. Wò fə̀d dè yə̂ awò àghu yə̀ ghu na tsə iwee i ghu yiy yəə à də anîsə̂. A təli, à tsə̀m tsə wô ani zəŋi ghii. 22Təli wam mə nyə̀ mà ayiə adzə̀m anə awo yam. Wù lìy kwu dzwàb dzə̀ way Wa, à mày kə Təli. Wù lìy kwu dzwàb dzə̀ way Təli, à mày kə Wa, nə̀ aghù yə̀ Wa sày kə̀ ani dè nyə̀ fyi we awò ghu.” 23U nìyòŋì dzày tsə awò tsə̀təndii tə we tiy nə, “Zə̀kìy mə lwì gha, ghà koʼò àyiə yə ghà koʼò nəniy. 24Ndə̀mə̀ àghè ə ntwùm ə̀ Kə̀zə̀ nə̀ ndə̀mə̀ ùdòŋ maa ŋge dìy ani kòʼ ayiə yə ghà koʼò nə̀ ani zuw soʼò ayiə yə ghǎ zuw nəniy, ghu ə dìy kɛ̀ kə.”
Wè Sàmaliyà wə̀ ù kə kwu nəniy fòŋ ìdzoŋə̀ yìy
25Abù kə tsuk ù liy wù ù sòŋə̀ ù lìy wìy ù kə tyi dê tsə̂ ulâŋ u Musîs wìy ə bù təmi bə̀ ani mwàm kòʼ Yesù. U bəb yə̀ â Yesù nə̀, “A àtyi dè, mə də ani zəŋi mə̀yə ani kəli imuə̀ itsà ə?” 26Yesù ə bə̀lì kə we nə, “Wə̀ tyoŋə kòʼò nə̀ lâŋ kə Musîs kìy dzîy nə̀ìndiə? Wò zuw kyilə tsə nə̀ìndiə ate yə?” 27Wù wə̀ ə bə̀lì kə nə̀, “Kə dzîy nə̀, Wò kwu ani liə yə Mwe ə̀ Mbyi Zə̀ kiə̀ kìy, nə̀ fòŋ yiə̀ ìdzə̀m, nə̀ ìmùə̀ yiə̀ yìy ìdzə̀m, nə̀ daʼa kiə̀ kə̀dzə̀m, nə̀ ìmòʼ yiə̀ ìdzə̀m. Wò liə yə̂ soʼò àzwə̀ yəə wò liə nəniy uwee niə̀ wìy.” 28Yesù ə dzày yə̀ a we nə, “Wò mə dzày dzwàb, i faʼa yə aghi wò kî mùə̀!” 29Wù wə nam liə kə ani dè tsə nə̀ ghe də wè tsitsi, u bəb tsə â Yesù nə̀, “Àzə̀ wam ba də ndiə?” 30Ani bə̀lì kə we, Yesù ə dzày tsə anə fəzə̀zə̌ nə̀, “Wù inaʼ Dzû ù lìy kə ŋwò tsə a Yèlusalèm bwìy zê anə inaʼ i Dzèlikò, aghê à tsoŋə kwi tsə we anə dzəd bwad kwe yə̀ àfoŋ anə uwè, yəə ghu nə wiy maʼà dyaŋi we 31Wù ù lwaʼà ùlìy wìy ə dyaŋə zè bè sòʼò awo anə dzəd, abù ù bù kôʼ tsə wù wə̀ ù nə̀ŋì doʼò anə dzəd, u bwa tsìy yə̀ anə ukɛ̀ u dzəd ù liy wə. 32Wè kə̀fàʼ ndàw Kə̀zə̀ ù lìy wìy u kə fyi nəniy anə isəd i ndaw i Levì ə zù bù sòʼò, kòʼ tsə we, bwa tsìy yə̀ sòʼò i we yiy anə ukɛ̀ u dzəd. 33Wè ìnaʼ i Sàmaliyà#10.33 Aghee Sàmaliyà nə̀ àghě Dzû yìy kə dzwə tsə̀ anə i wè. ù lìy wìy ə zù bù kòʼ tsə we, mwuli kiy kwoʼ we azoŋə̀ wù wə̀. 34U koŋə yə̀ akə̀lə̀ we, kwe tsə utyiə anə afoŋ ə we baŋ na kə afoŋ yə̀. U bòʼò kwe kə we anə kə̀ndzàkâs, nìy zù nə̀ we anə lòʼo kə ghu kwu ani yèmì ate azoŋə̀ we. 35Abù tsutsu wə, wè ìnaʼ i Sàmaliyà wə̀ ə na tsə wù wə̀ awò wù wə̀ ù fàʼa anə lòʼo kə ghè kə̀, nyə̀ na tsə ukhiy nə̀ u si byaŋə yə wù ù dzâŋə̀ wə̀ ate, dzày na tsə nə, abu u swây, ghe kî bè tsəə ŋwò abu ghe kamə̀ bê nəniy fə.” 36Yesù ə bəb tsə nə̀, “À kə ba dè tsə ndiə nə̀ ghe də àzə̀ awò wù wə̀ aghê tsoŋə kə bwad kwe afoŋ azoŋə̀ we anə aghu yə̀ à tii ə?” 37Wù wə̀ ə bə̀lì kə nə̀, “À kə də wù wə̀ ù kə kwoʼ nə̀ mwuli kiy.” Yesù ə dyaŋi dzày yə̀ we nə, “Zù wò ki faʼa yə ighəd.”
Yesù ə zù twoŋə̀ zuw Matà we nə̀ Mə̀li
38Yesù nə̀ tsə̀təndii tə we tiy kə bwìy yə̀ ŋwò, ghu zù kwùm tsə anə naʼà fə̀liy fiy, Wìyəŋi ù lìy ghu kə tyoŋə we nə̀ à də̀ Matà ə nìy na tsə ghu a ndaw. 39Àzə̀ we ghu kə tyoŋə nə̀ a də Mə̀li ə zù bvuki dòʼò yə̀ a təŋə̀ Mwe ə̀ Mbyi zwulə kə àyiə yə ù tyi dê nəniy. 40Fòŋ ə nə̀k yə̀ Matà anə iyiə yə̀ ù zwukə ani kwê nə̀ noŋə we, u ba ŋwò kə zù akə̀lə̀ Yesù bəb tsə nə̀, “A Mwe ə̀ mbyi i dzwabə̀ kə ŋwò yəə àzə̀ wam, Mə̀li bû doʼò bə̂ a təŋə̀ wò, mə kwuni zwukə a ndaw ani kwè ə̀? Dzǎy yə we nə̀ ù bù fày kə miə ani kwè.” 41Mwe ə̀ Mbyi ə kwuni dzày yə̀ a we nə, “A Matà, wò màŋə̀ fyimə ùwe niə̀ kə̀ŋwô ŋwò! 42Iyiə ìdzoŋì də kə imòʼ i dzwâb tsîy nəniy, Mə̀li mə sày iyiə yə idzwâb tsîy nəniy, wù lìy wày soʼo ani bii ŋwò dzə̀ awò we.”
Valgt i Øjeblikket:
Lukâs 10: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
