Dzwan 8
8
Ghu kwi kə wìyəŋi ù kə bwîy nəniy mwàŋ tìy
1Abù aghê dzə̀mə ŋwô zù dzwoŋi nəniy anə ndaw tə ghu, Yesù kwuni ŋwò kwoʼ yə̀ anə ukàʼ u ŋkàʼ mə̀ Olìf. 2U ŋwò zù dzwoŋi a ndàw Kə̀zə̀ nə̀ zwù kə utsuk kiy. Aghê adzə̀m ə lwe dzə̀mə̀ dòʼò tsìy yə̀ akə̀lə̀ we. U dòʼò tswi tsə, kaʼ yə̀ ani tyi dè àyiə awò ghu. 3Aghê tyiə dê ulàŋ wìy nə̀ àghě Falàsî yiy ə nìy bù nə̀ wìyəŋi ùlìy wìy ghu kə kwi nəniy we nə̀ wìŋəmə̀ ùlìy wìy nə̀ à wày dzə ŋə̀mə̀ we, ghu bù təmi na bə̂ we anə səkə ŋwàâ kə ghù kə̀. 4Ghu dzìy awò Yesù a we nə, “A àtyi dè, ghè kwi wìyəŋi wə̀ ù nəŋì nəniy nə̀ wìŋəmə̀ nə̀ à wày dzə ŋə̀mə̀ we. 5Lâŋ kə Musîs kìy kə dzìy nə̀ wìyəŋi wə̀ ù zəŋi nəniy ndzòʼò àyiə yə, a kpe ani təm wiy màʼà we nə̀ àtay yiy. Wò dzìy nə̀ a zəŋi mə̀yə nə̀ we?” 6Ghu kə àyiə yə ghii bəbə ani bè kwi Yesù, ani kəli tsə kəbwôʼ ani dzày nə̀ ù mə zəŋi bɛb iyiə yiy. Yesù kwuni zòʼ tswi tsə kaʼ ani twà àyiə a mbvə̀dintsə nə̀ wà kə̀wo.
7Yəə ghu sî tsə̂ŋ kwu kə ani bəb ayiə â we, u ŋwò təmi kə idoŋ dzày tsə a ghu nə, “Wù wə̀ ù kwu nəniy nə̀ ghe kamə zəŋi kôʼ ìbɛb yiy anə uzə ghii, ù nìy kə itay ù təm yə̂ wìyəŋi wə̀ ate isə.” 8U kàm zòʼ tswi tsə, kaʼ dzwoŋi yə̀ ani twà àyiə a mbvə̀dintsə. 9Abù ghu zuw tsə nəniy ayiə yə, ghu kaʼ kə ani ŋwò fə̀moʼ fəmòʼ. Inɛmə yə ŋwò yə̀ isəə. Abù ghu ŋwô mâ tsə nəniy, à dòʼò səə tsə kə Yesù nə̀ wìyəŋi wə̀ awote ù təmi doʼò nəniy. 10Yesù ə ŋwò təmi kə idoŋ dzày yə̀ awò wìyə̀ŋi wə̀ a we nə, “A niə̀ wə̀, ghu də yiə, wè lìy kə̀ saʼ wiy nə way wô ə̀?”
11Wìyəŋi wə̀ bə̀lì kə a we nə̀, “A Mwe, wè lìy kə̀ saʼ wiy dzə̂ miə.”
Yesù dzày tsə a we nə̀, “Yəə i də nəniy ghii, mə saʼa wiy sòʼò wày wô, zǔ ŋwòə. Kə̀ kâm zəŋi ayiə àbɛbə yiy.”
Yesù də̀ kaʼì tə aghě mbyi
12Yesù ə dzày fwuli yə̀ awò àghě Falàsî a ghu nə̀ “Mə də kaʼì tə aghě mbyi, wù wə̀ ù kî dzwùmə̀ nəniy miə, ù kì bwìy kòʼ dzə̀ wày an-a-ləm. Ù kì kwunə kyilə kàʼì tə̀ tə nyiə̀ nəniy nə̀ ìmùə̀ yìy.”
13Aghee Falàsî yìy dzìy a we nə̀, “À də̀ təŋ kə wô wò dzìy nəniy ayiə uwè niə̀ wìy. Ayiə yə wò dzìy soʼò, à wày dzə ayiə àsoŋə̀ yìy.”
14Yesù ə bə̀lì kə a ghu nə, “Abu mə boʼò dzìy kə ayiə uwè yam yiy, ayiə yə mə dzîy, à də̌ àsoŋə̀ yìy. Mə kwu ŋwô loʼo kə mə ŋwô bə̂ nəniy ate, kwu sòʼò loʼo kə mə zê ate. Ghà kwuni kwu way loʼo kə mə ŋwô bə̂ ate, nə̀ lòʼò kə mə zê nəniy ate. 15Ghà saʼa yəə à də̀ aghee mbyi, mə kwuni saʼa dzə̀ wày yəə à də̀ aghee mbyi. 16Abu mə saʼa nəniy wù, isaʼ yam yiy mə də ìsoŋə̀ yìy aŋwòə mə kî saʼ dzə̀ wày nə̀ noŋə̀ miə̀. Təli wə̀ ù twum nəniy miə, ù də̀ fwumi nə̀ mìə̀. 17I twâ dòʼò anə ulàŋ ghi nə̀ abù aghê bè dzîy kə nəniy iyiə ìmoʼo yiy, i bê byemə fwumə, à ki də nə̀ ayiə ghu à dzîy yiy də àsoŋə̀ yìy. 18Mə dzîy nyə̀ ìdzwə yam, Təli wə ù twum nəniy miə, ù də̀ sòʼò wù lìy ù dzìy nyiə̀ nəniy ìdzwə yam yiy.”
19Ghu bəb a we nə, “Təli yiə̀ də̀ yə?”
Yesù mee a ghu nə, “Ghà kwu way miə, kwu sòʼò way Təli wam. Bəə ghà mə̀ kwu nəniy miə, gha mə kwu soʼo Təli wam.”
20Yesù kə àyiə yə̀ dzày anə soŋə fə ù kə tyi dê àyiə yiy a ndàw Kə̀zə̀, anə idzwə i ndaw yə ghu kə nia tsə̂ nəniy ŋkaŋə m-à-zə̀ mìy ate. Wè lìy kə kə̀ kwi soʼò nəway we, aŋwòə soŋə fə we fi kə kamə kə̀ kpe dzə̂.
Yesù dzày yə̀ a ghu nə̀ ghà way ani zù dzə̀ anə lòʼo kə mə zê nəniy ate
21Yesù ə dzày fwuli tsə a ghu nə̀, “Mə kî ŋwô yə̀ ŋwò, ghà ki khu miə̀ kwuni kòʼò wày, ghà ki pfə soʼò anə ayiə ghi àbɛbə yə ghà zəŋə nəniy. Ghà kî wày dzə ani zù anə lòʼò kə mə zê nəniy ate.”
22Ŋgəd tə ghě Dzû tìy ə bəbə tsə̀ anə iwè nə̀, “Ù dzìy ŋgà way dzə ani zù anə lòʼo kə ù zè nəniy ate, ù liə ani wiy màʼà ùwee u we ə̀?”
23Yesù ə bə̀lì kə a ghu nə, “Ghà də aghee mbyi, a kwuni bû miə, mə ŋwô bə̀ idoŋ. Ghà də aghee mbyi mə kwuni wày dzə wè mbyi yə. 24À də̀ ighe mə mə̀ dzîy nəniy awò ghà nə̀ ghà nî pfə anə ayiə àbɛbə yə ghà zəŋə. Abu ghà də kə̀ bɛmə nəway nə̀, ‘Mə Də Wù wə̀ Mə dzîy nə̀ mə Də We.’ ”
25Ghu bəb a we nə, “Wò də̌ ndiə?”
Yesù ə bə̀lì kə a ghu nə, “Mə də wù wə̀ mə mə̀ bòʼ dzày nəniy awò ghà nə̀ mə də we. 26Mə kwu ndə̀mə̀ àyiə ani dzày kwùmə̀ bə̀ nə̀ ghà, kwu sòʼo ndə̀mə̀ àyiə ani saʼ wiy gha ate. Wù wə̀ ù twum nəniy miə, à də̌ wù wə̀ ù dzìy nəniy ayiə àsoŋə̀ yìy. Mə dzîy yə̀ kə ìyiə yə mə zuw sòʼò awò we.”
27Ghu kə kə̀ zuw kəli nəway ayiə yə Yesù kə dzîy â ghu. Ghu kə kə̀ zuw kəli dzə̂ nə̀ ù kə ghii dzìy kwùmə̀ yə̀ nə̀ Tè we. 28Yesù ə tsìy yə̀ kə nə̀ sə kiy ani dzày a ghu nə, “Ani bu ghà nî nìy na fyi kə Wà wù idoŋ, ghà ni dyaŋi kəli fyi kə nə̀ ‘Mə Də Wù Wə̀ Mə dzîy nəniy nə̀ me Də We.’ Ghà ni dyaŋi kəli tsə soʼò nə̀, ‘Mə zəŋə dzə̀ wày iyiə ìliy yiy anə daʼa kam. Mə kwuni dzìy kə ìyiə yə Tà dzày nəniy nə̀ mə dzây.’ 29Wù wə̀ ù twum nəniy miə, ù də̌ nə̀ miə̀. Me taw zəŋə tsə̀ ayiə yə a zəŋə nəniy nə̀ ù si dyoʼo. Ù nì nyəli myìʼà kòʼ wày miə.”
30Abù Yesù dzày mâ tsə nəniy ayiə yə, ndə̀mə̀ àghù yə̀ ghu kə zuw ayiə yə ù dzày nəniy, ghu bɛmə â we.
Iyiə ìsoŋə̀ yìy kî bii fyiə ŋwò gha
31Yesù kə dzày tsə awò aghù yə̀ ghu kə bɛmə nəniy a ghu nə̀, “Abu ghà tsəŋə̀ zəŋə yə̂ ayiə yə mə tyiə dê nəniy awò ghà, à ki də nə̀ ghà ndzə̂m də̌ tsə̀təndii tam; 32ghà ki dyaŋi kəli tsə iyiə yə i də nəniy ìsoŋə̀ yìy. Iyiə yə i də nəniy ìsoŋə̀ yìy ki bii fyi kə soʼò ghà.”
33Ghu bə̀lì kə a we nə, “Ghè də awi wa Ablàhâm. Ghè kamə doʼò kôʼ soʼò ukwə̂d wìy â wè lìy. Wò myìŋə ani dzày nə̀ indiə ani dzày nə̀ ghu kî bii fyiə ŋwò ghəd ə?”
34Yesù ə bə̀lì kə a ghu nə, “Mə ndzəmə̀ dzìy bə̀ ŋwò â ghà nə̀ wù wə̀ ù zəŋə nəniy ayiə àbɛbə yiy, ù də kəkwə̂d awò ìbɛb yiy. 35Wà ìsəd i ndaw yiy də wè ìsəd i ndaw anə nsoŋə in dzə̀m. Kwə̂d kìy kwuni mùə̀ dyòʼò təŋə dzə̀ wày anə isəd i ndaw ìliy yiy, anə nsòŋə̀ in dzə̀m. 36I dê tsə nə̀, abu Wà Wù bii fyi tsə nəniy wô, a də̌ nə̀ ghu mə ndzə̀m bii fyi wô. 37Mə kwu ŋwô nə̀ ghà də awi wa Ablàhâm. Ghà kwuni khu dzəd ani kwi wiy màʼà mìə̀, aŋwòə ghà liə way ani bɛmə ayiə yə mə tyi dzîy nəniy awò ghà. 38Ayiə yə mə dzîy nəniy â ghà, à də̀ ayiə yə Təli wam dê nəniy awò mìə̀. Ghà kwuni fələ̀ zəŋi yə̂ kə ayiə yə təli ghi dzîy nəniy awò ghà.”
39Ghu bə̀lì yə̀ a we nə̀, “Təli ghələ də Ablàhâm.”
Yesù ə bə̀lì dzwoŋi yə̀ a ghu nə, “Abu ghǎ mə ndzə̀m də nəniy awiwa Ablàhâm mə̀, ghà mə zəŋə yə ndzòʼò à yiə yə Ablàhâm kə zəŋə nəniy. 40Ghà fələ̀ khu dzəd ani wiy màʼà mìə̀ anə ayiə àsoŋə̀ yə̀ mə dzîy nəniy awò ghà, nə̀ mə zuw bə̀ â Zə̀kìy. Ablàhâm kə kə̀ zəŋi dzə̂ ndzòʼò àyiə yə ghà zəŋə nəniy. 41Ghà zəŋə àyiə yə təli ghii zəŋə nəniy.”
Ghu bə̀lì kə a we nə, “À mày kə Kəzə̀ nə̀ ùwe u we wiy ù də nəniy təli ghələ, ghè ndzə̂m də̀ sòʼò awa we.”
42Yesù mee a ghu nə, “Bəə Zə̀kiy mə̀ ndzə̂m də nəniy təli ghi, ghǎ mə liə miə, aŋwòə mə ŋwô bə̀ akə̀lə̀ Kə̀zə̀, mə də nyiə fə anə mbyi. Mə kə̀ bû dzə̂ fəə anə daʼa kam. À twum bə̀ we miə. 43À də̌ kìə̀ ghà də zuw kyilə way miə ə? Ghà liə way ani zuw kəli miə, aŋwòə ghà twe ani zuw ntwum yə mə niʼà nəniy awò ghà. 44Ghà də awa Satàn, tyoŋə təli ghi. Ghà liə sòʼò ani fàʼ fàʼ kə̀ təli ghi liə nəniy. Ani kaʼ bə̀, ù kə də̌ wù wə̀ ù kə wiy tsə̂ aghû yìy. U twe màʼà sòʼò ani zuw ayiə àsoŋə̀ yìy, aŋwòə ù kwu way iyiə ìsòŋə̀. Abu ù guw tsə nəniy, a də̌ nə̀ ù ghii dzə̀ŋə̀ ìdzə̀ŋi inaʼ i we aŋwòə ù də̌ wù ù gûw wìy, də̀ sòʼo tè àyiə àguw yiy àdzə̀m. 45Ayiə yə àdzə̀m mə dzây nəniy â ghà à də̀ ayiə àsoŋə̀ yìy. Ghà nam twe ani bɛmə â mìə̀. 46À də̌ ndiə anə uzə ghi ù də ani dè bə̀ nə̀ mə mə zəŋi iyiə ìbɛbə yiy ə? Bəə à də̀ nə̀ mə dzîy àyiə àsoŋə̀ yìy, à də̌ kìə̀ ghà də byemə way â mìə̀ ə? 47Wù wə̀ ù ŋwò bə̂ nəniy â Zə̀kìy, ù kwu ani zuw ayiə yə Zə̀kìy dzîy. Ghà kwuni twe ani zuw aŋwòə ghǎ kə̀ ŋwô bə̂ dzə̂ awò Zə̀kìy.”
 ghu ani byi Ablàhâm, Yesù kə də̀ ŋwô
48Aghee Dzû yiy bəb yə̀ â Yesù a we nə, “Ghè kə wày tsitsi anə yiə yə ghè kə dzîy nəniy nə̀ wò də̌ wè Sàmaliyà, kwu sòʼo usîy ù bɛbə wiy anə uwè ə̀?”
49Yesù ə bə̀lì kə a ghu nə, “Usîy ùbɛbə wiy way dzə azoŋə̀ mìə̀. Mə nyə̀ mə̀ŋkwiʼi â təli wam, ghà də kwuni nyə̀ wày miə nə̀ ŋkwiʼi miy. 50Mə dzîy dzə̀ wày nə̀ aghê nyiə̀ mìə̀ nə̀ ŋkwiʼi miy. Wù lìy kwuni də̀ ŋwǒ ù liə nəniy nə̀ aghê si nyiə̀ we nə̀ ŋkwiʼi miy. À də̌ we ù saʼa nəniy tsitsi. 51Mə ndzəmə̀ dzìy bə̀ â ghà nə̀, abu à də kə ndiə, ù zəŋə nəniy ayiə yə mə tyi dê nəniy, ù nì pfə kòʼ wày.”
52Ghu mee a we nə, “Ghè ndzə̂m kwu ŋwǒ nyiə nə̀ usîy ù bɛbə wiy də azoŋə̀ wò! Ablàhâm maa pfə, aghee ntwùm ə̀ Kə̀zə̀ ə̀ pfə, wò fə̀dlə̀ namə dzîy kə nə̀ wù wə̀ ù zəŋə nəniy ayiə yə wò tyi dê nəniy, ù nì pfə kòʼ way. 53Abu təli ghələ Ablàhâm kə də nəniy ani pfə, aghee ntwùm ə̀ Kə̀zə̀ ə pfə sòʼò, wò mòʼò nə̀ wò də̌ ndiə?”
54Yesù ə bə̀lì kə a ghu nə, “Bəə à də nə̀ mə kwoʼo ùwe nam, ŋkwiʼi mə̀ ghè mə̀ mə̀ dzǐy kwu way fàʼ kìy. Təli wam wə ghà kwoʼo iwe yiy nyiə nə̀ ù də̌ Zə̀ kəli, à də̌ we ù kwoʼo nəniy miə. 55Ghà kwu dzə̀ way we. Mə kwuni kwu ŋwô we. Bəə mə dziy nə̀ mə kwu way we, Mə mə də wù ù gûw wìy yəə à də̀ gha. Mə kwuni kwu ŋwô we, zuw sòʼò ayiə we à dziy yiy. 56Təli ghi, Ablàhâm kə dyoʼo ŋwò nə̀ ghe kî kòʼò ŋwò miə, anə sòŋə fə mə kə bê nəniy. U kòʼ tsə miə dwiʼi.”
57Ghu dzày yə̀ a we nə, “Wò kamə bôʼ kpe vəm mə̀ tə̀ŋə̀mə̀ mìy ìntà, wò kə kaʼ mə̀yə ani kòʼ Ablàhâm ə?”
58Yesù ə dzày yə̀ a ghu nə, “Mə ndzəmə̀ dzìy bə̀ ŋwò â ghà, â ghu ani byi Ablàhâm, à kə də̌ nə̀ Mə Də ŋwoə̀!”
59Ghu tswi kwumi kə atay ani təm wiy we ate. Yesù nù dòʼò tsə, ŋwò nìyòŋì tu ŋwò fyi dyaŋi a ndàw Kə̀zə̀.
Valgt i Øjeblikket:
Dzwan 8: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
