Dzwan 13
13
Yesù ə sùw ìfwe i tsə̀təndii tə we
1À kə buw səə kə ntsuk fəmòʼ awò ntsuk fə inyi fə ŋkàmə̀tâzaʼà mìy ani kpe. Yesù kə kwu ŋwò nə̀ soŋə fiy mə kpe awò ìghe ani nyəli màʼà mbyi, tə̀ ù ŋwò zù akə̀lə̀ Tè mbyi. U kə tsə̀ŋ kwu iliə awò aghù yə̀ ghu kə bɛmə nəniy â we zù kwùm soŋə fə ù kə pfə nəniy ate.
2Awò soŋə fə̀ nyiə fiy ani kpe nə̀ nyiŋkwubì tìy, a də̌ nə̀ àmbvə̂ntsə mâ zəŋi Dzudàs, wà Simùn Ìsə̀kalòt, nə̀ ù kaʼ ani mòʼ, nə̀ ghe kî fyè fyiə ŋwò Yesù. 3Yesù kə kwu ŋwô nə̀ Tè mbyi mə nyə̀ na mà we nə̀ daʼa kiy anə ufyiə udzə̀m. U kwu sòʼo nə̀ ghe kə ŋwò bə̀ awò Zə̀kìy, kwu sòʼò nə̀ ghe kî ŋwò zè dzwəŋə awò Zə̀kìy. 4Yəə i kə də nəniy aghii, u ŋwò kə anə lòʼo kə̀ nyiə̀ kə, tsoʼ ŋwò kə sàŋ ə̀ we, na tsə kə ndzu tə fôŋ tə̀. U nìy kə bə̂d kə ndzu kə̀ zələ kə uwè kìy, nìy nəm nyi yə̀ anə isəd. 5U tsuw kwe fyi bə̀ mwi anə kaŋ kə̀ zuw kə uwè kìy, kaʼ yə̀ ani sùw ìfwe i tsə̀təndii tə we ate, zə̀d myàʼà tsə anə bə̀d kə ndzu kə ù kə kwû kəli nəniy anə isəd. 6Abù ù bù nəniy akə̀lə̀ Simùn Pità, Simùn Pità ə bəb yə̀ a we nə, “A Mwe ə̀ mbyi, wò dzìi sûw ì fwe yam ə̀?”
7Yesù ə bə̀lì kə a we nə, “Wò kam kwu dzə̀ way fyiə kə mə zəŋə nyiə, wò kì wòə̀ kyilə ŋwò.”
8Pità mee a we nə, “Wò nì sùw kòʼ dzə̀ wày ifwe yam yiy!”
Yesù mee a we nə, “Abu mə də kə̀ sûw nəway ifwe yiə yìy, wò kì kàm dòʼò dzə̀ way tsə̀ndii wam.”
9Pità mee a we nə, “A Mwe ə̀ mbyi, kə̀ kaʼi sùw dzə̀ ifwe yam yiy, Suw kə awo yam mə, wò sûw kə soʼò tuw kam.”
10Yesù ə̀ bə̀lì kə a we nə, “Aghû yə̀ ghu sûw dzə̂ ìwe yiy, ghu kwu kə ani sùw kə kə ìfwe i ghu, aŋwòə iwe ighu yiy ìdzə̀m zwe ŋwò. À də̀ kə wù ùmòʼ anə uzə ghii ù dzəə nəniy, gha à liy yə àdzə̀m, ghà zwe ŋwò.” 11Yesù kə kwu ŋwǒ wù wə̀ ù kə liə ani fè fyi we. À də̀ ighe ù kə dzây tsə nəniy nə̀, “À də̀ kə wù ùmòʼ anə uzə ghii ù dzəə nəniy, gha à liy yə àdzə̀m, ghà zwe ŋwò.”
12Abù Yesù sùw mà tsə nəniy ifwe i ghu yiy, u nìy dzə̀ŋì dzwoŋi tsə sàŋ ə̀ we, zù dzwoŋi a lòʼo kə̀ nyiə kiy. U bəb tsə a ghu nə, “Ghà kôʼ kəli ŋwô imyiŋì yə̀ i də nəniy anə ayiə yə mə zəŋi awò ghà ə̀? 13Ghà twoŋə dzwàbə̀ ŋwò miə nə̀ à də̌ Àtyi dè, twoŋə dzwàbə̀ sòʼò nə̀ à də̀ Mwe ə̀ mbyi. I də ŋwô tsitsi â ghà ani toŋə miə ghii aŋwòə mə də Àtyi dè, də̀ sòʼò Mwe ə̀ mbyi. 14Yəə, miə, Àtyi dè ghəli nə̀ Mwe ə̀ mbyi ghəli, mə sûw tsə nəniy ifwe ghəli yiy, ghà kwu ani sùw sòʼò ìfwe i ghè liy yiy. 15Mə mə dè na bə̀ tsəe kiy â ghà, tə̀ ghà ki bvami zəŋə yə kə ayiə yə mə zəŋi awò ghà. 16Mə ndzəmə̀ dzìy bə̀ ŋwò â ghà nə̀, Aghee kəfàʼ yǐy kə̀ tsîy fyi dzə̂ nəway Mwe ə̀ kə̀fàʼ, aghee ntwum ə kə̀ tsîy fyi dzəə wù wə̀ ù twum nəniy ghu. 17Anə yiə yə ghà kwu nəniy ayiə àsoŋə̀ yə̀, Zə̀kìy kî lwì ghà abu ghà zəŋə yə̂ nəniy ayiə ghè yə̀!
18Mə dzîy dzə̀ wày gha dzə̀m. Mə kwu ŋwô aghû yə̀ mə sây na nəniy. I kwuni də̀ kə nə̀ iyiə yə i twâ dòʼò nəniy anə ŋwàʼà k-a-zə̀ nə̀, ‘Wu wə̀ ù kə nyi dzəŋi kə nə̀ mìə̀, ù nyə̀ dzwə nə̀ mìə̀,’ i kwu ani bù fyi ìsoŋə̀ yìy. 19Mə dzîy bə̀ ìyiə yə nyiə awò ghà nə̀ i kamə kə̀ fyi nəway, tə̀ a ki bu i fyi kə nəniy, ghà ki bɛmə kə nə̀ mə də wù wə̀ mə də nəniy we. 20Mə ndzəmə̀ dzìy bə̀ ŋwò â ghà nə̀ wù wə̀ ù nì ŋgwam na nəniy wù ùmòʼ anə ghù yə̀ mə twum fyi nəniy, ù ghii ŋgwam na miə. Wù wə̀ ù nìy ŋgwam na nəniy miə, ù ghî ŋgwam na wù wə̀ ù twum fyi nəniy miə.”
Yesù ə dzày na zìy bə̀ fyiə kə kə kî fyiə nə̀ we
(Matìyò 26.20-25; Mâk 14.17-21; Lukâs 22.21-23)
21Yəə Yesù dzày mà tsə nəniy ayiə yə ghii, fòŋ ə kaʼ yə̀ we ani byòŋì. Ù mee â tsə̀təndii tə we tiy a ghu nə, “Mə ndzəmə̀ dzìy bə̀ ŋwò â ghà nə̀ wù ùmòʼ anə uzə ghii ù kì fyè fyiə ŋwò miə.”
22Tsə̀təndii tə Yesù tə̀ ə wày ani kaw kəli fyi kə wù wə̀ Yesù kə myiŋə̀ nəniy. Ghu kaʼ yə̀ ani liay tsìy kyabi tsə̀ ìwee. 23Tsə̀ndii i mòʼ, kə də̀ a kə̀lə̀ Yesù twoŋə tsə̀ndii yə Yesù kə liə nəniy. 24Simùn Pità ə fòʼ kə kəwo â we dzìy a we nə, “Bəb yə a we nə̀ ù myìŋə̀ ndìə̀.”
25Yəə tsə̀ndii yə̀ zuw tsə nəniy ghii, u soŋ koŋə mà yə̀ akə̀lə̀ Yesù, bəb tsə a we nə, “A Mwe ə̀ Mbyi, à də̌ ndiə?”
26Yesù ə bə̀lì kə a we nə, “À dəə wù wə̀ mə kî tsùw kə nəniy bakiy anə ŋəmə, mə nyiə̀ yə̂ â we.” Yəə ù dzày tsə nəniy ghi, u dyaŋi tsùw kə kəba anə ŋəmə, nyə̀ yə̀ â Dzudà wə̀ tè we kə də nəniy Simùn Ìsə̀kalòt. 27Abù Dzudà nìy yə̂ nəniy ba kə ghà kə̀, Satàn ə kəli tsə kədaʼa azoŋə̀ we. Yesù mee a we nə, “Zə̀àŋi tsə nə̀ wokiy ani zəŋi ayiə yə wə̀ kwu nəniy ani zəŋə!” 28Wù lìy kə kə̀ zuw kəli dzə̂ anə ghù yə̀ àdzə̀m ghu kə də nəniy a lòʼo kə̀ nyiə kiy nə̀ Yesù kə ghii dzày iyî kìə̀ àwo we ə. 29Yəə Dzudà kə də nəniy wù wə̀ ù kə nia nəniy mbè kə ukhiy kiy, tsə̀təndii tə Yesù tə̀ liy tiy mòʼò kə nə̀ Yesù dzìy a we nə̀ ù zù zwe bə̀ ùfyiə u inyi yə i kə də nəniy, moo nə̀ ù zù nyə̀ fyiə kə̀liy kiy awò àghè la yiy.
30Dzudà ə nìy yə̀ ba kə Yesù nyə̀ nəniy â we, dyaŋi ŋwò fyi. À kə də̌ nə̀ ntsukə tiy.
Yesù ə tsə̀ày tsə kəlâŋ anə iyiə ìfyiə yiy
31Abù Dzudà ŋwò fyi yəə nəniy, Yesù ə dzày tsə nə̀, “Anə fə kə̀mə̀ Zə̀kìy dê ndzòʼò ŋkwiʼi mə Wà Wù kwu nəniy. Wà Wù kî zəŋi tsə nə̀ aghê kôʼ kəli tsə nə̀ Zə̀kìy də wù sòŋə̀ wìy. 32Abu Wà Wù kì zəŋi tsə nə̀ aghê kôʼ kəli tsə nə̀ Zə̀kìy də wù sòŋə̀ wìy,#13.32 Ùŋwàʼà ù liy wiy kwu dzə̀ way kə̂m kə̀. Zə̀kìy ki zəŋi tsə nə̀ ùwee u we wiy nə̀ aghê kôʼ kəli tsə nə̀ Wà Wù də̌ wù sòŋə̀ wìy. Zə̀kìy kwu ani zə̀àŋì dè nyə̀ nə̀ Wà Wù də̌ wù sòŋə̀ wìy. 33Aghû yamə, mə kâm kwu dzə̀ way ghab kiy ani dòʼò nə̀ ghà. Ghà ki kaw miə, ghà ki də kwuni kòʼò wày miə. Mə dzîy bə̀ â ghà nə̀ ayiə yə mə kə dzây nəniy awò aghě Dzû à nê yìy a ghu nə̀, ‘Ghà way dzə ani zù a lòʼo kə mə zê nəniy.’ 34Mə tsəà bə̀ làŋ kə̀ fiə kiy awò ghà nə̀, Ghà kwu ani liə tyili yə̀ ìwee nəli anə ndzòʼò yiə yə mə liə nəniy gha ate. 35Abu ghà liə tyili nəniy iwe nəli yiy, aghê dzə̀mə̀ ki kəli tsə nə̀ ghà də tsə̀təndii tam.”
Yesù ə dzày na zìì bə̀ nə̀ Pità kì twe ŋwǒ we
(Matìyò 26.31-35; Mâk 14.27-31; Lukâs 22.31-34)
36Simùn Pità ə bəb yə̀ a we nə, “A Mwe ə̀ Mbyi, wò zè yə̀?”
Yesù ə bə̀lì kə a we nə, “Wò wày dzə ani dzwùmì dzə̀ mìə̀ a lòʼo kə mə zê nəniy, wò kì kwuni wòə̀ dzwùmə̀ bə̀ ŋwò miə.”
37Pità ə bəb yə̀ a we nə, “A Mwe ə̀ Mbyi, à twe kìə̀ nə̀ mə kə dzwumì bə̀ wô nyiə ə? Mə kî pfə ŋwò anə iyiə yiə̀.”
38Yesù ə bəb yə̀ a we nə, “Wò dzìy nə̀ wò kì pfə anə tuw kam? Mə ndzəmə̀ dzìy bə̀ ŋwò â wò nə̀ awò mwaʼkiy ani twuŋ, à ki də nə̀ wò mə dzày fyi sòŋə inti nə̀ wò kwu dzə̀ way miə.”
Valgt i Øjeblikket:
Dzwan 13: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
