Dzwan 11

Ipfə i Lazalùs

1Wù liy kə də̀ tsə̀ kə ŋwô, ghu kə twoŋə nəniy we nə̀ à də̀ Lazalùs, ù kə muə̀ a Betanì, u kaʼ tsə ani dzàŋ. Betanì kə də̀ inaʼ yə Mə̀li nə̀ àzə̀ we Matà ghu kə muə nəniy ate. 2(Mə̀li də wìyəŋi wə̀ ù kə kyili nəniy mbvu mə̀ lyimə̀ mìy anə awèe Mwe ə̀ mbyi, Yesù, zə̀d maʼà kə anə ŋwù t-a-tuw tə we. Lazalùs wə̀ ù kə dzàŋə̀ nəniy, ù kə də̌ àzə̀ we.) 3Awizə̂ ə Lazalùs iyəŋi nàʼà yə̀ â Yesù a we nə, “A Mwe ə̀ mbyi, fwu yiə̀ wə̀, wò ŋge liə nəniy we, ù dzàŋə̀ ŋwò.”

4Abù Yesù zuw tsə nəniy ayiə ghè yə̀ ghii, u dzày tsə nə̀, “Idzâŋ yə̀ kì wiy màʼà dzə̀ wày Lazalùs. I dzâŋ yə̀ də̀ ani zəŋi tsə nə̀ aghê kəli tsə nə̀ Zə̀kìy də wù ùsòŋə̀ wìy. À də̀ sòʼo dzəd yə aghê kî kyilə nəniy ndzòʼò daʼa kə Wà Kə̀zə̀ kwu nəniy.”

5Yesù kə ŋge liə Matà, nə̀ àzə̀ ə̀ we ùyəŋi nə̀ Lazalùs. 6Yəə Yesù zuw tsə nəniy nə̀ Lazalùs dzàŋə̀ ŋwò, ù nam dòʼò tsə ntsukə imbè awote anə lòʼo kə ù kə də nəniy ate. 7U dyaŋi dzày tsə awò tsə̀təndii tə we tiy a ghu nə, “Ŋgà ə zû dzwoŋi a Dzùdiyà.”

8Tsə̀təndii tə we tiy dzày yə̀ a we nə, “Sa kiy kamə bvu tsə dzə̂ anə yiə yə aghee ghè yə̀ awote kə liə nəniy ani təm wiy màʼà wò nə̀ àtay yiy, wò nam liə kə ani zù dzwoŋi awote ə?”

9Yesù ə bə̀lì kə ghu nə̀, “Ghab kə asə ə̀ zwe kiy we kwu fwa tə iwùŋ ìvəm nə̀ ghe tiy ibè ə? Aghù yə̀ ghu bwîy nəniy anə soŋə fə asə ə̀ zwe gha yə̀, ghu way dzə ani tyàŋì bvə̀, aŋwòə ghu koʼò ŋwò yə asə yiy zwee nəniy ate. 10Abu aghê kwuni bwîy nəniy nə̀ ntsukə tiy, ghu kiy tyaŋì bvə̂, aŋwòə asə ə zwe way dzə.” 11Yesù ə dzày tsə ayiə yə ghii, kwe fwuli tsə ate nə̀, “Wè fə̀lə̀ ŋgàŋ Lazalùs màŋə̀ bvunə ŋwò, mə kwu ani zù zɛ̀m ŋwò kə we idoŋ.”

12Tsə̀təndii tə Yesù tiy bə̀lì kə a we nə, “A Mwe ə̀ mbyi, abu à də nə̀ ù bvunə ŋwò, i dê tsə nə̀ ù ki taw ŋwò.”

13Mbwuni tə Yesù kə dzîy nəniy nə̀ Lazalùs bvunə ŋwò u kə ba dzìy nə̀ Lazalùs mə pfə, tsə̀təndii tə we tiy kwuni mòʼò kə nə̀ ù dzìy ndzə̀m ndzə̀m kə təmbwuni. 14Yesù ə dzày yə̀ a ghu nə̀, “Lazalùs mə pfə, 15mə kwuni dyoʼo ŋwò yə mə kə̀ də̀ wày awote aŋwòə ipfə i we yiy kî zəŋə ŋwò nə̀ ghà ə bɛmə kə â mìə̀. Ghà bû, a ŋwô zû kôʼ we.”

16Tomàs wə̀ izəd i we ìliy yiy kə də nə̀ à də̌ Ŋgòŋ, u dzày tsə â tsə̀təndii tə Yesù tə̀liy tə, a ghu nə̀, “Ghà bû ŋgà zû dzəŋi nə̀ àtyi dè, tə̀ ŋgà ə nə̀ də ani pfə dzəŋi nə̀ we bəə à də nə̀ à də̀ ipfə.”

Yesù ə zɛ̀mə̀ dzwoŋi bə̀ Lazalùs anə ipfə.

17Abù Yesù bù kwùm tsə nəniy a Betanì, u bù kaw kəli fyi kə nə̀ Lazalùs mə dòʼo ntsukə miy inkyàʼì anə isày yəə ghu kə kələ nəniy we. 18Wù kə də̀ ani nìy fwa tə iwùŋ ìbè ani ŋwò tsə a Yèlusalèm, bwìy zù kwùm a Betanì. 19A də̌ nə̀ ndə̀mə̀ àghě Dzû yìy mə bù awote ani bù kòʼ Matà we nə̀ Mə̀li, ghu kyimi tsə fôŋ tə ghu anə ipfə i àzə̀.

20Abù Matà zuw tsə nəniy nə̀ Yesù nyìə̀ bè ŋwò, u tsìy fyi yə̀ a bee ani zù kpe nìy bə̀ Yesù. Mə̀li kwuni dòʼò tsə kə a ndaw. 21Matà ə dzày yə̀ awò Yesù a we nə, “A Mwe ə̀ mbyi, abu wò kə də nəniy fə, àzə̀ wam kə dzǐy pfə dzə̀ wày! 22Mə kwuni kwu ŋwô nə̀ abu à də kə kiə̀ wò ŋwa yə̂ nəniy nyiə̀ awò Zə̀kìy, Zə̀kìy kî nyə̀ ŋwò â wò.”

23Yesù ə dzày yə̀ a we nə, “Àzə̀ yiə̀ kì zɛ̀mə̀ dzwəŋə bə̀ ŋwò anə ipfə.”

24Matà bə̀lì kə a we nə, “Mə kwu ŋwô nə̀ ù nì zɛ̀mə̀ dzwəŋə bə̀ ŋwò anə ipfə, à ni də soʼo a tsuk fə isaʼ anə sòŋə̀ fə aghê pfə yiy nî zɛ̀mə̀ bə̂ nəniy ate.”

25Yesù ə bə̀lì kə a we nə, “Mə də wù wə̀ mə zɛmə̀ kə nəniy aghû yìy anə ipfə, də̀ sòʼò wù wə̀ ù nyiə̀ nəniy aghû yìy nə̀ imuə̀ yìy. Aghû yə̀ ghu bɛmə nəniy â mìə̀, abu ghu tsəb pfə kə ŋwô, ghu nî zɛ̀mə̀ dzwəŋə bə̀ ŋwò anə ipfə. 26Aghû yə̀ ghu bɛmə nəniy â mìə̀ nə̀ ghu nam də̀ utaw, ghu nî pfə kòʼ dzə̀ wày. Wò bɛmə ŋwô àyiə yə mə dzîy nəniy ə̀?”

27Matà ə bə̀lì kə a we nə, “Ìny, a Mwe ə̀ mbyi, mə bɛmə ŋwô nə̀ wò də̌ wù wə̀ Zə̀kìy sûw kyili na. Wò də̌ Wà Kə̀zə̀, wù wə̀ ù kə kwu nəniy ani bù fə̀ anə mbyi.”

Yesù kə dìy bòʼ ìpfə i Lazalùs

28Yəə Matà dzây mà tsə nəniy ayiə yə, u tsìy nyi yə̀ a ndaw, twoŋə tsə àzə̀ ə we Mə̀li tsoŋ dzày tsə a we nə, “Àtyi dè də̀ fə, ù khu wò.” 29Abù Mə̀li zuw tsə nəniy ayiə yə, ù zə̀àŋì nyəŋ tsìy fyi yə̀ a bee ani zù kòʼ Yesù. 30Anə sòŋə fə ghè fə̀, à kə də̌ nə̀ Yesù kamə bû kwùm dzə̂ anə inaʼ, ù kə nam də̌ anə lòʼo kə Matà kə zû kôʼ nəniy we ate. 31Aghee Dzû yə̀ ghu kə də nəniy a ndaw nə̀ Mə̀li, ghu kyimi fòŋə̀ we, ghu kòʼ tsə yəə Mə̀li swây tsìy fyi nəniy uwe wiy abee, ghu dzwùmì tsìy fyi yə̀ we mòʼò kə nə̀ ù zè anə isày ani zù dìy awote.

32Mə̀li zù kwùm tsə anə lòʼo kə Yesù kə də nəniy ate. Yəə ù kòʼ yə̂ nəniy Yesù ghii, u zù nyaʼa tswi tsə a təŋ ifwe i Yesù, dzày yə̀ a we nə, “A Mwe ə̀ mbyi, abu wò kə də nəniy fə, àzə̀ wam kə dzǐy pfə dzə̀ wày.”

33Yəə Yesù kòʼ tsə nəniy yə ù dìy nəniy, kòʼ sòʼò àghě Dzû yə̀ ghu kə də fwumi nə̀ we, ghu dîy dzəŋə nə̀ we, fòŋ ə ŋge fyimi we ate anə yiə ghè yə̀. 34Yesù ə bəb tsə a ghu nə, “Ghà ə we kələ na yiə?” Ghu bə̀lì kə a we nə, “A Mwe ə̀ mbyi, bùu kòʼò loʼo kə ghè kələ na nəniy we ate.”

35Yesù ə dìy. 36Aghê ghè yə̀ dzày tsə nə̀, “Ghà kôʼ ndzòʼò ìliə yə ù kə kwu nəniy azoŋə̀ Lazalùs.”

37Aghê Dzû àliy yiy kwuni dzìy nə̀, “À də̌ we ù kə zəŋi nəniy wù ù fɛbə̀ wìy nə̀ u kaʼ ani kòʼ tə̀loʼo, ù kə wày ani zəŋi tsə nə̀ Lazalùs kə pfə dzə̀ ə̀?”

Yesù ə zɛ̀mə̀ dzwoŋi bə̀ Lazalùs anə ipfə

38Yəə fòŋ kàm ŋge fyimi fwuli bə̂ nəniy Yesù, u ŋwò zù anə lòʼo kə isây Lazalùs yìy kə də nəniy ate. Isây i ghè yə̀ kə də̌ kətî ghu kə fê na nəniy idzwə i ghè yə̀ nə̀ ìtay ìnê yìy. 39Yesù ə tsày tsə kəlâŋ a ghu nə, “Byiŋi ŋwò nə̀ itay yə fiiy!” Àzə̀ wù ù pfə̂ wə̀, ghu kə twoŋə nə̀ à də̌ Matà ə kwuni bə̀lì kə a we nə, “A Mwe ə̀ mbyi, zuk kiy ki ŋge fyi, aŋwòə ntsukə miy mə tsìy inkyàʼì anə yiə yə ghu kə kələ nəniy we.”

40Yesù ə bəb yə̀ a we nə, “Mə kə kə̀ dzây nəway à ghà nə̀, abu gha bɛmə nəniy â mìə̀ ghà kî kòʼò ŋwò daʼa k-a-zə̀kìy yə̀?” 41Anə yiə yə ghu byiŋi ŋwô tsə nəniy itay yə, Yesù ə lia kwoʼ kə idoŋ, gwùŋi tsə nə̀, “A Tà, Mə nyiə̀ zoŋə̀ kiə̀, Mə kwu ŋwô nə̀ wò mə zuw igwuŋì yam yiy, 42Mə kwu ŋwô nə̀ wò taw zuw tsə̀ ŋwò igwuŋì yam yiy. Mə kwuni gwùŋə̀ bə̀ nyìə̀ â wò bòʼ àghù yə̀ ghu təmi doʼò nəniy nyiə fə, ani zəŋi tsə nə̀ ghu nə̀ byemə kə nə̀ à twum wô miə.” 43Yəə Yesù dzày mà tsə nəniy ayiə yə, u twoŋə tsə anə dzə̀ ìtaw yìy nə̀, “Lazalùs, ŋwòə fyi bə.” 44Wù ù pfə wə̀ ə fyi bə̀ abee, ubə̂d u təndzwu wiy kə nam baŋ dòʼò kə anə uwè u we nə̀ anə awù ə we, bə̂d kə ndzwu kiy də̌ anə utwùmusə u we. Yesù ə dzày yə̀ a ghu nə̀, “Ghà zê ŋwô ùfyiə wiy azoŋə we, tə̀ ù zù a ndaw.”

Ghu kaʼ ani kaw dzəd ani wiy màʼà Yesù

(Matìyò 26.1-5; Mâk 14.1,2; Lukâs 22.1,2)

45Ndə̀mə̀ àghê Dzû yə̀ ghu kə bû nəniy ani bù twoŋə zuw Mə̀li, ghu kòʼ tsə ayiə yə Yesù kə zəŋi nəniy, ghu bɛmə kə â we. 46Aghê Dzû àliy yiy kwuni fə̀d zù â àghě Falàsî yìy, dzày yə̀ àyiə yə Yesù kə zəŋi nəniy. 47Ŋgəd tə aghè àlwaʼa tiy nə̀ àghě Falàsî yìy ə kwi tsə kədzəŋə a ndaw yə ghu kə isaʼa nəniy àyiə yiy ate, bəb tsə nə̀, “Ŋgà ni zəŋi mə̀yə nə̀ wù wə̀ anə mali tə yiə tə ù zəŋə nəniy yə? 48Abu ŋgà na tsə kə wù wə̀ nə̀ ù si tsəŋə faʼa kə ndzòʼò àyiə yə, aghê àdzə̀m kî byemə ŋwò â we. Aghee Lûm yìy ki bû byɛbi maʼà ndàw Kə̀zə̀ ə̀ ŋgàŋ, nə̀ inaʼ i ŋgàŋ yìy.”

49Wù ùmòʼ anə uzə u ghu, izəd yiy kə də nə̀ à də̀ Kaʼifàs, ù kə də soʼo wù ùlwaʼà ùnè wìy anə ŋə̀m kə ghè kə̀, u ŋwò dzày fyi kə nə̀, “Ghà liʼà ŋwò! 50Ghà kwu way nə̀ i dzwàb bə̀ ŋwò â wù ùmòʼ ani pfə anə utuw u ndə̀mə̀ àghù tsìy fyi awò àghè dzə̀m ani pfə mà anə inaʼ ə̀?” 51Kaʼifàs kə kə̀ dzây dzə̂ àyiə yə anə daʼa kə we. Ù kə àyiə yə̀ dzày aŋwòə ù kə də̀ wù ùlwaʼà ùnè wìy anə ŋə̀m kə ghè kə̀. U dzày na zìì yə̀ nə̀ Yesù nì pfə anə utuw u ghè Dzû àdzə̀m. 52Ù nì kaʼi pfə dzə̀ wày anə utuw ghě Dzù, ù nì pfə sòʼò anə nìy bə̀ àghě Kəzə̀ yə̀ ghu səaŋì doʼò kyabi tsə̂ nəniy, ghu doʼò tsə anə fyiə kəmòʼ.

53Nìy ŋwò tsə a tsuk fə ghè fə̀, aghee Dzû yìy kaʼ tsə ani kaw dzəd yə ghu dziy wiy maʼà Yesù ate. 54Yesù ə kàmə̀ bwìy wày anə ndaa anə yiə yə aghê dzə̀mə̀ də nəniy ani kòʼ we ate. U kwuni ŋwò zù anə inaʼ i Eflèm yə̀ i kə kwulì də nəniy akə̀lə̀ mbvə̀nə̀ kə̀sisi. U mùə̀ dòʼò yə̀ awote nə̀ tsə̀təndii tə we tiy.

55Anə yiə yə inyi ŋkàmə̀tâzaʼà mìy kpe kioŋə mìà bə̂, ndə̀mə̀ àghě Dzû yə̀ ghu kə muə nəniy anə ukè inaʼ ə ŋwò kwoʼ zù a Yèlusalèm ani zù byay na tsə iwe tə̀ ghu zwu doʼò tsə anə yiə yə biə kə inàʼ kə ghu kiy kə dzîy nəniy.#11.55 Anə byiə̀ kə inaʼ i ghu, ghu kə kwu ani zəŋi ayiə inaʼ à liy yiy a kə zəŋə nəniy nə̀ wù kə kâm dòʼò dzə̀ wù ù dzəə wìy. 56Ghu kaʼ yə̀ ani kaw kyabi tsə̀ Yesù, abù ghu zû təmi doʼò yə̂ anə be kə ndàw Kə̀zə̀, ghu bəbə anə iwè nə̀, “Ghà moʼò nə̀ ù kì bè kə ŋwò yə̀? Nyîliy, ù də̌ ani bù, nyîliy ù wày dzə ani bù.” 57Ŋgəd tə aghè àlwaʼa tiy nə̀ àghě Falàsî yìy tsày tsə kəlâŋ nə̀ abu à də kə ndiə, ù kòʼ nəniy Yesù, u bù dzày bə̀ tə̀ ghu zû kwi we.

Valgt i Øjeblikket:

Dzwan 11: isu

Markering

Del

Kopiér