Jonashi 3
3
Ikantatigaiganakara Ninivekunirira
1Impo yogari Tasorintsi iniairi aikiro Jonashi, ikantiri:
2«Maika, piate anta apatotara pankotsi paitacharira Ninive pinkamantaigakerira nokantakempirira.»
3Impo yogari Jonashi itsatagakero ikantakeririra Tasorintsi iatanake Niniveku, antari Niniveku otovaigavagetityo pankotsi kara, antari ontsotenkenkanira magatiro onti okogakotaka anuitakenkanira mavati kutagiteri.
4Yogari Jonashi iatake yanuitanakera kara apatotakara pankotsi patiro kutagiteri, ikenkitsatanakera imaraenkarikatyo kara ikanti:
«¡Agapaakempara 40 kutagiteri ogari Ninive ompogereakenkani!»
5Impo yogaegiri timaigatsirira Niniveku, visaenkavageigatsirira intiegiri terira impaitumaigempa ikematsaigakeri Tasorintsi. Impo ovashi ikantakagantakero impitashiigakemparora kogapage gara isekatumaiga, aikiro irogaguiganakemparora manchakintsi tontaporokiri iokotagantaiganakempara arisano ikenkisureavageiganaka.
6Antari ikemavakera koveenkari Ninivekunirira, ovashi imatanaka irirori ikaviritanaka ipirinitira, isapokanakarora imanchaki mechomagori ikoveenkatantarira, irorokya yogagutanaka manchakintsi tontaporokiri iatakera ipirinitakera kipatsiseku.
7Impo, yogari koveenkari intiegiri inanpinaegi ikamantakagantaigakeri maganiro timaigatsirira Niniveku ikantaigakerira intsatagaigakerora oka:
«Gara tyani sekatumataacha. Ario inkañoigake aikiro piratsipage, vaka intiri ovisha gara ipagaani iseka, ontiri imire.
8Maganirosanotyo, irogagugakempa manchakintsi tontaporokiri iokotagantaigakempara arisano ikenkisureaiganaka, aikiro iriniaigakerira Tasorintsi inkaemageigamataketyo kara. Irapakuaiganakerora magatiro yovetsikageigirira terira onkametite, ganigera yogantavageigai aikiro ganigera ikisantavageigai;
9inkañoigakerorika maika ariorika irapitsimareanaempa Tasorintsi ovashi inkantatigaero ikantavetakarira impogereaigakaemera ariokya intsarogakagaiganajae ganiri yogamagaigai.»
10Impo yogari Tasorintsi ineaigakerira ikantatigaiganakara yapakuaiganakerora yovetsikageigirira terira onkametite, ovashi yapitsimareanaa tera impogereaigakerimera.
Valgt i Øjeblikket:
Jonashi 3: JON20
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Proyecto Biblia Matsigenka © Sociedad Bíblica Peruana.