Génesis 7
7
Bix úuchic le búulcabalo'
1Cu dzo'ocole' Yuumtzile' tu ya'alaj ti' Noé. Ichil tuláacal le máaco'ob yano'ob ti' le kiino'oba', chéen teech ca cuxtal jach je'el bix in káate'. Tu yo'olal lelo' ooquen yéetel a paalal ichil le cheemo'. 2Chuc ichil tuláacal le ba'alche'ob utz u jaanta'alo'obo' siete u j xiibilo'ob yéetel siete u x ch'uupilo'ob, ba'ale' ichil le ma' janalbe'eno'obo' chuc chéen jun túul u j xiibil yéetel jun túul u x ch'uupil. 3Chuc xan siete u núupul tuláacal jejeláas ch'íich'o'ob u ti'al ma' u xu'ulul u ch'i'ibalo'ob yóokolcaab, 4Tumen ichil siete kiino'obe' yaan in beetic u káaxal ja' cuarenta kiino'ob yéetel cuarenta áakabo'ob. ¡Bin in ca'aj in xu'uls tuláacal ba'ax cuxa'an in beetmaj yóok lu'um! 5Noee' tu beetaj tuláacal jach je'el bix a'ala'abic ti' tumen Yuumtzile'.
6Le ca j bu'ul le lu'um tumen le búulcabalo', ti' Noee' yaan ca'ach seis cientos ja'abo'ob. 7Noé túune' j ooc yéetel u paalal, u yatan bey xan u yilibo'ob ichil le cheem u ti'al u ta'acbesicuba'ob ti' le búulcabalo'. 8Le janalbe'en ba'alche'ob yéetel le ma' janalbe'eno'obo', le cu xiknalo'ob bey le cu jíiticubaobo', 9j ooco'ob yéetel Noé ichil le cheemo', ca'a ca'a túulil j xiib yéetel x ch'uup, je'el bix tu nu'uctilac Kue'.
10Tu siete kiino'obe' le búulcabalo' jo'op' u pixic le lu'uma'. 11Ti' u kiinil diez yéetel siete ti' le ca'a p'éel meso', yaan ca'ach ti' Noé seis cientos ja'abo'ob Jach ti' le kiino', xíiclajo'ob u sayabilo'ob le nojoch ka'anabo', ca j je'epaj xan u kalabilo'ob ca'an. 12Cuarenta kiino'ob yéetel cuarenta áakabo'ob káax ja' yóokol le lu'uma'. 13Ti'ilie' kiino' j ooc Noé ichil le cheem yéetel u paalal, u kaaba'obe': Sem, Cam yéetel Jafet; u yatan yéetel u yilibo'ob. 14Yéetel leti'obe' j ooco'ob xan tuláacal u jejeláasil káaxil ba'alche'ob, alaktbil ba'alche'ob, bey tuláacal u jejeláasil ch'íich'o'ob. 15Tuláacal le ba'alche'obo' ca'a ca'a túulil ooquico'ob ichil le cheemo' yéetel Noé. 16J ooco'ob jun túul j xiib yéetel jun túul x ch'uup, jujun túul u jejeláasil, je'el bix a'ala'abic ti' Noé tumen Kue', cu dzo'ocole' Yuumtzile' tu kalaj u jool le cheemo'.
17Le búulcabalo' xaanchaj cuarenta kiino'ob. Le ca j na'ac le ja'o', j líik le cheem te j lu'umo' ca j p'áat kaacba yóok ja'. 18Le ja'o' j bíin u na'acal asab ca'anal, ba'ale' le cheemo' láili' táan u bin u báabe'. 19Sen ca'analchaj le ja'o', j kuch tac u pix u sen ca'analil u witzilo'ob le lu'umo'; 20Cu dzo'ocol u pixic le witzo'obo' na'ac u láak siete metros yóokolo'ob, 21Bey úuchic u quíimil tuláacal máac cuxa'an yóokol lu'um, ch'íich'o'ob, alaktbil ba'alche'ob, káaxil ba'alche'ob, bey xan le cu jilanquilo'ob te j lu'umo'. 22Tuláacal ba'ax yaan j lu'um, yaan cuxtal ti' yéetel cu múus iike' j quíimi. 23Chéen Noé yéetel le yano'ob ichil le cheemo' j p'áat cuxa'ano'ob; le u chuucanilo'obe' j xu'ulsa'abo'ob: wíinico'ob, alaktbil ba'alche'ob, ch'íich'o'ob cu xiknalo'ob, bey xan le ba'alche'ob cu jíilticuba'obo'; 24ciento cincuenta kiino'ob j xaanchaj buululil le lu'umo'.
Valgt i Øjeblikket:
Génesis 7: MAYABI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Texto Maya © Sociedades Bíblicas Unidas, 1992