मत्ती 3
3
यूहन्ना बपतिस्मा देंइ बाले
(मरकुस 1:1-8; लूका 3:1-18; यूहन्ना 1:6-8,15-34)
1जब यीसु नासरत गाँव माहीं रहत रहे हँय, तबहिनय यूहन्ना बपतिस्मा देंइ बाले आइके, यहूदिया प्रदेस के सुनसान जघा माहीं इआ प्रचार करँइ लागें, कि 2“पाप करब छोंड़िके परमातिमा के लघे आबा, काहेकि #3:2 परमातिमा हरबिन मनइन के ऊपर राज करिहँयस्वरग के राज लघेन आइगा हय।” 3ईं उँइन यूहन्ना आहीं जेखर चरचा परमातिमा के सँदेस बतामँइ बाले यसायाह के व्दारा कीनगे ही, कि #यसा 40:3
“सुनसान जघा माहीं एक जने के गोहरामँइ के बोल सुनात हय कि, #3:3 प्रभू काहीं सोइकार करँय के खातिर खुद काहीं तइआर कराप्रभू के गइल तइआर करा, अउर उनखे खातिर सड़कँय सऊँ करा।” 4अउर यूहन्ना ऊँट के बार से बना ओन्हा पहिरे रहे हँय, अउर अपने करिहाँ माहीं चमड़ा के पट्टा बाँधे रहे हँय, अउर ऊँ चिड्डन काहीं अउर जंगल के महिपर खात रहे हँय।
5जब ऊँ प्रचार करत रहे हँय, तब यरूसलेम सहर, अउर सगले यहूदिया प्रदेस के मनई, अउर यरदन नदी के लघे-लघे के सगले मनई उनखे लघे आइके एकट्ठा होइगें। 6अउर अपने-अपने पापन काहीं सोइकार कइके यरदन नदी माहीं उनसे बपतिस्मा लिहिन। 7जब यूहन्ना बपतिस्मा देंइ बाले खुब फरीसी लोगन काहीं अउर सदूकी लोगन काहीं बपतिस्मा लेंइ के खातिर अपने लघे आबत देखिन, त उनसे कहिन, कि “हे साँप के बच्चन कि नाईं बुरे मनइव, तोंहईं को चेताय दिहिस, कि परमातिमा के आमँइ बाले सजा से बचा?” 8-9अउर तूँ पंचे अपने जीबन से इआ देखाय द्या, कि तूँ पंचे बास्तव माहीं पाप करब छोंड़ दिहा हय, अउर परमातिमा के बातन काहीं मनते हया। तूँ पंचे अपने-अपने मन माहीं इआ न सोचा, कि हम अब्राहम के सन्तान आहेन एसे परमातिमा हमहीं सजा न देइहँय; काहेकि हम तोंहसे सही कहित हएन, कि परमातिमा ईं पथरन से अब्राहम के खातिर बंस पइदा कइ सकत हें। 10अउर अब परमातिमा के क्रोध रूपी कुल्हारा बिरबन के जर माहीं धरा हय, एसे जउन-जउन बिरबा निकहा फर न फरी, उआ काटिके आगी माहीं झोंक दीन जई। 11तूँ पंचे अपने-अपने पापन से पस्चाताप किहे हया, इआ देखामँइ के खातिर हम तोंहईं पंचन काहीं पानी से बपतिस्मा देइत हएन, पय जउन हमरे बाद आमँइ बाले हें, ऊँ हमसे एतना महान हें; कि हम त उनखर #3:11 हम उनखर नोकरव तक बनय के काबिल नहिं आहेनपनहीं तक उठामँइ के काबिल नहिं आहेन, ऊँ तोंहईं पबित्र आत्मा अउर आगी से बपतिस्मा देइहँय। 12उनखर न्याय रूपी सूपा उनखे हाँथेन माहीं हय; अउर ऊँ संसार रूपी राहा काहीं निकहा से साफ करिहँय; अउर गोहूँ काहीं अपने बखारी माहीं रखिहँय; पय बूसा काहीं कबहूँ न बुझाँय बाली आगी माहीं डार देइहँय।
यीसु के बपतिस्मा
13जब यूहन्ना बपतिस्मा देत रहे हँय, उहय समय यीसु गलील प्रदेस से यरदन नदी के किनारे यूहन्ना बपतिस्मा देंइ बाले के लघे बपतिस्मा लेंइ आएँ। 14पय यूहन्ना बपतिस्मा देंइ बाले इआ कहिके उनहीं रोंकँइ लागें कि, “हमहीं त अपना के हाँथे से बपतिस्मा लेंइ के जरूरत ही, अउर अपना हमरे लघे आएन हय?” 15तब यीसु उनहीं इआ जबाब दिहिन, कि “अब त अइसय होंइ द्या, काहेकि हमहीं पंचन काहीं इहइमेर से सगली #3:15 परमातिमा के इच्छा इआ ही कि तूँ हमहीं बपतिस्मा दयाधारमिकता काहीं पूर करब उचित हय।” तब यूहन्ना बपतिस्मा देंइ बाले उनखर बात मान लिहिन। 16अउर यीसु बपतिस्मा लइके जइसय पानी से बहिरे निकरें, त देखा, उनखे खातिर अकास खुलिगा; अउर ऊँ परमातिमा के आत्मा काहीं परेबा के रूप म उतरत, अउर अपने ऊपर आबत देखिन। 17अउर देखा, इआ अकासबानी भय, “ईं हमार पियार लड़िका आहीं, जिनसे हम खुब प्रसन्न हएन।”
Valgt i Øjeblikket:
मत्ती 3: bag
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Wycliffe Bible Translators, Inc. All rights reserved.
