Génesis 13
13
Abram ha Lot ojei ojuehegui
1Ha Abram osẽ Egíptogui Négev gotýo, hembireko ha opaite mba’e oguerekóva reheve, ha Lot oho avei hendive.
2Ha Abram hetaiterei hymba, ipláta ha hi’óro.
3Ha ojevy hapykuere rupi Négev guive Betel gotýo, hóga hymba pirekueguigua oĩ haguépe, Betel ha Hái pa’ũme,
4pe kuave’ẽmby renda ojapo hague ypýpe; ha upépe Abram ohenói Ñanderuete réra.
5Ha Lot oiko Abram ndive, ha ha’e, ijovecha ha ivaka heta avei ha oiko hikuái hóga hymba pirekueguigua guýpe.
6Ha pe yvy ohechakuaa ndohupitypamo’ãi oiko hag̃ua hikuái oñondive, mokõivéva hymba hetaitereígui, ndaikatuvéima oiko oñondive peteĩ hendápe.
7Upévare Abram rymba rerekuakuéra oñepyrũma oñorãirõ Lot rymba rerekuakuéra ndive; ha umi Canaangua ha umi Ferezgua oiko gueteri pe tetã pévape.
8Upémaramo Abram he’i Lótpe: Anítei jaiko vai oñondive, ha péicha avei che rymba rerekua ne rymba rerekua ndive, ñande ningo oñopehẽngueteéva.
9Yvy tuichakue oĩmba ne renondépe. Che ajerure ndéve ejei chehegui, tereho asu gotýo, che aha hag̃ua akatúa gotýo; térã nde reho ramo akatúa gotýo, che aháta asu gotýo.
10Ha Lot ojesaporavo hag̃ua oma’ẽ pe Jordan ñu tuichakuére ha hi’y porã heta rehe, ojogua Ñanderuete yvatýpe térã Egípto retãme, Zoar peve, Ñanderuete ohundi mboyve Sodóma ha Gomórrape.
11Upéramo Lot oiporavo pe Jordan ñu tuichakue imba’erã ramo; ha oho kuarahyresẽ gotýo, ha ojei hikuái ojuehegui.
12Abram opyta Canaan yvýpe ha Lot oho umi táva ñu rupiguápe, ha omoĩ ohóvo hóga hymba pirekueguigua Sodóma peve.
13Ha umi kuimba’e Sodomaygua iñañaiterei ha heko vai Ñanderuete renondépe.
14Ha Ñanderuete he’i Abrámpe, Lot oho rire ijypýgui: Ejesaupi ha ema’ẽ ko’ág̃a reĩha guive, yvate (nórte) gotýo ha yvy (sur) gotýo, kuarahyresẽ gotýo ha kuarahyreike gotýo,
15ko’ã yvy rehecháva guive ame’ẽta ndéve ha ne ñemoñarenguérape opaite árape g̃uarã.
16Ha ambohetáta ne ñemoñarenguéra yvyku’ícha; ha oĩ ramo peteĩ oipapakuaáva pe yvyku’i ko yvy apére, péva oipapakuaáta avei ne ñemoñarenguérape.
17Epu’ã ha tereho ko yvy pukukue ha ipekue javeve, ndéve ame’ẽmbáta.
18Upéramo Abram ova jevy ha omopu’ã hóga hymba pirekueguigua oiko hag̃ua Mámre yvyra encinatýpe opytáva Hebron yvýpe, upépe omopu’ã avei ikuave’ẽmby renda Ñanderuetépe g̃uarã.
Valgt i Øjeblikket:
Génesis 13: ÑÑP2015
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.