TAUNET 13
13
Kobestos Abram ak Lot
1Ak kitogosta anyun Abram kong’eete Misri, inendet ak osotiondennyi, ak tugul che kitinyei, koboto Lot, koba Murot ne bo Tai. 2Ak ki magorio Abram mising’ eng’ tuga, ak feda, ak tahabu. 3Ak kiwa eng’ bandanyi, kong’eete Murot ne bo Tai, agoi Betel, agoi koit ole kimi emainnyi eng’ tai, kwenutab Betel ak Ai; 4agoi ole kimi kaptisisiet, ne kiga koteech eng’ tai: ak koguur Abram kainetab Jehovah eng’ oloto. 5Ak kitinyei Lot agine nego, ak tuga, ak emaisiek, inendet ne kibendi ak Abram. 6Ak kima imuch koyam ichek emonoto, komeny tuwai: amu ki chang’ tugukwak, kot ko mata komuch komeny tuwai amu noto. 7Ak kibiit boriet eng’ mestowek che kiiyagi tugab Abram ak che kiiyagi tugab Lot; ak kimenyei Kananik ak Perisik emonoto eng’ betusiechoto. 8Kilenji anyun Abram Lot, Ma mie kota kobiit boriet eng’ kwenunnyo, inye ak ane, anan eng’ kwenutab mestowek chechuk ak cheguk; amu kitupche. 9Tos mami emet komugul taing’ung’? Kaigai istegei eng’ ole ami: ngot iwe komostab katam, awe anyun komostab tai, anan ngot iwe komostab tai, awe anyun komostab katam. 10Kitobendo anyun Lot kogeerot atebwet komugul ne bo Jordan, kole emet ne tinyei beek eng’ olda tugul, ko u mbaretab Jehovah, ko u emetab Misri, ne tokyingei komostab Soar; ye ki tomo kong’em Jehovah Sodom ak Gomora. 11Kilewenjigei anyun Lot atebwet komugul ne bo Jordan, ak kouuot Lot kotokyigei kong’asis: ak kopcheigei ichegei. 12Kimeny anyun Abram emetab Kanan, ak komeny Lot nganasok che bo atebwet, ak kichecheiyot kot koit Sodom. 13Ago ki yaachen bikab Sodom, ak ki kiptengeginik mising’ kosiir, eng’ taitab Jehovah.
14Kingo kagobesio Lot ak Abram, kolenji Jehovah Abram, Tobende nguno anyun, ak igeerote kong’eete ole imitei komostab katam, ak komostab tai, ak komostab kong’asis, ak komostab cherongo: 15amu agonin emet tugul ne igeere koboto iyoteng’ung’ koigeny. 16Ak ayae lagoguk kochang’ait ko u temburiek che bo ng’ony, si ngot komugaksei koiit chi temburiek che bo ng’ony, ko kaga iitoksei lagoguk agichek. 17Ng’eet, wendote koindab emoni, ak tebeesindanyi, amu agonin emoni kobunjin. 18Ak kiu Abram ak emainnyi, ak kwo komeny ye negite ketik che bo Mamre, che mi Hebron, ak koteekyi Jehovah kaptisisiet eng’ oloto.
Valgt i Øjeblikket:
TAUNET 13: BUKUIT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
God's word open for all
©Bible Society of Kenya, 2020