YOANA 1
1
Kiwaghaka Ngölyon kïlïkwï chi
1Otini le towunöto yïm nko ngwïny, kï kimi Ngölyon, akimito Ngölyontononi nko Tororöt, aki Tororöt Ngölyontononi. 2Kimi Ngölyontononi nko Tororöt kïngeta towunöt. 3Kikigh tïkwïn löwïr kuwerï nyinte akï ntömö nyinte tömöminye kïgh nyo kikigh nyo kitökighöy. 4Kimi söpon nyinte aki löpoyïn pö pich söpononi. 5Lïwchini löpoyïnoni tuwïn amemukönye tuwïn kumisöy löpoyïnoni.
6 #
Mat 3:1; Mrk 1:4; Luk 3:1-2. Kiyonï Tororöt chi nyo kikuro Yoana 7nyo kingwïn kïsöwintönchï löpoyïnoni atökumï pich kïter akughan. 8Melö ki löpoyïntö nyinte, wölo kingwïn kïsöwintönchï löpoyïnoni. 9Löpoyïntö nyinte kegh nyoni kingwïnöy ngwïny kulïwchini pich lapay.
10Kimi Ngölyontononi ngwïny akigh Tororöt ngwïny kuwerï nyinte, wölo mayangnye pipö ngwïny nyinte. 11Kingwïn korenyi, wölo kimötaknye pikachi. 12Wölo pich löwïr cho kïtak akughan nyinte, kwigh chane kïlïkwï monïngo Tororöt. 13Malïkwïnye chane monïngo Tororöt ompö owesyo ptangengmöt, anta ompö machata por anta ompö chomnyo chi, wölo ompö owesyo Tororöt.
14Kiwaghaka Ngölyontononi kïlïkwï ptangengmöt akïmang kwenuncha, chi nyo nyïghitate pöropchö nko man. Kesïwecha ororyenyi, ororyö nyo kitö Kwanta Werïnyi nyo le akonga onkït.
15Kisöwintönchï Yoana nyinte ompö kiteghat lö, “Anyï chichay kyomwowokwa ngalechi, atanya kyamwaghan lö, ‘Pïnï yi chi nyo wow tya kïtïlanïn, ompöwölo kimito nyinte kïtomö keyïyanïn!’ ”
16Ompö sïkönöteto pöropchenyi, kikekonecha perur nyo mewonyotnye. 17Kikonï Tororöt kirurut kuwerï Musa, wölo kikonï pöropchö nko man kuwerï Yeso Kristo.* 18Möminye chi nyo kikïsïwa Tororöt kokay. Wölo kikuporwecha nyinte Werïnyi nyo le akonga nyo ghömote nko Kwanta.
Amtaghpa Yoana Kipatisanin
(Mat 3:1-12; Mrk 1:1-8; Luk 3:1-18)
19Kïyonta pipö Yaudi cho echön cho kimi Yerusalem tïsï nko pipö Lawi kïpa wölo mi Yoana atökïtep lö, “Ichinyi ngo nya?” 20Melö kitagh Yoana kuyokyï chane, wölo kilö, “Mochanye Kristo.”
21 #
Krt 18:15-18; Mal 4:5. Kïtep pïchay lö, “Ichinyi nyu ngo? Ichinyi so Eliya?”
Kuyokyï Yoana lö, “Ewo, mochanye.”
Kïtep pïchay lö, “Ichinyi so werkoyontonay kïmitecha kekönöy?”
Kuyokyï lö, “Ewo.”
22Kïlenchï pïchay, “Mwowecha nyu lö ichï ngo tökepecha kemwochinö pïchini köyonwecha. Ilentenyi ochï ngo nyinte nya?”
23 #
Isa 40:3. Kuyokyï Yoana chane lö, “Ochan chichanya kimwa werkoyon Isaya ngalechi lö,
‘Kakïlïma kuti chi surkwen nyo lentöy,
agha ara Echotyon, oghïtenö ortïnechi.’ ”
24Kïtep pïchay kiyonï Parisaytin* lö, 25“Kwato mechinyinye Kristo anta Eliya anta werkoyontonay kikönecha, kï kölö ne nyu tepötisönenyi pich?”
26Kuyokyï Yoana chane lö, “Opötisönan ompö pögh, wölo mi kwenunkwa chi nyo monkïtökwanye. 27Rïpkanïn nyinte, wölo mömïchinanïnye ompö atyak kweghkachi.”
28Kighisyeghö ngalechoni wölini le Petaniya, lalwa Yordan antakwagh, wölo kipötisöno Yoana pich.
Wawa Kecha Tororöt
29Kisïwa Yoana Yeso asista nyo kirïpöy kungwïnöy wölini kimi nyinte, kïmwochï pich lö, “Anyï Wawa Kecha Tororöt nyo ipöy ngokï ngwïny! 30Chichete nyanye kyomwowokwa ngalechi lö, ‘Rïpkanïn chi akong nyo wow tya kïtïlanïn, ompöwölo kimito nyinte kïtomö keyïyanïn!’ 31Kimonkïtönye ante nyinte lö eki ngo, wölo kangwïnan apatisana pich pögh, atömanyïn kïrumteghö nyinte pipö Israel.”
32Akïsöwintön Yoana lö, “Kyasïwan Mïkulögh kirökunö yïm le chepïrïm akïtöpö parakunyi. 33Kimonkïtönye nyinte, wölo kökimwowanïn nyinte nyini kiyonwanïn apatisana pich pögh lö, ‘Isïwiyenyi chi nyo rökyini Mïkulögh akïtöpö parakunyi, chichoni nyo pötisöno pich Mïkulögh nyo Tïlil.’ 34Kasïwan asöwintönan lö, nyinte kï Wero Tororöt.”
Kinetanpa Yeso cho pö tagh
35Kimi ngat Yoana asisto odeny nko kinetankachi cho le odeny atoni, 36kïsïwa Yeso kïwestotoy kïlö, “Anyï Wawa Kecha Tororöt.” 37Kïlïm kinetanchay pö Yoana le odeny otini kimwoghöy nyinte lenyoni, kïpa chane akïrïp Yeso. 38Kiwaghaka Yeso akïsïwa lö mi chane kïrïpöy nyinte, kïtep lö, “Omörekwa ne nya?” Kuyokyï chane lö, “Imöngenyi onö nya, Rapi?” (Ato kïwaghach ngölyontononi kelentöy, “Konetin.”) 39Kïlenchï, “Apkana asïwena.” Kïpa chane nko nyinte akïsïwa wölini kimöngöy, kïtïpï nko nyinte asisoni kwimön. (Ki mönon wölo ngata satïn taman.)
40Ki Andrea nyo tupchö nko Simon Petro nyoni kile akonga ompö pïchoni le odeny kilïmöy ngalechoni pö Yoana, kïrïp chane Yeso. 41Kïnyorï tagh Andrea werïngwa Simon, kïlenchï, “Kikenyorucha Masiya.”* (Ompö kayne anka kï Kristo.) 42Atolapay kumït Simon wölo mi Yeso. Kuros Yeso nyinte akïlenchï, “Ichinyi Simon, wero Yoana. Kïkuroninyi ye Kepa.” (Karkegh kaynanoni nko Petro nyo ato kïwaghach kï “Ghat.”)
Kuröy Yeso Pilipo nko Natanael
43Kïmach Yeso asisto odeny kïwö kutang Kalilaya. Kïtuyö Yeso nko Pilipo, akïlenchï, “Rïpkanïn!” 44(Ki chi pö Petsayda Pilipo kanasyan nyo kimöngöy ompö Andrea nko Petro.) 45Kïtuyö Pilipo nko Natanael akïlenchï, “Kakïtuyecha nko chichay kikir Musa ngalechi ompö kitapu Kirurut* akï nyinte nyaye kikir werkoy ngalechi. Yeso nyinte, nyaye le wero Yosep nyo möngöy Nasaret.”
46Kïtep Natanael lö, “Muköy so kïgh nyo karam kungwïno Nasaret?”
Kuyokyï Pilipo lö, “Nyonö rosa.”
47Otini kisïwa Yeso Natanael kungwïnchini nyinte, kïlö ompö, “Rose köny! Anyï chi pö Israel nyo pö man nyo möminye lïsata orinyi!”
48Kïtep Natanael nyinte lö, “Kenkïtwaninyi lö ne nya?”
Kuyokyï Yeso lö, “Kökyasïwïnyi atoni kemitenyi mpure moköngwoninö ghït kïtomö kïkurïnyi Pilipo.”
49Kuyokyï Natanael lö, “Konetin, ichinyi Wero Tororöt! Ichinyi pöytoghinto Israel!”
50Kïlenchï Yeso, “Keghananyi so pat ompöwölo kolan kasïwïnyi mpure moköngwö ghït? Tesïwïyenyi tïku walaka cho echön kïsir choni.” 51#Tow 28:12. Atolapay kïlenchï pïchay, “Omwowokwa nyoman lö, osïwïyekwa kïyoto yïmö akïpusöy malaykeni Tororöt akïrökyini Wero Chi.”
Kensyö nyo kimi Kana
Valgt i Øjeblikket:
YOANA 1: PIPÏLIA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©Bible Society of Kenya, 2019
