Shiyanso 9
9
UNguluvi ifinga kwa Nuhu
1Apo, uNguluvi wámuyimiilila uNuhu na vanaakwe iijova, “Musave, muyooloshe, muyimemye inyi. 2Ifidiimwa fyona, inkhanu isa mu lihakha soona isa mu nyi, inyuni soona, ifiinu fina fitambala ni nswi soona sikhavatiila, one navapeela musiyangalile. 3Ifiinu fyona ifyumi fisiive fyakiilya fyenyu. Lino nikivapeela ifi fyona ngaja shina navapeelaga ifimelo fyona.
4“Lino leelo, musikhajelaga kiilya inyama yina yili ni danda, kwa kiiva uwuumi wuli mu danda. 5Umuunu yuna akhamubuda umuyine, woope nikhamuhiga afwe! Shiyooli idanda iya wuumi weenyu nikhayisakula kwa shila muunu na kwa shila nkhanu. 6Namuwumbaga umuunu kwa shihwano shangu,#9:6 Yimba mu litaafili lya Shiyanso 1:26. ndeeno umuunu yuna akhamubuda umuunu, woope akhabudwa nu muunu. 7Lino omwe savaji, muyooloshe, muve vinshi muyalaalile nyi yoona.”
8Baheene uNguluvi wámujovela uNuhu na vanaakwe, 9“Loleeli, one nifinga kunyeenyu, avaana veenyu ni fisafi fyenyu fyona, 10ifiinu fyona fina fyumi fina munafyo, inyuni, ifidiimwa, inkhanu isa mu lihakha, fyona fina fiihuma mu shipugo. 11Nifinga kunyeenyu kiija, nisikhafibuda khanji ifiinu fyona ifyumi kwa lufuwukho lwa malenga, kiiva nisikhaleeta khanji ulufuwukho lwa malenga kiyinanga inyi.”
12-13Khanji uNguluvi wáaja, “Niviikha ilipingangʼombe lya noonya yangu ku wulanga, ilyo lilyene liwonensa ulufingo#9:12-13 Ulufingo: Yimba iliswi Lufingo mu Maswi aMahensa. lwangu ni nyi yoona. Isho shisheene shimanyilo sha lufingo lwangu lwa nsiku soona, luna nifinga kunyeenyu ni fiinu ifyumi fina munafyo ni fisafi fyenyu fyona. 14Uluhaavi luna nikhayigubikha inyi kwa mafunde, ilipingangʼombe lya noonya pina likhayiwonensa, 15one nikhakumbukha ulufingo lwangu kunyeenyu ni fiinu fyona ifyumi. Shiyooli, ulufuwukho lwa malenga lusikhabuda khanji ifiinu fyona ifyumi. 16Ilipingangʼombe lya noonya ilyo, pina likiyiwonensa mu mafunde nikhalyaga. Kwa kiiva ya ilyo nikhakumbukha ulufingo lwa shiluta luna one Nguluvi nafingaga ku fiwumbwa fyona.” 17Apo, baheene uNguluvi wámujovela uNuhu, “Ishiinu ishi shisheene shiwonensa ulufingo luna nifinjile ku fiinu fyona ifyumi, pa nyi apa.”
UNuhu na vanaakwe
18Avaana va Nuhu vina vapoolile mu shipugo vakhandi, uSheemu, uHamu nu Yafeti. UHamu yumwene wiihe wa Kanaani. 19Awo vaveene vaana vatatu va shigoosi va Nuhu na kihuma kunyaanave avaanu vayalaliile nyi yoona.
20UNuhu akhandi mulimaaji. Umuunu uyu yumwene akhandi wa wutasi kivyala isabiibu. 21Ilijuva limonga, uNuhu wángʼwesaga idivaayi mbakha wágaala, wáagona mu litinga lyakwe asiyifuniishe umwenda. 22UHamu, uwiihe wa Kanaani, wáwaaga uwubwinda wa wihaanave. Wáahuma panja, baheene wáaluta kivajovela avamaame. 23Leelo, uSheemu nu Yafeti vatoola umwenda, vaguviikha mu mavega gaanave, vaaluta shinyamugongo. Baheene vafunikha uwubwinda wa wihaanave. Uluhaavi luna viiluta kimufunikha, vakhandi vasetushiile kuna vahumile, kiija valeshe kiloleela uwubwinda wa wihaanave. 24UNuhu wáganile kigalalukha wámanyile shina wámugahilaga umuswamuve umunangʼana. 25Kwa kiiva ya ilyo wáaja,
“UKanaani ayiijilwe!
Akhava muvanda mandu kishila avavanda woona kwa valukholo lwakwe.”
26Khanji wáaja,
“Atunwajwe uMutwa uNguluvi wa Sheemu!
UKanaani ave muvanda wa Sheemu.
27UNguluvi asiyenjelese insala sa Yafeti.
UYafeti nu Sheemu vakhale wunofu luvala lumo.
UKanaani ave muvanda wa Yafeti.”
28Ulufuwukho lwa malenga lwaganile kishila, uNuhu wákheele maakha magana gatatu na mashumi gasaanu (350). 29Ndeeno wáfwisaga ana maakha magana gonja na mashumi gasaanu (950).
Valgt i Øjeblikket:
Shiyanso 9: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.