yo-han 6

ye-su wij pyaa Zin myenb

(peiq mavg matq-Taai 14:13-21; maa-Ko 6:30-44; lu-kaa 9:10-17)

1Ga'haaq ye-su Jiaj uaq vaang zi'g kaa-li-li Kxib txn (cvj maaib kanb nxm Buaj heug Ti-Be-lyetq). 2myenb Zamq Eei kan Jyenq ninb mivb weig zu'g ninb Bua pwatg ninb zruj Jiaj Bua'g hxvb Eei sig zxg lovj putg pcvg myenb. 3ye-su zyrug faauj Bovb aiq mivb Zauj ninb Eei saib kxj Bua zweid Jyenq uaq. 4uaq zang aaq lamb teij Tauj yiu-Tai myenb Jiaj siaj mcvg zipq a'q.

5ye-su Zau Myen mavg, pwatg myenb Zamq Eei taaib ninb uaq zyrug naaig kaaj fi-lipq, “Bua xij zu'g mivb haaij maaid ka'naaiq kauj pun naaiq teij zwavj myenb Eang?” 6ye-su Kuvj Navq naaiq nx naaig weig seij fi-lipq. ninb kanb xij Navq haiq nx zruj ninb zuvq hiuq mig a'q.

7fi-lipq tau, “lovg Eig pc'q Nxi Eei kovb zinb#6:7 kikg waag kxvq 200 De-naa-li-atg. uaq zang yetg Nxi Eei kovb zinb se yetg nxm De-naa-li-atg. maaid Eang Eei ka'naaiq zuvq maiq kauj yetg taub tu'q ti'q tyen.”

8maaib taub ye-su Eei saib kxj, tovb si-mon pi-te Eei yrud, an-Daa-lu, kxvq, 9“yem naaiq maaib taub txn maaib pyaa nxm lovg Byaub Baa-li zruj taaib Eei Fuaq Zauj i taub Byaud. mq paag myenb Dovg naaig Zamq Navq haiq nx haib pun tu'q Gxi?”

10ye-su kxvq, “Buaj zwavj myenb zweid Fiag maa'b!” uaq teij txvj miaq Zamq Eei. zwavj myenb zyrug zweid Fiag. taan mJavg txn maaib leib maiq ko pyaa Zin taub. 11ye-su zyrug zx'q uaq teij Fuaq taaib tauj kauj, lcvd zivb liud Tinb huvb, zyrug pun Gxi zweid Jyenq uaq teij zwavj myenb Eang. Byaud yaag fib Navq Eei pun Gxi, ziuj kx'g myenb xij Zamq fai zo'g.

12zwavj myenb zyrug Eang peuq Revg. ye-su Buaj ninb Eei saib kxj Bua, “mivb syru Eang zevg uaq teij taaib, maiq tuvq kwavg yetg aaj.” 13tovb uaq teij pyaa nxm Fuaq zwavj myenb Eang peuq Revg, mq paag saib kxj Bua cvj syru zevg uaq teij tapq pwavq zyepg Eeig nxm Daan.

14zwavj myenb pwatg ye-su zruj naaiq Euvg Bua'g hxvb Eei sig, ninb Bua kxvq, “naaiq se xij taaib Tauj paamb ken uaq taub trug waag myenb a'q.”#6:14 peiq mavg yo-han 1:21. 15ye-su hiuq tu'q myenb xij taaib zx'q ninb, aapq ninb zruj huvb, ninb kanb zyrug simq Gxi cvj faauj uaq Jiaj Bov mig a'q.

ye-su yavb uamb ming

(peiq mavg matq-Taai 14:22-33; maa-Ko 6:45-52)

16luvb maanb Mwavj teij, ye-su Eei saib kxj Bua Fiag Tauj Kxib Len, 17pia'g Ravq huvj Jyenq mivb uaq vaang zi'g Kxiq, Kaa-pe-naa-um muvq. uaq zang, zuvq Mwavj a'q. ye-su yaag maiq kcvb Tauj ninb Bua uaq. 18uaq zang pxvd kxv tomb Ryaauj pwrng Kxiq Jiad laavg. 19saib kxj Bua Rcv Ravq mivb pyaa Ju'q ki-lo Eei txvj, pwatg ye-su yavb uamb ming taaib nitq fatq ninb Bua Eei Ravq, hc'q ninb Bua kamb Riaj haig. 20ye-su Buaj ninb Bua, “maiq tuvq kamb Riaj. se tovb yia a'q.” 21saib kxj Bua zyrug a'Neiq zipq ninb pia'g Ravq. Ravq lyemb zeib Tauj ninb Bua xij mivb uaq nxm txvj mig a'q.

zwavj myenb lxd ye-su

22ta'Eeig Nxi Zxg yem uaq vaang zi'g Kxiq uaq teij zwavj myenb hiuq tu'q yem uaq Kuvj maaib Du'g Pruj Ravq Navq. ye-su yaag maiq zeid Zauj ninb Eei saib kxj pia'g uaq Pruj Ravq, Kuvj saib kxj Bua kanb mivb Navq. 23maaib teij Ravq yem Ti-Be-lyetq muvq taaib tivb Jyenq uaq Kxib Len, nitq zyruq zx'q Fuaq lcvd zivb liud Tinb huvb zyrug pun zwavj myenb Eang uaq nxm txvj. 24zwavj myenb pwatg ye-su Zauj saib kxj Bua maiq yem naaig, ninb Bua zyrug pia'g uaq teij Ravq mivb Kaa-pe-naa-um muvq lxd ye-su.

ye-su zruj yuvd mcvg Eei Eang hopq

25zwavj myenb lxd pwatg ye-su yem uaq vaang zi'g Kxiq ninb Bua naaig, “finb scv aa'b! zyavb haaij taaib Tauj naaiq?”

26ye-su tau, “yia kxvq zyen Buaj meib Bua, meib Bua lxd yia maiq zeid laaij pwatg yia zruj Bua'g hxvb Eei Javb hog, se weig zu'g meib Bua tu'q Fuaq Eang peuq. 27meib Bua maiq tuvq Zwrtq Qa'q lxd haib waaig Eei Eang hopq. xij zu'g lxd pun myenb tu'q yetg liud Eei mcvg uaq Euvg Eang hopq. yia, paamb myenb Eei txn, xij pun naaiq Euvg Eang hopq meib Bua, weig zu'g yia Eei tia, Tinb huvb, Jiu hatg maad pun yia, Navq Bx'q Jyenq yenj nx, pun Ziv yia hxpg Revg ninb Eei Hruq.”

28ninb Bua zyrug naaig ye-su, “yia Bua xij zu'g zruj haiq Euvg Zivj funj Tinb huvb Eei kov?”

29ye-su tau, “Tinb huvb xij meib Bua zruj Eei kov se xij zu'g syenj ninb Paaiq taaib uaq taub.”

30ninb Bua zyrug Buaj ye-su, “uaq Euvg meib xij zruj haiq Euvg Bua'g hxvb Eei Javb hog pun yia Bua pwatg zyrug haib syenj meib? meib xij Navq haiq nx zruj? 31yia Bua Eei ovb Taaij yem teib puvb Waav tu'q Eang maa-naa Navq kivb sru fiaq Jyenq kxvq, ‘ninb pun yem luvb taaib Eei Eang hopq ninb Bua Eang.’+”#Zwrtq i-yipq 16:4,15; ne-haa-mi 9:15; sivj Ruv 78:24

32ye-su Buaj ninb Bua, “yia kxvq zyen Buaj meib Bua, se maiq zeid mo-se pun yem luvb taaib uaq Euvg zyen Eang hopq. se yia Eei tia zx'q yem luvb Eei zyen Eang hopq Jiu pun meib Bua. 33weig zu'g Tinb huvb Eei Eang hopq se tovb yem Tinb txvb Fiag taaib pun paamb myenb tu'q zyavb Jyenq uaq taub.”

34ninb Bua kxvq, “finb scv aa'b! Toq zanb zang pun naaiq Euvg Eang hopq yia Bua maa'b!”

35ye-su Buaj ninb Bua, “yia kanb se yuvd mcvg Eei Eang hopq. haiq taub taaib lxd yia, uaq taub yetg liud maiq vxg. haiq taub syenj yia, uaq taub yetg liud maiq Gaatq. 36mq paag Navq yia Buaj Jiaj meib Bua nx, meib Bua pwatg Jiaj yia yaag maiq syenj. 37ta'faanb yia Eei tia Zeij pun yia Eei myenb yetg zuvq xij taaib lxd yia. haiq taub taaib lxd yia, yia yetg liud maiq kwavg. 38weig zu'g yia yem Tinb txvb Fiag taaib mq paag maiq zeid sweib yia kanb Eei eij zruj. yia taaib zruj ei Paaiq yia taaib uaq taub Eei eij Navq. 39Paaiq yia taaib uaq taub Eei eij se Navq naaiq. tovb ninb Zeij pun yia uaq teij myenb, ninb maiq xij yia pun laaib zitg yetg taub. Tauj Ga'haaq laai uaq Nxi, xij yia pun ninb Bua yetg zuvq navb taaib. 40weig zu'g yia Eei tia Eei eij se Navq naaiq. haiq taub pwatg ninb Eei txn, yaag syenj Kauj ninb Eei txn, uaq taub zyrug tu'q yetg liud Eei mcvg. Tauj Ga'haaq laai uaq Nxi yia yaag xij pun ninb navb taaib.”

41yiu-Tai myenb zyrug vopq ye-su weig zu'g ninb kxvq, “yia se yem Tinb txvb Fiag taaib Eei Eang hopq.” 42ninb Bua kxvq, “naaiq taub se yo-sepq Eei txn, ye-su, maiq zeid? ninb Eei tiaj maag Bua hiuq tu'q Eei. ninb Navq haiq nx haib kxvq ninb yem Tinb txvb Fiag taaib?”

43ye-su tau ninb Bua, “meib Bua maiq tuvq vib vuvj vopq Eei maa'b! 44maiq maaib haiq taub haib taaib lxd yia Zwrtq liud zavg tiaj, tovb Paaiq yia taaib uaq taub, yua'g ninb taaib. haiq taub taaib lxd yia, Tauj Ga'haaq laai uaq Nxi yia zyrug pun ninb navb taaib. 45trug waag myenb Eei sru fiaq Jyenq kxvq, ‘Tinb huvb kanb xij Faauj ninb Bua yetg zuvq.’#i-saa-yaa 54:13 haiq taub haid zavg tiaj Eei waag yaag ho'g hiuq Eei, ninb Bua yetg zuvq xij taaib lxd yia. 46naaiq maiq zeid kxvq maaib haiq taub tu'q pwatg Jiaj zavg tiaj. Kuvj yem Tinb huvb taaib uaq taub tu'q pwatg Jiaj zavg tiaj Navq. 47yia kxvq zyen Buaj meib Bua, haiq taub syenj yia, uaq taub maaib yetg liud Eei mcvg. 48yia zruj yuvd mcvg Eei Eang hopq. 49meib Bua Eei ovb Taaib vc'q yem teib puvb Waav Eang maa-naa mq paag ninb Bua taig mig a'q. 50haiq taub Eang yem Tinb txvb Fiag taaib Eei Eang hopq maiq zu'g taig. 51yia zruj zyavb Jyenq Eei Eang hopq yem Tinb txvb Fiag taaib. haiq taub Eang naaiq Euvg Eang hopq, uaq taub tu'q yetg liud zyavb Jyenq. yia pun Eei Eang hopq se tovb yia kanb Eei xq weig pun paamb myenb tu'q zyavb Jyenq.”

52yiu-Tai myenb haid naaiq teij waag zyrug Rcv Jiad Jaaj taaib kxvq, “naaiq laanb myenb Navq haiq nx haib pun ninb Eei xq Bua Eang?”

53ye-su Buaj ninb Bua, “yia kxvq zyen Buaj meib Bua, sij kxvq meib Bua maiq Eang paamb myenb Eei txn Eei xq, yaag maiq hopq ninb Eei Ryaamq, yem meib Bua ka'Euad maiq maaib zyavb mcvg a'q. 54haiq taub Eang yia Eei xq, hopq yia Eei Ryaamq, uaq taub maaib yetg liud Eei mcvg. Ga'haaq laai uaq Nxi yia yaag xij pun ninb navb taaib. 55weig zu'g yia Eei xq Zauj yia Eei Ryaamq se zyen Eang hopq. 56haiq taub Eang yia Eei xq yaag hopq yia Eei Ryaamq, uaq taub Zauj yia Jwavg mcvg zyavb. yia yaag Zauj uaq taub Jwavg mcvg zyavb. 57zyavb Jyenq Eei zavg tiaj Paaiq yia taaib, yia yaag weig ninb tu'q zyavb Jyenq. Navq naaig, haiq taub Eang yia Eei xq, uaq taub yaag weig yia tu'q zyavb Jyenq. 58naaiq se yem Tinb txvb Fiag taaib Eei Eang hopq. se maiq Navq Bua Eei ovb Taaij Eang Eei maa-naa. Eang liud Zxg haib taig Eei. mq paag haiq taub Eang yem Tinb txvb Fiag taaib Eei Eang hopq zyrug tu'q yetg liud zyavb Jyenq.” 59ye-su kxvq naaiq teij waag uaq zang ninb yem Kaa-pe-naa-um muvq Eei wig txvb Faauj myenb.

myenb Zamq Eei Twij prug

60ye-su Eei saib kxj Zamq Eei haid liud naaiq teij waag zyrug kxvq, “naaiq teij Faauj Eei waag za'kevb a'g tu'q haig. haiq taub haib mwavj tu'q lcb?”

61ye-su hiuq tu'q ninb Eei saib kxj Navq naaiq nx vopq naaiq teij waag zyrug kxvq Buaj ninb Bua, “laaij yia kxvq naaiq teij waag meib Bua haid xij Twij prug fai? 62uaq Euvg sij kxvq meib Bua pwatg yia, paamb myenb Eei txn, faauj Tauj zinb Daavg yem Eei txvj, meib Bua Navq haiq nx? 63se sivj livb pun myenb maaib zyavb mcvg. paamb myenb maiq haib pun myenb maaib zyavb mcvg. yia kxvq Eei waag haib pun meib Bua tu'q sivj livb. sivj livb yaag pun meib Bua tu'q zyavb mcvg. 64mq paag meib Bua maaib teij maiq syenj.” weig zu'g ye-su yem kxn mtaaib hiuq tu'q uaq teij myenb haiq taub maiq syenj ninb, haiq taub xij maaig ninb. 65ninb zyrug kxvq, “weig naaiq yia kxvq Jiaj Buaj meib Bua Eei, Zwrtq liud zavg tiaj pun taaib uaq teij, maiq maaib haiq taub haib taaib lxd yia.”

66yem naaig taaib ye-su Eei saib kxj Zamq Eei Twij prug, maiq kan ye-su a'q.

67ye-su zyrug naaig kaaj uaq teij zyepg Eeig taub saib kxj, “meib Bua yaag xij kwavg yia fai?”

68si-mon pi-te tau, “zyruq aa'b! yia Bua xij zu'g mivb kan haiq taub? se tovb meib kanb Eei waag haib pun myenb tu'q yetg liud Eei mcvg.#matq-Taai 16:16; maa-Ko 8:29; lu-kaa 9:20 69yia Bua syenj yaag hiuq tu'q meib zruj Tinb huvb Eei Zivb Revg myenb.”

70ye-su tau, “yia kinq meib Bua zyepg Eeig taub maiq zeid? mq paag meib Bua maaib taub zruj Yiab kwaiq myenq.” 71ye-su Navq naaiq nx kxvq se kxvq zu'g si-mon i-saa-Kaa-li-otg Eei txn, yu-Daatg. maiq kunq ninb zruj uaq teij zyepg Eeig taub saib kxj Eei yetg taub, Ga'haaq ninb maaig ye-su.

Valgt i Øjeblikket:

yo-han 6: IuMiNOR

Markering

Del

Kopiér