Mateo 11

Juan Bautista ichrꞌán iso sin tsjitsjehe Jesús

(Lc. 7:18-35)

1Ndá ti ó kjuixin kjua̱ko̱he̱ chꞌin Jesús ti teyó sin kꞌuájiko chꞌan, ndá sákjuí chꞌan iso chjasin siín chjinaxón ntiha, sákjuikjako chꞌan.

2A̱ndá chꞌin Juan mé tjechjina chꞌan ndo̱echjiso, la kuíhin chꞌan nkexra̱ tjechꞌe Cristo. La ichrꞌán chꞌan yaá ti sin kꞌuájiko chꞌan kixin sátsjitsjehe sin ti chꞌin Jesús. 3Ndá kjuíji sin ntiha la kjuanchankí sin, ndáchro sin:

―¿Á jaha ti nkexro tjejóchóheni itsi ní o̱ á na̱xa̱ tsochóheni íjnko nkexro? ―ichro sin.

4Ndá kjuáte̱he chꞌin Jesús, ndáchro:

―Sátjira la chenkara Juan ti nkehe kꞌuíkonra la ko ti nkehe kuihínra. 5#Is. 35:5, 6; Is. 61:1.*Kixin ti sin kuékꞌikonhña la ó tꞌikon sin, ti sin xitjahya kꞌuékji la ó itji sin, ti sin kꞌuéchónta chin lepra la ó kuito̱he sin jína la ko ti sin kꞌuékienhña la ó tihin sin ijie. Kja̱xin ti sin tsíkꞌen la xechón sin la ko ti sin nóa la ó tihin sin ti itan jína tsaáxin sin. 6Méxra̱ Díos sincheñao ti nkexro kohya nkehe tꞌinkákonhe̱n kixin tinkáchónki ti janhan.

7Ndá ti ó sákjuí ti sin kꞌuájiko chꞌin Juan, la chꞌin Jesús kjuankíxin nixje̱he̱ chꞌan ti sin kꞌuejó ntiha, kuènté chꞌin Juan, ndáchro chꞌan:

―Ti ó sákjuíra nte̱je̱ la, ¿nkehe kꞌuíkonra? ¿Á kꞌuíkonra ijnko nkexro itjen éxi itji nchexráye̱he xri̱nto̱ ní? 8Ti náhí, la, ¿nkehe kꞌuíkonra? ¿Á kꞌuíkonra ijnko nkexro tsíkꞌitsá jína ní? Náhí, kixin ti chojni tꞌitsá jína la tjejó sin ijnko palacio náxrjón kuènté rey. 9¿Ndá nkehe kꞌuíkonra? ¿Á ijnko nkexro chronka itén Díos ní? Jeén, chaxín tíha, la ko a̱ntsí tꞌe̱to̱an chꞌan ke ti sin kꞌuéchronka itén Díos ósé. 10#Mal. 3:1.*Ti chꞌin Juan, mé ti nkexro chrónka ti xroon itén Díos ósé. Ndáchro:

Janhan tsochrꞌan ijnko nkexro tsjasiyóxin ti nti̱a kuénta̱na tsochronka ti itan jína.

11Chaxín tjo̱nka̱ra kixin kaín ti nkexro kꞌuejó senó la kanhñó tjetoan ke chꞌin Juan Bautista. Kjánchó ijnko nkexro, kjónté tjetuanhña ijie, la ti ó tsꞌáyéhe̱ sin ti kjuachaxin kuènté Díos itjen nkaya nka̱jní, la a̱ntsí tsochónta sin kjuachaxin ke ti chónta chꞌin Juan.

12 # Lc. 16:16. *’Ndesi ikui chꞌin Juan Bautista hasta ijie la siín chojni nínkakohen ti kjuachaxin kuènté nkaya nka̱jní la jehó ti chojni tsjacha tsꞌatsínka kaín ti nkehe náxrjónhña mé tsjacha tsji̱chréhe̱ Díos. 13Kaín ti sin profeta la ko ti ley kuènté Moisés la jehó chrónkaxín nkexrín tjen ti kjuachaxin kuènté Díos hasta ikui chꞌin Juan. 14#Mal. 4:5; Mt. 17:10-13; Mr. 9:11-13.*Ti tsitekáonra o̱ náhí la chꞌin Juan mé Elías kixin ti chꞌin Elías la ticháxi̱n chrókui ínaá. 15Ti nkexro tjinkaon tsihin la chrókuihin jína.

16’¿Nkexrín chrókjui̱ntayóa̱xian ti chojni tjejó ijie? Jehe sin mé yóhe̱ ti chájan tjejótja̱xi̱n ndasin tsítán la tꞌéye̱he̱ sin kícho ndáchro: 17“Kꞌuánoani flauta, kjánchó jahara la tehyara. Itsjeni isón kuènté chojni tsíkꞌen la tsja̱nkahyara.” 18Kixin ikui chꞌin Juan la kjoniehña la ko kꞌuihya ninkehó, la ndáchrora kixin chónta chꞌan ncha̱kuén jínahña. 19A̱ndá ti ó ikui ti Xje̱en Díos kꞌóna Chojni, la kjónie chꞌan la ko ikꞌui chꞌan, ndá ndáchrora kixin imá itsjé kjónie chꞌan la imá ikꞌui chꞌan la tꞌiton chꞌan ti chojni chónta ijie̱ la ko ti sin nchekjènki̱. Kjánchó ti ixra̱ jína ichꞌeni mé tja̱ko̱xi̱n ti kjuaxrexinkaon kuènté Díos.

Ti chjasin titekakonhña

(Lc. 10:13-15)

20Ndá chꞌin Jesús nixje̱he̱ ti chojni siín ti chjasin ntiha kixin nchónhña kjuaxroan kjuasixín chꞌan ntiha, la kjónté xi̱kaha, la na̱xa̱ chaxínhña kuitekaon sin Díos. La ndáchro chꞌan:

21 # Is. 23:1-18; Ez. 26:1—28:26; Jl. 3:4-8; Am. 1:9, 10; Zac. 9:2-4. *―¡Nóira jahara tjejora Corazín la ko jahara tjejora Betsaida! Ti chrókꞌuixixín kjuaxroan Tiro la ko Sidón éxi kꞌuíkonra jahara, la tjoka chrókuíto̱he sin ti iji̱é sin, la chrókjua̱ko̱xi̱n sin chrókꞌuinkáya sin ika tié la ko chrókjuinchekꞌia sin nteso cuerpoé sin. 22Méxra̱ ndáxrja̱n kixin ti ña̱o tsito̱exín iji̱é chojni, la jahara a̱ntsí tsjasótiara ke ti sin chjasin Tiro la ko Sidón. 23#Is. 14:13-15; Gn. 19:24-28.*Ndá jahara chjasin Capernaum tjénka̱yáxinra kixin imá nohara la sátsjíra nkaya nka̱jní, kjánchó sátsjira tsjasótera ti siín ti chojni tsíkꞌen. Ti chrókjuásian ti kjuaxroan kꞌuíkonra Sodoma éxi kjuásian chjasánra la ti chjasin la na̱xa̱ chrókꞌuitjáñahña sin, chrókꞌuejó sin ijie, kixin tjoka chrókuitekaon sin. 24#Mt. 10:15; Lc. 10:12.*Méxra̱ ndáxrja̱n kixin ti ó sinchekito̱exín Díos iji̱é chojni la a̱ntsí tsjasótiara ke ti chjasin Sodoma.

Xrákira ti itjén janhan la tso̱kꞌáhara

(Lc. 10:21-22)

25Ndá ti ña̱o a chꞌin Jesús nixje̱he̱ Díos ndáchro:

―Tja̱ha kjuasáya Itꞌéni Díos, jaha této̱an nka̱jní la ko chjasintajni, kixin jaha kjuájonhña kjuachaxin chrókꞌuitja ti sin imá nohe ti itan, la kjuánjua kjuachaxin kixin tsꞌitja ti sin noehña. 26Mé xi̱kaha kjuénka̱yáxian, Itꞌéni, kixin kóxríhan xi̱kaha tso̱hen ―ichro chꞌan.

27 # Jn. 3:35; Jn. 1:18; 10:15. *La kja̱xin ndáchro chꞌan:

―Tꞌaná mé kjuajon kaín nkehe la kohya ninkexró chaxín chóxin ti Xje̱en Díos, jehó ti Itꞌé chꞌan, la kohya nkexro chóxin ti Itꞌé chꞌan, jehó ti Xje̱en chꞌan la ko ti sin tsíkjeyá chꞌan kixin tsochóxin sin ti Itꞌé chꞌan. 28Xrákira ti itjén janhan kaínra tsíkꞌóxrjéra tjejochꞌera ixra̱ la yámára nkehe iye, a̱ndá janhan tsakjijinhanra ti nkehe iye yámára ndá kjuaxróxin tso̱kꞌáhara. 29#Jer. 6:16.*Tákjára ti ixra̱ tja̱hára la tꞌitjára ti nkehe kuénta̱na kixin janhan la jína a̱sená la ntankehya, la xi̱kaha tsꞌitjára nketí tso̱kꞌèxín a̱sánra. 30Kixin ti ixra̱ tja̱hára la xra̱hya la ko ti nkehe tsamára la yehya.

Valgt i Øjeblikket:

Mateo 11: poeNTplus

Markering

Del

Kopiér