Yohane 19

1Pakiso Pailatŋo raki, Yesu ma ari kumunamŋo qekoi. 2Kawali ŋei eŋe sitman wakelerop, yewaŋo ŋei waom marok oŋaine mane mau pakiso lewino birakau ketke, eso takot suwaine kiroine weŋemka mane ma birakau ketke. 3Paki eŋe Yesu wano sari rakoi, “Yuda ŋei eŋane ŋei Waom naso kiroroine ge arinom!” Eso eŋe wau paki metetabeŋo qekoi.

4Pailat eŋe koso manerop zinge qeinat ŋei ŋerep magu eŋano waketki paki edane rake, “Kau, na eŋe baŋ iwa ŋinano ma saketpe ŋine kaikei, na dongo birakaikei wane kine mane mi maratkamaile.” 5Eso Yesu eŋe mat koto ŋine inat ketke, marokine sitman wakelerop so takotine weŋemka yewaŋo biraso, Pailatŋo edane rake, “Kau! ŋeimde iwa!”

6Pris ŋetne so tebe ŋei diyam gege eŋe kau paki qazom mane rakoi, “Kibeŋ qabego qenom seukkep! Kibeŋ qabego qenom seukkep!”

Pailatŋo edane rake, “Ŋidom ma ariu paki, kibeŋ qabego qeu, na sotine mane mi marat kamaile.”

7Yuda ŋei eŋe mainge olale rakoi, “Ŋenane ra rokop don mane pamaike. Yewaŋo ramaike yemo ŋei yewa eŋe seukeyake, onoka wane eŋe eŋinane na Kaisale wane Gipole ra okanmaike eya wane.”

8Pailat eŋe don iwa rau detongi paki zok manerop kaetkake. 9Paki eŋe koso matkoto zinge waket Yesu qesonka rake, “Ge deoŋine sarikone?”

Ŋo Yesu eŋe don mane mi mainge olatke. 10Pailatŋo olale rake, “Ge mi nolasikene me? Detmaine, na siwot ganbe arikenane, so rakok ganbe kibeŋ qabego gekuwi okorake nane zonom weneŋ kutno pamaike.”

11Yesuŋo mainge olatke, “Ge zonom yewa weku, yemo onoka wane Kaisaleŋo gingane na maket bira nanmaine, eya wane ŋei waom maŋo na neuki paki, geŋane meto bira nanike, eŋane sotine yemo zok suwaine.”

12Pailat eŋe don iwa detki paki numa mane maratka Yesu siwotkayakane okange. Ŋo Yuda ŋei eŋe mo qazom okane mainge rakoi, “Ge ŋei yewa siwot kanom ariyakeo, yemo ge Sisa wane kimaine mi gekene! ŋei mane eŋe na ŋei waom rayake, eŋe Sisa wane ŋabaine!”

13Pailat eŋe don iwa korop detwareki paki, Yesu ma qeinat waketke. Paki ket don wano wanok wane kito met met mane eŋetne “Wesi Surawet” yewao metke, Hibru eŋane dongo eŋetne “Gabata.” 14Kepe deine mo oŋabango okaniyakane okange qaekimo Yuda ŋei eŋe Loloŋon Loloŋon Peyada mesikei. Pailatŋo Yuda ŋei edane rake, “Iwa ŋinane ŋei Waom!”

15Eŋe qazom manbi paki mainge rakoi, “Eŋe qenom seukkep! Eŋe qenom seukkep! Eŋe kibeŋ qabego biriŋŋo rasukanom!”

Pailatŋo qeson one rake, “Ŋine ŋei waomŋine noŋo kibeŋ qabego biriŋŋo rasu kakalane ŋunmaike?”

Pris ŋetne eŋe mainge rakoi, “Ŋene ŋei waomze weku gemaike, yemo Sisa!”

16Pakiso Pailat eŋe Yesu kibeŋ qabego qekei wane eŋane meteeno birakake.

Yesu Kibeŋ Qabego Rasukakoi

17Eso eŋe Yesu mau paki, warekau erinat waket more, eŋine kibeŋ qabeŋ tewekke, paki ari kepe mane, eŋetne “Lewe Setne”, yewa lotkekoi, Hibru eŋane dongo “Golgota.” 18Yewa eŋe kibeŋ qabego rasukakoi paki, eŋe yale waka ŋei etke kibeŋ qabego weneŋ rasuotkoi, mane nat, mane nat, ŋo Yesu eŋe keuwetno. 19Pailatŋo don mane iwa yale dapore desikei wane qeki paki, kibeŋ qabego rasuki okorake, “Yesu Nazaret matko ŋine, Yuda eŋane ŋei waom.” 20Yuda ŋei loutneŋo don yewa dapore det okangoi, onoka wane Yesu kibeŋ qabego qekoi, kepe yewa yemo mat suwainane osino pakane, eŋe yale okangoi. Don qeke yewa yemo Hibru dongo, Latin so Grik dongo. 21Yuda ŋei ŋetne eŋe Pailat olale rakoi, “ ‘Yuda eŋane ŋei Waom’ yale mi qenom, ge iwa yale qenom, ‘Ŋei iwa eŋe rake, na Yuda eŋane ŋei waom.’ ”

22Pailatŋo mainge rake, “Na don mo qile, wane siluŋ don yewaŋoka payake.”

23Kawali ŋei eŋe Yesu kibeŋ qabego qeu paki, ŋadino eŋe takotine ma more, mapokeu sisine etke so etke okange, kawali ŋei eŋe weku weku makoi, eŋe takot suwaine lap lap wekuŋo mamaine, samapine midaine eya yaleka makoi. 24Pakiso kawali ŋei eŋe auye rakoi, “Ŋene takotine suwaine iwa misuk kito barak-kene, ŋene wezu qeŋem paki kaŋem, baŋ maŋo maine mayake.” Masi iwa yemo Kaisale wane ekapko don mane iwa yale pamaike, eya wele okaniyakane yale wakonge,

“Eŋe naŋane sola qekatne damo qe ama nagukoi so naŋane takotne suwaine yewa wane wezu qekoi.”

Eso kawali ŋei eŋe eya mo yalewa okangoi.

25Yesu wane kibeŋ qabeŋ osino okorakoi yemo Yesu eŋine nagaine, qaine, Mariya, Kelopas ŋanomine, so Mariya Magdalena. 26Yesu eŋe eŋine nagaine so medeune eŋaneka simile kamageke, yewa okorakoik paki, Yesuŋo nagaine olale rake, “Ŋerep, iwa geŋane giponŋone.”

27Paki koso medepine olale rake, “Iwa geŋane nagaŋone.” Naso yewaoka medepine eŋe Mariya ma ari eŋine matko biraka more warekake.

Yesu Seukke

28Yesu eŋe mo detke, ukude wamo urata kine kine mo korop qoe waremaike, eso Kaisale wane ekapko don mane pamaike, eya wele okaniyakane Yesuŋo rake, “Na doku wane seukmaile.”

29Lase mane eya metke, kotine wain lewine ketkeleŋo watke metke, eŋe wain doku yewa lap lapŋo qe muruge more, eki qogino piseu paki, ma wiye piino kitokoi. 30Yesu eŋe wain yewa neki paki rake, “Mo qoemaike!”

Yale rakiso, ebine qasiyeki so seukke.

Yesu Ŋorok Ŋorokine Qebarakkoi.

31Pakiso Yuda ŋei eŋe Pailatŋo detongi, ŋeiwa kibeŋ qabego engukoi, eŋane kiyeene rutupkeu paki, kibeŋ qabego ŋine makok one kesikei wane olatkoi, eŋe yewa okangoi, yemo onoka wane eya nagapko, eso yalinane eŋe pareŋene yewa Peyadao taboŋ met met nasoo, kibeŋ qabego okorakei wane mi onge. Peyada naso yewa mo naso koboboine. 32Eso kawali ŋei eŋe ari more, ŋeiwa mane wane alakane kine rutupkekoi, pakiso koso ŋeiwa mane Yesurop weneŋ etkukoi, eŋane kine rutupkekoi. 33Paki eŋe Yesu wano sari kakoi, eŋe mo ikopka seukke, eya wane eŋe kine mi rutupkekoi. 34Kawali ŋei maneŋo bozamineŋo Yesu wane ŋorok ŋorokino qebarakkiso yewaoka weŋem so doku qake saketke. 35Ŋei mane weneŋ naso yewao okora deineŋo masi iwa kaki wakonge, oŋo don iwa detluke ra wakonmaikane, ŋine yale waka detluke maine malip kaikei, eŋe don rake yemo welekatne, so eŋe detmaike, eŋe don wele ra okanmaike. 36Masi iwa wakonge, yemo Kaisale wane ekapko don mane iwa yale pamaike, eya wele okaniyakane wakonge, “Eŋane setne weku mane baŋ mi rutupkekei.” 37Eso Kaisale wane ekapko don mane iwa yale weneŋ ramaike, “Ŋei ŋerep eŋe potpi waki, ŋeiwa ŋorok ŋorokine qe barakkoi, eŋe baŋ kaikei.”

Yesu Dukkakoi

38Yewa wane ŋadino Yosep, Arimateya matko ŋine, oŋo Pailat wano ari Yesu wane pareŋine mayakane olatke. Yosep eŋe Yesu wane medep geke, ŋo eŋe didiwo mi geke, onoka wane eŋe Yuda ŋei ŋetne eŋane kaet-kaki, siu siuko geke. Pailatŋo olale rake, Yesu wane pareŋine maine mayake, eso Yosep eŋe ari Yesu wane pareŋine makoke ma arike. 39Nikodima, eŋe mo alakanka ruwo Yesu kayakane arike, oŋo Yosep korop weneŋ arikoik. Eŋe doku mane qoune teine, eki etke erane weŋem etneŋo maturage mamaine, umatneine 30 kilogram, yewa weneŋ ma arike. 40Ŋei etke ere Yesu pareŋine maut paki, lap lap libekaŋo doku qoune teine eya mo Yesu pareŋine Yuda edom okan-maŋkoi yale okane so kawet kakoik. Yuda ŋei eŋe pareŋ duk onikei wane yalewa okane gekoi. 41Yesu qeu seukke, kepe yewaoka eu mane pake, yewao kem mane musele mau kuneneŋ pakane ŋei etke ere Yesu pareŋine eya yewao mosikei wane wet weku okane so kem yewao ŋei mane mi dukongoi, wane ere yewao dukkeik wane rakokkoik. 42Yuda eŋane peyada taboŋ met met naso mo bomileke, eya wane so kem eŋe ososop pake, yalinane ere Yesu wane pareŋine eya motkoik.

Valgt i Øjeblikket:

Yohane 19: onsNT

Markering

Del

Kopiér