Aposolo 6
6
Aposolo Qesiŋongei Wane Ŋei Sewen (7) Ma Wakonongoi
1Naso yewao Yesu wane dokoine doku tau tau magu zok loutne wakone suwa loule okane arikoi, Yuda doku tau tau magu natne eŋe Grik don ra gekoi, eso Yuda natne eŋe Hibru doku tau tau magu enŋene don ra gekoi, eya wane Grik don ra gekoi, eŋe Hibru don ra gekoi, eŋane detpi boriki rakoi, “Ŋine naso baŋem Yuda ŋei ŋerep ŋara wane seuke ma zuwaŋ okanmami, eŋe ŋara maine qesiŋon okanmami, ŋo Grik ŋenane ŋerep mala iwa ŋaokopene seuseune, eŋe yemo ŋara mi qesiŋon okanmami.” 2Eso eya wane aposolo 12, eŋe doku tau taune magukopene korop edorau sari lewageu edane rakoi, “Ŋene Kaisale wane don kisi maep rara yewa qelige more solaoken ŋara mato matok urata maŋem mi menageyake, 3eya wane kimakop, ŋine ŋei sewen (7) ŋinŋine keuŋino ŋine, eŋe eŋet biŋekene maine, kisi maeprop so Asuŋo kotoeno watke pamaike, so eŋe dereretene maine, onbi menaŋgi ma wakon onbi. Pakimo, ŋene ŋei yewa eŋe bira onŋem urata yewa naso baŋem warekei, 4Ŋo ŋedom yemo naso baŋem meŋe meŋen urata maikene so Waom wane kisi maep don yewaka ŋei ŋerep ra edan okanikene.” 5Don yewa rau, ŋei ŋerep korop eŋe aposolo eŋane don yewa detpi menaŋ wareke, pakiso, eŋe Stiwen ma wakonka bira kakoi, eŋe mali malipine togogole so Asu Koboboineŋo kotino waket pake, so Pilip, Prokorus, Nikanor, Timon, Parmenas so Nokolaus, eŋe Antiok matko ŋine, eŋe lobo, ŋo eŋe mo sogino sari Yuda doku tau taune eŋane maguwo takotkeke. 6Eŋe ŋei eya ma wakon one more, aposolo eŋane kaiteno bira onbi okorakoi, paki eŋe meteene leweteno ma wa motpi paki, meŋenka mosop ongoi. 7Pakiso, Kaisale wane kisi maep donŋo ket suwa nat nat rokopke arike, eso ŋei ŋerep maguine maguine, eŋe Yerusalem yewao aposolo eŋane ŋadeeno doku tau tau magu loutneŋo ari takotke warekoi, so Yuda wane pris magu suwaine natne eŋe kisi maep don dere teweke malip kakoi.
Yuda Edo Stiwen Dongo Birakakoi
8Stiwen eŋe Kaisaleŋo qesiŋka more, mosop zok manerop mosopkake, so zonomine manerop wat watko qe watke mange, eya wane eŋe ŋei ŋerep eŋane keuweno masi kine kine suwaine so togogole zok make. 9Ŋo ŋei natne eŋe wiyeu paki, Stiwen gorop donŋo yakukoi, ŋei yewa eŋe Yuda eŋane lewa lewaŋ urum eya wane magu, eŋetene, “Yuda Ŋei Yaup gegine eŋane Lewa Lewaŋ Urum,” yale orakoi. Ŋei yewa eŋe Sairin matko ŋine, Alekzandriya matko ŋine, Silisiya kepeo ŋine so Isaiya kepeo ŋine. 10Ŋo Asuŋo yemo Stiwen dereret maine so koboboine zok manerop mangane, eŋe don raki, ŋei eŋe donŋo qekei wane zok manerop makararapkakoi. 11Paki, eŋe isiu paki, ŋei natne sanka wetko ket okanonbi rakoi, “Ŋei yewa eŋe Mose so Kaisale don qotkoine ra etoraki, ŋene det kakone.” 12Eŋe tanik yale okane ŋei ŋerep magu so ŋetne mama, so ra rokop don kito ebo ebon wane ŋei, wetene qe pokkoi, pakiso, eŋe Stiwen wano ari kitatka malipka tebaka Kaunsol eŋano ma arikoi. 13Eso eŋe ŋei natne isi don Stiwen wane aŋao more raikei wane bira ongoi, eŋe iwa yale rakoi, “Ŋei iwa eŋe naso baŋem ŋene detkaŋem Kaisale wane Mat Kobekine iwa so ra rokop don erane don borikine eya naso baŋem qik ore more ra okanmaike, 14Ŋene detkaŋem, eŋe iwa yale rake, ŋeiwa yewa Yesu Nazaret welaine, oŋo mat Kobekine iwa baŋ mataliki siukeyake, so Moseŋo ra rokop donba ŋebonge, yewa baŋ weneŋ ma papkayake, yale rake!” 15Pakiso, ŋei korop Kaunsol urum kotino metkoi, eŋe deene Stiwenka kalilip kakoi paki, eŋe kau de kaitine yewa korop aŋelo mane wane de kait yale qelaŋane arike.
Valgt i Øjeblikket:
Aposolo 6: onsNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2012, Wycliffe Bible Translators, Inc. All rights reserved.