Lukas 13

Hloov Dua Siab Tshiab Lossis Raug Kev Tuag

1Thaum lub sijhawm ntawd, muaj qeeleej uas nyob ntawd qhia rau Yexus hais txog zaj uas Philaj tau muab cov neeg Kalilais tua thaum uas lawv tabtom tua tsiaj fij rau Vajtswv. 2Yexus thiaj teb lawv hais tias, “Nej xav tias, cov neeg Kalilais uas raug tua li ntawd, lawv muaj txim loj dua txhua tus neeg Kalilais no lov? 3Tsis yog li ntawd! Kuv qhia rau nej hais tias, yog nej tsis tso nej tej kev txhaum tseg, nej yuav tuag tas ib yam li lawv cov ntawd thiab. 4Nej xav tias kaum-yim leej uas lub chaw tsomfaj nphau los ntaus tuag tas hauv Xilau-as ntawd yog lawv ua txhaum loj dua txhua tus neeg uas nyob hauv lub nroog Yeluxalees no lov? 5Tsis yog li ntawd! Kuv qhia rau nej hais tias, yog nej tsis tso nej tej kev txhaum tseg, nej yuav tuag tas ib yam li lawv cov ntawd thiab.”

Zaj Lus Pivtxwv Hais Txog Tsob Txiv Ncuavpias Uas Tsis Txitxiv

6Yexus txawm hais ib zaj lus pivtxwv rau lawv mloog hais tias, “Muaj ib tug txivneej cog tau ib tsob txiv ncuavpias rau hauv nws lub vaj txivhmab. Nws mus saib seb puas txitxiv tiamsis tsis pom txitxiv li. 7Nws txawm hais rau tus uas tu lub vaj ntawd hais tias, ‘Saib maj, twb tau peb lub xyoos lawm uas kuv pheej tuaj saib tsob txiv ncuavpias no seb puas txitxiv, tiamsis tsis pom txi li. Ciali muab nws ntov povtseg! Uacas tseem yuav cia nyob ntxoov av ua dabtsi?’ 8Tiamsis tus uas tu lub vaj teb tias, ‘Tus tswv, cia nws nyob ib xyoos ntxiv; kuv yuav khawb av npoog thiab rau chiv rau. 9Yog lwm xyoo nws ho txitxiv lawm kuj zoo, yog nws tseem tsis txitxiv li thiab, koj mam muab ntov povtseg.’ ”

Yexus Kho Tus Pojniam Khoov Duav Hnub Xanpataus

10Muaj ib hnub uas yog hnub Xanpataus, Yexus tabtom qhia hauv ib lub tsev sablaj. 11Muaj ib tug pojniam uas nyob ntawd tau raug ib tug ntsujplig phem uas ua rau nws mob tau kaum-yim lub xyoos los lawm; nws ciali khoov duav thiab sawv tsis tau ntseg li lawm. 12Thaum Yexus pom tus pojniam ntawd, Yexus txawm hu nws los thiab hais rau nws tias, “Tus pojniam 'e, koj dim koj tus mob lawm lau!” 13Yexus txawm tsa tes rau saum tus pojniam ntawd, ces tamsim ntawd nws txawm sawv tau ntseg thiab nws ua Vajtswv tsaug.

14Tus thawj uas saib lub tsev sablaj txawm npautaws heev vim Yexus kho mob rau hnub Xanpataus, nws thiaj hais rau cov neeg uas nyob ntawd tias, “Twb muaj rau hnub rau peb ua haujlwm; yogli ntawd, nej yuavtsum tuaj kho mob rau cov hnub ntawd, tsis txhob tuaj rau Hnub Xanpataus!” #Khiav 20:9-10; 2Kev 5:13-14

15Tus Tswv teb tias, “Cov niag neeg ntsejmuag ncaj siabnkhaus! Hnub Xanpataus nej twb daws nyuj lossis daws nees cab tawm hauv nkuaj mus haus dej thiab los sav. 16Tus pojniam no twb yog Anplahas li cajces uas tau raug Xatas muab khi tau kaum-yim lub xyoo los lawm; es hnub Xanpataus tseem tsis tsimnyog daws kom nws dim thiab lov?” 17Yexus cov lus teb ntawd ua rau cov neeg uas tawmtsam Nws txajmuag heev. Tiamsis cov neeg uas pom tej txujci uas Yexus ua, lawv zoosiab kawg li.

Zaj Lus Pivtxwv Hais Txog Lub Noob Maxataj

(Mathais 13:31-32; Malakaus 4:30-32)

18Yexus nug hais tias, “Vajtswv lub Tebchaws zoo licas? Kuv yuav muab Vajtswv lub Tebchaws ntawd piv rau dabtsi? 19Vajtswv lub Tebchaws piv ib yam li ib tug txivneej nqa ib lub noob maxataj mus cog rau hauv nws daim teb. Tsob zaub ntawd ciali lojhlob tuaj thiab dhau mus ua ib tsob ntoo, thiab noog los ua zes rau saum tej ceg.”

Zaj Lus Pivtxwv Hais Txog Cov Keeb

(Mathais 13:33)

20Yexus rov hais dua hais tias, “Kuv yuav muab Vajtswv lub Tebchaws piv rau dabtsi? 21Vajtswv lub Tebchaws piv ib yam li cov keeb uas ib tug pojniam muab xyaw rau peb siab hmoov nplej, ces ciali ua rau cov hmoov nplej ntawd su tagnrho huv tibsi.”

Lub Qhovrooj Nqaim

(Mathais 7:13-14, 21-23)

22Thaum Yexus tabtom taug kev mus rau nram lub nroog Yeluxalees, Nws ibke mus ibke qhia tej neeg sawvdaws uas nyob hauv tej nroog thiab tej zejzog. 23Muaj ib tug nug Yexus hais tias, “Tus Tswv, cov uas yuav dim txim tsuas yog muaj tsawg-tsawg leej xwb lov?”

Yexus teb lawv hais tias, 24“Nej yuavtsum ua tiag txeem ntawm lub qhovrooj nqaim kom nkag tau mus rau sabhauv. Kuv qhia rau nej hais tias, muaj ntau leej yuav txeem kom nkag tau mus rau sabhauv, tiamsis lawv yuav mus tsis tau. 25Thaum tus tswvtsev sawv thiab los kaw qhovrooj lawm; ces nej yuav sawv sabnraud khob thiab hu hais tias, ‘Tus tswv, thov qhib qhovrooj rau peb thiab os!’ Nws yuav teb nej hais tias, ‘Kuv tsis paub xyov nej tuaj qhovtwg tuaj!’ 26Thaum ntawd nej yuav teb tias, ‘Peb twb nrog Koj noj Koj haus, thiab Koj twb tuaj qhia hauv peb lub nroog ne!’ 27Tus tswvtsev yuav rov hais rau nej hais tias, ‘Kuv tsis paub xyov nej tuaj qhovtwg tuaj. Cov niag neeg siabphem, nej ciali khiav tawm ntawm Kuv mus!’ #Nnkauj 6:8

28“Thaum nej pom Anplahas, Ixaj, Yakhauj thiab cov xibhwb cev Vajtswv lus txhua tus nyob hauv Vajtswv lub Tebchaws, thaum ntawd nej cov uas raug muab ntiab tawm rau sabnraud, nej yuav quaj qw tom hniav qees! #Math 22:13; 25:30 #Math 8:11-12 29Yuav muaj neeg tuaj sab hnubtuaj, sab hnubpoob, sab qaumteb, thiab sab qabteb tuaj zaum uake ntawm rooj noj rooj haus hauv Vajtswv lub Tebchaws. 30Thaum ntawd cov uas nimno nyob tom tw yuav tau mus nyob tom hauvntej, thiab cov uas nimno nyob tom hauvntej, yuav rov mus nyob tom tw.” #Math 19:30; 20:16; Malak 10:31

Yexus Txoj Kev Hlub Rau Cov Neeg Hauv Yeluxalees

(Mathais 23:37-39)

31Lub sijhawm ntawd, cov Falixais qeeleej tuaj cuag Yexus thiab hais rau Nws tias, “Koj ciali khiav tawm ntawm qhov no mus rau lwmqhov, vim Helauj xav muab Koj tua povtseg.”

32Yexus teb lawv hais tias, “Nej ciali mus qhia rau tus hma ntawd hais tias, ‘Hnubno thiab tagkis, Kuv tseem yuav ntiab dab thiab kho tej neeg muaj mob, hnub thib peb Kuv tes haujlwm mamli tiav.’ 33Txawm licas los xij, hnubno, tagkis thiab nagkis, Kuv yeej yuav tau taug kev mus; rauqhov tsis tsimnyog uas ib tug xibhwb cev Vajtswv lus raug tua tuag nyob sabnraud lub nroog Yeluxalees.

34“Yeluxalees, Yeluxalees! Koj muab cov xibhwb cev Vajtswv lus tua thiab muab pobzeb ntaus cov tubtxib uas Vajtswv txib los qhia koj! Muaj ntau zaug Kuv twb yuav muab koj cov menyuam los puag ib yam li tus pojqaib cuab nws cov menyuam los puag rau hauv nws qab tis, tiamsis koj ho tsis kam Kuv ua li ntawd! 35Saib maj, koj lub Tuamtsev yuav raug muab tsotseg thiab nyob nqha lug cia. Kuv qhia rau koj hais tias, koj yuav tsis pom Kuv mus txog hnub uas koj hais tias, ‘Thov Vajtswv foom koobhmoov rau tus uas los hauv Vajtswv lub npe los.’ ” #Nnkauj 118:26

Valgt i Øjeblikket:

Lukas 13: MWW2022

Markering

Del

Kopiér