San Mateo 2

Bexa ngwaꞌinaꞌ Jesús

1Leꞌa Jesús ngol gezh Belén ten distrit Judea, zha na nak Herodes xa nibeꞌe Judea. Weꞌe leꞌa lad nlen wizh utoꞌo pla bexa ndák, ulayaꞌ bexa gezh Jerusalén. 2Cha unabdiꞌizh bexa ndoꞌ be men, ndab bexa:

—¿Ma meꞌed ngol gak xa nibeꞌe ten bega xa judio zha? Leꞌa besa uniꞌí ulen mbeal ten xa lad nlen wizh. Ta weꞌe nseabe besa yankea besa xa.

3Leꞌa Herodes nsea itea bexa ndencho Jerusalén wa ni ko lá iniꞌí xteꞌe gun gor na mbiꞌín bexa ta wa. 4Cha mchealte Herodes itea be uleꞌay nibeꞌe no be mech ten ley ten bexa judio. Cha unabdiꞌizh Herodes ndoꞌ bexa ná pa nsabndoꞌ gal Cristo xa na ndiꞌizh ga utuꞌubka Dios. 5Leꞌa bexa wa cha ukaꞌab ndab:

—Leꞌa xa wa gal gezh Belén ten Judea, lak mkeꞌa dub xa mbidiꞌizh sakndoꞌ Dios tiemp polta, ndab Dios:

6Lu Belén, gezh ten Judá,

nsakka lu ndoꞌ itea be gezh ten Judá,

geal leꞌa Belén itoꞌo dub xa nibeꞌe,

xa ulaꞌach be xmen naꞌ bexa Israel.

7Leꞌa Herodes cha xgaꞌach utezh bexa ndák wa, cha unabdiꞌizh Herodes ná xá wizh na ned uniꞌí bexa mbeal wa. 8Cha mtuꞌub Herodes bexa wa gezh Belén, ndab xa:

—Waꞌbe bego, cha bkwaꞌan bega pa ncho meꞌed wa. Leꞌa gor mzheal bega meꞌed, cha gidyab bega‑yá ndoꞌ naꞌ, ndontsa no naꞌ gaa sa wa, cha gankeꞌa naꞌ meꞌed.

9Leꞌa gor na mbiꞌín bexa ta li ndab Herodes wa, leꞌa bexa cha utoꞌo nchaꞌbe. Leꞌa mbeal na li uniꞌí bexa lad nlen wizh wa cha nchaꞌa ned ndoꞌ bexa, cha ngwaꞌisaꞌab‑a sa ncho meꞌed wa. 10Leꞌa gor na uniꞌí bexa wa mbeal nsob sa wa, leꞌa bexa uzhebpa mten ladna. 11Cha uyote bexa len niꞌi wa, cha uniꞌí bexa meꞌed nsea Marí xnaꞌa meꞌed. Cha msaxib bexa ngwankea bexa meꞌed wa. Cha mxaꞌal bexa be caj noꞌo bexa, cha uloꞌo bexa pla be taꞌa uzhebpa uyap: be ta oro, no dub ta uxeꞌe ta nyolꞌ, no mirra. Cha msaꞌa bexa be ta wa ukaꞌa meꞌed‑a. 12Tsoꞌo wa leꞌa Dios ndab ndoꞌ bexa wa gor ndeyats bexa lá yach bexa ndoꞌ Herodes. Ta weꞌe cha nseaꞌ bexa lazh bexa ndi stub nes xaꞌaga.

Kosé no Jesús no Marí mxoꞌon nchaꞌa Egipto

13Leꞌa gor na nseaꞌla bexa ndák wa, leꞌa dub angel ten Dios mlundoꞌ ndoꞌ Kosé gor naxyats xa, ndab angel:

—Goste, cha biꞌi meꞌed baꞌ no xnaꞌa meꞌed. Bxoꞌon waꞌ nacion Egipto. Cha weꞌetsa uyoꞌo bega gast zha na gáp naꞌ yach bega, leꞌa Herodes ukwaꞌan meꞌed baꞌ gut xa meꞌed.

14Bi leꞌa teꞌal wa leꞌa Kosé cha utoꞌo no meꞌed no xnaꞌa meꞌed, nchaꞌbe bexa Egipto. 15Cha kwen uyoꞌo bexa sa wa gast ngut Herodes. Leꞌa be ta wa li ngok lak nkeaniꞌi diꞌizh ten Dios ta ndab dub xa sakndoꞌ Dios: “Uteꞌezh naꞌ xiꞌín naꞌ itoꞌo xa Egipto.”

Herodes nlad gat Jesús

16Leꞌa gor uniꞌí Herodes leꞌa bexa ndák wa yá lá yachtabe, cha uzhebpa ngokloo xa. Cha unibeꞌe xa ndoꞌ be soldad, ndab xa yaꞌyut bexa itea be meꞌed ncho top liꞌin, no gast be medoꞌo gezh Belén no be gezh nde gax sa wa. Li unibeꞌe xa geal leꞌa bexa ndák wa ndab mtopla liꞌin ulen mbeal wa. 17Li ngok ta wa lak mbidiꞌizh Jeremías sakndoꞌ Dios, ndab xa:

18Mgen dub ruid siꞌil gezh Ramá,

Uzhebpa nbezhat bexa no ndoꞌon bexa.

Leꞌa Raquel ndoꞌonno be xin na.

Yá lá kaꞌabta xa itayoꞌon, geal leꞌa be xin xa ngutbe.

Kosé myoꞌo Jesús nsea Marí gezh Nazaret

19Ngol tsoꞌo wa leꞌa Herodes ngut. Weꞌe leꞌa dub angel ten Dios mlundoꞌ ndoꞌ Kosé nacion Egipto gor naxyats xa, 20cha ndab angel:

—Goste, cha byoꞌo meꞌed baꞌ no xnaꞌa meꞌed leꞌaka nacion Israel, leꞌa bexa na nlad gut meꞌed baꞌ wa ngutlabe.

21Leꞌa Kosé cha ngwaste, cha myoꞌo xa meꞌed no xnaꞌa meꞌed leꞌaka Israel. 22Ná leꞌa gor na mbiꞌín Kosé leꞌa Arquelao xin Herodes myatsoꞌgal nibeꞌe Judea, cha mzheb xa yaꞌ xa sa wa. Leꞌa Dios cha uníꞌigal gor naxyats Kosé, ndab Dios lá yaꞌ xa Judea. Ta weꞌe cha nchaꞌa xa ndi distrit Galilea. 23Ngwaꞌ bexa yoo bexa gezh Nazaret, lak ndab bexa uyoꞌo polta sakndoꞌ Dios, ndab xa: “Leꞌa be men gab leꞌa xa dub xa Nazaret.”

Valgt i Øjeblikket:

San Mateo 2: zpt

Markering

Del

Kopiér