Yahiya 7

Si Isa duk meꞌ pungtinaꞌine lellahin

1Puwas inin, lumengngan si Isa si meꞌ kalahatan laꞌi si Jalil hadja. Gaꞌi iye mabayaꞌ pī si lahat Yahudiya peggeꞌ batang iye papatey meꞌ nakuraꞌ meꞌ Yahudi malaꞌihin. 2Manjari tapit ne pagkādjaꞌan meꞌ Yahudihin patennaꞌde dem meꞌ payad-payadin. 3Paꞌin meꞌ pungtinaꞌi si Isa lellahin si iye, “Hāp pe kew tahalaꞌ bittuꞌu. Subey kew pī si lahat Yahudiya duk isab takite meꞌ tindegnun meꞌ hinangnun. 4Peggeꞌ bang niyaꞌ aꞌa mabayaꞌ bantu, subey gaꞌi tapukanne meꞌ hinangannen. Peggeꞌ iyuꞌ kew maghinang meꞌ hinangan makaꞌulaliꞌ, subey kew pakite si meꞌ aꞌahin kēmon.” 5Bisan hep meꞌ pungtinaꞌinen, gaꞌi kahagad si iye. 6-7Manjari paꞌin si Isa si siye, “Gaꞌ pe taꞌabut waktu pamakiteku dikun. Bang kaꞌam, bisan waktu ine makajari peggeꞌ gaꞌi du kaꞌam kabunsihan weꞌ meꞌ aꞌa si dunyahin. Bu aku, kabunsihan ku weꞌ de peggeꞌ luwal siye paꞌinanku weꞌ meꞌ hinanganden laꞌat. 8Pī kaꞌam si Awrusalam si pagkādjaꞌan,” paꞌin si Isa si meꞌ pungtinaꞌinen. “Gaꞌi pe ku hap pī peggeꞌ gaꞌ pe taꞌabut waktukun.” 9Ubus inin bissāne, gaꞌ iye usaꞌ amban lahat Jalil.

Si Isa laꞌi si pagkādjaꞌan patennaꞌ meꞌ Yahudi dem meꞌ payad-payadin

10Paglumikut ne meꞌ pungtinaꞌinen hap pī si pagkādjaꞌan miyaꞌan, gaꞌ du tiggel paturul isab si Isa pī. Saguwaꞌ gaꞌ iye patuhut si meꞌ aꞌa maꞌekkahin hangkan gaꞌ niyaꞌ ngataꞌu papīnen. 11Pinagpiha iye weꞌ meꞌ nakuraꞌ Yahudihin laꞌi si pagkādjaꞌan. Magtilew siye bang antag iye. 12Ekka meꞌ aꞌa magkemot-kemot sabab si Isa laꞌi dem kaꞌekkahan meꞌ aꞌahin. Paꞌin sinduwehin, “Aꞌa hāp si Isa.” Paꞌin sinduwehin isab, “Dumaꞌin, iyuꞌ padupangne meꞌ aꞌahin.” 13Saguwaꞌ gaꞌ niyaꞌ missā binawag sabab si Isa, peggeꞌ tinalew siye si meꞌ nakuraꞌden.

14Pagsōng nengaꞌ ne pagkādjaꞌanin, hap pī si Isa si langgal hadjehin duk nagnaꞌ iye magtoloꞌ si meꞌ aꞌahin. 15Ulaliꞌ manamal meꞌ nakuraꞌ Yahudihin si panoloꞌ si Isahin. Paꞌinde, “Gaꞌ hatiꞌ aꞌa inin bakas ngadjiꞌ. Antag pangeddoꞌanne kataꞌune inin?” 16Sambungan si Isa siye, paꞌinne, “Panoloꞌkun dumaꞌin amban di kataꞌuku saguwaꞌ amban Tuhan, iye mamapitu akuhin. 17Bang aꞌahin ngatu ngahinang kinabayaꞌan Tuhanin, kataꞌuhanne du bang panoloꞌkun amban Tuhan ke atawa bang amban di pikilanku hadja. 18Bang aꞌahin missā amban di pikilanne, iye inapasnen kabantuhannen. Saguwaꞌ bang iye inapasnen weꞌ binantu mangandaꞌak iyehin, na, aꞌa iyan bentel duk gaꞌi iye ngakkal.” 19Paꞌin si Isa pe si meꞌ nakuraꞌ miyaꞌan, “Dumaꞌin ke pinangurung weꞌ si Musa si kaꞌam saraꞌin? Saguwaꞌ gaꞌ du niyaꞌ kaꞌam nuhut saraꞌin. Weꞌey ku batang papateybi?” 20Nambung meꞌ aꞌa maꞌekkahin, paꞌinde, “Iyuꞌ kew kasayedan. Sine batang mapatey kaꞌuhin?” 21Nambung si Isa, paꞌinne, “Mintedde du ku ngahinang hinangan makaꞌulaliꞌ baytu ellew liꞌi, na, iye ne inin pagulaliꞌanbin kēmon. 22Dinaꞌak weꞌ si Musa si kaꞌam inislam meꞌ anakbi lellahin. (Bu dumaꞌin hep amban si Musa daꞌakan inin saguwaꞌ amban meꞌ kapapuꞌanbin du.) Manjari bang taꞌabut ellew pagislamin, bisan tewwaꞌ si ellew liꞌi, inislam du weꞌ bi meꞌ anakbi lellahin. 23Kaꞌam hatiꞌ, magislam kaꞌam meꞌ anakbin bisan baytu ellew liꞌi supaya gaꞌi talanggalbi saraꞌ si Musahin, na weꞌey kaꞌam astel si aku peggeꞌ makoleꞌ ku aꞌa si ellew liꞌi? 24Daꞌa ku magtawus hukumun bi bang gaꞌi kaꞌam kapastiꞌan. Saguwaꞌ bang kaꞌam ngahukum, tuhutun bi hukuman mabentelin.”

Inin ne ke Almasihin

25Manjari niyaꞌ meꞌ aꞌa Awrusalam magbissā-bissā, paꞌinde, “Dumaꞌin ke inin aꞌa batang pinapatey meꞌ nakuraꞌin? 26Payamanun bi,” paꞌinde, “tiyaꞌ iye missā patampal saguwaꞌ gaꞌi du iye saggaꞌ meꞌ nakuraꞌin. Kahagad ne enteꞌ siye weꞌ iye ne Almasihin? 27Saguwaꞌ bang Almasihin pitu,” paꞌinde, “gaꞌi kataꞌuhan bang amban iye. Bu aꞌa inin, kataꞌuhante bi kēmon bang amban iye.”

28Magtoloꞌ pe si Isa dem langgal hadjehin, bu pinapales weꞌ ne suwalanen, paꞌinne, “Weꞌ kataꞌuhanbi ku teꞌed duk kataꞌuhanbi bang amban ku? Gaꞌ ku pitu amban di kabayaꞌanku. Dinaꞌak ku weꞌ Tuhanin pitu, duk gaꞌi iye magdustaꞌ. Gaꞌi iye kataꞌuhanbi,” paꞌin si Isa. 29“Saguwaꞌ aku, kataꞌuhanku iye peggeꞌ billaꞌi ku amban iye duk iye mangandaꞌak aku mapituhin.” 30Manjari batang ne iye siggewde, saguwaꞌ gaꞌ niyaꞌ bisan makaꞌantan iye, peggeꞌ gaꞌ pe taꞌabut waktu pamapatey iyehin. 31Saguwaꞌ ekka meꞌ aꞌa malaꞌihin kahagad pu si Isa. Paꞌinde, “Asal inin ne Almasihin. Peggeꞌ gaꞌ niyaꞌ aꞌa makahinang meꞌ hinangan makaꞌulaliꞌ labi amban meꞌ hininang si Isa inin.”

Meꞌ guwaldiya dinaꞌak niggew si Isa

32Pagkataꞌuhan weꞌ meꞌ Pariseohin bang ine kinemot-kemot meꞌ aꞌa sabab si Isahin, magtawus siye duk meꞌ nakuraꞌ meꞌ imamin ngandaꞌak meꞌ guwaldiya pī niggew si Isa. 33Manjari paꞌin si Isa si meꞌ aꞌa mapatipun si iyehin, “Gaꞌi ne ku tiggel tuꞌu si kaꞌam. Sōng ne ku moleꞌ pī si mangandaꞌak aku mapituhin. 34Pihabi du ku iyan, saguwaꞌ gaꞌi ku takasuwaꞌbi, peggeꞌ gaꞌi kaꞌam tapi si palaꞌihankun.” 35Manjari magbissā-bissā meꞌ nakuraꞌ Yahudihin, paꞌinde, “Sōng tungan hatu aꞌa inin hangkan gaꞌi iye takasuwaꞌte bi? Pī enteꞌ iye si meꞌ bangsate bi mapatennaꞌ si kalahatan laꞌi si lahat Girikin? Duk pī enteꞌ iye noloꞌan meꞌ bangsa Girikin? 36Paꞌinne weꞌ pihate bi iye saguwaꞌ gaꞌi koꞌ iye takasuwaꞌte bi. Duk gaꞌi koꞌ kite bi tapī laꞌi si palaꞌihannen. Ine enteꞌ hāti pinaꞌinne inin?”

Meꞌ boheꞌ makaꞌellum

37Kakapusan ellew pagkādjaꞌanin, iye ellew asal mahadjehin, nengge si Isa diyalem langgal hadjehin duk missā iye pinapales, paꞌinne, “Sine-sine kaꞌam lekkakan, pitu kaꞌam si aku duk paꞌinumte kaꞌam. 38Peggeꞌ tasulat dem kitab sabab aꞌa makahagad si akuhin; paꞌin kitabin, ‘Niyaꞌ nubud kuweꞌ dalil meꞌ boheꞌ amban dem ateyne, boheꞌ makapakellum.’ ” 39Boheꞌ manubud pinaꞌin si Isa inin, hātinen Niyawa Tuhanin sōng pinangurung ne si meꞌ makahagad si iyehin. Saguwaꞌ masa miyaꞌan gaꞌ pe tapangurung Niyawa Tuhanin, peggeꞌ gaꞌ pe taꞌabut waktu pamahadje si Isa weꞌ Tuhanin.

Magseddili tapikil meꞌ aꞌahin

40Pagkale meꞌ aꞌahin meꞌ bissā si Isa inin, paꞌin meꞌ sinduwehin, “Asal aꞌa inin ne nabi inagad-agadten bi.” 41Paꞌin meꞌ sinduwehin isab, “Inin ne Almasihin.” Saguwaꞌ niyaꞌ sinduwe magpaꞌin, “Dumaꞌin iye Almasihin. Peggeꞌ Almasihin dumaꞌin amban lahat Jalil. 42Paꞌin kitabin hep weꞌ Almasihin tubuꞌ Sultan Daꞌud duk subey iye inanakan si kalurnaꞌan Betlehem peggeꞌ iye miyaꞌan lahat si Sultan Daꞌudin.” 43Hangkan magseddili-seddili tapikil meꞌ aꞌahin sabab si Isa. 44Niyaꞌ siye mabayaꞌ niggew iye saguwaꞌ gaꞌ niyaꞌ bisan makaꞌantan iye.

Gaꞌi kahagad meꞌ nakuraꞌin

45Manjari balik ne meꞌ guwaldiyahin. Tinilew siye weꞌ meꞌ Pariseohin duk meꞌ nakuraꞌ meꞌ imamin, paꞌinde, “Weꞌey iye gaꞌ boꞌobi pitu?” 46Nambung meꞌ guwaldiyahin, paꞌinde, “Gaꞌ teꞌed niyaꞌ aꞌa bakas magtoloꞌ kuweꞌ panoloꞌ aꞌa miyaꞌan.” 47Sambungan meꞌ Pariseohin siye, paꞌinde, “Sampay kaꞌam tapadupang du isab weꞌ ne? 48Kami meꞌ Pariseohin, gaꞌ niyaꞌ bisan dangan kami kahagad si iye. Duk meꞌ nakuraꞌ Yahudihin damikkiyan du isab. 49Iye du makahagad si iyehin meꞌ aꞌa maꞌekka īꞌen peggeꞌ awam siye bang ine pinaꞌin dem saraꞌ si Musahin. Hangkan kamulkaꞌan siye weꞌ Tuhanin.” 50Dangan meꞌ Pariseo malaꞌihin si Nikodemus. Iye hep miyaꞌan bakas mapī magbissā duk si Isa sangem īꞌen. Paꞌinne si meꞌ saweꞌnen, 51“Paꞌin saraꞌten weꞌ gaꞌi aꞌahin makajari laboꞌante hukuman bang gaꞌi dahuꞌ iye pinakale supaya kataꞌuhan bang ine bakas tahinangnen.” 52Nambung siye, paꞌinde, “Weꞌ amban Jalil kew isab? Payamanun dem kitab, gaꞌ tasulat dem kitab weꞌ niyaꞌ nabi paguwaꞌ amban lahat Jalil.”

Dende tasaꞌut magjinahin

53Manjari kaniya-kaniya ne siye moleꞌ.

Valgt i Øjeblikket:

Yahiya 7: yakV

Markering

Del

Kopiér