Yahiya 19

1Manjari dinaꞌak weꞌ Pilatus si Isa ilagutan. 2Ubus miyaꞌan ngalakal meꞌ sundaluhin bāhan luhihan, hininang kuweꞌ korona sultan, duk pinapī weꞌ de si kōk si Isa. Pinasemmekan isab iye weꞌ de juba taluk kuweꞌ juba sultan. 3Manjari hininang dagey iye weꞌ de. Magbalik-balik siye pī si iye nalam iye, paꞌinde, “Assalamu alaikum, Sultan meꞌ Yahudihin,” ubus bu pinagsampakan weꞌ de. 4Manjari paluwas balik si Pilatus duk paꞌinne si meꞌ aꞌa maꞌekkahin, “Payamanun bi, boꞌoku du si Isa paluwas pitu si kaꞌam supaya kataꞌuhanbi weꞌ gaꞌ niyaꞌ takasuwaꞌku jānne pangahukumanku iye.” 5Manjari paluwas isab si Isa, laꞌi pe lakal luhihanin diyataꞌ kōkne duk magjuba talukin pe iye. Paꞌin Pilatus si meꞌ aꞌahin, “Payamanun bi aꞌa inin.” 6Pagkite meꞌ nakuraꞌ imamin duk meꞌ guwaldiya si langgal mahadjehin si Isa, magkalolop siye, paꞌinde, “Papateyun iye. Lansangun diyataꞌ olom.” Paꞌin Pilatus si meꞌ aꞌahin, “Bayaꞌ-bayaꞌbi ne. Boꞌohun bi iye duk kaꞌam ne ngalansang iye diyataꞌ olom. Saguwaꞌ bang aku, gaꞌ niyaꞌ takasuwaꞌku jānne pamapateyan iye.” 7Paꞌin meꞌ nakuraꞌ Yahudihin si iye, “Paꞌin saraꞌ kamihin subey iye pinapatey peggeꞌ paꞌinne weꞌ Anak Tuhanin iye.” 8Pagkale Pilatus pinaꞌinde inin, pasōng ne talewnen. 9Binoꞌo weꞌ ne si Isa padiyalem balik dem astanaꞌ bu tinilew weꞌ ne, paꞌinne, “Aꞌa amban kew?” Saguwaꞌ gaꞌ nambung si Isa. 10Paꞌin Pilatus si iye, “Weꞌey kew gaꞌi nambung? Gaꞌi ke kataꞌuhannu weꞌ taga kapatut ku maluwas kaꞌu? Duk taga kapatut ku isab ngalansang kaꞌu diyataꞌ olom duk kew matey.” 11Nambung si Isa, paꞌinne, “Bang dumaꞌin Tuhanin mangurungan kaꞌu kapatutin, gaꞌ niyaꞌ kapatutnu ngahukum aku. Hangkan hep aꞌa manōngan aku pitu si kaꞌuhin, pasōng hadje dusenen amban dusenun.” 12Amban miyaꞌan, miha teꞌed lān si Pilatus supaya tapaluwasne si Isa. Saguwaꞌ magkalolop ne paꞌin meꞌ nakuraꞌ Yahudihin, paꞌinde, “Bang paluwasnu aꞌa iyan, dumaꞌin kew bagay Sultan Nakuraꞌin. Sine-sine ngēnan dinen sultan, kuntarahanne Sultan Nakuraꞌin.”

13Pagkale Pilatus pinaꞌinde miyaꞌan, binoꞌo weꞌ ne si Isa paluwas duk ningkoloꞌ iye si siya pangahukumanin laꞌi si lugal inēnan “Lame Batu.” Bang si bissā Yahudi, ēnnen “Gabbata.” 14Ellew miyaꞌan ellew pagpanyap si Kādjaꞌan Pangessebanin duk sōng lettu ne. Manjari pagtingkoloꞌ Pilatus, paꞌinne si meꞌ aꞌahin, “Payamanun bi, tiyaꞌ ne sultanbin.” 15Saguwaꞌ magkalolop meꞌ aꞌahin, paꞌinde, “Papateyun ne. Papateyun ne. Lansangun diyataꞌ olom.” Paꞌin Pilatus si siye, “Ine? Bayaꞌ kaꞌam daꞌakku ilansang diyataꞌ olom sultanbin?” Nambung meꞌ nakuraꞌ imamin, paꞌinde, “Gaꞌ niyaꞌ sultan kami seddili amban Sultan Nakuraꞌin.” 16Manjari sinōngan ne weꞌ Pilatus si Isa pī si siye duk iye talansangde diyataꞌ olom pinapatey.

Pangalansang si Isa diyataꞌ olomin

(Mateo 27:23-44; Markus 15:21-32; Lukas 23:26-43)

17Manjari ineddoꞌ ne weꞌ de si Isa duk binoꞌo weꞌ de paluwas amban puweblo. Pinapanangkit weꞌ de pu si Isa olom sōng pangalansangan iyehin, tudju pī si lugal inēnan “Lahat Bungkug,” bang si bissā Yahudi, “Golgota.” 18Pagtekka laꞌi, ilansang si Isa weꞌ meꞌ sundaluhin diyataꞌ olomin duk pinatengge weꞌ de olomin diyataꞌ bulak. Niyaꞌ isab duwangan aꞌa ilansang diyataꞌ olomde, dangan si kanawanan si Isa duk dangan si bibanganne. 19Niyaꞌ sinulat weꞌ Pilatus dinaꞌak weꞌ ne pinapī diyataꞌ olom si Isahin. Iye inin sinulatnen: “Si Isa, aꞌa Nasaret, Sultan meꞌ Yahudihin.” 20Ekka aꞌa makabatsa sulat inin peggeꞌ lugal pangalansangan si Isahin tapit si Awrusalam duk sinulat inin si bissā Yahudi, si bissā meꞌ aꞌa Roma, duk si bissā Girik. 21Manjari hap pī meꞌ nakuraꞌ imamin pu si Pilatus duk paꞌinde si iye, “Gaꞌi tewwaꞌ sinulatnu miyaꞌan. Daꞌa iye sulatun ‘Sultan meꞌ Yahudihin’ saguwaꞌ sulatun, ‘Paꞌin aꞌa inin weꞌ iye sultan meꞌ Yahudihin.’ ” 22Nambung Pilatus, paꞌinne, “Bakas tasulatkun gaꞌi ne kapindahan.” 23Pagubus ne ilansang weꞌ meꞌ sundaluhin si Isa, ineddoꞌ weꞌ de meꞌ semmeknen duk binahagiꞌ weꞌ de pinaꞌampat, da bahagiꞌ-da bahagiꞌ siye dangan. Saguwaꞌ niyaꞌ pe dambuwaꞌ badjuꞌ si Isa, gaꞌ niyaꞌ laꞌitanne, tinennun pinadambūs. 24Paꞌin meꞌ sundaluhin si saweꞌden, “Daꞌa garette bi badjuꞌ inin. Saguwaꞌ magpuwaꞌan hadja kite bi. Sine-sine ngandaꞌag, tepe si iye badjuꞌ inin.” Sabab hininang meꞌ sundalu miyaꞌan, tuman tasulat dem kitabin, pinaꞌin laꞌi,

“Pagbahagiꞌande semmekkun duk pagpuwaꞌande badjuꞌkun.”

25Laꞌi si bihing olom pangalansangan si Isahin, magtengge saꞌi si Isahin, duk pungtinaꞌi saꞌinen, duk Mariyam anda Kolopasin, duk Mariyam dende amban lahat Magdalahin. 26Takite si Isa saꞌinen duk tindegne kinalasahannen laꞌi. Paꞌin si Isa si saꞌinen, “Tindegku iyan anaknu ne.” 27Duk paꞌinne si tindegne miyaꞌan, “Iyan ne saꞌinun.” Hangkan amban ellew miyaꞌan binoꞌo ne weꞌ tindeg si Isa miyaꞌan saꞌi si Isahin pinatennaꞌ si lumaꞌne.

Kamatey si Isahin

(Mateo 27:45-56; Markus 15:33-41; Lukas 23:44-49)

28Manjari inin, kataꞌuhan si Isa weꞌ kēmon pinahinang si iyehin ubus ne duk jukup ne. Manjari paꞌinne, “Lekkakan ku.” Paꞌinne inin supaya tuman tasulat dem kitabin. 29Niyaꞌ andang laꞌi binettad poga isihan ininum. Pagkale meꞌ sundaluhin pinaꞌin si Isahin, ngeddoꞌ siye kuweꞌ gapas bu ilebbagan weꞌ de dem ininumin. Ubus, pinapī weꞌ de si tuggu kayu-kayu bu pinaꞌabut pī si behe si Isa. 30Pagubus miyaꞌan tasessep si Isa, paꞌinne, “Ubus ne hinangkun.” Manjari patondok iye duk bekkat ne napasnen.

Ilogsok seddi si Isahin

31Peggeꞌ ellew Jumaꞌat hep miyaꞌan, hap pī meꞌ nakuraꞌ Yahudihin maꞌid pu si Pilatus weꞌ daꞌakde ne pinolong pusuꞌ meꞌ aꞌa tellungan ilansang diyataꞌ olomin duk siye mura matey duk ne talebbes pādpād gaꞌ pe taꞌabut ellew liꞌihin. Gaꞌi siye mabayaꞌ weꞌ inambanan meꞌ bangkeyin diyataꞌ olom baytu ellew Sabtuꞌ, peggeꞌ ellew liꞌi miyaꞌan asal ellew hadje. 32Hangkan pī meꞌ sundaluhin duk pinolong weꞌ de dehellu meꞌ pusuꞌ saweꞌ si Isa duwangan ilansang diyataꞌ olomin. 33Saguwaꞌ pagtapit ne siye pu si Isa, takitede weꞌ matey ne hatiꞌ iye, hangkan gaꞌ ne polongde pusuꞌnen. 34Saguwaꞌ dangan meꞌ sundaluhin, ilogsok weꞌ ne duk budjakne seddi si Isahin. Magtawus pabuꞌus lahaꞌin magsaget duk boheꞌ. 35(Aꞌa mangite maꞌumantag pu si Isa inin, sinulat weꞌ ne sabab inin supaya kaꞌam kahagad. Aꞌa manulat inin kapangandelan duk bennal panaksiꞌnen.) 36Sabab meꞌ maꞌumantag pu si Isa miyaꞌan, tuman tasulat dem kitabin. Pinaꞌin laꞌi, “Gaꞌ niyaꞌ polong bisan dambuwaꞌ tolangne.” 37Duk niyaꞌ isab da ayat tasulat dem kitab, pinaꞌin, “Payamande du aꞌa bakas ilogsokden.”

Pangubul si Isahin

(Mateo 27:57-61; Markus 15:42-47; Lukas 23:50-56)

38Manjari, niyaꞌ dambuwaꞌ aꞌa amban lahat Arimati, ēnnen si Yusup. Si Yusup inin tindeg si Isa du isab saguwaꞌ gaꞌ iye magpatampal peggeꞌ tinalew iye si meꞌ nakuraꞌ Yahudihin. Pī iye pu si Pilatus duk pākune ngeddoꞌ bangkey si Isahin. Dinaꞌak ne iye weꞌ Pilatus, hangkan pī iye duk ilebbes weꞌ ne bangkey si Isahin amban diyataꞌ olom. 39Nuhut isab Nikodemus pu si Yusup. Iye hep aꞌa bakas mapī pu si Isa sangemin. Magboꞌo Nikodemus duwe bayuꞌ laksiꞌ ēnnen mira duk alos pinagsaget. Bohatannen niyaꞌ limempūꞌ kilu. 40Ineddoꞌ weꞌ de bangkey si Isahin duk sinaput weꞌ de dem kakanaꞌ pinagtuhut duk laksiꞌin, sa addat bangsa Yahudihin bang siye magsaput aꞌa matey. 41Laꞌi si antag pamapateyan si Isahin, niyaꞌ kabbun. Laꞌi dem kabbun miyaꞌan niyaꞌ lingab pangubulan, baꞌahu pe, gaꞌ pe bakas kapangubulan. 42Laꞌi si Isa kinubul weꞌ de peggeꞌ tapit du si lugal pamapateyan iyehin duk peggeꞌ sōng ne sangem Sabtuꞌ, ellew liꞌi meꞌ Yahudihin.

Valgt i Øjeblikket:

Yahiya 19: yakV

Markering

Del

Kopiér