Yahiya 17

Ngampun si Isa para si meꞌ tindegnen

1Pagubus inin bissā si Isa, mayam iye padiyataꞌ langit duk ngampun iye si Tuhan, paꞌinne, “O Ammaꞌ, taꞌabut ne waktuhin. Pahadjehun ku, Anaknun, duk kew isab tapahadjeku. 2Kaꞌurungan ku weꞌ nu kapatut magbayaꞌ si kēmon manusiyaꞌ, supaya kaꞌurunganku umul gaꞌ tamananne kēmon aꞌa pinasukuꞌnu si akuhin. 3Duk meꞌ aꞌa kaꞌurungan umul gaꞌ tamanannen, subey kew kataꞌuhande, kaꞌu Tuhan mabennalin, Tuhan dambuwaꞌ-buwaꞌin. Duk subey isab kataꞌuhande Isa Almasi pinapitunu si dunyahin. 4Pinahadje kew weꞌ ku tuꞌu si dunya peggeꞌ ubus ne weꞌ ku hinang pinahinangnu si akuhin. 5O Ammaꞌ, pahadjehun ku luꞌu si panaꞌanannu lu, sa pamahadje aku maluꞌuhin masa gaꞌ pe dunya inin pinapanjari.

6“Bakas ne kew pinakitaꞌu weꞌ ku si meꞌ aꞌa pinasukuꞌnu si aku tuꞌu si dunyahin. Meꞌ sukuꞌ si kaꞌu du siye, duk pinasukuꞌ siye weꞌ nu si aku. Tinuhut weꞌ de lapalnun, 7duk bugtuꞌ ne si siye weꞌ kēmon pangurungnu akuhin asal bennal amban kaꞌu. 8Bakas ne pasampayku si siye lapal pinangurungnu si akuhin, duk tinayimaꞌ ne weꞌ de. Bugtuꞌ ne si siye weꞌ billuꞌu ku amban kaꞌu, duk kahagad ne teꞌed siye weꞌ kaꞌu asal mamapitu akuhin.

9“O Ammaꞌ, pāku-pākuhanku siye si kaꞌu. Dumaꞌin manusiyaꞌin kēmon pinākuhankun saguwaꞌ meꞌ aꞌa pinasukuꞌnu si aku inin hadja, peggeꞌ siye inin asal sukuꞌ si kaꞌu du. 10Kēmon si akuhin, si kaꞌu du duk kēmon si kaꞌuhin, si aku du. Duk pinahadje ku weꞌ de, sabab sandel siye si aku. 11Aku inin sōng balik ne piyu si kaꞌu. Sōng ne ambananku dunya inin. Saguwaꞌ meꞌ aꞌa pinasukuꞌnu si aku inin, tuꞌu pe si dunya. O Ammaꞌ, kaꞌu masutsihin, pakitehannu ku balakat ēnnun; banteyanun siye duk balakatnu inin, supaya siye magdambuwaꞌ atey sa kitehin. 12Tiggelanku tuꞌu si siye, banteyanku meꞌ aꞌa pinasukuꞌnu si aku inin duk balakat ēnnun. Binanteyan siye weꞌ ku hangkan gaꞌ niyaꞌ siye lepas amban kaꞌu, luwal du dambuwaꞌ, peggeꞌ niyaꞌ subey lepas supaya tuman tasulat dem kitabin. 13Sōng balik ne ku inin piyu si kaꞌu hangkan pādpād tuꞌu pe ku si dunya, bissāku inin supaya jukup kēgden kuweꞌ kēgkun. 14Pinasampay weꞌ ku si siye lapalnun. Manjari kabunsihan siye weꞌ meꞌ aꞌa manggaꞌi manuhut kaꞌuhin, peggeꞌ gaꞌi siye nuhut pikilan meꞌ aꞌa miyaꞌan. Kuweꞌ siye akuhin, gaꞌi du isab tuhutku pikilan meꞌ aꞌa manggaꞌi manuhut kaꞌuhin. 15Gaꞌi ku māku-māku weꞌ eddoꞌnu meꞌ aꞌa pinasukuꞌnu si akuhin amban dunya inin. Saguwaꞌ māku-māku ku weꞌ banteyannu siye duk siye gaꞌi kapagbayaꞌan weꞌ nakuraꞌ seyitanin. 16Kuweꞌ siye akuhin, gaꞌi siye nuhut pikilan meꞌ aꞌa manggaꞌi manuhut kaꞌuhin. 17Paseddilihun siye duk sutsihun siye. Panutsi siyehin panoloꞌnu mabennalin, iye lapalnun. 18Daꞌakku ne siye pī si meꞌ aꞌa si dunyahin, kuweꞌ akuhin du isab dinaꞌak weꞌ nu pitu si dunya. 19Duk si kahāpande paglillaꞌku umulkun si kaꞌu, supaya siye teꞌed meꞌ aꞌa sukuꞌ si kaꞌuhin.

20“Māku-māku ku dumaꞌin hadja para si meꞌ tindegku inin,” paꞌin si Isa, “saguwaꞌ para si kēmon makahagad si aku sabab panoloꞌden. 21O Ammaꞌ, karayaw magdambuwaꞌ atey siye kēmon; kuweꞌ kaꞌuhin teteg tuꞌu si aku, duk aku teteg luꞌu si kaꞌu, damikkiyan isab karayaw teteg siye tuꞌu si kite. Karayaw weꞌ asal magdambuwaꞌ atey siye, supaya kahagad meꞌ aꞌa si dunyahin weꞌ asal kaꞌu mamapitu akuhin. 22Pinahadje siye weꞌ ku sa pamahadjenu akuhin, supaya siye magdambuwaꞌ atey kuweꞌ pagdambuwaꞌ ateyten, 23aku teteg luꞌu si siye, kuweꞌ kaꞌuhin teteg tuꞌu si aku, supaya siye kēmon asal magdambuwaꞌ atey teꞌed. Manjari bang asal magdambuwaꞌ atey ne teꞌed siye, ujud kataꞌuhan meꞌ aꞌa si dunyahin du weꞌ kaꞌu mamapitu akuhin. Duk kataꞌuhande du isab weꞌ kalasahannu meꞌ makahagad si akuhin sa pangalasanu akuhin. 24O Ammaꞌ, pinasukuꞌ weꞌ nu siye kēmon si aku. Manjari iye kabayaꞌankun, subey siye laꞌi si aku si palaꞌihankun supaya takitede pamahadjenu akuhin duk sahaya pangurungnu akuhin, peggeꞌ kinalasahan ku weꞌ nu gaꞌ pe pinapanjari dunyahin. 25O Ammaꞌ, kaꞌu mabentelin, bisan kew gaꞌi kataꞌuhan meꞌ aꞌa manggaꞌi manuhut kaꞌuhin, saguwaꞌ kataꞌuhante kew duk meꞌ tindegku inin kataꞌuhande weꞌ kaꞌu mamapitu akuhin. 26Bakas ne kew pinakitaꞌu weꞌ ku si siye, duk pakitaꞌute pe kew namba, supaya lasade si saweꞌden saliꞌ duk lasanu si akuhin duk supaya ku teteg dem ateyde.”

Valgt i Øjeblikket:

Yahiya 17: yakV

Markering

Del

Kopiér