Amatie 6

Azezi zãsʋm nẽrba sõŋrɛ, la Nawẽnnɛ pʋ'ʋsgɔ, la nõorlʋa yelle

(Aluki 11:2-4)

1«Guuse-ya, da ɩta-ya ɩr-sõma nẽrba nẽŋam tɩ ba yẽta ya. Ya sãn ɩta bɛla, ya kãn to'oge yɔɔrɔ ya Sɔ Nawẽnnɛ n boe saazuum zẽ'am.

2Bɛla, fʋ sãn yetɩ fʋ sõŋɛ nasa, da kãn mõolɛ nẽrba zẽ'am wʋ pʋlibsum dõma n ɩtɩ se'em ba wẽndeto pʋam, la sorɔɔrɔ zuto tɩ nẽrba pẽgɛ ba la. Mam yetɩ ya la sɩra, tɩ bãma põn to'oge ba yɔɔrɔ mɛ. 3Fʋ sãn yetɩ fʋ sõŋɛ nasdõma, da basɛ tɩ fʋ gɔbga nu'ugo bãŋɛ fʋ zʋʋgɔ nu'ugo n ɩtɩ sɛla. 4Bɛla nẽra nẽra kãn bãŋɛ tɩ fʋ sõŋɛ nasdõma, la fʋ Sɔ Nawẽnnɛ n yẽ fõn sʋgɛ ẽŋɛ la, a wʋn lebse fo.

5Ya sãn pʋ'ʋsra Nawẽnnɛ, da ɩta-ya wʋ pʋlibsum dõma n ɩtɩ se'em na, bãma nõŋɛ la ba zɛ ba wẽndeto pʋam, la sorɔ-puursi zuto pʋ'ʋsra Nawẽnnɛ tɩ nẽrba yẽta ba. Mam yetɩ ya la sɩra, tɩ ba põn to'oge ba yɔɔrɔ mɛ. 6Fʋ sãn yetɩ fʋ pʋ'ʋsɛ Nawẽnnɛ, fʋ kẽ fʋ deem yʋ kʋlɩŋa pʋ'ʋsɛ fʋ Sɔ Nawẽnnɛ n boe zẽ'a n sʋgɛ la. La fʋ Sɔ la n yẽ tɩ fʋ sʋgɛ mɛ pʋ'ʋsɛ la, a wʋn yɔ fɔ.

7Ya sãn pʋ'ʋsra Nawẽnnɛ, ya da tɔgra yetɔga n ka tarɩ võorɛ kaana wʋ nẽr-sɛba n ka mi Nawẽnnɛ n ɩtɩ se'em na, ba tẽ'esɛ tɩ bãma n tɔgrɩ zɔ'ɔra la ĩyã, Nawẽnnɛ wʋn lerge bãma pʋ'ʋsgɔ mɛ. 8Bɛla, da ãna-ya wʋ bãma n ãn se'em na, se'ere n soe la, lan dẽŋɛ ya wʋn sose ya Sɔ Nawẽnnɛ, a põn mina yãma n boorɩ sɛla mɛ. 9Bɛla, pʋ'ʋsra-ya wãna:

‹Tõma Sɔ Nawẽnnɛ n boe saazuum,

botɩ fʋ yʋ'ʋrɛ yẽta pẽka,

10wa'am wa di na'am nẽrba tẽŋasʋka,

botɩ fõn boorɩ se'em ẽŋɛ tẽŋa zuo,

wʋ lan ɩtɩ fõn yire se'em na.

11Bɔ tɔ tɩ zĩna dia.

12Basɛ tɩ tõon-be'ero taalɛ,

wʋ tõma n mẽ basɛ sɛba n ẽŋɛ tõma be'em taalɛ se'em na.

13Da basɛ tɩ yelle paagɛ tɔ tɩ tɩ lui.

Fãagɛ tɔ be'em dãana nu'usum basɛ.

[Tɩ fõn soe so'olʋm, la pãŋa, la nã'asgɔ wakatɛ n ka ba'asrɩ. Amina!]›

14Ya sãn basɛ nẽr-sɛba n ẽŋɛ ya be'em na taalɛ, ya Sɔ Nawẽnnɛ mẽ wʋn basɛ ya tõon-be'ero taalɛ. 15La ya sãn ka basɛ nẽr-sɛba n ẽŋɛ ya be'em na taalɛ, ya Sɔ Nawẽnnɛ mẽ kãn basɛ ya taalɛ.

16Ya sãn lʋ nõorɛ, da zũŋe-ya nẽŋa wʋ pʋlibsum dõma n zũŋri ba nẽnsɩ se'em, tɩ ba pa'alɛ nẽrba tɩ bãma lʋ la nõorɛ la. Mam yetɩ ya la asɩra, tɩ ba põn to'oge ba yɔɔrɔ mɛ. 17Fʋ sãn lʋ nõorɛ, wire fʋ nẽŋa dee sãasɛ fʋ zuugo, 18tɩ nẽrba da bãŋɛ tɩ fʋ lʋ la nõorɛ. La fʋ Sɔ Nawẽnnɛ n boe zẽ'a n sʋgɛ la wʋn bãŋɛ. La fʋ Sɔ la n yẽ fõn sʋgɛ lʋ nõorɛ la, a wʋn yɔ fɔ.»

Azezi zãsʋm Nawẽnnɛ yire bõntarsõm yelle

(Aluki 12:33-34;11:34-36;16:13;12:22-31)

19«Da lagsrɩ-ya bõntarsõm bĩŋra dũnia wã zuo, zẽ'e-sɛka tɩ bõn-mõgla la tẽŋanzẽem wʋn sã'am ba, tɩ nayigba mẽ kẽ'era zũura.

20Lagsra-ya bõntarsõm bĩŋra Nawẽnnɛ yire, bilam tɩ mõka la tẽŋanzẽem kãn sã'am ba, tɩ nayigba mẽ kãn kẽ zũ. 21Se'ere n soe la, ya bõntarsõm n boe zẽ'a na, ya pʋtẽ'era mẽ boe la bilam.

22Nini n nẽerɩ peelem bɔ'ɔra ĩyã wʋ fɩtla la. Bɛla, fʋ nini sãn ãna sõŋa, fʋ ĩyã wuu tarɩ peelem mɛ. 23La fʋ nini sãn ka ãna sõŋa, fʋ ĩyã wuu boe la lika pʋam. Peelem sɛka n wʋn nẽegɛ fʋ pʋam na sãn dɛna lika, la de la lika mẽŋa mẽŋa.

24Nẽra ka boe n tã wʋn sakɛ zuudãandõma bayi, a wʋn sise ayɩla mɛ, dee nõŋɛ ayɩla, bɩɩ a wʋn nanna ayɩla la mɛ, dee pɔ'ɔra ayɩla la. Bɛla, yãma ka tã wʋn sakɛ Nawẽnnɛ n de ya Zuudãana, dee botɩ bõntarsõm mẽ dɛna ya zuudãana.

25Bɛla n soe tɩ mam yele ya yetɩ, ya da fabla ya vɔm yelle, yãma n wʋn di sɛla, bɩɩ ya wʋn yũ sɛla, la ya da fabla ya ĩyã yelle, ya wʋn yɛ sɛla. Vɔm ka gãnnɩ dia? Bɩɩ ĩyã ka gãnnɩ futo? 26Bɩsɛ-ya bõn-ẽgla, ba ka bʋtɩ, ba mẽ ka lagsrɩ bõnkɔɔla ɩta bã pʋam. La ya Sɔ Nawẽnnɛ bɔ'ɔrɩ ba dia mɛ. Yãma ka tarɩ yõorɔ gãnna bõn-ẽgla halɩ zozo'e? 27Ãne n boe yãma pʋam n tã wʋn pa'asɛ a vɔm woglʋm fẽfẽe ẽn fablɩ la ĩyã?

28La bẽm tɩ ya fabla futo yelle? Bɩsɛ-ya mõ-puuro n ãn sõŋa se'em, ba ka tõnnɩ, ba mẽ ka wʋgrɩ futo. 29La mam yetɩ ya mɛ tɩ, baa naba Asalomõ na'am n yʋʋn tarɩ pãŋa la, a yʋʋn ka tã'agɛ yɛ fuugo n ãn sõŋa wʋ mõ-puugo ayɩla. 30La Nawẽnnɛ sãn botɩ mõorɔ n boe zĩna dee tɩ ba wʋn yõ ba bugum beere ãna sõŋa bɛla, a kãn bɩsɛ yãma yelle gãnna bɛla? Bẽm tɩ yãma ka bɔ Nawẽnnɛ sɩra zo'oge? 31Da fabla-ya yɛta tɩ: ‹Bẽm tɩ wʋn di?› bɩɩ ‹tɩ wʋn yũ la bẽm?› bɩɩ ‹tɩ wʋn yɛ la bẽm?› 32La de la nẽr-sɛba n ka mi Nawẽnnɛ n eerɩ bõn-bãma wuu. La yãma Sɔ Nawẽnnɛ mi tɩ yãma boorɩ bõn-bãma wuu mɛ. 33Dẽŋɛ-ya ɛ Nawẽnnɛ so'olʋm, la sɛla n masɛ Nawẽnnɛ zẽ'am, tɩ a wʋn bɔ ya bõn-bãma wuu pa'asɛ. 34Da fabla-ya beere yelle, tɩ beere ya wʋn bãŋɛ ya wʋn ẽŋɛ se'em, daarɛ woo n bɩsrɩ a mẽŋa yelle.»

Valgt i Øjeblikket:

Amatie 6: gurDBL

Markering

Del

Kopiér