Yuh 4

I Yesu nda markwa la Samari

1Ka snaŋtá la *Farisa ta mnay kazlay: Mal mnduha ta sliʼi da maga batem da *Yesu ka ya da Yuhwana kəʼa. 2Ka kahwathwata ni ka lu mnay katsi ná, Yesu a ta maga batem ŋa mndu wu, duhwalha ni zlanaŋ tsi ta magay. Snaŋta Yesu ta tsa gwaɗa ta mnə lu ya, 3ka sliʼaftá tsi ta haɗika Zudiya ŋa vrə ta haɗika Galili. 4Wya nda ma haɗika Samari ta laba tsi ya, 5ka ɓhadaghatá tsi da sana vli ta hgə lu ka Sikar ndusa nda vwaha Yakubu ta vlaŋtá zwaŋa ni Yusufu bamma, ta haɗika Samari. 6Ma tsa vli ya, mamu vavrəma Yakubu. Manda hərfatá Yesu ta mbaɗa, ka nzatá tsi ta wa tsa vavrəm ya, wər ma ghəŋ fitik nda tsa.

7Ka lagha sana markwa la Samari da ta imi. « Tiɗifta ta imi ka saʼata yu, » ka Yesu nda tsi. 8Ma tsa fitik ya, laghu la duhwalha ni da luwa da skwa skwa zay. 9« Waká kagha ta nzakway ka mnda la *Yahuda, ta ɗawa imi ŋa say da iʼi ta nzakway ka markwa la Samari na? » ka tsa marakw ya nda tsi. Tsaw haɗ la Yahuda ta guya vgha nda la Samari wa. 10Ka Yesu mantsa: « Ka má nda sna ka ta skwi ta kum Lazglafta ta vlaghata, nda mndu ya ta ɗawa imi ŋa say da kagha katsi ná, má kagha má dzaʼa ɗawa imi ŋa say, má ŋa vlaghatani ta imi ta vla hafu, » kaʼa nda tsi. 11Ka tsa marakw ya nda tsi mantsa: « Mghama ɗa! wana haɗ skwi ŋa tagafta da kagha wu, nda la na vavrəm na guli, ga dzaʼa mutsa ka ta tsa imi ta vla hafu ya na? 12Mal kagha ka dzidza ŋni Yakubu si ta sa ima na vavrəm na nda zwana ni, nda rina ni tani, ka zlaŋnaŋtá tsi na ra? » kaʼa. 13Ka Yesu nda tsi mantsa: « Dər wati ma mndu ta sa na imi na ná, ta dzaʼa kuzlaŋ kuzla ndala, 14ama mndu dzaʼa sa na imi dzaʼa vlaŋta yu na ná, walglaŋta a ndala ta kuzlaŋta wa. Tsa imi dzaʼa vlaŋta yu ya ná, dzaʼa nuna ka dzuɓay, ŋa mbəzagapta hafu ŋa kɗekedzeŋ mida, » ka Yesu nda tsi. 15« Mghama ɗa! Vliha vla ta tsa imi ya tsa, kada kwala ndala ta kuzliglihata, ka kwala yu ta səglagha da ta imi hadna, » ka tsa marakw ya nda tsi. 16« La hgaktá zəʼala ghuni, ka sagha kuni da hadna, » ka Yesu nda tsa marakw ya. 17« Haɗ zəʼala ɗa wu, » ka tsa marakw ya nda tsi. Ka Yesu nda tsi mantsa: « Ta ŋa gha ta mnay kazlay: Haɗ zəʼala ɗa wu kəʼa, 18kabga hutaf zəʼala gha. Nana ga taŋ ka ndanana guli, zəʼala ghuni a wu, raghatani mnay gha mantsa ya, » ka Yesu nda tsi. 19« Mghama ɗa! *Anabi ka ta grə yu nda na skwi na. 20Dzidzíha ŋni la Samari ná, ta na ghwá na si ta maga həŋ ta duʼa ŋa Lazglafta. Ka kaghuni la Yahuda ná, ma Ursalima vla maga duʼa ŋa Lazglafta, ka kaghuni, » ka tsa marakw ya. 21Ka Yesu nda tsi mantsa: « Marakw na, zlghaf zlgha ta iʼi. Dzaʼa sagha sa fitik dzaʼa kwal kuni maga duʼa ŋa Da ta na ghwá na, dər ma Ursalima. 22Kaghuni la Samari, ŋa skwi kul snaŋtá kuni ta maga kuni ta duʼa. Aŋni la Yahuda, ŋa skwi snaŋ ŋni ta maga ŋni ta duʼa, kabga da la Yahuda sagha mbaku. 23Dzaʼa sagha sa fitik, nda maga va ni ndanana. Ma Sulkum nda ya ma kahwathwata dzaʼa kəl mnduha ka maga duʼa, ŋa tsəɓay taŋ ta tsəlɓu ŋa Da, kabga mndərga tsa mnduha ta tsəlɓa tsa tsəlɓu ya ta zbə Da. 24Lazglafta ná, Sulkum ya. Tsa mnduha ta maga duʼa ŋa ni ya, ma Sulkum nda ya ma kahwathwata ta maga həŋ, » ka Yesu nda tsi. 25« Nda sna yu kazlay: Dzaʼa sagha sa Almasihu, ta hgə lu ka *Kristi ya, kəʼa. Ka sagha sa tsi, dzaʼa mnaŋna mna ta inda skwi, » ka tsa marakw ya nda tsi. 26« Tsa mndu ta mnə kagha ya na iʼi ta gwaɗa nda kagha na, » ka Yesu nda tsi.

27Tata gwaɗa həŋ, ka vraktá duhwalha ni. Ka ndərmimi duhwalha ni ta tsa nzata ni ka gwaɗa nda tsa marakw ya. Tsitsiriɗ, nza nza həŋ, haɗ ya ta pslanaftá wi, ka ɗawaŋta da tsi kazlay: Nu ta ɗaw ka da tsi, ari nu ta gwaɗ ka nda tsi na kəʼa wa.

28Ka gi zlanatá tsa marakw ya ta bzleghwani hada ka laghu da luwa da mnay ŋa mnduha. 29Kaʼa mantsa: « Sawa ngha mndu ta mnihatá inda skwiha maga yu ɓa, zlah Kristi na mndu na? » kaʼa. 30Ka sliʼagaptá mnduha ma luwa, ka lagha slanaghatá Yesu. 31« Maləma ɗa! Kwa za ta skwa zay misimmisim, » ka duhwalha ni nda Yesu, ma tsa fitik ya. 32« Mamu skwa zaya ɗa kul snaŋtá kaghuni, » ka Yesu nda həŋ. 33« Mamu mndu ta klanaktá skwa zay ra? » ka duhwalha ni mataba taŋ. 34Ka Yesu nda həŋ mantsa: « Maga skwi ta zɗəganatá mndu ya ta ghunigihata ka kɗinistá slna ni, skwa zaya ɗa. 35“Ta fwaɗ pɗakwa tili ka tska nimaya ta vwah” a ka kaghuni ndanana wu ra? ka iʼi nda kaghuni wa, nghadapwa ngha ta ndəhatá nimaya ta vwah ɓa, taghwaŋ a lu ka tskay wa. 36Mndu ta tska nimaya ta vwah ná, ta mutsay ta nisəla ni, ŋa tskanatani ta hulfa ni ŋa hafu ŋa kɗekedzeŋ. Mantsa ya, ŋa rfay mndu ta sləgafta nda mndu ta tskata ta rfu kawadaga. 37Tsa mahdihdi mnə lu kazlay: Slgadatá slgayslgay ŋa sani, tskatá tskaytskay ŋa sani kəʼa ya ná, kahwathwata nzakwa ni. 38Da vli kul magatá kuni ta slna ghunaghunafta yu. Ghuy ghuya sanlaha ta ɗaŋwa ma slna, ka lagha kaghuni da ŋatsa ndela tsa slna taŋ ya, » kaʼa. 39Nda ndəgha la Samari ma tsa luwa taŋ ya ta zlghaftá Yesu ta ghəŋa tsa gwaɗa mna tsa marakw ya ta mnay kazlay: Ka mnihatá tsi ta inda skwiha maga yu kəʼa ya. 40Ma lagha la Samari da slanaghatá Yesu, ka ndəɓ həŋ ta dzvu da tsi ŋa nzata ni kawadaga nda həŋ. Ka nzatá tsi ka zatá fitik his hada da həŋ. 41Ka sgavaghatá ndəghata mnduha ta zlghaftá Yesu, kabga Yesu ka ghəŋa ni ta mna gwaɗa ni ŋa taŋ. 42« Zlghaf zlgha aŋni ndanana tama makwa na, kabga gwaɗa gha mna ka yeya a wa. Nda sna vərɗa aŋni nda sləməŋa ŋni. Graf gra ŋni kahwathwata kazlay: Na mndu na ná, mnda mba mnduha ta ghəŋa haɗik ya kəʼa. »

Mbanafta Yesu ta zwaŋa sana mnda ksa slna ŋumna

43Tahula tsa fitik his ya, ka sliʼaftá *Yesu hada ka laghwi ta haɗika Galili. 44Tsaw si wya ka Yesu mnata: « Haɗ lu ta vla glaku ŋa anabi ta haɗika ni wu » kəʼa. 45Ɓhadaghata ni ta haɗika Galili, ka tsuʼaftá gwal hada. Tsa gwal ta tsuʼafta ya ná, gwal ta nghaŋtá inda skwi maga Yesu ma Ursalima ma fitika skala *Pak ya, kabga si lab la hahəŋ guli da vla tsa skalu ya.

46Ka vraghatá tsi tama da luwa Kana ta haɗika Galili, ma vla mbəɗanaftani ta imi ka ima inabi ya kay. Tsaw mamu sana mndu dagala ma slna ŋumna, ta maga slna ga mgham ma luwa Kafarnahum, kul ɗughwanaku zwaŋa ni ta kala ghəŋ. 47Snaŋta ni kazlay: Sliʼaf sliʼa Yesu ta haɗika Zudiya, ka sagha ta haɗika Galili kəʼa, ka sliʼaftá tsi ka lagha slanaghata. Kaʼa nda tsi mantsa: « Kdəkkdək, mbaɗa mbanaftá zwaŋa ɗa kul ɗughwanaku, ta kala ghəŋ, » kaʼa. 48Ka Yesu nda tsi mantsa: « Ka ta ngha a kaghuni ta mazəmzəm nda skwa ndərmimay wu ná, zlgha a kaghuni kay tama wa! » kaʼa. 49Ka tsa mndu ta maga slna ga mgham ya nda tsi mantsa: « Mghama ɗa! Mbaɗa ma kɗaku zwaŋa ɗa mtuta, » ka nda tsi. 50Ka Yesu nda tsi mantsa: « La dzagha! Wa a zwaŋa gha wdərwdər, » kaʼa.

Ka zlghaftá tsa mndu ya ta tsa gwaɗa mnana Yesu ya, ka sliʼaftá tsi ka laghu dzagha ni. 51Ta laha tsi ta tvi ta dzaʼa dzagha, ka guyatá tsi nda kwalvaha ni ta ŋlu da mnay ŋa ni kazlay: Waʼa nda mba zwaŋa gha wdər kəʼa. 52Ka tsa mndu ya mantsa: « Ta wati luwa leŋavata tsi na? » kaʼa ɗawaŋta da həŋ. « Kiʼa hdzikata fitik ma ghəŋ ɗahawu, ta lavaghutá tsa ŋuɗidarani ya, » ka həŋ nda tsi. 53Ka graftá tsa da ni ya, ta tsa luwa ya mna Yesu ŋa ni kazlay: Wdərwdər zwaŋa gha kəʼa ya. Daga baɗu tsa ka zlghaftá tsatsi nda gwal ga taŋ tani ta Yesu.

54Tsaya mahisa mazəmzəm maga Yesu ta haɗika Galili manda zlaŋta ni ta haɗika Zudiya.

Valgt i Øjeblikket:

Yuh 4: xed

Markering

Del

Kopiér