Populære bibelvers fra لُوقا 17

Del

وَ قَالْ لِلسَّامِرِي: «قُمّ فَوْق وَ أَمْشِي فِي دَرْبَكْ. لِقِيتْ الْعَافَيْ بِسَبَبْ إِيمَانَكْ.»

كَنْ فِي الْيَوْم الْوَاحِدْ هُو يَخْطَا فَوْقَكْ سَبْعَةْ مَرَّاتْ وَ يِقَبِّلْ لَيْك سَبْعَةْ مَرَّاتْ وَ يُقُولْ: ‹أَنَا تُبْت مِنْ الْخَطَا دَا›، وَاجِبْ تِسَامِحَهْ.»

وَ وَكِتْ وَاحِدْ مِنْهُمْ عِرِفْ كَدَرْ هُو لِقِي الْعَافَيْ، قَبَّلْ لِعِيسَى وَ قَمَّ يَشْكُرْ اللّٰهْ بِحِسّ عَالِي. وَ سَجَدْ قِدَّامْ عِيسَى وَ شَكَرَهْ. وَ النَّادُمْ الْقَبَّلْ دَا، هُو سَامِرِي.

أَشَانْ دَا، خُطُّوا بَالْكُو فِي نُفُوسْكُو. «كَنْ أَخُوكْ خِطِي، أَهَرْجَهْ. وَ كَنْ هُو نِدِمْ فِي الشَّيّءْ السَّوَّاهْ، سَامِحَهْ.

وَ عِيسَى قَالْ: «النَّاسْ اللِّقَوْا الْعَافَيْ مَا عَشَرَةْ وَلَّا؟ وَيْن التِّسْعَةْ؟

وَ الرَّبّ عِيسَى قَالْ: «كَنْ إِيمَانْكُو صَغَيَّرْ مِثِلْ حَبَّةْ الْكِرَيْب كُلَ، تَقْدَرَوْا تَامُرُوا الشَّدَرَةْ الْكَبِيرَةْ دِي وَ تُقُولُوا: ‹قُمِّي مِنْ هِنِي وَ مَقِّنِي نَفِسْكِ فِي الْبَحَرْ› وَ هِي تَسْمَعْ كَلَامْكُو.

أَيِّ نَادُمْ الْيِفَتِّشْ يِنَجِّي نَفْسَهْ، يِوَدِّرْهَا. لَاكِنْ النَّادُمْ الْمَا يِفَكِّرْ فِي نَفْسَهْ، يَنْجَى.

وَ عِيسَى حَجَّى لِتَلَامِيذَهْ وَ قَالْ: «لَابُدَّ أَشْيَاءْ وَاحِدِينْ يَبْقَوْا وَ بِسَبَبْهُمْ نَاسْ وَاحِدِينْ يَمُرْقُوا مِنْ الدَّرِبْ. وَ لَاكِنْ الْعَذَابْ يَرْجَى النَّادُمْ الْيِسَبِّبْ الْأَشْيَاءْ دَوْل. أَيْوَى، كَنْ نَادُمْ يِتَلِّفْ إِيمَانْ هَنَا وَاحِدْ مِنْ الْمُؤمِنِينْ الدُّقَاقْ دَوْل، الْعَذَابْ الْيَرْجَاهْ يَبْقَى شَدِيدْ لَحَدِّي أَخَيْر لَيَّهْ كَنْ رَبَطَوْا مُرْحَاكَةْ فِي رَقَبَتَهْ وَ زَقَلَوْه فِي لُبّ الْبَحَرْ.

«وَ حَالَةْ النَّاسْ فِي يَوْم جَيَّةْ إِبْن الْإِنْسَانْ تَبْقَى سَوَا سَوَا مِثِلْ حَالَةْ النَّاسْ فِي زَمَنْ نُوحْ. هُمَّنْ قَاعِدِينْ يَاكُلُوا وَ يَشَرْبَوْا وَ الرُّجَالْ يَاخُدُوا عَوِينْ وَ الْعَوِينْ يَاخُدَنْ رُجَالْ لَحَدِّي الْيَوْم النُّوحْ دَخَلْ فِي السَّفِينَةْ. وَ خَلَاصْ الْأَلْمِي جَاءْ وَ أَكَلْ كُلَّ النَّاسْ.