Populære bibelvers fra လုကာ 3

Del

တစ်နေ့​၌ လူ​အပေါင်းတို့​သည် နှစ်ခြင်းမင်္ဂလာ​ခံယူ​ပြီးနောက် ယေရှု​သည်လည်း နှစ်ခြင်းမင်္ဂလာ​ကို​ခံယူ​တော်မူ၏။ ထို့နောက် ဆုတောင်းတော်မူ​စဉ် ကောင်းကင်​ပွင့်​၍ သန့်ရှင်းသော​ဝိညာဉ်တော်​သည် ချိုးငှက်​အသွင်ဆောင်​လျက် ယေရှု​အပေါ်​ဆင်းသက်​၍ နားတော်မူ၏။ ကောင်းကင်​မှ “သင်​သည် ငါ​နှစ်သက်မြတ်နိုးသော ငါ​၏​ချစ်သား ဖြစ်၏” ဟူသော အသံတော်​ထွက်ပေါ်လာ၏။

ယောဟန်​ကလည်း “ငါ​သည် သင်တို့​အား ရေ​၌ နှစ်ခြင်းမင်္ဂလာ​ပေး၏။ သို့ရာတွင် ငါ့​ထက်​ကြီးမြတ်သော​အရှင်​သည် မကြာမီ​ကြွလာမည်။ ငါ​သည် ထို​အရှင်​၏​ဖိနပ်ကြိုး​ကို ဖြေပေး​ရန်​ပင် မထိုက်တန်ပါ။ ထို​အရှင်​သည် သင်တို့​ကို သန့်ရှင်းသော​ဝိညာဉ်တော်​၌​လည်းကောင်း၊ မီး​၌​လည်းကောင်း နှစ်ခြင်းမင်္ဂလာ​ပေးတော်မူ​လိမ့်မည်။

အပြစ်​မှ နောင်တရ​၍ ဘုရားသခင်​ထံတော်သို့ ပြန်လာကြောင်း​ကို သင်တို့​အကျင့်​အားဖြင့် သက်သေထူကြလော့။ ‘ငါတို့​သည် အာဗြဟံ​၏​မျိုးဆက်များ ဖြစ်ကြ​သောကြောင့် ဘုရားသခင်​သည် ငါတို့​ကို အပြစ်​စီရင်တော်မူမည်​မဟုတ်’ ဟူ၍ မိမိကိုယ်ကိုယ်​မထင်ကြနှင့်။ သင်တို့​အား ငါ​ပြောဆိုသည်​မှာ ဘုရားသခင်​သည် အာဗြဟံ​အတွက် သားသမီးများ​ကို ဤ​ကျောက်ခဲများ​မှပင် ဖန်းဆင်းတော်မူနိုင်၏။

သစ်ပင်​အမြစ်​နား​တွင် ပုဆိန်​ကို ချထားပြီ​ဖြစ်၏။ ထို့ကြောင့် ကောင်းသော​အသီး မသီးသည့်​အပင်​ရှိသမျှတို့​သည် ခုတ်လှဲခြင်း​ခံရ​၍ မီး​ထဲသို့ ပစ်ချခြင်း ခံရ​လိမ့်မည်” ဟူ၍ ဖြစ်၏။

ပရောဖက်​ဟေရှာယ​၏​ကျမ်း​တွင် ဟောထားသည်​နှင့်အညီ “တောကန္တာရ​၌ လူတစ်ဦး ကြွေးကြော်​လျက်​နေ၏။ ထို​သူ​၏​အသံ​မှာ ‘ထာဝရဘုရား​ကြွလာမည့်​လမ်းတော်​ကို အသင့်​ပြင်ဆင်ကြလော့။ ထို​အရှင်​၏​လမ်းတော်​ကို ဖြောင့်ဖြူး​စေကြလော့။ ချိုင့်ဝှမ်းများ ရှိသမျှတို့​သည် ညီညာ​ချောမွေ့ရ​လိမ့်မည်။ တောင်ကုန်း​တောင်တန်းများ​သည် ညီညာ​ပြန့်ပြူး သွားရ​လိမ့်မည်။ ကောက်သော​လမ်းများ​သည် ဖြောင့်တန်း​သွားရ​လိမ့်မည်။ ကြမ်းတမ်းသော​လမ်းများ​သည်လည်း ချောမွေ့​ပြေပြစ်​လာရ​လိမ့်မည်။ ထိုအခါ လူအပေါင်းတို့​သည် ဘုရားသခင်​၏​ကယ်တင်ခြင်း​ကို တွေ့မြင်ကြရ​လိမ့်မည်’ ဟူ၍ ဖြစ်၏” ဟု ရေးသားထား၏။