Lahu - 1989 Edition (NT) Drama

Lahu Bible Edited © Thailand Bible Society and Bible Society of Myanmar, 2010, 2020.

Teˇ shinˉ awˬ hkʼaw lo awˉ lawˉ teˇ nyi mvuhˇ htiˇ la htaˇ, yaˇ miˇ teˇ hpaˍ lehˬ, yawˇ hui gu taˍ ve sha hawnˉ teˇ hpaˍ hta‸ yuˬ leh tuˍ hpfuh lo kʼai ve yoˬ. Yawˇ hui oˇ kaˬ lo gaˬ ve teˇ yanˇ, tuˍ hpfuh hta‸ hoˆ taˍ ve haˉ pui shiˍ hpfuhˆ baˬ taˍ ve hta‸ gʼa mawˬ ve yoˬ. Yawˇ hui lo‸-e ve teˇ yanˇ, Jawˇmawˇ Yeˍsuˆ ve awˬ to hta‸ maˇ mawˬ Awˬ lawn chi hta‸ yawˇ hui dawˇ maˇ tawˆ chehˇ ve teˇ yanˇ, awˬ gʼeuˆ ba ve veu‸ kʼaˇ hta‸ veu‸ deh taˍ ve chaw nyiˇ gʼaˇ tawˆ la leh yawˇ hui awˬ paˇ lo huˉ taˍ ve yoˬ. Yaˇ miˇ oˇ ve teˇ hpaˍ kawˆ jaˇ leh miˬ chaˇ hkʼoˆ boˆ taˍ ve teˇ yanˇ, chaw oˇ ve nyiˇ gʼaˇ kʼoˆ ve, Nawˬ hui lehˬ, aˬ hto‸ ma pa taw te‸ chehˇ ve chaw hta‸ suh ve chaw chehˇ kuiˬ lo ca la ve le. Yawˇ choˬ kaˬ maˇ chehˇ. Kʼaw‸ te‸ tu la peuˬ. Gaˍliˍlehˇ mvuhˇmiˬ awˬ hkʼaw lo chehˇ htaˇ yawˇ nawˬ hui hta‸ kʼoˆ laˇ ve tawˇ hkawˇ hta‸ dawˇ nawˇ-oˆ. Yawˇ kʼoˆ ve, Chaw yaˇ ve Yaˇ hpu lehˬ, venˇbaˆ yaˇ hui ve la‸ hkʼaw lo chiˇ a‸ piˇ ve hta‸ gʼa hkanˍ leh, la‸ ka hkʼoˆ lo hta‸ pehˍ peuˬ hkʼaw‸ nawˉ, shehˆ nyi gaˬ kʼo, kʼaw‸ te‸ tu la tuˬ yoˬ teh‸, nawˬ hui hta‸ kʼoˆ laˇ ve yoˬ teh‸, yawˇ hui hta‸ kʼoˆ piˇ ve yoˬ.
Oˇ htaˇ, Yeˍsuˆ kʼoˆ taˍ ve tawˇ hkawˇ hta‸ yawˇ hui kʼaw‸ dawˇ nawˇ la ve yoˬ. Yawˇ hui lehˬ, tuˍ hpfuh lo kʼaw‸ la peuˬ hkʼaw‸ nawˉ, tcuh yaˇ teˇ chi teˇ gʼaˇ leh awˬ kaˍ awˬ nu awˬ la‸ gʼawˇ hkʼa peu-eˬ hta‸ awˬ lawn oˇ ve hkʼa peu-eˬ ca hto piˇ ve yoˬ. Awˬ lawn oˇ ve teˇ hpaˍ tcuh yaˇ hui hta‸ ca hto piˇ ve yaˇ miˇ teˇ hpaˍ lehˬ, Maˍriˆ Maˍgaˍdaˍlaˆ, Yoˇhaˍnaˆ, Yaˍkoˆ ve awˬ e Maˍriˆ leh, awˬ kaˍ awˬ nu ve yaˇ miˇ teˇ hpaˍ yoˬ. Yaˇ miˇ teˇ hpaˍ kʼoˆ ve tawˇ hkawˇ lehˬ, tcuhˉ kuiˬ maˇ cawˬ ve tawˇ hkawˇ hpeh‸ ve yoˬ teh‸, tcuh yaˇ teˇ hpaˍ dawˇ leh, yawˇ hui hta‸ maˇ yonˍ.

Chi hkʼoˆ ka‸, oˇ ve teˇ nyi awˬ hkʼaw lo awˬ la‸ gʼawˇ nyiˇ gʼaˇ lehˬ, Yeˍruˆsaˍlehnˍ venˇ hta‸ suhˍ laˆ vuiˇ da‸ ve Eˇmaw‸ hkʼaˆ lo kʼai chehˇ ve teˇ yanˇ, hkʼa hpeh‸ la ve awˬ lawn hkʼa peu-eˬ yawˇ huiˉ maˬ kʼaoˍ da‸ chehˇ ve yoˬ. Yawˇ huiˉ maˬ chi hkʼe kʼaoˍ da‸ jehˬ da‸ chehˇ ve teˇ yanˇ, Yeˍsuˆ awˬ to awˬ paˇ lo laˬ leh, yawˇ huiˉ maˬ geh teˇ geh kʼai ve yoˬ. Ya‸ hkʼaˇ, yawˇ hta‸ maˇ gʼa shiˍ tuˬ, yawˇ huiˉ maˬ ve mehˆ shiˍ hta‸ koˍ taˍ ve hkʼe hpeh‸ piˇ lawˬ ve yoˬ. Oˇ htaˇ Yeˍsuˆ kʼoˆ ve, Nawˬ huiˉ maˬ ya‸ kʼaw kʼai chehˇ htaˇ, aˬ hto‸ ma awˬ lawn na‸ uˉ te da‸ ve le teh‸ na nyi ve teˇ yanˇ, yawˇ huiˉ maˬ lehˬ mehˆ hpfuhˇ nawˍ lehˍ te leh huˉ taˍ ve yoˬ.
Oˇ htaˇ, yawˇ huiˉ maˬ awˬ hkʼaw lo Kaˍlawˇhpaˆ meh ve chaw teˇ gʼaˇ kʼoˆ ve, Yeˍruˆsaˍlehnˍ venˇ awˬ hkʼaw lo hkehˉ chaw hpeh‸ leh, chi nyiˇ nyi venˇ oˇ ve awˬ hkʼaw lo hpeh‸ la ve awˬ lawn teˇ hpaˍ hta‸ maˇ shiˍ ve chaw nawˬ teˇ gʼaˇ tiˉ yoˬ laˇ teh‸, yawˇ hta‸ kʼaw‸ kʼoˆ piˇ ve yoˬ.
Yeˍsuˆ kʼaw‸ kʼoˆ ve, Aˬ hto‸ ma teˇ hpaˍ awˬ lawn le teh‸ na nyi ve teˇ yanˇ,
yawˇ huiˉ maˬ kʼaw‸ kʼoˆ ve, Naˍzaˍrehˆ chaw Yeˍsuˆ ve awˬ lawn yoˬ. Chaw oˇ ve lehˬ, Gʼuiˬsha mehˆ gʼuˇ suhˍ leh chaw hkʼa peu-eˬ mehˆ gʼaˇ suhˍ, yawˇ kʼoˆ ve te ve awˬ hkʼaw lo kanˇ paˆ uiˍ ve Gʼuiˬsha ve tcuh kaˍ paˍ teˇ gʼaˇ hpeh‸ ve yoˬ. Paw hkuˇ lonˉ teˇ hpaˍ leh ngaˬ hui ve jawˇmawˇ teˇ hpaˍ lehˬ, yawˇ gʼa suh tuˬ awˬ pon suhˉ taˆ tuˬ chiˇ a‸ piˇ leh, la‸ ka hkʼoˆ lo hta‸ pehˍ ve yoˬ. Yawˇ lehˬ, Iˉsaˍreˍlaˆ chaw ceuˬ hta‸ htaiˍ hkʼaw‸ shehˍ hpaˇ hpeh‸ ve yoˬ teh‸, ngaˬ hui dawˇ law jaw ve yoˬ. Chi hkʼoˆ ka‸, awˬ lawn chi teˇ hpaˍ hpeh‸ la ve lehˬ, ya‸ nyi shehˆ nyi gaˬ peuˬ. Ngaˬ hui ve awˬ moˍ awˬ hkʼaw lo yaˇ miˇ teˇ hpaˍ hpaˍ htawˇ anˇ jaˇ ve awˬ lawn teˇ hpaˍ ngaˬ hui hta‸ hto laˇ ve yoˬ. Ya‸ shawˉ teˇ na‸ yawˇ hui tuˍ hpfuh lo kʼai leh, yawˇ ve awˬ to hta‸ maˇ mawˬ. Oˇ htaˇ, yawˇ hui kʼaw‸ la leh kʼoˆ ve, Awˬ ha awˬ hkʼaw lo mvuhˇ naw ma tcuh yaˇ teˇ hpaˍ hta‸ ngaˬ hui gʼa mawˬ leh, Yawˇ te‸ chehˇ ve yoˬ teh‸ kʼoˆ laˇ ve yoˬ teh‸ yaˇ miˇ teˇ hpaˍ kʼoˆ ve yoˬ. Ngaˬ hui ve chaw teˇ hpaˍ hpaˍ lehˬ, tuˍ hpfuh lo kʼai leh, yaˇ miˇ teˇ hpaˍ kʼoˆ ve hkʼe gʼa mawˬ ve yoˬ. Ya‸ hkʼaˇ, yawˇ hui yawˇ hta‸ maˇ mawˬ teh‸, yawˇ hta‸ kʼoˆ piˇ ve yoˬ.
Oˇ htaˇ Yeˍsuˆ kʼoˆ ve, Gʼuiˬsha ve tcuh kaˍ paˍ hui kʼoˆ taˍ ve tawˇ hkawˇ hkʼa peu-eˬ hta‸ yonˍ tuˬ, nyi ma hkʼaw maˇ dawˇ pawnˍ puiˉ leh cuˇ yiˍ maˇ cawˬ ve chaw hui-oˬ, Hkri‸ lehˬ chi hkʼe gʼa tu‸ gʼa hkanˍ leh, yawˇ ve awˬ me‸ awˬ hponˇ awˬ hkʼaw lo gʼa lo‸-e ve maˇ heˆ laˇ teh‸, yawˇ huiˉ maˬ hta‸ kʼoˆ piˇ ve yoˬ. Oˇ htaˇ, Moˉseˍ leh Gʼuiˬsha ve tcuh kaˍ paˍ hkʼa peu-eˬ hta‸ tanˬ leh, Li‸ hpu hkʼa peu-eˬ awˬ hkʼaw lo yawˇ ve awˬ lawn hkʼa bvuh‸ taˍ ve teˇ hpaˍ yawˇ yawˇ huiˉ maˬ hta‸ tcuhˉ kuiˬ hpeu‸ maˍ piˇ ve yoˬ.
Yawˇ huiˉ maˬ kʼai chehˇ ve hkʼaˆ lo gaˬ paˇ neˇ ve teˇ yanˇ Yeˍsuˆ lehˬ, awˬ gʼuˇ suhˍ kʼai-a teh‸ te ve yoˬ. Oˇ htaˇ yawˇ huiˉ maˬ kʼoˆ ve, Ngaˬ huiˉ maˬ geh haˉ taˉ sheˍ. Mvuhˇ nyi kʼehˬ peuˬ. Mvuhˇ ka‸ hpeu‸ la yoˬ teh‸ kʼoˆ leh, yawˇ hta‸ gʼaˇ hte‸ lawˬ ve yoˬ. Hkʼe te leh, yawˇ huiˉ maˬ geh ca haˉ tuˬ yawˇ lo‸-e ve yoˬ. Yawˇ yawˇ huiˉ maˬ geh hpui lawˇ paˇ lo mui ve teˇ yanˇ, yawˇ hkaoˍmonˇ hta‸ yuˬ leh bon hta‸ chiˇ mvuh peuˬ hkʼaw‸ nawˉ, hkaoˍmonˇ hkʼeh‸ leh yawˇ huiˉ maˬ hta‸ piˇ ve yoˬ. Oˇ htaˇ, yawˇ huiˉ maˬ mehˆ hpaw la leh, Yeˍsuˆ yoˬ teh‸ gʼa shiˍ ve yoˬ. Yeˍsuˆ lehˬ, yawˇ huiˉ maˬ mehˆ gʼuˇ suhˍ mehˉ sheˬ ve yoˬ. Yawˇ huiˉ maˬ kʼoˆ ve, Ya‸ kʼaw kʼaˉ lo yawˇ ngaˬ huiˉ maˬ hta‸ tawˇ yaw laˇ leh Li‸ hpu tcuhˉ kuiˬ hpeu‸ maˍ laˇ ve teˇ yanˇ, ngaˬ huiˉ maˬ ve nyi ma hkʼaw lo geh jaˇ ve maˇ heˆ laˇ teh‸, teˇ gʼaˇ leh teˇ gʼaˇ kʼoˆ da‸ ve yoˬ.
Awˬ yanˇ oˇ ve awˬ hkʼaw lo yawˇ huiˉ maˬ teˇ cawˬ haˉ tu leh Yeˍruˆsaˍlehnˍ venˇ lo kʼaw‸ kʼai ve yoˬ. Oˇ kaˬ lo gaˬ ve teˇ yanˇ, tcuh yaˇ teˇ chi teˇ gʼaˇ leh yawˇ hui geh chehˇ ve chaw teˇ hpaˍ hpawnˬ da‸ chehˇ ve hta‸ gʼa mawˬ ve yoˬ. Chaw oˇ ve teˇ hpaˍ yawˇ huiˉ maˬ hta‸ kʼoˆ piˇ ve, Jawˇmawˇ Yeˍsuˆ awˬ tehˬ awˬ na kʼaw‸ te‸ tu la peuˬ. Siˉmonˍ hta‸ yawˇ ve awˬ to maw piˇ peuˬ teh‸ kʼoˆ ve yoˬ.
Oˇ htaˇ yawˇ huiˉ maˬ htawˇ, ya‸ kʼaw kʼaˉ lo hpeh‸ la ve awˬ lawn teˇ hpaˍ maˇ kʼoˆ, hkaoˍmonˇ hkʼeh‸ ve teˇ yanˇ yawˇ yoˬ teh‸ shiˍ la ve awˬ lawn maˇ kʼoˆ, yawˇ hui hta‸ kʼaoˍ maˍ piˇ ve yoˬ.

Yawˇ hui chi hkʼe kʼoˆ da‸ chehˇ ve teˇ yanˇ, Yeˍsuˆ awˬ to yawˇ hui awˬ kʼaw ji lo huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸, yawˇ hui hta‸ kʼoˆ piˇ ve yoˬ.
Ya‸ hkʼaˇ yawˇ hui lehˬ, chaw ha ku hta‸ mawˬ ve law teh‸ dawˇ leh, kawˆ jaˇ leh cheˇ lehˍ kʼai ve yoˬ. Yawˇ hui hta‸ kʼoˆ piˇ ve, Aˬ hto‸ ma pa taw nawˬ hui nyi ma sho‸ sha‸ ve le. Aˬ hto‸ ma pa taw nawˬ hui ve nyi ma hkʼaw lo htawˇdawˇnawˬdawˇ te chehˇ ve le. Awˬ tehˬ awˬ na ngaˬ yoˬ. Ngaˬ ve la‸ sheh hkui sheh hta‸ nyi-o. Ngaˬ hta‸ shoˆ nyi htawˇ nyi-o. Ngaˬ lehˬ, nawˬ hui mawˬ taˍ ve hkʼe, awˬ shaˍ leh awˬ mu‸ ku cawˬ ve yoˬ. Chaw ha ku lehˬ, oˇ hkʼe cawˬ tuˬ maˇ heˆ teh‸ kʼoˆ leh, yawˇ ve la‸ sheh hkui sheh yawˇ hui hta‸ maw piˇ ve yoˬ. Yawˇ hui anˇ leh ha lehˬ jaˇ ve pa taw, hkʼa deh‸ maˇ yonˍ sheˍ ve teˇ yanˇ, Nawˬ hui geh caˇ tuˬ teˇ ceuˬ ceuˬ cawˬ laˇ teh‸, yawˇ yawˇ hui hta‸ na nyi ve yoˬ. Ngaˇ piˬ taˍ ve teˇ tawn yawˇ hui yawˇ hta‸ piˇ ve teˇ yanˇ, Yawˇ yuˬ leh yawˇ hui mehˆ gʼuˇ suhˍ caˇ ve yoˬ.
Oˇ htaˇ yawˇ kʼaw‸ kʼoˆ ve, Moˉseˍ ve awˬliˇtawˇhkawˇ li‸ awˬ hkʼaw lo maˇ kʼoˆ, Gʼuiˬsha ve tcuh kaˍ paˍ hui ve li‸ teˇ hpaˍ awˬ hkʼaw lo maˇ kʼoˆ, chiˇ mvuh ve li‸ teˇ hpaˍ awˬ hkʼaw lo htawˇ maˇ kʼoˆ, ngaˬ awˬ lawn hkʼa bvuh‸ taˍ ve hkʼa peu-eˬ gʼa biˇ la tuˬ yoˬ teh‸, ngaˬ nawˬ hui geh teˇ geh chehˇ ve teˇ yanˇ, ngaˬ nawˬ hui hta‸ chi hkʼe kʼoˆ piˇ taˍ ve yoˬ.
Oˇ htaˇ, Li‸ hpu ve tcuhˉ kuiˬ hta‸ shiˍ tuˬ, yawˇ yawˇ hui ve nyi ma hta‸ dawˇ pawnˍ piˇ ve yoˬ. Yawˇ kʼoˆ ve, Li‸ hpu hkʼaw chi hkʼe bvuh‸ taˍ ve, Hkri‸ lehˬ gʼa hkanˍ suh leh shehˆ nyi gaˬ kʼo gʼa kʼaw‸ te‸ tu la tuˬ yoˬ. Venˇbaˆ dawˇ hpfuhˆ leh venˇbaˆ hpehˇ hkʼa tuˬ awˬ lawn, Yeˍruˆsaˍlehnˍ venˇ hta‸ tanˬ leh chaw ceuˬ hkʼa peu-eˬ hta‸ yawˇ ve awˬ meh awˬ hawˉ lo gʼa maˍ piˇ tuˬ yoˬ teh‸ bvuh‸ taˍ ve yoˬ. Nawˬ hui lehˬ, chi teˇ hpaˍ awˬ lawn shaˉ hkiˆ hkanˍ shehˍ hpaˇ hpeh‸ ve yoˬ. Ngaˬ Awˬ pa piˇ tuˬ yoˬ teh‸ kʼoˆ taˍ ve awˬ ceuˬ nawˬ hui geh lo ngaˬ peu laˇ tuˬ yoˬ. Hkʼe te leh, mvuhˇ naw ma lo ve kanˇ paˆ hta‸ nawˬ hui maˇ gʼa sheˍ ve ceh ceh, venˇ chi awˬ hkʼaw lo chehˇ taˍ sheˍ teh‸ yawˇ hui hta‸ kʼoˆ piˇ ve yoˬ.

Oˇ htaˇ, yawˇ yawˇ hui hta‸ Beˍtaˍniˆ hkʼaˆ awˬ paˇ lo hkʼa gaˬ shiˍ kʼai peuˬ hkʼaw‸ nawˉ, yawˇ la‸ sheh chiˇ leh, yawˇ hui hta‸ bon na‸ piˇ ve yoˬ. Chi hkʼe bon na‸ piˇ chehˇ ve teˇ yanˇ, yawˇ yawˇ hui hta‸ hpaˆ da‸ leh mvuhˇ naw ma hkʼoˆ lo taˆ kʼo‸-e ve yoˬ. Yawˇ hui yawˇ hta‸ oˉ kʼoˍ pui taˉ leh, ha lehˬ jaˇ ve awˬ hkʼaw lo Yeˍruˆsaˍlehnˍ venˇ lo kʼaw‸ kʼo‸-e ve yoˬ. Yawˇ hui lehˬ, hkʼaˬ htaˆ ka‸ bon yehˬ lonˉ awˬ hkʼaw lo chehˇ leh Gʼuiˬsha hta‸ chiˇ mvuh chehˇ ve yoˬ.

Lyt til Luˉka‸ li‸ 24