If you would like a copy of this version please contact info@davaraudiobibles.org

Lhomi New Testament

हुनी येशुगी रोरङ्‌गी ॱलोप्‍टुक् दीबल ॱअयु ॱमत् छ्‌यक्‍प, छीगङ् ॱसुव तप् तब झ्‍यीत् गोगेङ्‌गी ढीक्‍ल पी च्‍यीक् हीन्‍दुक् सीन्‍न ॱस्‍येप्‍प बेत्। सार् च्‍यीक्‍न को़न्‍ज्‍योक्‍ल आक् ज्‍यीब मीत् झ्‍यीक्‍केन्, मील अक् ॱङीङ् ॱमीत् छगेङ्‌गी मी ठीम्‍बो़न् च्‍यीक् यो़प्‍प बेत्। ॱनी हुगो च्‍याल भुमु मोरेङ्‌मु च्‍यीक् युङ्‌न भुमु दीगी हुगोल ङल खम्‍ज्‍यु ज्‍यक्‍केन् हुगोल ठीम् च्‍येत्‍न, ङ ज्‍यला थो़न्‍दु ची़त्‍रो झ्‍यी सीन्‍न स्‍युव ज्‍यक्‍तु लेम्‍म गज्‍येन् युङ बेत्। ॱनी धोबा च्‍यीक् थुक्‍ल हुगी ठीम्‍बो़न् दीगी हुगी भुमी़ तम् दील मत् नेम्‍ब बेत्। ॱनी तीङ्‌ला हुगी ठीम्‍बो़न् दीगी ॱसीम्‍ल ङ को़न्‍ज्‍योक्‍ल आक् मीत् ज्‍यीबेत्। मील अक् ॱङीङ् ॱमीत् छयेत्। ॱनी हीन्‍न अक्, हीगी मोरेङ्‌मु हीगी ङल दुक्‍स्‍यी तङ्‌रङ् ढासोङ्। ह हीगी ढीक्‍ल ठीम् च्‍येत्‍न हीगी भुमु हीगो ज्‍यला ॱमत् तङ्‌न, स्‍येन् हीगो छीगङ् युङ्‌न ङ उ दुदु ची़प्‍पेत् सीन्‍न झ्‍यीब बेत्। ढङ्‌ज्‍ये मीप्‍पे ठीम्‍बो़न् हुगी तम् हुगो ॱह घोव झ्‍यी। हुगो डस्‍सी को़न्‍ज्‍योक्‍ल ङीन् छेन् मीप्‍प केत् ज्‍यप्‍न डेन् ज्‍यक्‍केन्, खोङ्‌गी दम्‍बे मी घयेक्‍की छ्‌योल ॱसुम्‍ब खोङ् लोङ्‌न ठीम् ढङ्‌बु च्‍येत्‍न ज्‍यलाल तो़ङ्‌गेन् मेम्‍बेक्‍क ॱनी? खोङ् मत् नेम्‍बल घजो़त् च्‍यीक् थुक् स्‍यु छुगेन्? ङे खीत्‍रङ्‌ल ॱस्‍येत् योङ्। खोङ्‌गी हुब ज्‍योक्‍पु झ्‍यीन ज्‍यलाल तो़ङ्‌गेन् बेत्। ॱनी हीन्‍न अक्, कोलीमीगी ॱरेबु युङे यङ्‌ल जम्‍बुलीङ्‌दु तेम्‍बोक्‍म छ्‌य स्‍योक्‍कीन् यो़प्‍प ठेक्‍को़दङ् ॱमीत् ठेक्‍को़दङ् सीन्‍न ॱसुङ बेत्।

मी यरीगी रोरङ् को़न्‍ज्‍योक्‍की मी ढङ्‌बु हीन् ॱनो़ब ॱसम्‍न ॱयोङ्‌ल यङ् गज्‍ये मीप्‍प छोर्केन् घयेत्‍ल खोङ्‌गी हीन्‍दुक् सीन्‍न केच्‍च्‍य च्‍यीक् ॱसुङ बेत्। मीरङ् ॱङी ॱसुव तोप्‍तु छ्‌यो़गङ्‌ल फीम्‍ब बेत्। ॱनी हुब च्‍यीक् फरीसी धङ् च्‍यीक् गोलदर् हीङ्‌गो़प्‍प बेत्। ॱनी फरीसी दी टङील देत्‍न रोरङ्‌गी ॱसीम्‍ल हीन्‍दुक् सीन्‍न ॱसुव तब बेत्। को़न्‍ज्‍योक् नीज्‍यरङ् ङ ॱनी मी ॱयोङ् डस्‍सी झ्‍यक्‍पा, ठीम्‍ल ङीगेन्, ॱयोङ्‌गी नङ्‌जङ्‌दङ् ङीगेन्, हीगी गोलदर् हीगो डस्‍सी ङ मेन्। हीगी ढीक्‍ल ङ नीज्‍यरङ्‌ल थु छ्‌यी पुगेन्। ङ दी़न्‍डक् च्‍यीक्‍की नङ्‌ल लेम्‍म ॱङी ॱनुक्‍नेल दो़क्‍को़त्। ङल घङ् झ्‍युङ घयेत् दीनी गो च्‍युल तङे गो च्‍यीक् नीज्‍यरङ्‌ल पुगो़त् सीन्‍न ॱसुव तब बेत्। ॱनी यङ् हुगी गोलदर् दी फच्‍चो़त्‍तु देत्‍न तेङ् यी़ ङो़ल अक् झ्‍येत्‍ङे थोसेङ् ॱमत् तो़म्‍ब, रोरङ्‌गी रोरङ्‌ल ढङ्‌गोक् दुङ्‌न को़न्‍ज्‍योक् नीज्‍यरङ् ङल ॱङीङ्‌ज्‍यी जेत्‍रो ॱनङ्। ङ ॱनी दीक्‍च्‍येन् हीन् सीन्‍न स्‍यी़ब बेत्। ङे खीत्‍रङ्‌ल ॱस्‍येत् योङ्। को़न्‍ज्‍योक्‍की ढुङ्‌दु ॱनम्‍बर् धक्‍पर् दील हुगी फरीसी हुगो मेम्‍ब, हीगी गोलदर् हीगो थो़न्‍न टप्‍नर बेत्। घन्‍ड हीन् सीन्‍न मी ॱसी़ रोरङ्‌गी रोरङ् छ्‌यीया हीम्‍ब ॱसम्‍गो़दङ् हुगो च्‍युङाल तोङ्‌गेन् बेत्। ॱनी यङ् मी ॱसी़ रोरङ्‌गी रोरङ् च्‍युङा हीम्‍ब ॱसम्‍गो़दङ् हुगो छ्‌यीयाल तो़ङ्‌गेन् बेत् सीन्‍न ॱसुङ बेत्।

हुनी हुदु मी घयेक्‍की भीज च्‍युङेत्‍मु गज्‍येन् खुर्न युङ्‌न हीबल रेक्‍न ॱनङ्‌रो झ्‍यी सीन्‍न येशुल स्‍यी़ब बेत्। ॱनी ॱलोप्‍टुक् दीबे हुगो थोङ्‌नी हुबे क च्‍येत्‍न लप्‍स्‍य तङ बेत्। ॱनी येशुगी यङ् भीज घयेत् दीबल ॱस्‍योक् सीन्‍न खोङ्‌गी रोरङ्‌गी ॱलोप्‍टुक् दीबल भीज घयेत् हुब क ॱमत् च्‍यो़त्। हुब ङ च्‍याल युङ्‌दु ची़त्। घन्‍ड हीन् सीन्‍न को़न्‍ज्‍योक्‍की ज्‍यागक् भीज हीब डस्‍सीगी बेत्। ङे खीत्‍रङ्‌ल गन्‍दीय ॱस्‍येत् योङ्। को़न्‍ज्‍योक्‍की ज्‍यागक्‍ल स्‍युक्‍पल मी ॱसु हीगी भीज हीगो डस्‍सीगी ॱसम्‍ल खुर्न मीत् युङेक्‍क हुगो स्‍युक् ॱमीत् छुगेन् बेत् सीन्‍न ॱसुङ बेत्।

हीनी मी छ्‌यीया च्‍यीक्‍की येशुल गय च्‍येम्‍मे चयेलम ङल फु तक्‍पे छी थोबे ढीक्‍ल ङे घन्‍दुक् झ्‍यीब झ्‍यीत् गोगेन् बेक्‍क? सीन्‍न ढीब बेत्। ॱनी येशुगी हुगोल खोक्‍की ङल घन्‍डल गय च्‍येम्‍म सीक्‍केन्। गय च्‍येम्‍म दी ॱनी को़न्‍ज्‍योक् मेन्‍द, ॱयोङ् ॱसु उक् मीप्‍प बेत्। छ्‌यो़डीम्‍गी क घयेत् रङ्‌ल ॱस्‍यो़च्‍च्‍ये यो़ट्‌टो।
ॱयोङ्‌दङ् मत् ङीज्‍यीत्। मी ॱमत् ॱसो़च्‍च्‍यीत्। की़न्‍नक् ॱमत् कुज्‍यीत्। पङ्‌बु झ्‍यीप्‍पे यङ्‌ल ॱएलम मत् ज्‍यक्‍च्‍यीत्। फमल खुच्‍च्‍य झ्‍यीज्‍यीत् सीन्‍न ॱस्‍येप्‍प बेत्।
ॱनी हुगी मी दीगी खोङ्‌ल हीगो त कुरीक् ङे च्‍युङेत्‍मुनीरङ् चीन युङेन् झ्‍यीब बेत्। ॱनी हीगो येशुगी ॱह घोनी खोङ्‌गी हुल हरुङ्‌द रङ्‌ल हुन्‍दो ॱनग च्‍यीक् ॱमत् छङेत्। रङ्‌ल घङ् यो़प्‍पे नोर् घयेत् दी चोङ्‌न टङ्‌बु घयेत्‍ल गो़न बील्‍ल रङ् ङे ॱलोप्‍टुक्‍ल ॱस्‍योक्। हुनी रङ्‌ल तेङ् यी़दु तीर्क थोप्‍केन् बेत् सीन्‍न ॱस्‍येप्‍प बेत्। हीगो ॱह घोनी हुगी मी दी ॱसीम्‍ब दुक्‍नर बेत्। घन्‍ड हीन् सीन्‍न हुगो छ्‌युक्‍पु बर्तीङ् यो़प्‍प बेत्।
हुनी येशुगी हुल तेन हीन्‍दुक् ॱसुङ बेत्। मी छ्‌युक्‍पु बर को़न्‍ज्‍योक्‍की ज्‍यागक्‍ल स्‍युक्‍पल घन्‍दुक्‍मे घाब दुक्‍क। मी छ्‌युक्‍पु बर को़न्‍ज्‍योक्‍की ज्‍यागक्‍ल स्‍युक्‍पले त ॱमुक्‍मु घम खप्‍की ॱमीक्‍ल स्‍युक्‍प ले ॱल्‍हा युङ्‌गेन् बेत् झ्‍यीब बेत्। हीगो ॱह घोवे मी घयेत् दीबे नुक्‍म हीन्‍न, मी ॱसु दी छी थर्वल थो़न् छुगेन् ॱनी? सीन्‍न ढीब बेत्। ॱनी हील येशुगी कोलीमी ङो़नी युङ् ॱमीत् छुगेङ्‌गी ढे घयेत् को़न्‍ज्‍योक् ङो़नी हुगो युङ् छुगेन् बेत्।
हीगी ढीक्‍ल पत्रुस्‍की खोङ्‌ल ङीक्‍की ॱनी ङीत्‍रङ्‌गी खीम् थम्‍ज्‍येत् फङ्‌न ङीत् नीज्‍यरङ्‌गी ॱलोप्‍टुक्‍ल स्‍युन यो़त् सीन्‍न झ्‍यीब बेत्। ॱनी हुल खोङ्‌गी ङे खीत्‍रङ्‌ल गन्‍दीय ॱस्‍येत् योङ्। को़न्‍ज्‍योक्‍की ज्‍यागक्‍की ढीक्‍ल मी ॱसी़ रोरङ्‌गी ढोङ्‌ब, नङ्‌जङ्, पी़न्, फम धङ् भीज घन्‍ड फङ्‌न स्‍यक् यो़दङ् हुगोल हन्‍देङ्‌गी छी हीलरङ् ॱल्‍हक्‍मु गज्‍येन् थोप्‍केन् बेत्। ॱनी तीङ्‌मागी धी़ दीगी यङ्‌ल ॱसुम्‍ब हुल फु तक्‍पे छी थोप्‍केन् बेत् सीन्‍न ॱसुङ बेत्।

हुनी येशुगी ॱलोप्‍टुक् च्‍युन्‍नीबु दी फच्‍चो़त् च्‍यीक्‍ल ठीक्‍न हुबल हीन्‍दुक् ॱसुङ बेत्। तेदे हुन्‍दो हज्‍यरङ् यरुशलेम्‍ल डोगीन् यो़क्‍केन् बेत्। कोलीमीगी ॱरेबी़ ढीक्‍ल कलुङ् ॱस्‍यो़क्‍केन् घयेक्‍की घङ् ढीन यो़प्‍पे केच्‍च्‍य घयेत् दी ह जेङ् डुप्‍केन् बेत्। खोङ् ज्‍यी़त् ॱयोङ् ॱयोङ्‌गी मी घयेक्‍की लक्‍ल टेत्‍न, हुगी मी दीबे खोङ्‌ल छ्‌यस्‍सी़त् ज्‍यप्‍न, ॱमो़म्‍बी़त् तङ्‌न, छ्‌युप्‍स्‍या कप्‍न, डेङ्‌ज्‍यक् बेन्‍न, हुनी ॱसो़क्‍केन् बेत्। हुनी स्‍यक्‍पु ॱसुम् ॱसोङे ङीन् दी यङ् खोङ् ॱसोम्‍बुल लोङ्‌गेन् बेत् सीन्‍न ॱसुङ बेत्। ॱनी ॱलोप्‍टुक् दीबे हीगी तम् हीगी धो़न् दी घन्‍ड अक् ॱह मत् घोव बेत्। हुबे ॱसीम्‍बे ॱमीक् दी मत् भीयल हुबे ॱह घो ॱमत् छुब बेत्।

ॱनी येशुसो यरीहो सार्ल ॱलीच्‍च्‍येम ॱयेङे यङ्‌ल ज्‍यलम्‍गी छीगन मी स्‍यर्च्‍योक् च्‍यीक् ॱसो़ङो़न् लीङ्‌गीन् यो़प्‍प बेत्। ॱनी हुगी स्‍यर्च्‍योक् दीगी लम्‍ल मी गज्‍येन् डोव ॱह घोनी हीगो घन्‍ड बेक्‍क? सीन्‍न ढीब बेत्। हीगी लेल्‍ल उन मी डोगेन् दीबे नासरत्‍की येशुसो डोगुक् सीन्‍न ॱस्‍येप्‍प बेत्। हुनी हुगी खोङ्‌ल ॱवे दाऊद्‌गी ज्‍यी़त्, येशु ङल ॱङीङ्‌ज्‍यी जेत्‍रो ॱनङ् सीन्‍न केत् ज्‍यब बेत्। लम्‍ल ॱएन्‍स्‍युक्‍ल डोगेन् दीबे हुगोल ॱहरक्‍प दो़त् सीन्‍न लप्‍स्‍य तङ बेत्। ॱनी तङ्‌न आक्, हुगी हरुङ् केत् छ्‌यीदु तो़न्‍न ॱवे दाऊद्‌गी ज्‍यी़त्, ङल ॱङीङ्‌ज्‍यी जेत्‍रो ॱनङ् सीन्‍न झ्‍यीब बेत्। हुनी येशु फच्‍चो़त्‍तु ठेल्‍ल देत्‍न, हुगी मी हुगो ठीक्‍लेत् सीन्‍न तङ बेत्। हुनी स्‍यर्च्‍योक् दी खोङ्‌गी लोल ठीक्‍न युङ्‌नी, खोङ्‌गी हुल ङ खो़त्‍ल घन्‍ड झ्‍यीच्‍च्‍ये गो़गुक्‍क? सीन्‍न ढीब बेत्। हुगी लेम्‍बुल चोव ज्‍यीन्‍दक् ङल ॱमीक्‍की थोङ्‌ज्‍ये यो़प्‍प सो़न ॱनङ्‌रो झ्‍यी सीन्‍न स्‍युव पुब बेत्। हीनी येशुगी हुल रङ्‌गी ॱमीक्‍की थोङ्‌गेल्‍ल ज्‍युक्‍च्‍यीत्। रङ्‌गी छ्‌य स्‍यक्‍प दीगी रङ्‌गी ॱमीक् थोङ्‌गेल्‍ल ॱसोङ बेत् सीन्‍न ॱसुङ बेत्। हुनी ॱस्‍यर्च्‍यक् हुगी ॱमीक् दी थोङ्‌गेल्‍ल ॱसोङ बेत्। हुनी हुगी को़न्‍ज्‍योक्‍ल तो़प्‍प पुगील्‍ल खोङ्‌गी तीङ्‌ल टप्‍नर बेत्। ॱनी उन यो़प्‍पे मी घयेत् दीगी हुगो थोङ्‌नी हुबे एक् को़न्‍ज्‍योक्‍ल तो़प्‍प पुब बेत्।

Lyt til लुका 18