If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

अब्राहाम चो पिला, दाऊद चो पिला, ईशु मसीह चो बंसावली। अब्राहाम ले इसाक जनम होलो, इसाक ले याकूब जनम होलो, याकूब ले यहूदा आउर हुनचो भाई जनम होलो, यहूदा आउर तामार ले पेरेस आउर जेरह जनम होला, आउर पेरेस ले हिस्रोन जनम होलो, आउर हिस्रोन ले एराम जनम होलो, एराम ले अम्मीनादाब जनम होलो, अम्मीनादाब ले नहशोन आउर नहशोन ले सलमोन जनम होलो, सलमोन आउर राहाब ले बोअज जनम होलो, बोअज आउर रूत ले ओबेद जनम होलो, आउर ओबेद ले यिशै जनम होलो, आउर यिशै ले दाऊद राजा जनम होलो। आउर दाऊद ले सुलेमान हुन बायले ले जनम होलो जोन पयले उरिय्याह चो बायले रली, सुलेमान ले रहबाम जनम होलो, आउर रहबाम ले अबिय्याह जनम होलो, आउर अबिय्याह ले आसा जनम होलो, आसा ले यहोशाफात जनम होलो, आउर यहोशाफात ले योराम जनम होलो, आउर योराम ले उज्जियाह जनम होलो, उज्जियाह ले योताम जनम होलो, योताम ले आहाज जनम होलो, आउर आहाज ले हिजकिय्याह जनम होलो, हिजकिय्याह ले मनश्शे जनम होलो, मनश्शे ले आमोन जनम होलो, आउर आमोन ले योशिय्याह जनम होलो; आउर बंदी होऊन भाती बेबीलोन जातो बेरा योशिय्याह ले यकुन्याह आउर हुनचो भाई जनम होला। बंदी होऊन भाती बेबीलोन अमरलो पाचे यकुन्याह ले शालतियेल जनम होलो, आउर शालतियेल ले जरुब्बाबिल जनम होलो, जरुब्बाबिल ले अबीहुद जनम होलो, अबीहुद ले इल्याकीम जनम होलो, आउर इल्याकीम ले अजोर जनम होलो, अजोर ले सदोक जनम होलो, सदोक ले अखीम जनम होलो, आउर अखीम ले इलीहुद जनम होलो, इलीहुद ले इलियाजर जनम होलो, इलियाजर ले मत्तान जनम होलो, आउर मत्तान ले याकूब जनम होलो, याकूब ले यूसुफ जनम होलो, जोन मरियम चो मुनुक रलो, आउर मरियम ले ईशु जनम होलो जोन के लोग मसीह बलु आत। अब्राहाम ले दाऊद तक सपाय चवदा पीढ़ी होली, आउर दाऊद ले धरून बेबीलोन चो बंदी होऊन भाती अमरून जाओत ले चवदा पीढ़ी, आउर बंदी होऊन भाती बेबीलोन के अमराय जातोर समया ले मसीह तक चवदा पीढ़ी होली।

अदायं ईशु मसीह चो जनम ऐ परकार ले होली, कि जिदलदाय हुनचो आया मरियम चो मांगनी यूसुफ चो संगे होली, तेबे हुनमन चो रूंड़ा होतोर पयले ले हुन पवितर आत्मा चो बाटले देंहबारी होऊ रली। तेबे मरियम चो मुनुक यूसुफ जोन धरमी रलो आउर हुनके बेईजित करूक नी चाहते रलो, हुनके खुसराय छांडुन देतोर बिचार करलो। जिदलदाय यूसुफ ऐ गोठमन चो बिचार ने ची रलो तेबे माहापुरू चो सरगदूत हुनके सपना ने दका देउन भाती बोलुक मुरयालो, “हे यूसुफ! दाऊद पुरखा चो पिला, तुय आपलो बायले मरियम के आपलो घरे आनतो काजे नी डर, कसनबल्लोने जोन हुनचो गरब ने आसे, हुन पवितर आत्मा चो बाटले आय। हुन बेटा जनमायदे आउर तुय हुनचो नाव ईशु संगाव, कसनबल्लोने हुन आपलो लोगमन चो हुनमन चो पापमन ले मुक्ति करेदे।” ऐ सपाय काई ऐईकाजे होली कि जोन बचन परबु यशाया अगम गिआनी चो बाटले बोलु रलो, हुन पुरा होओ “दका, गोटक कुंआरी देंहबारी होयेदे आउर गोटक बेटा जनमायदे, आउर हुनचो नाव इम्मानुएल संगाया जायेदे,” जेचो अरत आय-माहापुरू आमचो संगे। तेबे यूसुफ नींद ले उठून भाती माहापुरू चो दूत चो हुकुम चो अनुसार आपलो बायले के आपलो घरे धरून ईलो। आउर जिदलदाय ले मरियम पिला के नी जनम दिली हुदलदाय ले यूसुफ आउर मरियम ओछना ने संगे नी सोहला: आउर यूसुफ हुन पिला चो नाव ईशु संगालो।

Lyt til मत्ती 1