If you would like a copy of this version please contact info@davaraudiobibles.org

Kayort New Testament, CC-BY-SA-4.0, The Love Fellowship. Kayort New Testament Audio Bible, CC-BY-SA-4.0, Davar Partners International, The Love Fellowship, 2022.

Kayort New Testament

Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.

पत्रुस आर यूहन्ना दिपहरियाके तीन बजे प्रार्थनाके समयमे परमेश्वरके मन्दिरमे जैते रहै। एकटा आदमी जे जनमहैसे नेंग्डा रहै ओकरा आदमीसब सभे दिन परमेश्वरके मन्दिरके सुन्दर नामके फाटक लगत आनिके बैठ्या देते रहै, ताकी ऊ परमेश्वरके मन्दिरमे ज्यावाला आदमीसिसे भीख माँगे सकै। जब ऊ पत्रुस आर यूहन्नाके परमेश्वरके मन्दिरमे जैते देखल्कै ऊ ओकरासिसे भीख माँगे लाग्लै।
तब पत्रुस आर यूहन्ना सिधे ओकर महर देखिके कहैल्कै, “हमरसिके महर देख।” ओकरसिसे कुछु पाबैके आशा करिके ऊ ओकरसिके महर ध्यान द्याके देखल्कै। तब पत्रुस कहैल्कै, “हमरसिके लगत सोना या चानी ते नैछै, मगर हमरसिके लगत जे छै से हमेसब तोरा देबौ। नासरत गाँवके येशू ख्रीष्टके नाममे उठ् आर लर।”
पत्रुस ओकर दहिना हात पक्डीके उठैल्कै आर तुरन्ते ओकर पैरीमे आर घुटुवामे तागत ऐलै। तब ऊ तुरन्ते उठिके खडा भेलै आर लरे लाग्लै तब उछल्ते-कुदते आर परमेश्वरके प्रशंसा कर्ते ओकरसिके संगे परमेश्वरके मन्दिरके ऐगनमे ढुक्लै।
तब सभे आदमीसब ओकरा लर्ते आर परमेश्वरके प्रशंसा कर्ते देखल्कै। ऊसब ओकरा चिन्हल्कै कि परमेश्वरके मन्दिरके सुन्दर नामके फाटक लगत रहेवाला उहे भीख माँगेवाला आदमी छै आर ओकर जीवनमे भेल यी चमत्कारके देखिके ऊसब आश्चर्य-चकित भेलै।

ऊ आदमीके पत्रुस आर यूहन्नाके पाछु लाग्ल देखिके सभे आदमीसब खुबे आश्चर्य हैते एक्केसंगे उटा जगहमे दौड्ले ऐलै जकरा सुलेमान राजाके ओसरा कहेल जैछै। यी देखिके पत्रुस आदमीसिके कहैल्कै, “इस्राएलीसब, यी बातमे कहिने तुहेंसब आश्चर्य मानैछ? या हमरसिके आपने शक्ति या भक्तिद्वारा हमेसब एकरा लरेवाला बनैलियै कहिके तुहेंसब कहिने हमरासिके एरंके ताकिके देखैछ?
आपनसिके बाप-पुर्खासब अब्राहम, इसहाक आर याकूबके परमेश्वर येशूके बहुते आदर देल्कै जे सभे दिन ओकर आज्ञापालन कैल्कै आर ओकरा खुश बनैल्कै। मगर जकरा तुहेंसब ओकर जान मरवाबैके लिए यहूदी आदमीसिके अगुवासिके हातमे सौंपी देलह। राज्यपाल पिलातस ओकरा छोडी दियैके विचार कैल पर भी तुहेंसब ओकरा नैछोडैले कहेलह। मगर तुहेंसब एकटा पवित्र आर धर्मी जनके अस्वीकार करिके, एकटा हत्याराके छोडी दियैके माँग कैलह।
आर कहियो खतम नैहुएवाला जीवन दिएवाला स्रोतके तुहेंसब मार्लह जकरा परमेश्वर मुर्दासे जिन्दा बनैल्कै, हमेसब यी बातके गवाह छियै।
ख्रीष्ट येशूके नाममे विश्वासके कारण यी आदमीके जकरा तुहेंसब जानैछ, जकरा तुहेंसब एखन देखैछ, एकरा तागत देल गेलै छे। यी आदमी येशूके नाममे आर ख्रीष्ट येशूमे विश्वासके द्वारा बिलकुल भला चंगा भेल छै, जेरं कि तुहेंसब खुद देखैछ। आब भैय्यासब आर बहिनसब, हमरा मालुम छै, कि तुहेंसब आर तोर अगुवासब अन्जानमे येशूके जान मार्लह कहिनेकी तुहेंसब नैजान्लह कि ऊ ख्रीष्ट रहै। मगर परमेश्वर सभे आपन वक्तासिके द्वारा यी बात पहलहै घोषणा करिदेल्कै रहे कि ख्रीष्टके दुःख भोगे पड्तै आर मरे पड्तै। परमेश्वर यी बातके सच साबित कैल्कै।
सेल्याके पाप करैले छोड आर परमेश्वरके तरफ मन लगाब आर परमेश्वरके लगत लौटिके आब, ताकी तोरसिके पापसब माफ भ्याजहौं। तब तुहेंसब परमेश्वरके तरफसे आत्मिक सामर्थ्य पैभ। आर ऊ तोरसिके लिए येशूके भेजी देतहौं, जे ख्रीष्ट छै, जकरा परमेश्वर पहलहै तोरसिके खातिर चुन्लकहौं छे।
मगर बहुते समय पहेला परमेश्वर आपन वक्तासिके द्वारा आदमीसिके यी प्रतिज्ञा कैल्कै कि येशूके स्वर्गमे उटा समयतक रहना जरुरी छै जब परमेश्वर ऊ सभे चीजसिके नया बन्या देतै जे ऊ बनैल्कै छे। जेरं कि मूसा कहैल्कै रहे, ‘प्रभु परमेश्वर तोरसिके लिए तोरसिके बीचसे हमर जुगुर एकटा परमेश्वरके वक्ता भेज्तौ। ऊ तोरासिके जे-जे कहतौ ऊ सभे बात तोरासिके सुने पड्तौ।
मगर हरेक आदमी जे ऊ परमेश्वरके वक्ताके बात अनसुना कर्तै ऊ आदमीसिके बीचसे पुरा तरहसे नाश कैल जैतै।’
शमूएलसे ल्याके ओकर पाछुके सभे परमेश्वरके वक्तासब जतनें बोल्लै छे, ऊ सभेकोय इहे दिनके बारेमे सुनैल्कै छे। तुहेंसब उहे परमेश्वरके वक्तासिके आर उहे प्रतिज्ञाके सन्तान छह, जे प्रतिज्ञा परमेश्वर तोरसिके पुर्खा अब्राहमके संगे एरं कहिके कैल्कै रहे, ‘तोर सन्तानमे धर्तीके सभे परिवार आशीर्वाद पैतै।’
परमेश्वर आपन सेवकके मुर्दासे जिन्दा बन्याके सभैसे पहेला आशीर्वाद दियैके लिए तोरसिकेलगत भेजल्कै। ताकी आपनसिमेसे हरेकके आपन जीवनके पापमय तरिकासिसे परमेश्वरके तरफ लौटैके लिए सहायता करै।”

Lyt til चुन्ल आर भेज्ल चेलासब 3