N'KANGULU WUMOONË

Cilumbu be ciina, Yeesu kubasikë ku n'zo i wusë kalë mu ndaambu liyaangë. Nkoongë yinenë yi baatu kwiisë kun'zukë, tee yi faanë naandi wusye be podi ko kukalë yaawu. Naandi wusë kandëmë mu bwaatu i wusë kalë. Nkoongë yooso kukalë mu ndaambu masi. Naandi wusë bëkaambë mpaapë maambu mu sisasafë : « Cimwamunë singeenzë wubasikë mu kwe mwamuni singeenzë. Abu kulëmwamunë singeenzë, mwa mpooko singeenzë kubwa bwendi yi nzilë. Sinuni kutuukë i kusidoodë. Singeenzë sin'ka kubwiilë fë yilu mëmanyi. Mu lukaambu lu n'toto wu mpaapë faawu, bo n'toto wusye doongë ko, mimeni kulëlukë. Bunë muunyi wuselukë, mimeni kulelukë i kuumë mu lukaambu lu singaanzi. Singeenzë sin'ka sibwiilë fë meeyi siseendë. Siseendë kumenë i kusifyetikini. Simesë kubwiilë mu n'toto cibodo i syaawu kubutë mëkuundi : nkamë, mëkumë-samunu, mëkumë-tatu! Wosuku wuke yi n'tu, matu mëke yaandi. »


Bilaanzi bisë belëmë Yeesu i bisë n'yufulë : « Mu cibilë-mbici wulë mu kutubilë mu sisasafë? » Yeesu wusë bëvutulilë : « Cibilë bëvaanë ke beeno bukuzabilë liviindë li Lwaangu lu mëyilu. Lya lyoolyo lisye veewu ke baawu ko. Licyelikë, wunë wuke yi byaawu, bëkun'vaanë i naandi wum'bakë bimpaapë. Kasi wunë wukambusu, bëkum'botulë keti fwaati fëke yaandi. Mu lyaawu, yilë mu kubëkambilë mu sisasafë : cibilë bëm'monë, bisë m'monë ko, bën'kuwu bisë n'kuwu ko i bisë m'bakulë ko. Mu baawu mëvangënë manë mëbikë Ezayi :
“Kuwu, lun'kuwu kasi lusë m'bakulë ko.
Kumonë, lum'monë, kasi lusë m'monë ko.
Cibilë, n'timë wu mboongu baatu be yiiyi wucidë.
Baawu baduci matu maawu i meeso maawu,
mu kumaangë kuwulu mu matu maawu,
mu kumaangë kumweenë mu meeso maawu,
mu kumaangë kubakulilë mu n'timaawu.
Mu lyaawu, baawu bisë bën'vutukunë ke miinu ko,
bwiinji yibëbelusi.” »
« Nyeenzi oyo mu meeso miinu beeno, cibilë lulë mu kumonë i matu miinu cibilë lulë mu kuwu. Licyelikë yilukaambë, mpaapë mibici i bësulëmë bëvwa n'ciinzë kumonë linë lumonë i bisye limonë ko i kuwu linë luyuwu, lusye likuwu ko. »


« Lwe yuwaano suundu sasafë cimwamunë singeenzë. Banë bën'kuwaangë libuungu li Lwaangu i bën'kaambu kuzikulë bëke dedë mweekë ndaambu nzilë fanë fëm'bwiilë lungeenzë : ciluunzi cibi kwiisë i kubotulë cinë bëkunë mu n'timaandi. Bëmesë bëke dedë mweekë n'toto mëmanyi fanë fëm'bwiilë cikunu : baawu bën'kuwu libuungu i bëlengë litambulë yimunë liyaanji. Kasi, baawu bisë libiikë ko kumënë mu baawu. Oboobo bunë bën'kwisë mënyonyi kaambofo nkwamusu mu cibilë ci libuungu li Nzaambi baawu bën'lengë lekulë ciminu. Bën'kooso bën'tambulë cikunu fë meeyi siseendë : bën'kuwu libuungu, kasi bideenzë buloongo i lupuutu lu businë kufyetikini libuungu li Nzaambi, lyaawu lisë n'vaanë ko lyosuku likuundi. Bën'ka, bën'tambulë bikunu mu n'toto wumboti : bën'kuwu libuungu i bën'zikulë. Oboobo, baawu bën'vaanë mëkuundi, bëmesë nkamë, abaabë mëkumë-samunu, aba mëkumë-tatu mu kadë lungeenzë. »

Naandi wusë bëteelë sasafë yin'ka : « Lwaangu lu mëyilu, dedë mweekë muutu wun'kunë singeenzë simboti mu solaandi. Bunë baatu bëlëlembikilë, mbeeni kwiisë, kukunë mbuundu fë meeyi singeenzë simboti i wusë ke yendaangë. Bunë lungeenzë lwamëni i likuundi, oboobo mbuundu yisë basikë yivaandi. Bisasi bi fumu solë bisë n'kaambë : “A Fumu, njeeyi sye kunë lungeenzë lu boti mu solaakwe? Oboobo kuni kwafuminë mbuundu?” Naandi wusë bëkaambë : “Mati mbeeni na wuvaangë lyaliili.” Bisasi bisë n'kaambë : “Njeeyi wun'vitikë beeso twe yitumunye?” Naandi wusë vutulë : “Moniko, mu kumaangë bunë lun'sakulë mbuundu, beeno lum'podi kutumunë yivaandi bikunu biboti. Biikaanu byakë byooso bikulilë fë cimweekë, tee yi fanë bën'velilë. Ntaangu kuvelilë, miinu mba yikaambë bisasi : Tumunaanu ntetë mbuundu, luyikucikaanu mu bikuuku mu kuyilakisi. Kucikaanu singeenzë simboti mu ntalaami.” »


Naandi wusë bëkaambë sasafë yin'ka : « Lwaangu lu mëyilu luke dedë mweekë lungeenzë lu mutalëdë lunë wun'viipë wukunë mu solaandi. Lwaawu, lungeenzë luvyokili bucyeeci yi singeenzë syooso yi bikunu byooso. Ka mooti lwamenë, lwaawu lun'citukë n'ti i sinuni kutuungë maanzë maawu mu bitafi byaandi. »


Na kubëkaambë sasafë yin'ka : « Lwaangu lu mëyilu fwiifu si n'cyeetu wun'tuulë m'bweeli mu bizoongu bi tatu bi faliinë. Tee fanë fun'funinë yakë yooso! »


Yeesu wulëkambilaangë makë mooso omo ke sinkoongë si baatu mu sisasafë i naandi wusye tubënaangë yaawu ko, kukaambu kutubë sisasafë. Naandi wulësiilaangë boobo bwiinji buvangënë libuungu litendulë m'bici :
« Miinu mba yin'zibulilë munu mu sisasafë,
mba yin'tendulë biimë biswaamë kutoonë fanë mpangulu buloongo. »

Oboobo, Yeesu kubiikë sinkoongë si baatu i wusë kotë ku n'zo. Bilaanzi byaandi kum'belëmë i bisë n'kaambë : « Tuzimuninë suundu sasafë yi mbuundu mu solë. » Naandi wusë bëcikuninë : « Wunë wun'kunë lungeenzë lu boti, mati Mwaanë muutu. Solë : yaawu bën'teelë buloongo, singeenzë simboti, banë bë Lwaangu lu mëyilu. Mbuundu : baanë bë dyaabu. Mbeeni wunë wukunë mbuundu : dyaabu. Wunë wun'velë : situkulu buloongo. Bisasi : siyaanzi. Mpilë mweekë bo bën'sakulilaangë mbuundu bën'lankaangë ku mbaasu, boobo mweekë bwa bum'beelë situkulu buloongo : Mwaanë muutu mba wun'filë siyaanzi syaandi mu kubotulë nkakinyi yooso i bivadë-mbi, mu lwaangu lwaandi, baawu mba bëbëlakë ku buluunji bu mbaasu, kunë kum'ba miluunji yi tukwetukunu tu meeno. Oboobo bësulëmë, bëm'monikë buke muunyi ku Lwaangu lu Tataawu. Wosuku wuke yi n'tu, matu mëke yaandi! »

« Lwaangu lu mëyilu fwiifu yivaandi yi businë buswaamë mu solë n'viipë. Muutu wunë wububakulë, wubusweekë, yi liyaanji lyaandi, na ke sumbisi byosuku kubakë. Fë siitu, na kusuumbë solë beenë. »
« Lwaangu lu mëyilu fwiifu yi mungë-lungooso wuke toombaangë n'saangë wu bukaalu. Bunë kum'bakë n'saangë mweekë wu bukaalu, naandi ke yendaangë kusumbisi byakë byooso, biba yaandi i naandi kuwusuumbë. »

« Lwaangu lu mëyilu fwiifu n'taambu wunë bën'lakë mu m'bu i wun'kuungë litoongo li mpilë i mpilë yaandi. Mooti wawaalë, bëwuvolë ku ntaandu. Bivubë-toongo kukalë fësi i kusoolë li litoongo liboti, kutuulë mu mikutë i kubumë libi. Boobo bwa bum'beelë fë situkulu buloongo. Siyaanzi sin'kwiisë i sin'kabulë bilyaani yimunë bësulëmë. Bën'lakë bilyaani ku buluunji bu mbaasu kunë kum'ba mësweelë i tukwetukunu tu meeno. »

« Lwakuwaanu makë mooso omo? » Bilaanzi kucikunë : « Mweenë-ngete. » Yeesu kubëkaambë : « Mu lyaawu, wosuku n'loonji n'kaakë wun'citukë cilaanzi ci Lwaangu lu mëyilu, naandyoowo, fwiifu yi fumu n'zo wum'bakilë businë bwaandi mu maambu mëmoonë, yimunë mëkulu. »


Bunë kwamani kubëkambilë mu sisasafë, Yeesu wusë botukë fë mbiinji bë yooyi i wusë kweendë ku livulë li Nazaleetë, kunë kuyonzukulë. Naandi wusë ba mu kuloongë baatu mu cizutununu cyaawu. Baawu kubwa libobo i bisë tubë : « Mamoomë kufuminaangë kunyee? Nani wan'vaanë mpilë luzaabu olo? Kwisilë buni yivaandi mu naandi kuvaangë mpilë bimaaku obyo? Naandi kwe mwaanë salëpaantye? Lizinë li mamaandi Maali kwe? I baanë baandi bë nguli, Zaakë, Zozeefë, Simu, i Zuudë? Baanë baandi bëcyeetu abu bëkeeli yiitu fë cimweekë kwe? Kuni kwabakilë lutumu looso olwe? » Baawu bisë bakë ntoondo mu naandi, Yeesu wusë bëkaambë : muutu ve wum'ba « M'bici wun'cizëmë fosuku faamë, kasi yaaku fë cifuumbë cyaandi. » Yeesu wusye vaangë mpaapë bimaaku ko cibilë baatu bë livulë lyaandi bësye ta maanë mu naandi ko.

Lyt til Matye 13