Zapoteco de San Vicente Coatlan - 2015 Edition (NT) Non-Drama

Zapoteco de San Vicente Coatlan - 2015 Edition (NT)

Zapoteco de San Vicente Coatlan - 2015 WBT (NT) Drama

Leꞌa Espíritu ten Dios cha msaꞌa juers ndoꞌ Jesús, cha utoꞌo Jesús toꞌo yowbeꞌe Jordán. Cha mbiꞌi Espíritu ten Dios xa geꞌe sa bid sa naꞌan men. Leꞌa Jesús uyoꞌo dub top gaꞌal wizh sa wa. Leꞌa maxuꞌu mbin preb Jesús, nlad maxuꞌu utsabgix maxuꞌu Jesús. Leꞌa be wizh wa leꞌa Jesús lá ngaw, ta weꞌe zha utid be wizh wa leꞌa xa uzhebpa ndanna. Weꞌe leꞌa maxuꞌu cha ndab ndoꞌ xa:
—Tal leꞌa lu Xin Dios, nat gud ndoꞌ geꞌ baꞌ yak‑a pan.
Leꞌa Jesús cha ukaꞌab ndab:
—Leꞌa diꞌizh ten Dios nkeaniꞌi: “Naꞌanpa nabtsa ta ndaw men nban bexa. Mas nsak nxobgek men ndoꞌ diꞌizh ten Dios, leꞌa ta wa ndun nban xa.”
Weꞌe leꞌa maxuꞌu cha mbiꞌi Jesús gek dub geꞌe gaꞌappa. Cha uxax mluu maxuꞌu itea be gezh nde ndoꞌ gizhliyo. Cha ndab maxuꞌu ndoꞌ Jesús:
—Leꞌa itea be gezh baꞌ no itea be ta nsak ncho ndoꞌ be gezh baꞌ, leꞌa ta wa usa naꞌ ndoꞌ lu inibeꞌe lu‑yá. Leꞌa ta baꞌ ta nibeꞌe naꞌ, no sak usa naꞌ‑yá ndoꞌ bexa nlad naꞌ. Tal leꞌa lu isaxib ndoꞌ naꞌ yankea lu naꞌ, leꞌa naꞌ usa itea be ta baꞌ ikaꞌa lu.
Leꞌa Jesús cha ndab ndoꞌ maxuꞌu:
—Bxoꞌon wats naꞌ, maxuꞌu. Leꞌa diꞌizh ten Dios nkeaniꞌi ndab‑a: “Wankea Dios Xa Nibeꞌe, no bin ta nladtsa xa.”
Weꞌe leꞌa maxuꞌu cha mbiꞌigal Jesús gezh Jerusalén gek niꞌi ten Dios sa ndon leꞌa gaꞌap. Cha ndab maxuꞌu:
—Tal leꞌa lu Xin Dios, nat btsaꞌab brink gast ndoꞌ yo baꞌ, geal leꞌa diꞌizh ten Dios nkeaniꞌi ndab‑a:

Leꞌa Dios utuꞌub be angel ten na ulaꞌach lu.
Leꞌa bexa wa goꞌo lu ndoꞌ yaꞌa na,
ndontsa ni lá ikateꞌeb lu ndoꞌ ni dub geꞌ.

Leꞌa Jesús cha ukaꞌab ndab:
—No ndab diꞌizh ten Dios: “Lá gun lu preb Dios Xa Nibeꞌe.”
Cha li mteꞌa maxuꞌu be ta mbin maxuꞌu preb Jesús wa, cha mlaꞌa maxuꞌu xa dub ndeꞌep.


Leꞌa Jesús cha mlanseaꞌ distrit Galilea, cha mas uyoꞌo juers ten Espíritu ten Dios xa. Leꞌa be ta mbin Jesús cha mgen itea be sa gax sa wa. No mluu Jesús be men len be niꞌi sa nzhealbe bexa judio. Cha ndab bexa leꞌa Jesús leꞌaka ndadiꞌizh.


Tsoꞌo wa leꞌa Jesús cha nseaꞌ Nazaret sa na ngoꞌol xa. Leꞌa ngol dub wizh neꞌe bexa judio, leꞌa xa cha no uyoꞌo len niꞌi sa nzhealbe bexa wa, lakka ndun xa. Cha ngwasoꞌ xa goꞌol xa diꞌizh ten Dios. Cha msaꞌa bexa dub libr nyuꞌud ndoꞌ Jesús, ta nsoꞌ diꞌizh mkeꞌa Isaías, xa mbidiꞌizh sakndoꞌ Dios tiemp polta. Leꞌa gor na mxaꞌal xa git wa, cha mzheal xa sa ndab‑a:

Leꞌa Espíritu ten Dios Xa Nibeꞌe ncho ladoꞌo naꞌ,
leꞌa Dios mti naꞌ gudiꞌizh naꞌ ndoꞌ be men uban nak leꞌa Dios gakno bexa.
No gun naꞌ wen yoo ladna bexa kweaꞌ ncho ladna,
no itoꞌo bexa nkea litgiꞌib, no inaꞌ bexa lá naꞌ.
No ko naꞌ bexa kweaꞌ ndencho ndoꞌ yaꞌa be men,
no ndalyáp naꞌ leꞌa Dios Xa Nibeꞌe yá ngol tiemp gakno be xmen na.

Cha mtsaw Jesús git wa, cha msaꞌa xa‑yá ndoꞌ xa nchansu sa wa, cha usob xa. Leꞌa itea be men nde len niꞌi wa cha nwiꞌi ndoꞌ Jesús. Leꞌa Jesús cha ndab ndoꞌ bexa:
—Nat ngok cumplir be diꞌizh ndee ndoꞌ gaꞌal bega.
Leꞌa itea be men wa ndab leꞌa Jesús dub xa wenka. No ngwanseana bexa ndoꞌ be ta li mbidiꞌizh Jesús wa, ndab bexa:
—¿Lid xin Kosé xa baꞌ zha?
Leꞌa Jesús cha ndab:
—Ta ugeapa leꞌa bego gab dub diꞌizh ndee ndoꞌ naꞌ: “Doctor, byunyakna go leꞌaka go. Bin ga be uyon lazh ga ndee, lak ndoꞌón besa mbin go be uyon gezh Capernaum.”
Cha no ndab Jesús:
—Leꞌa naꞌ gáp ndoꞌ bego leꞌa ni dub profet lá gungea ladna bexa lazh xa ti profet xa. No gáp naꞌ leꞌa tiemp uyoꞌo profet Elí, lá ilaꞌ gi chon liꞌin ncho xoꞌop mbeꞌe, cha uzhebpa uyoꞌo win idub Israel. Leꞌa zha wa leꞌa kwaꞌad be xagots nab ngut xabgiꞌi ten na uyoꞌo Israel. Parea leꞌa Dios ni dub ndoꞌ be xagots Israel wa lá utuꞌub Elí. Leꞌa xa wa ndi ngwaꞌyakno dub xagots ncho gezh Sarepta sa nibeꞌe Sidón. No liga leꞌa tiemp uyoꞌo profet Eliseo, leꞌa kwaꞌad bexa Israel nsén gealgizh lepra, parea ni dub bexa wa lá yunyakna xa. Leꞌa xa ndi myunyakna dub xa nsaleaꞌ Naamán, xa nacion Siria.
Leꞌa gor na mbiꞌín bexa ta ndab Jesús, cha uzhebpa ngokloo itea bexa. Cha ngwasoꞌ bexa, mbiꞌi juers bexa Jesús toꞌo gezh sa mas gaꞌap gek bet wa, ndiꞌizh utsuꞌub bexa Jesús. Parea leꞌa Jesús cha myach, mtid xa tlaw bexa wa, cha nseaꞌ xa.


Leꞌa Jesús cha nchaꞌa Capernaum dub gezh ten distrit Galilea. Leꞌa ngol be wizh neꞌe bexa judio, leꞌa Jesús cha mluu be men len niꞌi sa nzhealbe bexa wa. Leꞌa bexa wa ndanseana xteꞌe ndadiꞌizh xa, geal leꞌa ta ndadiꞌizh xa wa nluu leꞌa xa uzheꞌeb ndap juers.
Ngol dub wizh leꞌa dub xabgiꞌi nsak gizh tont ncho mbi bxin len ladoꞌo na no nsob sa wa. Leꞌa mbi bxin wa cha ugeꞌ ndab ndoꞌ Jesús:
—Blaꞌa besa. ¿Xtaꞌan nsea ugal lu besa, Jesús xa Nazaret? ¿Nsea unitndoꞌ lu besa zha? Leꞌa naꞌ nchandoꞌ lu, leꞌa lu xa umbiꞌi mtuꞌub Dios.
Leꞌa Jesús cha uteyo mbi bxin wa, ndab xa:
—¡Kexga lu! ¡Utoꞌo ladoꞌo xa baꞌ!
Weꞌe leꞌa mbi bxin wa cha udabi xabgiꞌi wa ndoꞌ yo lat be men, cha utoꞌo mbi bxin wa len ladoꞌo xa, naꞌanta xtaꞌan ngunno ta wa xa. Weꞌe leꞌa itea be men wa ngwanseana, ndab bexa ndoꞌ ltsaꞌa bexa:
—¿Xteꞌe nak diꞌizh ten xa ndee zha? Leꞌa xa ndee ndap juers nibeꞌe xa ndoꞌ be mbi bxin, cha ntoꞌo be mbi bxin wa len ladoꞌo be men.
Leꞌa ta li mbin Jesús wa cha mgen itea be gezh ndebe gax sa wa.


Weꞌe leꞌa Jesús cha utoꞌo len niꞌi wa, cha nchaꞌa xa ta lid Simón. Leꞌa xnazhaꞌap Simón uzhebpa kweaꞌ nsak, ncho xlea xa. Cha unab bexa ndoꞌ Jesús yunyakna Jesús xa wa. Leꞌa Jesús cha ubii sa nax xa wa, cha uteyo Jesús xlea wa, cha mtoꞌo xlea wa xa. Cha bi leꞌa gor wa ngwaste xa, msaꞌa xa ta gaw bexa.


Leꞌa gor na yá ngwaꞌasla wizh leꞌa be men ulenno kwaꞌadpa bexa gizh ndoꞌ Jesús, bexa nsén isandoꞌ gealgizh. Leꞌa Jesús cha mxoꞌob yaꞌa na las kadga dub bexa gizh wa, cha myakna bexa. No ulantuꞌub Jesús be mbi bxin ncho ladoꞌo kwaꞌad bexa. Leꞌa be mbi bxin wa ugeꞌ ndab ndoꞌ Jesús:
—¡Lu nak Xin Dios!
Leꞌa Jesús cha uteyo be mbi bxin wa, no lá ulaꞌata Jesús iníꞌi bena wa, geal leꞌa be mbi bxin wa uniꞌí leꞌa Jesús leꞌa nak Cristo xa mtuꞌub Dios.


Ngol stubtsa wizh leꞌa Jesús cha mkaꞌan sa wa, nchaꞌa xa dub sa naꞌan men. Ná leꞌa be men cha mkwaꞌan xa. Leꞌa ngol gor na mzheal bexa Jesús, ndab bexa ndoꞌ xa lá ikaꞌan xa gezh ten bexa. Leꞌa Jesús cha ukaꞌab ndab:
—Leꞌa naꞌ no be gezh xaꞌaga nsabndoꞌ gudiꞌizh diꞌizh wen, ná xteꞌe nibeꞌe Dios be men. Leꞌa Dios tiꞌin weꞌe mtuꞌub naꞌ.
Cha nchasea Jesús be gezh nibeꞌe Galilea, nluu xa be men len be niꞌi sa nzhealbe bexa judio.

Lyt til San Lucas 4