Titus 3:11-14
Titus 3:11-14 beibl.net 2015, 2024 (BNET)
Mae pobl felly wedi gwyro oddi wrth y gwirionedd, ac wedi pechu. Nhw sy’n condemnio eu hunain! Dw i’n bwriadu anfon Artemas neu Tychicus atat ti. Cyn gynted ag y bydd y naill neu’r llall wedi cyrraedd tyrd i’m gweld i yn Nicopolis. Dw i wedi penderfynu aros yno dros y gaeaf. Gwna dy orau i helpu Zenas y twrnai ac Apolos ar eu taith. Gwna’n siŵr fod ganddyn nhw bopeth sydd ei angen. Dylai ein pobl ni ddysgu arwain y ffordd wrth wneud daioni, yn cwrdd ag anghenion y rhai sydd mewn angen go iawn. Fyddan nhw ddim yn gwastraffu eu bywydau felly.
Titus 3:11-14 Beibl Cymraeg Newydd Diwygiedig 2004 (BCND)
fe wyddost fod un felly wedi ei wyrdroi, ei fod yn pechu, a thrwy hynny yn ei gollfarnu ei hun. Pan anfonaf Artemas neu Tychicus atat, gwna dy orau i ddod ataf i Nicopolis, oherwydd yr wyf wedi penderfynu bwrw'r gaeaf yno. Gwna dy orau hefyd dros y cyfreithiwr, Zenas, ac Apolos, i'w hebrwng ar eu taith, gan ofalu na fyddant yn fyr o ddim. Rhaid i'n pobl ni hefyd ddysgu ymroi i waith gonest i gyfarfod ag angenrheidiau bywyd; os na wnânt, byddant yn ddi-les.
Titus 3:11-14 Beibl William Morgan - Argraffiad 1955 (BWM)
Gan wybod fod y cyfryw un wedi ei ŵyrdroi, ac yn pechu, gan fod yn ei ddamnio ei hunan. Pan ddanfonwyf Artemas atat, neu Tychicus, bydd ddyfal i ddyfod ataf i Nicopolis: canys yno yr arfaethais aeafu. Hebrwng Senas y cyfreithiwr, ac Apolos yn ddiwyd; fel na byddo arnynt eisiau dim. A dysged yr eiddom ninnau flaenori mewn gweithredoedd da i angenrheidiau, fel na byddont yn ddiffrwyth.