Caniad Solomon 3:6-10
Caniad Solomon 3:6-10 Beibl Cymraeg Newydd Diwygiedig 2004 (BCND)
Beth yw hyn sy'n dod o'r anialwch, fel colofn o fwg yn llawn arogl o fyrr a thus, ac o bowdrau marsiandïwr? Dyma gerbyd Solomon; o'i gylch y mae trigain o ddynion cryfion, y rhai cryfaf yn Israel, pob un yn cario cleddyf, ac wedi ei hyfforddi i ryfela, pob un â'i gleddyf ar ei glun, yn barod ar gyfer dychryn yn y nos. Gwnaeth y Brenin Solomon iddo'i hun gadair gludo o goed Lebanon, gyda'i pholion o arian, ei chefn o aur, ei sedd o borffor, a'r tu mewn iddi yn lledr o waith merched Jerwsalem.
Caniad Solomon 3:6-10 beibl.net 2015, 2024 (BNET)
Beth sy’n dod o gyfeiriad yr anialwch, yn codi llwch fel colofnau o fwg? Fel mwg yr arogldarth yn codi o’r allor – myrr a thus a phob powdr persawrus sydd ar werth gan fasnachwyr teithiol. Edrychwch! Soffa gludo Solomon ydy hi! Mae chwe deg o filwyr o’i gwmpas – arwyr dewr Israel. Mae gan bob un ei gleddyf yn barod, ac maen nhw wedi’u hyfforddi i ryfela. Mae cleddyf pob un ar ei glun i’w amddiffyn rhag peryglon y nos. Mae gan Solomon gadair gludo wedi’i gwneud o goed o Libanus. Mae ei pholion o arian a’i ffrâm o aur; ei sedd o ddefnydd porffor a’r tu mewn wedi’i addurno â chariad.
Caniad Solomon 3:6-10 Beibl William Morgan - Argraffiad 1955 (BWM)
Pwy yw hon sydd yn dyfod i fyny o’r anialwch megis colofnau mwg, wedi ei pherarogli â myrr, ac â thus, ac â phob powdr yr apothecari? Wele ei wely ef, sef yr eiddo Solomon; y mae trigain o gedyrn o’i amgylch, sef o gedyrn Israel. Hwynt oll a ddaliant gleddyf, wedi eu dysgu i ryfel, pob un â’i gleddyf ar ei glun, rhag ofn liw nos. Gwnaeth y brenin Solomon iddo gerbyd o goed Libanus. Ei byst ef a wnaeth efe o arian, ei lawr o aur, ei lenni o borffor; ei ganol a balmantwyd â chariad, i ferched Jerwsalem.