Rhufeiniaid 9:30-33
Rhufeiniaid 9:30-33 Beibl Cymraeg Newydd Diwygiedig 2004 (BCND)
Beth, ynteu, a ddywedwn? Hyn, fod Cenhedloedd, nad oeddent â'u bryd ar gyfiawnder, wedi dod o hyd iddo, sef y cyfiawnder sydd trwy ffydd; ond bod Israel, er iddi fod â'i bryd ar gyfraith a fyddai'n dod â chyfiawnder, heb ei gael. Am ba reswm? Am iddynt weithredu, nid trwy ffydd ond ar y dybiaeth mai cadw gofynion cyfraith oedd y ffordd. Syrthiasant ar y “maen tramgwydd” y mae'r Ysgrythur yn sôn amdano: “Wele, yr wyf yn gosod yn Seion faen tramgwydd, a chraig rhwystr, a'r rhai sy'n credu ynddo, ni chywilyddir mohonynt.”
Rhufeiniaid 9:30-33 beibl.net 2015, 2024 (BNET)
Felly beth mae hyn i gyd yn ei olygu? Mae’n golygu fod pobl o genhedloedd eraill – pobl oedd ddim yn ceisio dilyn Duw – wedi cael eu derbyn i berthynas iawn gyda Duw drwy gredu. Ond mae pobl Israel, oedd wedi meddwl y byddai’r Gyfraith yn eu gwneud nhw’n iawn gyda Duw, wedi methu cadw’r Gyfraith honno. Pam? Am eu bod nhw’n dibynnu ar beth roedden nhw eu hunain yn ei wneud yn lle credu. Maen nhw wedi baglu dros ‘y garreg sy’n baglu pobl’ , fel mae’r ysgrifau sanctaidd yn dweud: Edrychwch – dw i’n gosod yn Jerwsalem garreg sy’n baglu pobl a chraig sy’n gwneud iddyn nhw syrthio. Ond fydd pwy bynnag sy’n credu ynddo ddim yn cael ei siomi.
Rhufeiniaid 9:30-33 Beibl William Morgan - Argraffiad 1955 (BWM)
Beth gan hynny a ddywedwn ni? Bod y Cenhedloedd, y rhai nid oeddynt yn dilyn cyfiawnder, wedi derbyn cyfiawnder, sef y cyfiawnder sydd o ffydd: Ac Israel, yr hwn oedd yn dilyn deddf cyfiawnder, ni chyrhaeddodd ddeddf cyfiawnder. Paham? Am nad oeddynt yn ei cheisio trwy ffydd, ond megis trwy weithredoedd y ddeddf: canys hwy a dramgwyddasant wrth y maen tramgwydd; Megis y mae yn ysgrifenedig, Wele fi yn gosod yn Seion faen tramgwydd, a chraig rhwystr: a phob un a gredo ynddo ni chywilyddir.