Salm 8:1-9
Salm 8:1-9 beibl.net 2015, 2024 (BNET)
O ARGLWYDD, ein brenin, mae dy enw di mor fawr drwy’r byd i gyd! Mae dy ysblander yn gorchuddio’r nefoedd yn gyfan! Gyda lleisiau plant bach a babanod rwyt yn dangos dy nerth, yn wyneb dy elynion, i roi diwedd ar y gelyn sy’n hoffi dial. Wrth edrych allan i’r gofod, a gweld gwaith dy fysedd, y lleuad a’r sêr a osodaist yn eu lle, Beth ydy pobl i ti boeni amdanyn nhw? Pam cymryd sylw o un person dynol? Rwyt wedi’i wneud ond ychydig is na’r bodau nefol, ac wedi’i goroni ag ysblander a mawredd! Rwyt wedi’i wneud yn feistr ar waith dy ddwylo, a gosod popeth dan ei awdurdod – defaid ac ychen o bob math, a hyd yn oed yr anifeiliaid gwyllt; yr adar sy’n hedfan, y pysgod sydd yn y môr, a phopeth arall sy’n teithio ar gerrynt y moroedd. O ARGLWYDD, ein brenin, mae dy enw di mor fawr drwy’r byd i gyd!
Salm 8:1-9 Beibl Cymraeg Newydd Diwygiedig 2004 (BCND)
O ARGLWYDD, ein Iôr, mor ardderchog yw dy enw ar yr holl ddaear! Gosodaist dy ogoniant uwch y nefoedd, codaist amddiffyn rhag dy elynion o enau babanod a phlant sugno, a thawelu'r gelyn a'r dialydd. Pan edrychaf ar y nefoedd, gwaith dy fysedd, y lloer a'r sêr, a roddaist yn eu lle, beth yw meidrolyn, iti ei gofio, a'r teulu dynol, iti ofalu amdano? Eto gwnaethost ef ychydig islaw duw a'i goroni â gogoniant ac anrhydedd. Rhoist iddo awdurdod ar waith dy ddwylo, a gosod popeth dan ei draed: defaid ac ychen i gyd, yr anifeiliaid gwylltion hefyd, adar y nefoedd, a physgod y môr, a phopeth sy'n tramwyo llwybrau'r dyfroedd. O ARGLWYDD, ein Iôr, mor ardderchog yw dy enw ar yr holl ddaear!
Salm 8:1-9 Beibl William Morgan - Argraffiad 1955 (BWM)
ARGLWYDD ein Iôr ni, mor ardderchog yw dy enw ar yr holl ddaear! yr hwn a osodaist dy ogoniant uwch y nefoedd. O enau plant bychain a rhai yn sugno y peraist nerth, o achos dy elynion, i ostegu y gelyn a’r ymddialydd. Pan edrychwyf ar y nefoedd, gwaith dy fysedd; y lloer a’r sêr, y rhai a ordeiniaist; Pa beth yw dyn, i ti i’w gofio? a mab dyn, i ti i ymweled ag ef? Canys gwnaethost ef ychydig is na’r angylion, ac a’i coronaist â gogoniant ac â harddwch. Gwnaethost iddo arglwyddiaethu ar weithredoedd dy ddwylo; gosodaist bob peth dan ei draed ef: Defaid ac ychen oll, ac anifeiliaid y maes hefyd; Ehediaid y nefoedd, a physgod y môr, ac y sydd yn tramwyo llwybrau y moroedd. ARGLWYDD ein IÔR, mor ardderchog yw dy enw ar yr holl ddaear!