Exodus 23:10-12
Exodus 23:10-12 beibl.net 2015, 2024 (BNET)
Rwyt i hau cnydau a chasglu’r cynhaeaf am chwe mlynedd. Ond yna ar y seithfed flwyddyn mae’r tir i gael gorffwys, heb gael ei drin. Bydd y bobl dlawd yn cael casglu a bwyta beth bynnag sy’n tyfu ohono’i hun, a’r anifeiliaid gwyllt yn cael beth sy’n weddill. Gwna’r un peth gyda dy winllan a dy goed olewydd. Rwyt i weithio am chwe diwrnod, a gorffwys ar y seithfed. Bydd yn rhoi cyfle i dy ych a dy asyn orffwys, ac i’r caethweision sydd wedi’u geni yn dy dŷ a’r mewnfudwr sy’n gweithio i ti ymlacio.
Exodus 23:10-12 Beibl Cymraeg Newydd Diwygiedig 2004 (BCND)
“Am chwe blynedd yr wyt i hau dy dir a chasglu ei gynnyrch, ond yn y seithfed flwyddyn yr wyt i'w adael heb ei drin, er mwyn i'r rhai tlawd ymysg dy bobl gael bwyta, ac i'r anifeiliaid gwyllt gael bwydo ar yr hyn a adewir yn weddill. Yr wyt i wneud yr un modd gyda'th winllan a'th goed olewydd. “Am chwe diwrnod yr wyt i weithio, ond ar y seithfed dydd yr wyt i orffwys, er mwyn i'th ych a'th asyn gael gorffwys, ac i fab dy gaethferch ac i'r estron gael dadflino.
Exodus 23:10-12 Beibl William Morgan - Argraffiad 1955 (BWM)
Chwe blynedd yr heui dy dir, ac y cesgli ei ffrwyth: A’r seithfed paid ag ef, a gad ef yn llonydd; fel y caffo tlodion dy bobl fwyta: a bwytaed bwystfil y maes eu gweddill hwynt. Felly y gwnei am dy winllan, ac am dy olewydden. Chwe diwrnod y gwnei dy waith; ac ar y seithfed dydd y gorffwysi: fel y caffo dy ych a’th asyn lonyddwch, ac y cymero mab dy forwyn gaeth, a’r dieithr ddyn, ei anadl ato.