Deuteronomium 30:15-18
Deuteronomium 30:15-18 Beibl Cymraeg Newydd Diwygiedig 2004 (BCND)
Edrych, yr wyf am roi'r dewis iti heddiw rhwng bywyd a marwolaeth, rhwng daioni a drygioni. Oherwydd yr wyf fi heddiw yn gorchymyn iti garu'r ARGLWYDD dy Dduw, a rhodio yn ei ffyrdd, a chadw ei orchmynion, ei reolau a'i ddeddfau; yna byddi fyw, a chei amlhau, a bydd yr ARGLWYDD dy Dduw yn dy fendithio yn y wlad yr wyt yn mynd iddi i'w meddiannu. Ond os byddi'n troi i ffwrdd ac yn peidio â gwrando, ac yn cael dy ddenu i addoli a gwasanaethu duwiau estron, yna, dyma fi'n dweud wrthyt heddiw, fe'th lwyr ddifodir di, ac nid estynnir dy ddyddiau yn y tir yr wyt yn croesi'r Iorddonen i'w feddiannu.
Deuteronomium 30:15-18 beibl.net 2015, 2024 (BNET)
“Edrychwch! Dw i wedi rhoi dewis i chi heddiw – bywyd a llwyddiant, neu farwolaeth a dinistr. Beth dw i’n ei orchymyn i chi ydy i chi garu’r ARGLWYDD eich Duw, byw fel mae e eisiau i chi fyw, a chadw’i orchmynion, ei reolau, a’i ganllawiau. Wedyn byddwch chi’n byw ac yn llwyddo, a bydd yr ARGLWYDD eich Duw yn eich bendithio yn y wlad dych chi ar fin ei chymryd. “Ond os byddwch chi’n troi oddi wrtho a gwrthod gwrando arno, ac yn cael eich denu i addoli duwiau eraill, dw i’n eich rhybuddio chi, byddwch chi’n cael eich dinistrio! Gewch chi ddim aros yn hir iawn yn y wlad dych chi’n croesi afon Iorddonen i’w chymryd.
Deuteronomium 30:15-18 Beibl William Morgan - Argraffiad 1955 (BWM)
Wele, rhoddais o’th flaen heddiw einioes a daioni, ac angau a drygioni: Lle yr ydwyf fi yn gorchymyn i ti heddiw garu yr ARGLWYDD dy DDUW, i rodio yn ei ffyrdd ef, ac i gadw ei orchmynion a’i ddeddfau, a’i farnedigaethau ef; fel y byddych fyw, ac y’th amlhaer, ac y’th fendithio yr ARGLWYDD dy DDUW yn y tir yr wyt ti yn myned iddo i’w feddiannu. Ond os try dy galon ymaith, fel na wrandawech, a’th yrru i ymgrymu i dduwiau dieithr, a’u gwasanaethu hwynt; Yr wyf yn mynegi i chwi heddiw, y difethir chwi yn ddiau, ac nad estynnwch ddyddiau yn y tir yr ydwyt yn myned dros yr Iorddonen i fyned i mewn iddo i’w berchenogi.