Actau 18:14-20
Actau 18:14-20 beibl.net 2015, 2024 (BNET)
Ond cyn i Paul gael cyfle i gyflwyno ei amddiffyniad, dyma Galio yn dweud wrth yr Iddewon: “Petaech chi Iddewon yn dod â’r dyn yma o flaen y llys am gamymddwyn neu gyflawni rhyw drosedd difrifol, byddwn i’n caniatáu i’r achos fynd yn ei flaen. Ond y cwbl sydd yma ydy dadl am sut i ddehongli manion eich Cyfraith chi. Felly ewch i ddelio gyda’r mater eich hunain. Dw i’n gwrthod barnu’r achos.” Felly taflodd nhw allan o’r llys. Y tu allan i’r llys dyma griw o bobl yn gafael yn Sosthenes, arweinydd y synagog, a’i guro. Ond doedd Galio ddim fel petai’n poeni dim. Arhosodd Paul yn Corinth am amser hir wedyn. Pan ffarweliodd â’r Cristnogion yno hwyliodd i Syria, ac aeth Priscila ac Acwila gydag e. (Cyn mynd ar y llong yn Cenchrea roedd Paul wedi cadw’r ddefod Iddewig o eillio ei ben fel arwydd o gysegru ei hun yn llwyr i Dduw.) Ar ôl glanio yn Effesus, gadawodd Paul Priscila ac Acwila yno. Ond tra oedd yno aeth i drafod gyda’r Iddewon yn y synagog. Dyma nhw’n gofyn iddo aros yn hirach yno, ond gwrthododd.
Actau 18:14-20 Beibl Cymraeg Newydd Diwygiedig 2004 (BCND)
Pan oedd Paul ar agor ei enau, dywedodd Galio wrth yr Iddewon, “Pe bai yn fater o drosedd neu gamwedd ysgeler, byddwn wrth reswm yn rhoi gwrandawiad i chwi, Iddewon; ond gan mai dadleuon yw'r rhain ynghylch geiriau ac enwau a'ch Cyfraith arbennig chwi, cymerwch y cyfrifoldeb eich hunain. Nid oes arnaf fi eisiau bod yn farnwr ar y pethau hyn.” A gyrrodd hwy allan o'r llys. Yna gafaelodd pawb yn Sosthenes, arweinydd y synagog, a'i guro yng ngŵydd y llys. Ond nid oedd Galio yn poeni dim am hynny. Arhosodd Paul yno eto gryn ddyddiau, ac wedi ffarwelio â'r credinwyr fe hwyliodd ymaith i Syria, a Priscila ac Acwila gydag ef. Eilliodd ei ben yn Cenchreae, am fod adduned arno. Pan gyraeddasant Effesus, gadawodd hwy yno, a mynd ei hun i mewn i'r synagog ac ymresymu â'r Iddewon. A phan ofynasant iddo aros am amser hwy, ni chydsyniodd.
Actau 18:14-20 Beibl William Morgan - Argraffiad 1955 (BWM)
Ac fel yr oedd Paul yn amcanu agoryd ei enau, dywedodd Galio wrth yr Iddewon, Pe buasai gam, neu ddrwg weithred, O Iddewon, wrth reswm myfi a gyd-ddygaswn â chwi: Eithr os y cwestiwn sydd am ymadrodd, ac enwau, a’r ddeddf sydd yn eich plith chwi, edrychwch eich hunain; canys ni fyddaf fi farnwr am y pethau hyn. Ac efe a’u gyrrodd hwynt oddi wrth y frawdle. A’r holl Roegwyr a gymerasant Sosthenes yr archsynagogydd, ac a’i curasant o flaen y frawdle. Ac nid oedd Galio yn gofalu am ddim o’r pethau hynny. Eithr Paul, wedi aros eto ddyddiau lawer, a ganodd yn iach i’r brodyr, ac a fordwyodd ymaith i Syria, a chydag ef Priscila ac Acwila; gwedi iddo gneifio ei ben yn Cenchrea: canys yr oedd arno adduned. Ac efe a ddaeth i Effesus, ac a’u gadawodd hwynt yno; eithr efe a aeth i’r synagog, ac a ymresymodd â’r Iddewon. A phan ddymunasant arno aros gyda hwynt dros amser hwy, ni chaniataodd efe