Matyu 4
4
Satan na wadau sawaq dia Yesus walawalaiyoqnej
1Onaqa bati deqa Qotei aqa Mondor na Yesus wadau sawaq osi gilsiqa di uratonaqa Satan bosiqa Yesus a une bei atqajqa deqa marsiqa walawalaiyoqnej. 2Qanam 40 qolo dego 40 Yesus a wadau sawaq di soqnej. Sosiqa iŋgi uratsiqa qurieŋ ti soqnej. Bati 40 di koboonaqa a mamyej. 3Onaqa walawalaiyo tamo Satan a Yesus aqa areq bosiqa minjej, “Ni Qotei aqa Ŋiriamqa meniŋ kalil endi minjrim bem bulyibqa ni uye.” 4Degsi minjnaqa Yesus na kamba minjej, “Qotei aqa anjam bei nami endegsib neŋgreŋyeb unu, ‘Tamo naŋgi iŋgi na segi ŋambile sqasai. Anjam kalil Qotei aqa medabuq na branteqnu qaji dena naŋgi ŋambile sqab.’”
5Onaqa Satan na Yesus olo osiqa Qotei aqa qure koba Jerusalem aisiq atra tal quraq oqsiq goge dia Yesus atsiqa minjej, 6“Ni Qotei aqa Ŋiriamqa endena prugosim mandamq aie. Agi Qotei aqa anjam bei nami endegsib neŋgreŋyeb unu, ‘Qotei na aqa laŋ aŋgro naŋgi minjrimqa bosib ni taqatmqab.’ Anjam bei dego nami endegsib neŋgreŋyeb unu, ‘Laŋ aŋgro naŋgi bosib baŋ na ni soqtmibqa ino siŋga meniŋ na qalqasai.’” 7Onaqa Yesus na kamba Satan minjej, “Qotei aqa anjam bei dego endegsib neŋgreŋyeb unu, ‘Ni ino Tamo Koba Qotei aqa siŋgila unqa osimqa ni na kumbra bei laŋa yaim. A ni aqaryaimqas kio sai kio di unqa osimqa kumbra bei laŋa yaim.’”
8Degsi minjnaqa Satan na Yesus olo osiqa mana goge kobaq oqsiqa goge dia Yesus tigeltosiqa sawa sawa kalil mandor kokba naŋgi na taqatejunub qaji naŋgo siŋgila ti ñoro ti kalil di Yesus osoryosiqa minjej, 9“Ni ijo ulatamuq endia siŋga pulutosim e qa louimqa sawa sawa kalil di naŋgo ñoro ti ni emqai.” 10Onaqa Yesus na minjej, “Satan, ni ulaŋ. Qotei aqa anjam bei nami endegsib neŋgreŋyeb unu, ‘Ino Tamo Koba Qotei a segi qa louoqnsimqa aqa sorgomq di soqne.’”
11Degsi minjnaqa Satan a Yesus uratosiq ulaŋej. Onaqa Qotei aqa laŋ aŋgro naŋgi bosib Yesus siŋgilatsib soqneb.
Yesus a olo Galili sawaq aiej
12Bati bei Jon a tonto talq waiyonab sonaqa Yesus a di qusiqa olo tigelosiq Galili sawaq aiej. 13Aisiq Nasaret qureq di brantej. Dena walwelosiqa Kaperneam qureq gilsiq di soqnej. Kaperneam qure agi Galili ya agu qalaqsi unu. Ya agu jojomq dia sawa aiyel unub. Sawa aiyel di naŋgo ñam Sebulun ti Naptali ti. Kaperneam qure a sawa aiyel di naŋgo ambleqsi unu. 14Yesus a Kaperneam qureq gilej deqa anjam bei Qotei aqa medabu o tamo Aisaia nami marej qaji di aqa damu brantej. A endegsi marej, 15“Gam kobaquja Jordan ya qalaq dena aiejunu qaji di Galili sawa ambleq na aiejunu. Aisiqa yuwalq di diŋejunu. Gam qalaq dia Sebulun sawa ti Naptali sawa ti unub. Tamo uŋgasari gargekoba naŋgi sawa bei beiq dena beleŋosib Galili sawaq di unub. 16Deqa tamo uŋgasari ambruqsi unub qaji naŋgi puloŋ kobaquja unqab. Tamo uŋgasari padalo gam dauryosib ambruqsi unub qaji naŋgi puloŋ dena suwantnjrqas.”
Yesus na tamo qolqe naŋgi metnjrnaq a dauryeb
17Bati deqa Yesus na aqa wau utru atej. Wau utru atsiqa Qotei aqa anjam palontoqnsiqa tamo uŋgasari naŋgi endegsi minjroqnej, “Qotei a nuŋgo Mandor Koba sosim niŋgi taqatŋgwajqa bati jojomqo. Deqa niŋgi are bulyiye.”
18Yesus a naŋgi anjam degsi minjrsiq koboonaqa a naŋgi uratnjrsiqa Galili ya agu qalaq aisiq alile dia walweloqnsiqa ŋam atej Saimon aqa ñam bei Pita naŋgi aqa was Andru wo sonab unjrej. Naŋgi aiyel qe o qaji tamo deqa kakaŋ waiyeqnab unjrsiqa minjrej, 19“Niŋgi aiyel e daurbiye. Niŋgi qe o qaji tamo deqa niŋgi qe eqnub. Dego kere e wau eŋgitqa niŋgi degsib olo tamo oqnqab.” 20Yesus a na naŋgi degsi minjrnaqa naŋgi na naŋgo kakaŋ uratosib Yesus dauryeb.
21Yesus a olo walwelosi gilsiqa Sebedi aqa ŋiri Jems wo aqa was Jon wo naŋgi aiyel qobuŋ miligiq dia naŋgo siqali koba na kakaŋ braŋo qandimeqnabqa unjrsiqa metnjrej. 22Metnjrnaqa naŋgo abu Sebedi a qobuŋ miligiq di sonaqa uratosib Yesus dauryeb.
Yesus a Galili sawaq dia walweloqnsiqa Qotei aqa anjam palontoqnsiqa ma tamo naŋgi boletnjroqnej
23Yesus a dena walwelosiqa Galili sawa keretoqnsiqa Juda naŋgo Qotei tal miligiq giloqnsiqa Qotei aqa anjam palontosiq minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu. Anjam bole di Yesus na palontosiq minjroqnej. Osiqa tamo ma utru segi segi so qaji naŋgi boletnjroqnej. 24Onaqa tamo uŋgasari kalil Siria sawaq di soqneb qaji naŋgi anjam endegsib queb, “Yesus a maŋwa tulaŋ gargekoba yeleŋeqnu.” Degsib qusib deqa naŋgo ma tamo kalil joqsib Yesus aqa areq osi beleŋeb. Tamo ma utru segi segi osi beleŋeb. Tamo jejamu jaqatiŋnjro qaji naŋgi ti tamo mondor uge uge na ojeleŋo qaji naŋgi ti tamo gate na nanarioqnsib maŋgaloqneb qaji naŋgi ti tamo jejamu lainjro qaji naŋgi ti kalil joqsib beqnab Yesus na boletnjroqnej. 25Bati deqa tamo uŋgasari tulaŋ gargekoba naŋgi Yesus dauryosib laqneb. Galili sawa naŋgi ti Dekapolis sawa naŋgi ti Jerusalem qure naŋgi ti Judia sawa naŋgi ti qure kalil Jordan ya taqal beiq di soqneb qaji naŋgi ti kalil Yesus aqa maŋwa yeqnaq unoqnsib deqa dauryosib laqneb.
Dewis Presennol:
Matyu 4: bojNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2013, Wycliffe Bible Translators, Inc. All rights reserved.