San Mateo 11
11
Guxeꞌhla Jwahn nin ruroꞌbañihsa xpwiinn ba tin gwaganaabadxyiꞌdxyi raꞌ ba loh Jesuhs
(Lc. 7.18‑35)
1Ya chin guyaꞌloh bwiiꞌyidxyiꞌdxyi Jesuhs loh raꞌ xpwiinn Ñiꞌh xa guunn raꞌ ba xtsiꞌn Ñiꞌh, chiꞌchi gunaꞌzu nehza Ñiꞌh loh guidxyi raꞌ nin rnabwaꞌ guihdxyi chi tin zee galuuꞌyi Ñiꞌh xchiꞌdxyi Dxiohs laꞌh raꞌ bwiinn, 2ya gaduhbi nin nuu Jwahn nin ruroꞌbañihsa laꞌn lahtsi dxiꞌba, bihn ba xcweenta dziꞌn raꞌ nin cayuhnn Jesuhs, niꞌchin nin guxeꞌhla Jwahn paaldaa raꞌ xpwiinn ba 3tin gwaganaabadxyiꞌdxyi raꞌ ba loh Jesuhs sidela laꞌhpaꞌh Ñiꞌh naa Ñiꞌh Crixtu o ñibweza ru ba dxiꞌ stuhbi bwiinn, 4ya chiꞌchi rahbi Jesuhs loh raꞌ ba:
―Guldxiaa tin gulgahbi loh Jwahn garaa raꞌ nin caywaꞌha tu cun nin cayihn tu; 5gulgahbi laꞌh raꞌ bwiinn nin rahcaloh ñiꞌh, laꞌhloh raꞌ ba biaca, bwiinn raꞌ nin ayi nuu sah laꞌh raꞌ ba rzah, bwiinn raꞌ nin rahchyi guiiꞌdxyu tihxi ñiꞌh laꞌh guiiꞌdxyu chi guñihchiloh tihxi raꞌ ba, bwiinn raꞌ nin rahca dxiahga ñiꞌh laꞌh dxiahga raꞌ ba ballaala, bwiinn raꞌ nin guhchi laꞌh raꞌ ba babahn loh guelguhchi, ya bwiinn prohbi raꞌ nin cabweeza gacanee Dxiohs laꞌh raꞌ ba, laꞌh raꞌ ba cagazoꞌbadxiahga xchiꞌdxyi Dxiohs nin gutaꞌh laꞌh raꞌ ba loh duhlda. 6¡Dichohsa naa raꞌ bwiinn nin ayi gusaaꞌn xcweenta ziga riachiistoꞌ raꞌ ba naꞌh!
7Ya chin babii raꞌ xpwiinn Jwahn loh Jesuhs chiꞌchi guzoꞌbaloh guñiꞌ Ñiꞌh xcweenta Jwahn loh raꞌ bwiinn, rahbi Ñiꞌh:
―¿Chyu niꞌca gwaguiaꞌha tu loh dahan? ¿Ta tuhbi ñihta nin biehla gudzihbi bwih? 8Ya sidela ayi niꞌchi dxiꞌh, ¿xiilla gwaguiaꞌha si chiꞌh tu? ¿Ta gwaguiaꞌha tu tuhbi ndxiꞌhw nin nahcu lahdxi zaꞌca? Laꞌh tu naann tu sola yihdzi tuhbi bwiinn nin rnabwaꞌ duxa nuu bwiinn raꞌ nin nahcu lahdxi zaꞌca. 9Ya nnaha xchiꞌh, ¿xi pur biriaꞌh chiꞌh tu? ¿Ta tin gwaguiaꞌha tu tuhbi bwiinn nin rñiꞌ xchiꞌdxyi Dxiohs? Ziꞌchi pwihsi, tuhbi bwiinn nin naa bwiinn nin mahziru lasahca que ziga daada raꞌ nin guñiꞌ xchiꞌchi Dxiohs. 10Xcweenta Jwahn niꞌchi ruzeꞌta loh Xchihtsi Dxiohs hasta rahbi squiiꞌ:
Zixeꞌhlaꞌhn tuhbi xpwiiꞌnnahn galohtiiꞌ tin laꞌh ba guzuhnayaa neziuh nin guzee luꞌh.
11’Guchiin nin rñiꞌn loh tu, garaa raꞌ ziga bwiinn raꞌ nin raalaa raꞌ loh guidxyiyuh riiꞌ pur gunnaꞌh, nagahdxi dxiinloh nin tuhbi bwiinn nin nagahdxi gaca lasahcatiiꞌ ziga Jwahn nin ruroꞌbañihsa, per nin naa biꞌtuꞌhntiiꞌ loh xquelrnabwaꞌ Dxiohs niꞌchi mahzi lasahca loh Jwahn.
12’Dez laꞌn dxyih raꞌ nin guzoꞌbaloh ruluuꞌyi Jwahn, cun para hasta nnahyi nuu ziahan duxa raꞌ bwiinn nin xclaaꞌdzi chuu raꞌ loh xquelrnabwaꞌ Dxiohs lajweersi, ya snuhn raꞌ ba lajweersi xclaaꞌdzi raꞌ ba cweꞌhelluꞌhu raꞌ ba loh guelrnabwaꞌ xteenn Dxiohs. 13Garaa raꞌ bwiinn raꞌ nin guñiꞌ xchiꞌdxyi Dxiohs cun ziga naa xlehyi Moisehs guñiꞌxgah raꞌ ba xcweenta ziga cohsa raꞌ nin gaca, cun para laꞌn dxyihyi nin biꞌ Jwahn, 14ya sidela xclaaꞌdzi tu chechiistoꞌ tu dxyiꞌdxyi riiꞌ, laꞌgahca Jwahn naa Elías ndxiꞌhw xteenn Dxiohs nin nahpa dxiꞌ. 15Bwiinn raꞌ nin zohballaala dxiahga raꞌ ñiꞌh, gulchuuꞌ gulchaꞌzi dxyiꞌdxyi riiꞌ. 16¿Cuun nin xñah ziga xñah raꞌ bwiinn nin rii nabahan laꞌn dxyih raꞌ riiꞌ? Rluuꞌyi raꞌ ba ziga zi xñah raꞌ nuhn biñiꞌn nin riidzihta loh dxiaaꞌ hasta rdooꞌ xica, ya cañiꞌ raꞌ bi loh raꞌ lasaaꞌ raꞌ bi jweersi roo: 17“Bachidxiꞌlda nu bichiiwuu tin ñudxiaꞌha tu per ayi badxiaꞌha tu; bachidxiꞌlda nalaasa za nu tin ñuꞌn tu, per ayi za biꞌn tu.” 18Laasii biꞌ Jwahn nin ayi gudahw ba ziahan nin ayi za gwaaꞌ ba vihnnu, nee rahbi tu nuu tuhbi bwiinndxaaba stoꞌ Jwahn. 19Ya lwehgu gahca badzihn Lliiꞌn Dxiohs nin naa ndxiꞌhw, rahw ba nee reeꞌ za ba vihnnu, ya rahbi tu naa ba tuhbi nin rahw chiꞌh zi cun reeꞌ chiꞌh zi, cun naa za ba nin rdxaꞌga loh raꞌ bwiinn nin rsadxihlli impwestu cun bwiinn nin ayi ruzoꞌbadxiahga lehyi, per xquelnasiin Dxiohs naa rariaꞌcaa ruluuꞌyi xcweenta bwiinn raꞌ nin ruzoꞌbadxiahga xchiꞌdxyi Ñiꞌh.
Guihdxyi raꞌ nin ayi bazoꞌbadxiahga xchiꞌdxyi Jesucristu
(Lc. 10.13‑15)
20Ya chiꞌchi guzoꞌbaloh Jesuhs gudxihndxinee dxyiꞌdxyi Ñiꞌh laꞌh raꞌ bwiinn guihdxyi raꞌ nin bwaꞌha dziꞌn rooꞌ raꞌ nin bwiꞌhnn Ñiꞌh, laasii laꞌh raꞌ bwiinn guihdxyi raꞌ chi ayi rusaguuꞌdzi stoꞌ raꞌ ba nez loh Dxiohs, ya chiꞌchi rahbi Jesuhs:
21―¡Prohbi za laꞌh tu bwiinn guihdxyi Corazihn, cun neezaa laꞌh za tu bwiinn guihdxyi Betsaida prohbi za laꞌh tu!, laasii sidela laꞌh raꞌ bwiinn guihdxyi Tiru cun bwiinn guihdxyi Sidohn ñwaꞌha raꞌ ba dziꞌn rooꞌ raꞌ nin bwiꞌhnnaꞌhn nez loh tu, nahpa ñazah raꞌ ba xneziuh Dxiohs nee ñahcu raꞌ za ba lahdxi lluhn cun ñuroꞌba raꞌ ba cobadeh yihca raꞌ ba. 22Niꞌchin chin guunn Dxiohs jwisi loh guidxyiyuh riiꞌ mahzi ru gusaꞌcazii Ñiꞌh laꞌh tu loh raꞌ bwiinn Tiru cun bwiinn Sidohn raꞌ. 23Ya laꞌh tu bwiinn guihdxyi Capernaum, ¿ta ruhnn chiꞌh tu lligaaba par dxibaaꞌ gacah tu? ¡Sidela nnah mas laꞌn gueeta gabihldxyi dxiehta tu!, laasii sidela loh guihdxyi Sodoma ñuꞌnnahn dziꞌn rooꞌ raꞌ nin bwiꞌhnnaꞌhn loh tu, guihdxyi chi nahpa ñazah zaꞌca hasta laꞌn dxyih raꞌ riiꞌ. 24Niꞌchin nnah rñiꞌn loh tu laꞌn dxyih nin gaca jwisi loh guidxyiyuh, zirooꞌ ru guelrzaꞌcazii guniꞌhi Dxiohs laꞌh tu que ziga guzaꞌca raꞌ bwiinn guihdxyi Sodoma.
Gultaaꞌ naꞌhla naꞌh ya zahpa tu guelruziꞌlaaꞌdzi
(Lc. 10.21‑22)
25Ya laꞌn dxyih raꞌ chi rahbi Jesuhs:
―Zuxchiilli luꞌh Xtaaꞌdahn nin rnabwaꞌ dxibaaꞌ cun loh guidxyiyuh, laasii cagaluuꞌyi luꞌh laꞌh raꞌ bwiinn nadoꞌlaadzi nin naa ziga bweezu raꞌ cohsa raꞌ nin guluuꞌlaꞌn luꞌh loh raꞌ bwiinn naann raꞌ, cun loh nin rahcabwaꞌ, ya baluuꞌyi luꞌhn nez loh raꞌ bwiinn raꞌ nin ayi xi dxiuu. 26Ziꞌchi, Paah, laasii ziꞌchi ruhnn luꞌh lligaaba naa bwen gaca.
27’Laasii laꞌh Xtaaꞌdahn biuꞌn ntriehgu garaatiiꞌ loon, ya ayi chyu nuꞌnbwaꞌ laꞌh Lliiꞌn Ñiꞌh; sola laꞌh Daada Dxiohs nuꞌnbwaꞌ Ñiꞌh laꞌh Lliiꞌn Ñiꞌh. Ya ayi za chyu nuꞌnbwaꞌ laꞌh Daada Dxiohs, sola Lliiꞌn Ñiꞌh nuꞌnbwaꞌ laꞌh Ñiꞌh, cun neezaa bwiinn raꞌ nin gudihdxyi Lliiꞌn Ñiꞌh dxiuꞌnbwaꞌ laꞌh Xtaada Ñiꞌh. 28Gultaaꞌ nez loon garaa tu nin babadxahga cun nin cagasiꞌnaaꞌha raꞌ duhlda, laasii naꞌh guniꞌhihn guelrziꞌlaaꞌdzi laꞌh tu, 29per gulgasiꞌdxi guunn tu dziꞌn nin guluꞌyiꞌhn laꞌh tu, nee gulgasiꞌdxigahca xcweeꞌntahn laasii naan bwiinn naguuꞌdzi stoꞌ cun nahpa zahn paseensi laꞌh tu, ya sidela guunn tu squiiꞌ zidxeela tu hasta gapa xaalma tu guelruziꞌlaaꞌdzi, 30laasii dziꞌn nin guluꞌyiꞌhn laꞌh tu cun garaa nin gusagwaꞌhn laꞌh tu, ayi xi guinaaꞌha raꞌn.
Dewis Presennol:
San Mateo 11: zpv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 1990, Wycliffe Bible Translators, Inc. All rights reserved.