LUCAS 19
19
Wa Jesus ruxyuu Zaqueo
1Ne wdxiin Jesus gyëz-Jericó, wdee Ne lenlgyëz guin. 2Nga nuu te menrik ne la Zaqueo; laa men rnebééy lo men ne rgoob zeg impwest. 3Rlaan men kwii men Ne, per rakdet gan kwii men Ne porke kesentyent ndal mén ndxin no ndopendxee men. 4Por neguin wzaner men noze rzhoon men, wyeep men lo tebzhaan yag ne la sicómoro ne zob nes ledne tee Ne chen gak kwii men Ne. 5Chene wdee Ne nga, wii Ne nes gya, lex re Ne lo men:
―Zaqueo, gyiid gyiidske gugyët wa, porke ruxyuu de rap noo degne yzëën noo.
6Orguin noze ryob rdxiintee wyët Zaqueo, no kesentyent rzhiilen men wano men Ne ruxyuu men. 7Ne wii yra mén neguin, wzelo men yra men rnii men por laa Ne, re men:
―Le Jesus wdxiin ruxyuu te mendol.
8Lex wzuli Zaqueo, re men lo Ne:
―Gukwii gante Dechey, ydee noo gwrool ne rap noo lo menprob, no belne nuu pe wkade noo mén chen wak wbaan noo men, ycheree noo tap lal ne wbaan noo lo men.
9Lex re Ne lo men:
―Nedxeree wláá men ne nuu lenyuuree lo dol, porke laake no men rlaleedx Dëdyuzh zegne wlaleedx Abraham Dëdyuzh. 10Le Men ne wdxiid wak Mén zëdye mén ne che wak perdid chen yselaa men men lo dol.
Xkwent med
11Wzëët Jesus zegnak te kwent lo mén ne kayon ne re Ne, porke che guex ydxiin Ne Jerusalén no porke nuu lextoo yra mén guin pazer orgueguin gak ne rkyeen Dëdyuzh. 12Re Ne lo men:
―Wuu te mgyeey ne nak zhiin mennon, wruu men za men nat chen ylaa mén men rrey, lex yberee ke men. 13Per antes ne yruu men, wbëz men chii xmos men, wdee men ndal med lo men te te men, lex re men lo men: “Gulano medree dxiin axtegue ne yberee noo.” 14Per rwinyaan yrandxee menlaz men men, lex wxaal menlaz men tebëd mén zanal men chen gue men: “Rlaandet noo ne gak ménree xerrey noo.” 15Per wlaa mén men rrey, lex wberee ke men laz men. Chene le men wberee, wbëz men yra xmos men ne wdee men med lo, chen gaknan men gan palal wun men gan te te men. 16Wbig men primer, re men: “Dechey, le xmed de nee; wuno gan schii lal ne nako.” 17Wke rrey, re rrey lo men: “Weno, te moswen nak de; ya ke ne wen wlaa de kon ne zhi, orrenaa yzu noo de ynebééy de chii gyëz.” 18Wbig men ste men, re men: “Dechey, le xmed de nee; wuno gan sgaay lal ne nako.” 19Wke rrey, re rrey lo mos guin: “Laa de ynebééy gaay gyëz.” 20Lex wbig men ste men, re men: “Dechey, le xmed de nee; wkaa noo we te lo bayles, wgutsoow noo we. 21Wdxe noo de porke wdee beey nak de, rnëëz de ne nakdet xen de, no rlaap de ne wak ledne wguudet de bni.” 22Lex re rrey lo men: “Mosmal, por xgyelgyedruu de nak ne sakzi de. Belne nan de ne wdee beey nak noo, ne rnëëz noo ne nakdet xen noo, no ne rlaap noo ne wak ledne wguudet noo bni, 23¿penak waludet de xmed noo bank cheguin? Lex chene nberee noo, nkakwent noo we ydebzhiino.” 24Lex re rrey guin lo men ne ndxin nga: “Gugyitxee med gwa lo men, gudee we lo men ne nzen chii lal wa.” 25Wke men re men: “Dechey, per che nzen men chii lal wa.” 26Wke rrey, re rrey lo men: “Yna noo lo de yra de ne mén ne nzeno, mazre ndaldoo sen men; per le mén ne nzendeto, axtegue ne nzenendxee men ybetxee lo men. 27Le yra mén ne rwinyaan noo ne wlaandet ne gak noo rrey, gutano men nee, lex guket men nes lo noo.”
Le Jesus wdee lenlgyëz-Jerusalén
(Mt. 21:1-11; Mr. 11:1‑11; Jn. 12:12-19)
28Chene wluzhse re Jesus zenga, wyuli ke Ne nëz, za Ne Jerusalén. 29Chene wdxiin Ne guex Betfagé no le guex Betania guex gyeey ne la Olivos, wxaal Ne txup xpén Ne, 30re Ne lo men:
―Gutsa gyëzwin ne nak ngali nee. Ne ydxiin de, tsël te bur bëën bëënleg ne kaduu nga lo de no ne rutlel gardet kwib. Ychil de ma, chidno de maa. 31Belne nuu mén ynabdiiz lo de, yna men: “¿Penak rchil de bur gwa?”, yke de, gue de: “Laa Jesus ne rnebééy ykyiinen maa.”
32Lex za xpén Ne, no yrandxee zegne re Ne, zenga wako. 33Chene le men kachil bur guin, wnabdiiz xpexwaan ma lo men, re men:
―¿Penak rchil de bur gwa?
34Wke men re men:
―Laa Jesus ne rnebééy ykyiinen maa.
35Lex wdxinno men ma lo Jesus, wxob men lër ne rrël men led maa, wzoob men Jesus led maa. 36Zegne zadee Jesus, rgyixnchiil mén lër nëz ledne tee Ne. 37Ne che guex ydxiin Ne ledne rzeeb den gyey-Olivos, yrandxee xpén Ne wzelo men noze rakrwid men por tant rzhiilen men no rzaknon men Dëdyuzh por yra gyelmilaguer ne wii men wak. 38Re men:
―¡Dëdyuzh gaknonen rrey ne zëëd por la Dëdyuzh! Gyelendxi nuu gyeybaa; nzoon Dëdyuzh.
39Orguin re tebëd men ne nak farisew ne za lad yra mén nga, lo Ne:
―Maxter, gugakndux lo yra xpén de.
40Per wke Ne re Ne lo men:
―Yna noo lo de yra de, belne gyakchi men, selo yra gyeree terëzo.
41Chene le Ne wdxiin guex Jerusalén ne wii Ne gyëz guin, woon Ne por laa we. 42Re Ne:
―Men-Jerusalén, belnaal ydee de kwent gan txu zëëd yniiz gyelendxi lo de, per orrenaa nuudet ydee de kwento porke ngueedxo por laa de. 43Porke sdxiin dxe ne mal por laa de yra de, ne ylep soldad te fchin noze kbii de, lex kwinnap men de; ni te lad gundet de gan yláá de lo men. 44Yket men de yra de no yluzh men laz de. Ni te gye gyandet led ste gye, porke wukasdet de mén ne wxaal Dëdyuzh lo de yra de.
Wladoo Jesus ruxeydoo Dëdyuzh
(Mt. 21:12-17; Mr. 11:15‑19; Jn. 2:13-22)
45Chene wdxiin Jesus Jerusalén, wzelo Ne wnexoon Ne yra mén ne ndxin rtoo no le yra mén ne ndxin rzii ruxeydoo Dëdyuzh. 46Re Ne lo men:
―Lo xgyiich Dëdyuzh re: “Xyuu noo, ledne rnab mén lo noo nako”; per le laa de yra de rlaa do zegnak xebluu ngbaan.
47Yzaandxee dxe wneluu Jesus mén lenxeydoo Dëdyuzh. Per le fxuz ne rnebééy lo yra fxuz no le maxter ley no le men ne rnebééy lo men-Jerusalén, rye men gan pezee gak yket men Jesus. 48Per rzëldet pezee ylaa men, porke noze list ndxin yrandxee mén rkagyedyag men ne rnii Ne.
Dewis Presennol:
LUCAS 19: zpi
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2010, Wycliffe Bible Translators, Inc. All rights reserved.