Mateo 2
2
Dos Kod-inguma to mgo Minuvu no id Pomon tid Tollak
1Na, to id tobbow si Disas diyot bonuwa to Betlehem no sakup to Judea iddot timpu no si Herodes kos hari, duwon mgo minuvu no id pomon tid tollak nid inguma riyot Jerusalem. Sikandan, od kotuig nod ontong to kohulugan to mgo bitu-on. 2Na mid intud sikandan, kahi ran to, “Ingkon man iddos id tobbow no hari to mgo Judio? Su nokita roy iddos bitu-on nid loppow riyon lomig tid tollak no patow to kodtobbow rin, de-en mid undini koy amoy'd simba kandin.”
3To norinog idda ni Harin Herodes, dii ron sikandin od pokodto-ii, woy ungketen dad en mandad iddos langun nid oubpa riyot Jerusalem. 4De-en id po-umow rin iddos mgo ponguu to tohodbuwis woy dos mgo tohodnonaw to Suhu ni Moises. Na id inturan din sikandan, kahi rin to, “Ingkon man od tobbow iddos Mesiyas?”
5Mid tavak sikandan to, “Diyot Betlehem no sakup to Judea, su ini en kos id sulat to propeta no mid ungketen to,
6‘Sikkow, Betlehem no riyot prubinsya to Judea,
ahad disok ka no bonuwa, od kovantug ka taddot dumon mgo bonuwa no sakup to Judea.
Oyyos od pomon duwot kikow iddos sokkad no ponguu
nod hari to koddin mgo minuvu no idda en so koubbaran ni Israel.’ ”#2:6 Od kovasa ini riyot Miqueas 5:2.
7To norinog idda ni Herodes, id po-umow rin iddon mgo minuvu no siksikandan da. Woy id inturan din ko kannu id loppow dos bitu-on. 8Na id po-undiyon din sikandan to Betlehem, kahi rin to, “Undiyon kow woy ooyyari row tod nangkap iddos anak. Woy otid kokita rowd, livod kow vo ka-ay woy ponudtuli a, su od undiyon a mandad amoy'd simba kandin.”
9-10Nopongnga idda, id logkiyat don iddon mgo minuvu. To kod-ipanow ran, nokita ran mandon iddos bitu-on no nokita ran to riyon pa sikandan to lomig tid tollak, woy dakkoo en kos kahaan dan. Id ikuu ran idda taman to id soro riyot pantok to baoy no rutun en iddos anak. 11Na id usok dan taddon baoy, woy nokita ran don iddos anak woy dos inoy rin no si Maria. Mid lingko-od sikandan amoy'd simba taddot anak. Id ukaa ran iddos mahaa no mgo piniyoddan dan, woy id boggoy ran taddot anak iddos buawan, mammut no insenso woy dos pomammut no mira.#2:11 Dos buawan, korotuwan to hari. Dos mammut no insenso, id gamit to mgo tohodbuwis diyot kodsimba, patow to mgo dosalon no id poratas diyot Monama, woy idda mandad so mira, pomammut atag to lawa to minatoy timpu to kodlobbong.
12To kod-uli ran, id baya sikandan to osson daan, su id pomonduwan sikandan to Monama ukit to tohenoppon no dii ran don od livod diyot ki Herodes.
Dos Kodpaahuy Po-undiyon to Ehipto
13Na, to noko-ipanow ron iddos mgo minuvu no id pomon tid tollak, id pokita ki Jose iddos ponolihan to Monama ukit to tohenoppon, woy kahi rin to, “Onnow ka. Piyoddow kos anak woy inoy, woy paahuy kow po-undiyon to Ehipto. Oubpa kow pa tahad dutun taman tod oseng a koniyu no od pokolivod kowd, oyyos konnod kouhoy, id po-inangkap ni Herodes kos anak amoy'd imotayan.”
14De-en id onnow si Jose woy id piyod din iddos anak duma taddot inoy, woy id ipanow ran to idda ra en no bulli po-undiyon to Ehipto. 15Na riyon en sikandan id oubpa taman tid patoy si Herodes. Notomanan ini amoy'd kotuman iddos id ikahi to Monama nod Longaggon ukit to propeta no mid ungketen to, “Id umow ku kos koddin anak nod leggua pomon diyot Ehipto.”#2:15 Od kovasa ini riyot Oseas 11:1.
Dos Kod-imatoy to mgo Anak
16To nosorollan ni Herodes no iddos mgo minuvu nid pomon lomig tid tollak, waa id tuman taddot tandu ran nod livod diyot kandin, nolinglingasa sikandin. De-en id suhu rin kos mgo sundau rin nod imotayan kos langun no anak no mama pomon diyot lammid tobbow taman to oruwon lahun kos idad no id oubpa riyot Betlehem woy riyot mgo bonuwa no morani rutun. Iyon din id ikuu, iddos timpu no id ponudtuu taddot mgo minuvu no id pomon tid tollak iddot id inturan din sikandan ko kannu id loppow iddos bitu-on.
17De-en notuman iddos id ikahi to propeta no si Jeremias no mid ungketen to,
18“Od korinog kos kodpondaawit diyon to Rama.
Id sinoggow si Raquel#2:18a Si Jacob no id pomonnan to mgo Judio, id lobbong din iddos sawa rin no si Raquel diyot morani to Betlehem. Id ponunggelengan sikandin to mgo inoy rutun no id ponsinoggow pomon to id pon-imotayan kos mgo anak dan. atag to mgo anak din, woy
dii ron od ko-uus kos ginawa rin,
oyyos id patoy ron man dos mgo anak din.”#2:18b Od kovasa ini riyot Jeremias 31:15.
Dos Kodleggua Pomon diyon to Ehipto
19Na, to id patoy ron si Herodes, duwon ponolihan to Monama nod Longaggon no id pokita ki Jose riyot Ehipto ukit to tohenoppon. Kahi taddot ponolihan to, 20“Onnow ka. Piyoddow kos anak woy inoy, woy livod kow riyot ingod to Israel, oyya su id patoy ron iddos od kopiyan nod imatoy ruwot anak.” 21De-en id onnow si Jose woy id piyod din iddos anak woy dos inoy, woy id uli sikandan diyot ingod to Israel.
22Piru to norinog ni Jose no si Arquelao no anak ni Herodes kos id suvaa nid hari riyot Judea, novaakkan sikandin nod undiyon. Na, id pomonduwan don mandon sikandin to Monama ukit to tohenoppon, de-en id undiyon sikandan to prubinsya to Galilea. 23Na, diyon don en sikandan mid oubpa to bonuwa to Nazaret.#2:23 Dos kahi no Nazaret, konna od kovasa riyot Tapoy'n Tandu. Diyot timpu ni Disas, disok idda no bonuwa woy od lomottan to minuvu (Juan 1:46). De-en iddos kohulugan ni Mateo, duwon mo-uraan propeta nid posaddoo no od lomottan si Disas to mgo minuvu. De-en notuman don iddos id ikahi to mgo propeta no mid ungketen to, “Od ngoranan sikandin no toho Nazaret.”
Dewis Presennol:
Mateo 2: obo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2011, Wycliffe Bible Translators, Inc. All rights reserved.