Luke 21
21
1ၸဝ်ႈယေႇသုယွတ်ႈသီး(ရ်)သီး(ရ်)ရႄ ဢေႃး(လ်)ဢီႉမၢင်ၵိူၺ် တိူဝ်ႇ(ရ်)ဢၢႆႉၻႄႉလူပႅၵ်းတေႃးတိူၵ်ႇပႅၵ်းၸွင်းပိၵ်ႈမၢၼ်ႇဢၼ်ၻီးဢေႃႈ။ 2ၵမ်းတီးယႃႇၵိူဝ်မၢႆး ဢီႉၽၢၼ်းႁွၵ်းတြူးလူပႅၵ်းဢၼ်ၼႄႇၶလႅပ်းတွင် ရူင်ဢႃး(ရ်)ၶလႅပ်းၼေၵေႃႇ ႁိုဝ်ႉဢေႃး(လ်)ႁေယဝ်ႉ။ 3ၸင်တႃး ဢူဝ်ႉၻႃးတေႃးပေႉသမ်း ယႃႇၵိူဝ်မၢႆးဢီႉၽၢၼ်းဢၼ်ၼီ သပ်းပႅၵ်းလူႁိူင်းလၵ်ဢီႉႁႆႉဢၢမ်းယဝ်ႉ။ 4ၵွပ်ၼႄႉတႃးသမ်း ၵိူဝ်ႇၵိူဝ်ၻီးလေႇပႅၵ်းဢၼ်လိူဝ်းတုဢၼ်ၵိူဝ်ႇမၢင်ႁိူင်းၿၢႆးဢၼ်ၻီးတြူးလူတၢၼ်းဢေႃႈ။ ၵိူၺ်းၻႃး ယႃႇၵိူဝ်မၢႆးဢီႉဢၼ်ၽၢၼ်းၿၢႆးဢၼ်ၼီသမ်း လေႇၵႃဢၼ်ႁိုဝ်ႉမၢင်ႁႆႉဢၢမ်းဢၼ်လူဝ်တမ်းၽွမ်းၻႄႉဢၼ်ၻီးလူယဝ်ႉ ၻႃးၸိုၼ်ၻီးဢေႃႈ။ 5တွႆးၸိုၼ်ဢီႉတိူဝ်(ရ်)ၵႃတိူဝ်ႇ(ရ်)ဢုပ်းၻႄႉ လွင်တိူၵ်ၸွင်းပိၵ်ႈမၢၼ်ႇၸဝ်ႈဢၼ်လေႇတင်ရိူဝ်ဢၢင်းၵိူၼ်ရႃဢၼ်ဢၢတ်းၿၢႆးၿူဝ်ႇတင်တႃၼႃႉရိူင်ႇၻဵင်းလူႇၵိူဝ်ႇဢၼ်ၻီး ဢၼ်သိူၵ်လႅပ်မူၵ်ႇဢၼ်ၻီးရႄ၊ 6ႁိုဝ်ႉလဝ်တေႃးၵိူဝ်ႇရႄၻႃး ၵႃဢၼ်ပေႉဢေႃး(လ်)ၿူဝ်ႇႁၢႆႉႁႆႉဢၢမ်းဢၢမ်းဢၼ်ၼီ ၶိင်ၵႃလႃႉဢၼ်ရိူဝ်ဢၢင်းၵိူဝ်ၼီ တေၼမ်တိူဝ်ႇ(ရ်)တၵ်းၻႄႉသိူဝ်ၵွၼ်းၵွၼ်းရႄ တေၿွၼ်းတိူၵ်ႇၽရုင်းယႃထဵင်းၵလေႃႉၵွၼ်းၼေ တေၽရႅဝ်းတြူးဢေႃႈ ၻႃးၸိုၼ်ၼီဢေႃႈ။ 7ၵိူဝ်ႇၵေႃႇမၢႆးၻႃး တႃႉသြႃႇ လွင်ၵိူဝ်ၼီတေပဵၼ်းတြူးမိူဝ်ၼႄႇလႃႇ။ ၼိမိၵ်ႈလၢၵ်ႈၶၼႃႇဢၼ်ငႃးပျႃႉပလႄးလွင်ၵိူဝ်ၼီ သမ်းၶိင်ငႃးပဵၼ်းတြူးၼေ ငႃးမၢင်ၸိုၼ်ၼႄၶႃႈ ၻႃးၸိုၼ်ၼီဢေႃႈ။ 8ၸဝ်ႈယေႇသုမေ(လ်)လဝ်ရႄၻႃးႁိုဝ်ႉၸဝ်ႈလဝ်ၻႃး ၸီႇသတီႇဢႄး။ ယၵ်ႇဢႄးဢီႉၿွၼ်းဢုပ်းၵျႃႉပေႉ။ ဢီႉႁိူင်းၿၢႆးတေၶၢမ်လေႇမူႇ(သျ်)ဢူဝ်ႉတြူးရႄ လဝ်ၻႃးဢူဝ်ႉၼႄႇတႃႉဢၼ်ၻီးယဝ်ႉ သမ်းတႃး ၶိင်ဝႃၽရႅဝ်းတြူးယဝ်ႉ ၻႃးၸိုၼ်ၼီဢၼ်ၻီးႁိူင်းၿၢႆးဢေႃႈ။ ယၵ်ႇပႃလၼ်တွႆးၵိူဝ်ႇ။ 9မိူဝ်းဢၼ်ပေႉၿွၼ်းငႂ်း(ရ်)ရိူဝ်ဢူၺ်းတိုၵ်းသိုၵ်းတင်ၿူဝ်ႇလွင်ဢၼ်သိူၵ်ဝိူဝ်(ရ်)တိူဝ်ႇ(ရ်)ၶတ်းတိူဝ်ႇ(ရ်)တႃၻႄႉဢၼ်ၻီးၼေ ယၵ်ႇဢႄးၵိင်းၵိူဝ်ၼူး(သျ်)ပေႉတူဝ်းတိူဝ်ႇ(ရ်)ၸိူဝ်ႇ(သျ်)။ လွင်ၵိူဝ်ၼီတေပဵၼ်းတြူးဢၢႆႉဢေႃႈ။ ၵိူၺ်းၻႃး ၶိင်ၵႃလႃႉထႃးပူတ်းတုတ်းတေထတ်းၽရႅဝ်းတြူးယဝ်ႉ ၻႃးၸိုၼ်ၼီမၢတ်လဝ်ၿွၼ်းလူးၵွၼ်။ 10ဝၢႆးဢၼ်ၻီး ဢီႉသိူဝ်မဵဝ်းတေတိူဝ်ႇ(ရ်)တိုၵ်းၻႄႉတင်ဢီႉသိူဝ်မဵဝ်းရႄ ဢီႉသိူဝ်ပရီႇၿူဝ်ႇသိူဝ်ပရီႇတေတိူဝ်ႇ(ရ်)ၶတ်းတႃၻႄႉဢေႃႈ။ 11တိူဝ်ႇ(ရ်)ယုင်လူင်းၵိူၺ်၊ ၽေးၵၢႆးၽရိၽရႃႉၵႄး(သျ်)ၵိူၺ်၊ ၿူဝ်ႇတင်ၽေးၵႃလႃႉပရီႇဢူမ်းၵိူၺ်တေပဵၼ်းတြူးပဵၼ်းတီပဵၼ်းတီဢေႃႈ။ တင်ႇၼိမိၵ်ႈလၵ်ၶၼႃမဵဝ်းလၢၵ်ႇလၢႆးရၵ်ႇသိူမ်သင်း၊ ၿူဝ်ႇတင်ႇၼိမိၵ်ႈလၵ်ၶၼႃဢၼ်ပိုၵ်ၻူဝ်းပိုၵ်ငၢတ်တင်ႇႁိူင်းတေပဵၼ်းတြူးလင်ၵႆပလဵင်းဢေႃႈ။ 12ၸူဝ်ဢၼ်လွင်ၵိူဝ်ၼီမၢတ်ပဵၼ်းတြူးၼေ ၵွပ်မူႇ(သျ်)ဢူဝ်ႉရႄ ၵိူဝ်ႇတေၺွပ်းပေႉၼိၵ်ႈၸၢၵ်ႈပႄသူးဝမ်းပေႉရႄ ၸွႆးတၢင်းဢမုတေႃးပေႉတုၸရွပ်ရေႃးတြႃးၵိူၺ်၊ လေႇသပ်းထင်ၵိူၺ်ၼမ်ၵႃး၊ တေလေႇပေႉၽူႉဢႄးတေႃးၶုၼ်းႁေႃၶမ်းၵိူၺ်တင်တေႃးဢမၢတ်ၽွင်းမိူင်းၵိူၺ်ဢေႃႈ။ 13ၵွပ်လွင်ၵိူဝ်ၼီရႄ ပေႉတေၿွၼ်းဢၶႂၢင်းဢယေးဢၼ်ရေႃးလဝ်သၢၵ်သေရိူဝ်ဢူၺ်းတြႃးသိူဝ်းပျေႃဢေႃႈ။ 14ႇသတီႇဢႄးၵိင်းၵိူဝ်ၼူး(သျ်)ပေႉမၢင်ၵိူမ်ရင်တႃလွင်ပေႉတေၼမ်ၿွၼ်းၵႂတ်းၽွမ်းတႃတေမေ(လ်)ဢုပ်းၵၼ်းၶရႄးတူဝ်းၻႄႉၼေဢႄး။ 15လွင်ႁိုဝ်ႉသမ်း ဢူဝ်ႉတေၶႂၢင်းဢႄးမႂဵင်ရိူဝ်မႃတင်ၺၢၼ်ႇပိင်ၺႃတေႃးပေႉ ဢၼ်ရၢၼ်ႇသူႇပေႉတေၼမ်တွပ်းၼမ်ထႅင်းၿွၼ်း၊ ၼမ်ၶင်းၼမ်ၶရႅၼ်းၿွၼ်းၼေဢေႃႈ။ 16ပေႉတေၿွၼ်းၶၢမ်ဢၼ်မႃႇပႃးၵူးဝၼ်းမႆၸိူဝ်ၶိူဝ်းပေႉ၊ တင်ၵူးဝၼ်းၿူဝ်ႉပေႉသႃးသူးဝမ်းမူႇ(သျ်)ပေႉဢေႃႈ။ တိူဝ်(ရ်)ၵႃတေလေႇပေႉယမ်။ 17ဢီႉတင်ႇႁိူင်းတင်ႇလူင်း တေၸိူဝ်ႇပေႉ ၵွပ်ပိူဝ်ဢူဝ်ႉဢေႃႈ။ 18သင်းၻႃးၸိုၼ်ၻီးၵေႃႇ ႁုၵ်းၵိင်းပေႉတေၼမ်ၿွၼ်းလူႇၿွၼ်းၵူ(ရ်)သိူဝ်သဵၼ်းသဵၼ်း။ 19ပေႉတေၿွၼ်းၵႄသႄလေႇဢသၢၵ်ႈပေႉၵွပ်ပိူဝ်ရိူင်ႇၻဵင်းၺိုၼ်ၶၢမ်ဢၼ်ၵလၵ်းၶရိူမ်းပေႉဢေႃႈ။ 20မိူဝ်းဢၼ်ပေႉဢေႃး(လ်)တပ်းသိုၵ်းရၢၼ်ႇသူႇလွမ်သိူဝ်(ရ်)ဝိတ်ႈဝဵင်ယေရုသလႅမ်၊ မူၵ်ႇဢၼ်ၻီးၼေ၊ တိူဝ်ႇ(ရ်)ဢၢႆႉၻႄႉမႃႇ(သျ်)ၻႃး၊ ဝဵင်ဢၼ်ၻီးဝႃထတ်းငႃးလူႇၽင်းယဝ်ႉဢၼ်ၻီးဢေႃႈ။ 21မိူဝ်းၻီး ၵိူဝ်ႇၸိူဝ်းဢၼ်ၼႄႇတုပရီႇယုတႃႉ၊ တေၿွၼ်းဝင်တိုၼ်းရေႃရင်ရႄႇ ၵိူဝ်ႇၸိူဝ်းဢၼ်ၼႄႇတုဝဵင်တေၿွၼ်းဝင်တိုၼ်းလႄဝဵင်လၼ် ၵိူဝ်ႇၸိူဝ်းဢၼ်ၼႄႇတုပရူႇထႃးၼွၵ်တေၼမ်ၿွၼ်းၵုတ်ႇၸူတုဝဵင်ဢေႃႈ။ 22လွင်ႁိုဝ်ႉသမ်း ၶိင်ၵႃလႃႉဢၼ်ၼီ တေၼႄႇသိူဝ်ငိဢၼ်ၸီႇယၢင်ဢႄးတၢမ်ဢႄးၵႃဢၼ်တႅမ်းမူၵ်ႇတုၵျၢမ်းလိၵ်ၼေ ၿွၼ်းပျေႉၸုင်ဢေႃႈ။ 23မိူဝ်းၽွင်းသိူဝ်ငိၵိူဝ်ၻီးၼေ။ ၵိူၼ်ၺႃႇဢၼ်ၵိူၼ်မိူဝ်(ရ်)ၵိူၺ်၊ ၿူဝ်ႇတင်ၵိူၼ်ၺႃႇဢၼ်မၢင်ၵူးဝၼ်းငၢၵ်ႇရူင်ၵိူၺ် တေၵိၼ်းၽွမ်းၿၢႆးဢေႃႈ။ တုၵ်ႉၶႃႉဝူၺ်တၼႃတေၵလႄးၽရႅဝ်းၵႆပရီႇၵိူဝ်တေႉဢၼ်ၼီရႄ ဢၼ်ၽြႃးပဵၼ်ၸဝ်ႈၸီႇယၢင်ဢႄးတၢမ်ၼေ၊ တေၵလႄးသပ်းၵႆဢီႉၵိူဝ်ၼီယဝ်ႉဢေႃႈ။ 24ၵိူဝ်ႇတိူဝ်(ရ်)ၵႃတေၿွၼ်းၶၢမ်ဢၼ်မၵ်တိူၵ်ႇယမ်ရႄ တိူဝ်(ရ်)ၵႃသမ်း တေၿွၼ်းၶၢမ်ဢီႉၺွပ်းမတ်လေႇလၼ်ၸီႇၶႃတုပရူႇတုပရီႇဢီႉသီး(ရ်)ႁႆႉဢေႃႈ။ ဝဵင်ယေရုသလႅမ် တေၿွၼ်းၶၢမ်ဢၼ်ဢီႉတၢင်ၸိူဝ်တၢင်ၶိူဝ်းပႅၼ်းသူးဝမ်းတေႃၽရႅဝ်းၶိင်ၵႃလႃႉဢီႉတၢင်ၸိူဝ်တၢင်ၶိူဝ်းၵိူဝ်ႇတေပျေႉၸုင်ၼေဢေႃႈ။ 25မိူဝ်းၻီး ပုၵ်ႉပႃႉၼိမိၵ်ႈလၵ်ၶၼႃတေပဵၼ်းတြူးတုသိူဝ်ငိ၊ တုၵီး(ရ်)တုသိုၵ်ႇမႂိင်ၵိူၺ်ဢေႃႈ။ ၵႆပရီႇၵိူဝ်တေႉဢၼ်ၼီၵေႃႇ ဢီႉၵလေႃႉၸိူဝ်ၵလေႃႉမဵဝ်း တေတိူၵ်ႇၶရၼ်းတင်းရႄတူဝ်း ရိူဝ်ႇ(သျ်)ဢူမ်းသမ်မုၵ်းတြႃဢၼ်ပိူၼ်ဝႆရေႃႉဢူး(သျ်)ၿၢႆးလူင်းလၢင်းၼေဢေႃႈ။ 26ဢီႉၵိူၺ်ထၼ်းပေႃယမ်မေ(လ်)လၼ် ၵွပ်ပိူဝ်ၵိူဝ်ႇၻူဝ်းမိူဝ်းဢၼ်ၵိူဝ်ႇယိုင်တိုၵ်သူဝ်းပႂ်ယွတ်ႈလွင်ဢၼ်တေပဵၼ်းတြူးၵႆပရီႇၵိူဝ်တေႉဢၼ်ၼီၼေ ၵွပ်ပိူဝ်တၼ်းၶူဝ်းၵၢင်ရၢဝ်းၵိူၺ် တေၶရူႉတိူဝ်ႇ(ရ်)ၸိူဝ်ႇ(သျ်)ၿူဝ်ႇဢေႃႈ။ 27မိူဝ်းၻီး ၵူးဝၼ်းဢီႉတေပႃတင်ပုၼ်းၽုင်းတၼ်းၶူဝ်းဢႃၼုၽေႃႁိုဝ်ႉႁေရႄ တြူးတုပိူဝ်ဢိူမ်းဢေႃႈ။ 28မိူဝ်းဢၼ်လွင်ၵိူဝ်ၼီ သိူၼ်တိူင်းပဵၼ်းတြူးၼိမိၵ်ႈလၵ်ၶၼႃဢၼ်ရၢႆဢၼ်ၻီးၼေ၊ ၵွပ်ပိူဝ်ၶိင်ဢၼ်ၽြႃးပဵၼ်ၸဝ်ႈတေထုတ်းလေႇပေႉဝႃထတ်းတြူးရႄ ၵိူဝ်(လ်)ငိူၵ်းၵိင်းငေႃငၢႆဢႄး၊ ၻႃးၸိုၼ်ၼီၸဝ်ႈယေႇသုရေႃးလဝ်ဢေႃႈ။ 29ၸဝ်ႈယေႇသုသမ်း လေႇတင်မႂဵင်ပုင်ႇတႅၵ်ႈဢုပမႃႇရႄၻႃးသမ်း ယွတ်ႈတိူင်းလၢင်းဝႃႇတင်တိူင်းၶႄႉၵိူၺ်လူး။ 30မိူဝ်းဢၼ်ပေႉဢေႃး(လ်)ၵိူဝ်ႇရုၼ်တြူးဢၼ်ၻီးၼေ၊ ပေႉမႃႇ(သျ်)လွင်ဢၼ်ၶိင်ၵႂတ်းဝႃထတ်းၽရႅဝ်းတြူးၼေယဝ်ႉ။ 31ၼႄႇၸိုၼ်ၻီးလၢႆ မိူဝ်းဢၼ်ပေႉၿွၼ်းဢေႃး(လ်)လွင်ၵိူဝ်ၼီပဵၼ်းတြူးၿူဝ်ႇဢၼ်ၻီးၼေ၊ မႃႇ(သျ်)လွင်ဢၼ်ပရီႇၽြႃးပဵၼ်ၸဝ်ႈထတ်းတႄပဵၼ်းယဝ်ႉဢႄး။ 32ဢူဝ်ႉၻႃးမွၼ်မွၼ်မၢၼ်မၢၼ်ပေႉၼႃႉသမ်း ၶိူဝ်းဢီႉမဵဝ်းဢၼ်ၼီ တေမၢတ်ႁႆႉဢၢမ်းတေႃၽရႅဝ်းလွင်ၵိူဝ်ၼီ ၿွၼ်းပဵၼ်းတြူးႁႆႉဢၢမ်းဢၼ်ၻီးဢေႃႈ။ 33ပလႅင်းၵၢင်ရၢဝ်းတင်ပရီႇၵိူဝ်တေႉ တေဝၢႆးၿီး(လ်)ဢေႃႈ။ မႂဵင်ဢူဝ်ႉၼေ တေၼမ်ၵူ(ရ်)ၼမ်ၿီး(လ်)လႃးလႃး။ 34ၸီႇသတီႇတေႃးတူဝ်းၻႄႉဢႄး။ ယၵ်ႇဢႄးၵိင်းၵိူဝ်ၼူး(သျ်)ပေႉၼူၵ်းမူၵ်ႇတင်ဢၼ်သူးဝမ်းပိူၼ်သူးဝမ်းလိူဝ်း၊ တင်ဢၼ်ၸိၵ်ႈၵူးဝူၼ်းလွင်လေႃးၵီၿၢႆးလိူဝ်းလၼ်။ ၿိူၵ်ႇၼမ်ဢၼ်းၸိုၼ်ၻီး မိူဝ်းဢၼ်ပေႉၼမ်ထၢင်ၼမ်ထိူမ်ၼေ ၸၢင်ၶႄးသိူဝ်ငိဢၼ်ၻီး တေၻႃး(ရ်)မႅၼ်ပေႉ၊ 35ၼႄႇၸိုၼ်တူင်တၵ်းၵွပ်ပိူဝ်တႃးသိူဝ်ငိဢၼ်ၻီး တေၽရႅဝ်းတြူးၵႆဢီႉၵႃဢၼ်မူဝ်ႇၵႆပရီႇၵိူဝ်တေႉဢၼ်ၼီႁၢႆႉႁႆႉဢၢမ်းဢၢမ်းဢေႃႈ။ 36တိူဝ်ႇ(ရ်)ဢၢႆႉၻႄႉမူၵ်ႇသတီႇပႂ်ၿူဝ်ႇရႄ သူးတွင်းတႃလွင်ဢၼ်တေၿွၼ်းၵိူမ်ရင်ဢႄးၵၢင်းလွတ်တင်လွင်ဢၼ်တေပဵၼ်းတြူးၵိူဝ်ၻီးႁေယဝ်ႉ၊ ၿွၼ်းၸဵင်ၿူဝ်ႇပလၢၵ်းထႃးငၢႆၵူးဝၼ်းဢီႉဢၼ်ၻီးဢႄး၊ ၻႃးၸိုၼ်ၼီဢေႃႈ။ 37မိူဝ်းၻီးသိူဝ်ငိ ႁိုဝ်ႉသွၼ်းဢႄးတုၸွင်းပိၵ်ႈမၢၼ်ႇၸဝ်ႈၵလေႃႉသိူဝ်ငိရႄ ၶိင်တိုၵ်ၿိမ်းၼေ၊ ႁိုဝ်ႉရေႃလၼ်ၽရိူမ်းရိူဝ်ၵႆရင်ဢၼ်ရၢၵ်ႇၻႃး၊ ရင်သၢၼ်လုၼ်ၼေဢေႃႈ။ 38ၶိင်တိုင်ငုပ်ၸဝ်ၸဝ်ၼေ ဢီႉၵိူၺ်လၼ်ၸူတေႃးႁိုဝ်ႉတုၸွင်းပိၵ်ႈမၢၼ်ႇၸဝ်ႈ ဢႄးၿွၼ်းတိူၵ်ႇငႂ်း(ရ်)တြႃးၸဝ်ႈဢေႃႈ။
Dewis Presennol:
Luke 21: rtpv-rv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This translation of the Riang Lai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.