Kejadian 1
1
Allah arye, aning-aning nirya kwepdeibuk ati, nyabuk yupu
1Aning-aning nirya kum uamuk talak ara, Allah arye im ap, tuku ap kwepdeibuk. 2Tukwak mutuku akunum kwepdeipmok bukni, aning-aning ayala-yala nirya kum ulamuk talak, min kum lipsisikdeiamuk ati, urasin talye-talye urdemuk ubuk. Kaurwe weik mekwen awamukba, kuna weik ubuk. Ubukba, Allah el Dib Kanye arye, amekwen deice lakanmok.
3Wininmokbuk, Allah arye, nyabuk. “Dirina kiplyame,” nyabukba, adiparyuk dirina ubukce, berekuk. 4Dirina kibukba, Allah dipdeyukce, ‘Adirina ara telebe,’ tenebukce, kuna yuk, dirina yuk bokukabukce, yuk-yuk kipdeibuk. 5Dirina ati, Allah arye, “Keting noutam,” nyabuka sisibuk. Kunukna ati ara, “Lukunyan,” nyabuka sisibuk. Winibukopura, lukunyan ap, keting noutam ap winibukba, like tonok sum min yuma sum ning ara, akunum teleb kibuk.
6Winibukopura, Allah arye nyabuk. “Ton mekwen eitam, ton mekwen ara, amu tam noutam ara, weik lo uplirye, mekwen dana-dana wilipropnule,” nyabuk. 7Nyabukce, Allah arye lo weik kwepdeibukba, mekwen outam ton deibuk. Lo weik eitam ton mekwen deibukopura, amekwen nirya wilibuke. Allah arye, ‘Wilipnule,’ nyabuk touk winibuk. 8Winibukopura, Allah arye weik lo noutam kwepdeibuk ning, el si ati, “Im noutamak,” nyabuk. Nyabukura, inipmoka ani berekukba, inina bitinye sum ning akunum kibuk.
9Winibukopura, Allah arye, nyabuk. “Wini talak ara, im noutamak eitamak arye, outam mekwen ara tonokak deiplirye, tuku mikuka, lak kipnule,” nyapdeibukba, adiparyuk Allah arye nyapmok touk winibuk. 10Mutuku lak bukukce, tuku buppu kibuk ning ara, Allah arye, si dobuk mutuku ara, “Tukwak mutuku,” nyabuka si dobuk. Tonda, outam mekwen tonokak bulubuka deibuk ning si ara, “Laut mekwen,” nyabuka sisibuk. Nyabuka deipdeyukce, ‘Aning nirya ara teleb,’ tenebuk. 11Winibukopura, Allah arye, nyabuk. “Winira tukwak mutuku, im sirya, mutuku sirya nirya noutamak ara, tuku pum bisik arye, papnamle ning ayala-yala nirya, adiparyuk beteklyame,” nyabukba, adiparyuk betekuka pabuk. Tonda, “Yo duk ap, tapu duk ap ara, duk moulamle ning ayala-yala nirya ara, sik urasin yuk-yuk aunamle touk, duk mouplirye, yala ning doknamle,” nyapdeibukba, adiparyuk winibuk. 12Tukwak mutuku, im sirya, mutuku sirya noutamak arye, yata yala ning do nirya ara, betekuka pabukce, sik urasin yuk-yuk aulye touk, duk ap, yala ap kintinibuk. Tonda, yo noutamak aning-aning nirya pabukce, sik urasin yuk-yuk aulye touk, duk moubukce, ekuk. Winibukopura, Allah dinmokce, ‘Aning nirya ara telebe,’ tenebuk. 13Winibukopura, inipmoka, berekukba, like winilye sum akunum kibuk.
14Winibukopura, Allah arye nyabuk. “Winira im noutam ara, weik dirina upnule. Adirina arye, lukunyan ap, keting noutam ap wilipnule. Tonda adirina ara, ‘Li ning yangan talak ara ani, tonok keting tamun ani, tonda like tonok sum ani,’ tenena ati, lak kilin ning unamle. 15Tonda, adirina ara, im noutam deipniba, im sirya, mutuku sirya nirya ati, dirina kipnamle.” Allah arye, ayupu nyabuk touk, adiparyuk ubuk.
16Atalak ara, Allah arye, dirina weik ning bitinye kwepdeibuk. Weik ning ara, ‘Keting noutam tiknamle’ tenen, keting kwepdeibuk bukni, mitik ning ara, ‘Lukunyan noutam tiknamle’ tenen, wala kwepdeibuk. Tonda, atalak anyuk, kurya ton kwepdeibuk. 17Allah arye, ‘Asukum tikinamle,’ tenebuk touk kwepdeibukce, ‘Tukwak mutuku nirya ati dirina kipnamle,’ tenebuk. 18Ton ning ara, ‘Keting noutam tikinamle, ton ning ara lukunyan noutam tikinamle, sik dirina deice ara, dirina sukum ap, kuna ak ap wilipnamle,’ tenebuk. Tenebukce winibukopura, Allah dinmokce, ‘Aning ara telebe,’ tenebuk. 19Winibukopura, inipmoka ani, berekukba, like tonok ton dumu sum akunum kibuk.
20Winibukopura, Allah arye, nyabuk. “Wini talak ara, mekwen noutam nirya ara, kam ulye ning ayala-yala nirya weik uplyame. Tonda, im noutam ara, maka ayala-yala nirya adiparyuk weik ubikirye, im deice lakuka banamake,” nyabuk. 21Allah arye nyabuk deice arye, mekwen noutam kam ulye ning, weik ning babye, mitik ning babye, sik yala-yala yuk-yuk aunamle touk, tenebukce kwepdeibuk. Tonda, im deice lakuka balamle ning, maka ayala-yala nirya kwepdeibuk. Kwepdeibukura, daunmoka ani, Allah dinmokce, ‘Aning nirya ara telebe,’ tenebuk. 22Utenebukce, mekwen noutamak kam ulye ning ap, im deice lakuka balamle maka ayala-ayala nirya ap ati, pia teleb updeibukce, “Anggun nirya ara, mapu weik delilamunyeba, weik upnin banamle. Laut mekwen nirya noutamak ara, kam ulye ning weik upnamle. Im sirya mutuku sirya mutuku-mutuku nirya noutamak ara, maka aning-aning weik upnamle,” nyabuk. 23Nyabukura, inipmoka ani berekukba, pamu sum kibuk.
24Winibukopura, Allah arye, nyabuk. “Tukwak mutuku ap, im sirya, mutuku sirya noutamak ara, kam ulye ning tuku deice yanibuka banamle ning weik, aning-aning nirya upnule. Ara, ninye weinamak ning ap, tuku deice yanibuka banamle ning ap, talye buru tam ning ap, sik aning-aning yuk-yuk aunamak touk upnule,” nyabuk. Allah arye, ayupu nyabuk touk, adiparyuk ubuk. 25Ara, asum Allah arye, kweipdeibuk ning ara, ninye arye, weinamak ning ap, tuku deice yanibuka banamle ning ap, aning ayala-yala nirya aulamak touk kwepdeibukce, dinmokba, ‘Aning nirya ara telebe,’ tenebuk.
26Winibukopura, Allah arye, nyabuk. “Nun unyaba atonun ninye ton kwepdeinuyabe. Nun urasin atonun tukwak ninye kwepdeibibyeba, ninye arye, tukwak mutuku ning nirya ara, talibuka deiyok nang kibuka unamake. Ara, laut mekwen noutam ulye ning ap, mek pum bal ikan ap, tonda im deice lakuka balamle maka ayala-yala nirya ap, ninye arye weinamak ning yala nirya ap, tuku deice yanibuka banamle ning nirya ap, ara, tukwak mutuku im sirya, mutuku sirya unamle ning nirya ati, tukwak ninye talibikirye, deiyok nang kibuka unamake.” Allah arye nyabuk.
27Allah arye nyabukce, Allah el bidamnye arye, mitik anun ulye touk, tukwak ninye kwepdeibuk. Ara, Allah el urasin atonun, sal ap, kil ap kibuka, Allah arye kwepdeibuk. 28Kwepdeibukce, sikti, teleb yupu nyabuka, teleb kipdeibukce, nyabuk, “Anggun mapu weika arye, deipnin balamdumunya arye, tukwak ninye weik upnin banamake. Im sirya, mutuku sirya, mutuku-mutuku nirya binuka umunce, aning-aning nirya ati, malye kibuka talinamlume. Mekwen noutam ulye mek pum bal ikan ap, im deice lakuka balamle maka aning-aning nirya ap, tukwak yanibuka balamle kam ulamak ning nirya ap ati, talipmunce, deiyok nang kibuka unamlume.” Allah arye nyabuk.
29Nyabukopura, ayupu ton nyabuk. “Tonda tukwak betekuka neplirye, duk moulamle ning nirya ap, yo duk mouplirye, yo duk moulamle yo ayala-yala nirya ap, anggun din ning ati arepsine. 30Aning atonun, tukwak mutuku noutamak kam ulamle ning yala nirya ap, im noutamak lakuka balamle maka yala nirya ap, tuku deice yanibuka balamle ning aning-aning nirya ap ati, talye palamle ning, yo bok ulamle ning nirya ara, arepsiniba aninguk dinamlume,” nyabuk. Allah arye, ayupu nyabuk touk, adiparyuk aning nirya ubuk. 31Allah arye, kwepdeibuk ning, aning-aning nirya dinmokce, ‘Aning-aning nirya ara, pia telebe,’ tenebuk. Utenebukce, inipmoka ani, berekukba, like tonok ton nakub sum akunum kibuk.
Dewis Presennol:
Kejadian 1: EIPA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2023, Wycliffe Bible Translators, Inc. All rights reserved.