परेरीत 7
7
इस्तिफनुस हर महा सभा में परचार करथे
1तब महायाजक हर इस्तिफनुस ला पूछीस, “का तोर ऊपर लगावल ए दोस हर सही हवे?” 2इस्तिफनुस हर जबाब देहीस, “ए भाई अऊ सियान मन, सुईन लेआ, हमर पूरखा अबराहम हर हारान देस में बसे कर आगू, मेसोपोटामिया में रहत रहीस, ते घनी महिमामय परमेस्वर हर ओके ला दरसन देहीस, 3अऊ ओके ला कहीस, ‘तंए अपन देस अऊ कुटुंब ला छोंएड़ के ओ देस में चले जा, जेला मंए तोके देखाहूं।’ 4तब ओहर कसदी मन कर देस ले निकेल के, हारान देस में जाए के बएस गईस, ओकर दाऊ कर मरे कर पाछू, परमेस्वर हर ओके उहां ले लाएन के ए देस में बसाईस, जिहां तुमन अब रहत हवा। 5परमेस्वर हर इहां अबराहम ला कांहीच हक नई देहीस, ओके गोड़ मढ़ाएयोच कर जघा नई मिलीस, बकिन ओ घरी अबराहम कर कोई लईका नई रहीन, तबोले परमेस्वर हर ओकर जग बात जबान करीस कि मंए ए देस ला तोर अऊ तोर पाछू, तोर बंस कर हक में कएर देहूं। 6परमेस्वर हर ओके कहीस, तोर संतान मन दूसर देस में परदेसी होहीं अऊ ओजग कर मईनसे मन ओमन ला गुलाम बनाहीं, अऊ चार सवो बछर ले ओमन ला सताहीं।” 7फेर परमेस्वर हर कहीस, “जे जाति कर ओमन गुलाम होहीं, ओ जाति ला मंए सजा देहूं अऊ एकर पाछू ओमन, ओ देस ले निकेल के अऊ एही जघा में रहिके मोर अराधना करहीं। 8तेकर परमेस्वर हर अबराहम जग करार करीस, तेकर चिन्हा बर खतना करुवाईस अऊ अबराहम ले इसहाक हर एही देस में जनमीस अऊ ओकर जनम कर आठ दिन में, ओकर खतना करल गईस अऊ इसहाक ले याकूब अऊ याकूब ले हमर बारह गोती कर मुखिया मन जनमीन।”
9ए मुखिया मन यूसुफ ले इसगा करे लागीन अऊ ओके ला मिसर देस जवईया मन कर हाथ में, गुलाम कर रूप में बेंचीन बकिन परमेस्वर हर ओकर संगे रहीस, 10अऊ परमेस्वर हर यूसुफ ला सब दुख तकलीफ ले छोंड़ाईस अऊ मिसर कर राजा फिरोन कर आगू में बूईधमान बनाईस अऊ ईसूफ हर फिरोन राजा कर मन ला जीत लेहीस, अऊ फिरोन राजा हर ओके मिसर देस, अऊ अपन सब घराना में सासन करोईया ठहराईस।
11तेकर मिसर देस अऊ कनान कर सबेच देस में अकाल परीस, एकर चलते मईनसे मन कर उपरे ढेरेच बड़खा संकट आए गईस, अऊ हमर पूरखा मन ला खायो बर नई मिलत रहीस। 12तेकर ले याकूब हर जब एला सुनीस कि मिसर देस में अनाज हवे, त ओहर हमर पूरखा मन ला सुरू दाएर उहां भेजीस। 13जब ओमन दूसर दाएर गईन, त यूसुफ हर ओकर भाई मन ला अपन पहिचान बताईस अऊ फिरोन राजा हर, यूसुफ कर परिवार कर बारे में जाएन गईस। 14फेर यूसुफ हर अपन दाऊ याकूब अऊ अपन सब परिवार मन ला, जेमन पचहतर झे मईनसे रहीन, अपन जग मिसर देस में बलाए बर भेजीस। 15तब याकूब हर मिसर देस में गईस, जिहां ओहर अऊ हमर पूरखा मन मएर गईन। 16तेकर ओमन ला गाड़े बर, सकेम सहर में पहुंचाए देहीन, अऊ ओ मठ में राखीन, जेला अबराहम हर सकेम में, हमोर कर बेटा मन जग ले चांदी कर पईसा देके बेसाए रहीस।
17जब ओ बात जबान कर पूरा होए कर समय हर ठांवें आईस, जेला परमेस्वर हर अबराहम जग करे रहीस, त ओ मिसर देस में हमर मईनसे मन ढेरेच बएढ़ गए रहीन। 18तब मिसर देस में एक झन दूसर राजा हर राएज करे लागीस, जेहर यूसुफ कर बारे में नई जानत रहीस। 19त ओ राजा हर हमर मईनसे मन ले, छल-कपट कएर के हमर पूरखा मन कर ऊपरे ढेरेच अतियाचार करीस, अऊ जबरजसती करीस कि ओमन अपन नांवा जनमल बेटा लईका मन ला मरे बर बाहरी फेंक दें।
20ओही घरी में मूसा कर जनम होईस अऊ ओहर परमेस्वर कर नजेर में ढेरेच सुघर रहीस अऊ ओके तीन महीना तक अपन दाऊ कर घर में, पोसल गईस। 21बकिन जब मूसा ला फेंक देहीन, त फिरोन कर बेटी हर ओके ले लानीस अऊ अपन बेटा बनाए के ओकर पालन-पोसन करीस। 22मूसा ला मिसर देस कर सब गियान, सिखावल गईस अऊ ओहर सामर्थ कर संगे गोएठ बात अऊ काम करत रहीस।
23जब मूसा हर करीबन चालीस बछर कर होईस, त अपन मन में कहीस कि मंए अपन इसराएली भाई मन जग भेंट करों। 24मूसा अपन एक झन भाई कर उपरे अनियाए होवत देख के, ओके बचाईस अऊ ओहर मिसर देस कर मईनसे ला माएर के पलटा लेहीस। 25मूसा हर सोंचीस कि मोर जाति कर भाई मन समझहीं कि परमेस्वर हर मोर द्वारा, ओमन कर उद्धार करही, बकिन ओमन नई समझीन। 26दूसर दिन जब दुई झन इसराईली मन आपस में लड़त रहीन, त मूसा हर ओजग आईस, अऊ ए कहिके ओमन के मेल-मिलाप करे बर समझाईस, “ए मईनसे मन, तुमन तो भाई-भाई हवा, तुमन एक दूसर ले काबर लड़त हवा?”
27बकिन जे इसराएली हर दूसर उपरे अनियाए करत रहीस, ओहर एकस कहिके मूसा ला हटाए देहीस, “तोके कोन हर हमर उपरे हाकीम अऊ नियाओ करे बर ठहराईस हवे? 28का तंए जईसना काएल एक झन मिसर देस कर मईनसे ला माएर दारे, ओइसने मोके ला माएर दारे बर चाहत हस?” 29ए बात ला सुईन के मूसा हर, उहां ले भागीस अऊ मिदयान देस में जाए के, परदेसी कस होए के रहे लागीस अऊ उहां ओकर दुई ठे लईका होईन।
30“जब मूसा ला मिदयान देस में रहत, चालीस बछर बीत गईस, त एगोट सरगदूत हर सीने पहार कर जंगल में, मूसा ला बरत झाड़ी में आगी कर मझारे दरसन देहीस। 31मूसा हर ओ दरसन ला देख के अचमहों होईस, अऊ जब मूसा ओला देखे बर ठांवें गईस, त परभू कर ए अवाज ला सुनीस, 32मंए तोर पूरखा, अबराहम, इसहाक अऊ याकूब कर परमेस्वर लागों, त एला सुईन के मूसा हर, डर कर मारे कांपे लागीस अऊ फेर ओला देखे कर हिमेत नई रहीस। 33तब परभू हर मूसा ला कहीस, अपन गोड़ कर पनही ला उताएर दे, काबरकि तंए जे जघा में ठड़होए हवस, ओहर पबितर भुईंया हवे। 34मंए फूरोंच में मिसर देस में अपन मईनसे मन कर, बिपेत ला देखे हों अऊ ओमन कर दुख अऊ कलपाई ला सुने हों, एकर बर मंए ओमन ला छोंड़ाए बर उतरे हों, अब तंए आओ, मंए तोके मिसर देस में भेजहूं।”
35“जे मूसा ला इसराईली मन, ए कहिके इनकार करे रहीन, तोके कोन हर हमर उपरे हाकीम अऊ नियाओ करोईया बनाईस हवे? एहर ओही लागे, जेला परमेस्वर हर इसराएल कर मईनसे मन बर हाकीम अऊ छोंड़ईया ठहराए के, ओ सरगदूत कर द्वारा भेजीस, जेहर ओके ला झाड़ी में दरसन देहे रहीस। 36एही मूसा हर मिसर देस अऊ लाल समूंदर अऊ रेगिसतान में चालीस बछर ले, चिन्ह चमत्कार देखाए-देखाए के, ओमन ला गुलामी ले निकाएल के ले आनीस। 37ए होही मूसा लागे, जेहर इसराएली मन ले कहे रहीस, परमेस्वर हर तुमन कर मईनसे मन ले, तुमन बर मोर कस एक झन अगमजानी उठाही। 38ए ओही मूसा लागे, जेहर रेगिसतान में झूंड कर मझारे हमर पूरखो मन कर संगे रहीस, जे घनी ओहर सरगदूत ठन सीने पहार में गोठियाईस, त एही मूसा हर हमन ला देहे बर, परमेस्वर कती ले ए जीयत बचन ला पाए रहीस। 39बकिन हमर पूरखा मन मूसा कर बात ला नई मानीन, अऊ ओकर बात ला नकाएर के अपन मन ला मिसर देस कती लगाईन।” 40ओमन हारून ला कहीन, “हमर बर एकस देंवता बना, जेहर हमर आगु-आगु चले, काबरकि ए मूसा जेहर, हमन ला मिसर देस ले निकाएल के लानीस, हमरे नई जानी कि ओके का होईस?” 41ओही दिन में ओमन एगोट बछवा कर मूरती बनाईन, ओ मूरती कर आगू में बली चघाईन अऊ ओमन अपन हाथ कर काम ले ढेरेच खुस होए लागीन। 42बकिन परमेस्वर हर ओमन जग ले मूंह मोएड़ लेहे रहीस, ओमन ला अगास कर बेर, जोन अऊ तरईया मन कर पूजा करे बर छोंएड़ देहे रहीस, जेकस कि अगमजानी मन कर किताब में लिखल हवे,
“ए इसराएली कर परिवार कर मईनसे मन,
का तुमन रेगिसतान में चालीस बछर ले,
पसू कर बली अऊ अनबली मोहीं के चघावत रहा।
43तुमन मोलेक कर तंबू अऊ
रीफान देंवता कर तरईया ला लेके फिरत रहा,
ओ मूरतीयो मन ला ले गए जेला, तुमन पूजा करे बर बनाए रहा,
एकरले मंए तुमन ला बेबीलोन सहर कर बाहरी
ले जाए के दुरीहां बसाहूं।”#आमोस 5:25-27
44गवाही कर पबितर तंबू हर, रेगिसतान में हमर पूरखा मन कर संगे रहीस, परमेस्वर हर मूसा जग कहे रहीस, “तंए जे नमूना ला देखे हवस, ओकरे कस एला बनाबे” जेकस ओहर बताए रहीस, ओही कस मूसा हर बनाईस 45ओही पबितर तंबू ला हमर पूरखा मन, सुरूच ले पाए के यहोसू कर संगे एजग ले आनीन, जे घनी ओमन ओ आने जाति मन कर उपरे अधिकार पाईन, जेमन ला परमेस्वर हर, हमर पूरखा मन कर आगू ले निकाएल देहीस अऊ ओ पबितर तंबू हर, दाऊद राजा कर समय तक ओजग रहीस। 46ओकर उपरे परमेस्वर हर किरपा करीस अऊ दाऊद राजा हर बिनती करीस कि ओहर याकूब कर परमेस्वर बर रहे बरीक घर बनाही। 47बकिन सुलेमान राजा हर परमेस्वर बर घर बनाईस। 48बकिन सबले ऊंच में रहोईया परमेस्वर हर, मईनसे कर हाथ कर बनाल घर में नई रहे, जेकस कि अगमजानी हर कहीसे,
49“परभू हर कहथे, सरग हर मोर सिंहासन
अऊ धरती हर मोर गोड़ मड़हाए कर चौकी हवे,
मोर बर तुमन कोन कस घर बनईहा?
अऊ मोर बिसोए कर जघा कहां होही?
50का ए सबेच चीज हर मोर हाथ कर बनाल ना हवे?”#यसायाह 66:1-2
51“ए जिदहा मईनसे मन, तुमन सत ला सूईन के नई अपनावा, काबरकि तुमन कर मन अऊ कान हर, गैर यहूदी मन सहींक परमेस्वर कर आगू में असुध हवे अऊ तुमन हमेसा पबितर आत्मा कर बिरोध करथा, जेकस तुमन कर पूरखा मन करत रहीन। 52अगमजानी मन ले काके ला, तुमन कर पूरखा मन नई सताईन? ओमन ओ खभरीहा मन ला माएर दारीन, जेमन ओ धरमी जन कर आए कर खभेर ढेरे आगू देहे रहीन अऊ अब तंहूच मन ओकर धरोईया अऊ मरोईया हवा। 53तुमन तो सरगदूत कर द्वारा लानल कानहूंन ला तो पाए हवा, बकिन ओकर अनुसार नई चला।”
इस्तिफनुस ला पखना में माएर मरुवाथें
54ए बात ला सुईन के ओमन गुसाए गईन अऊ इस्तिफनुस बर, दांत चाबे लागीन। 55बकिन इस्तिफनुस हर पबितर आत्मा ले भरपूर होए के, सरग कती ला देखत रहीस अऊ परमेस्वर कर महिमा अऊ ईसू ला परमेस्वर कर जवनी कती ठड़होवल देखीस, 56अऊ कहीस, “देखा, मंए सरग ला खुलल, अऊ मईनसे कर बेटा ला, परमेस्वर कर जवनी कती ठड़होवल देखत हवों।” 57तब ओमन जोर से किरलाए के, अपन कान मन ला मूईंद लेहीन अऊ ओमन सब झन ओकर उपरे झपाए गईन, 58अऊ ओके घिसलावत, सहर ले बाहरी ले गईन अऊ उहां ओके पखना में मारे लागीन अऊ गवाह मन अपन-अपन ओढ़ना ला, साऊल नांव कर जवान मईनसे कर, गोड़ जग उताएर के मड़हाए देहीन। 59ओमन जब इस्तिफनुस ला पखना में मारतेच रहीन, तब ओहर पराथना करीस, “ए परभू ईसू! मोर आत्मा ला अपनाए ले।” 60तब ओहर ठेहुनाए के जोर से किरलाईस, “ए परभू, ए पाप ला ओमन कर उपरे झईन लगा” अऊ ए कहिके ओहर मएर गईस।
Dewis Presennol:
परेरीत 7: SGJ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© (Active) Wycliffe Bible Translators, Inc. All rights reserved.