Matay 24
24
O Pipali'ayaw to Saka Pleng no Fangcalay Pita'ongan
(Maroko 13.1-2; Luka 21.5-6)
1Yo masadak ci Yis a miliyas to Fangcalay Pita'ongan i, raoden no nisawawaan Cingra. Toro' sa cangra to Fangcalay Pita'ongan a loma' a papinengneng ci Yisan. 2Pasowal sa ci Yis i cangraan, <<O minengnengay kamo tonini a loma' haw? So'linen Ako a somowal kamo, o mamapleng a ma^min konini a mapatirengay a fokloh, o a awato ko ccaccay a fokloh i kafkang no roma a fokloh,>> han Ningra.
O Pades ato Kari'ang
(Maroko 13.3-13; Luka 21.7-19)
3Yo maro' ci Yis i Olif a lotok i, dokdok sa ko nisawawaan a tayra i ci Yisan a milicay, <<Ano hacowa aira konini a dmak? Ano miliyaw Kiso a tayni ano pahrekanto no hkal i, o maan ko kacipinangan niyam a mafana' saw? Pasowalen kami,>> han nangra.
4Paca'of sa ci Yis i cangraan, <<Pina'on kamo. Aka ka sa'fit no tamdaw. 5Nawhani o aira ko 'alomanay a tamdaw a micaliw to ngangan Ako. Sowal asa, <Ci Kristo Kako>, o sasaan cangra a misa'fit to 'alomanay a tamdaw. 6O romasato, o mamatngil namo ko nika ira no i ngataay a kalalood ato iraayay a lihaf to pakayniay i kalalood. Nikawrira, aka ka rawraw ko faloco' namo. Nawhani o airaira aca konini a dmak. Nikawrira, caayho ko pahrekan no hkal itiya. 7O mamalaloolood ko finawlan ato finawlan. O mamasasi'ada'ada ko kitakit ato kitakit. O aira ko kdal ato lonen#24.7 lonen -- o roma i, 'atoray (katimol). i cowacowa. 8Onini a dmak a ma^min i, o satapangan no tata'angay a pades a matiya o pisemsem no ma'at'atay.
9<<Itiya i, o mamarpet, o mamapasemsem no tamdamdaw kamo ta patayen nangra. O mitooray kamo i Takowanan saka, o mamaka'intel no tamdamdaw a ma^min kamo. 10Itiya i, 'aloman ko mamisawad a mitoor i Takowanan. O mamarari'ari'ang cangra a masasi'intel. 11O aira ko 'alomanay a mangah a pali'ayaway to sowal no Kawas a misa'fit to 'alomanay a tamdaw. 12O mamatongal ko tatiihay saka, o mamafasaw ko olah no 'alomanay a tamdaw to Kawas. 13Nikawrira, o pakahadidiay a tamdaw a tahira i pahrekan i, o mamapa'orip. 14O mamapatnakho ko Nga'ayay Ratoh to pakayniay i Kitakit no Kawas i polong no hkal, pasayra i polong no tamdamdaw a pawacay, ta maraod ko pahrekan a romi'ad no rayray no hkal.
O Tata'angay a Pades
(Maroko 13.14-23; Luka 21.20-24)
15<<O mama'araw namo ko nisowalan ni Taniil o pali'ayaway to sowal no Kawas toya <Kaka'osian a mihadefekay>. O aira konini a tomireng i fangcalay a kaitiraan. (Kafana' kiso o miasipay a tamdaw to tatodong nonini a sowal.) 16Pilaliw kamo o maro'ay i Yutaya a tamdaw a talalotok. 17Ano i fadahongay kiso i, aka ka ^pod a miala to maamaan i loma'. 18Ano i omahay kiso i, aka pinokay i loma' a miala to kafafang iso. 19Itiya toya romi'ad i, tada o kasini'adaan ko cipoyapoyay a fafahiyan ato ciwawaay a wina to micocoayho a wawa. 20Pitolon kamo to saka^caaw ka tama i kasi^nawan, ano^ca i Pasla'an a Romi'ad konini a dmak. 21Nawhani oya aira a pades itiya i, awaho ko hatiniay a nika tata'ang no pades nai satapangan no nipisanga' no Kawas to hkal a tahanini. O a awato i ikor ko matiniay a pades. 22Ano caay lowanen no Kawas koya kapadesan a romi'ad i, awaay ko mamapa'orip to ccaccay aca a tamdaw. Nikawrira, o lalowanen no Kawas koya romi'ad to saki nipili'an Ningra a finawlan.
23<<Itiya toya romi'ad i, ano ira ko somowalay i tamowanan, <Nengnengen, ini ci Kristo! Nengnengen, itiraw ci Kristo!> ano saasaan i, aka paso'lin to sowal ningra. 24Nawhani o aira ko mangah a Kristo ato mangah a pali'ayaway to sowal no Kawas. Ano mama^deng i, sa'fitaw ako ko nipili'an no Kawas a finawlan, saan cangra. Saka, midmak cangra to tadakafahka'an a dmak a patiri'. 25Pina'on kamo! Mapali'ayawto Ako kamo a somowal tonini a dmak.
26<<Orasaka, ano ira ko somowalay i tamowanan to <Nengnengen, ira i kohkohan ci Kristo,> ano saasaan i, aka ka tayra kamo. O romasato, ano ira ko somowalay to <Nengnengen, ira i loflof ci Kristo,> ano saasaan i, aka ka paso'lin. 27Nawhani o piliyaw noya Wawa no Tamdaw a tayni i, o mamatiya o pimiyat#24.27 pimiyat -- o roma i, piflat (ka'amis). no kalapiyat fahal sa nai wali a tala^tip.
28<<Ano i cowa ko kodih i, o a itira a masa'opo ko lidep.
O Pili'ayaw no Wawa no Tamdaw a Tayni
(Maroko 13.24-27; Luka 21.25-28)
29<<I ikor nonini a kapadesan a romi'ad i, o tato'man ko cidal. Caayto ko mamalikat ko folad. O mamatfad ko fo'is nai kakarayan. O mamangernger ko polong no kakakafikafit no kakarayan. 30Itiya i, o mama'araw i kakarayan ko kacipinangan to nipiliyaw noya Wawa no Tamdaw a tayni. Ta o tatomangic a ma^min ko kasafinacadan no hkal. O mama'araw nangra ko nika o tadaci'icelay, o ci'dilay koya Wawa no Tamdaw a pakato'em a tayni nai kakarayan. 31Ira ko tata'angay a soni no la^pa, ta ocoren Ningra ko coyoh a patayra i ka'amis katimol kawali ka^tip, ta pasa'opoen nangra ko nai cowacowaay no hkal a nipili'an Ningra a finawlan.
O Sifana' to Sokon a Kilang
(Maroko 13.28-31; Luka 21.29-33)
32<<Kafana' kamo to pakayniay i sokon a kilang a tinako. Yo masadak ko lo^ngelay a co'ong a cipapah ko ca'ang i, mangatato ko kacihrangan saan kamo a mafana'. 33Malcad tonini, ano mahapinang namo ko nika ira nonini a dmak i#24.33 ira nonini a dmak i -- ano ^ca i, o tatayni to Cingra., itiya a mafana' kamo to nika o mingataayto Cingra to fawahan. 34So'linen Ako a somowal kamo, o mamalahci ko polong nonini a dmak i 'ayaw no nika patay no aniniay a tamdaw. 35O mamalasawad ko kakarayan ato sra. Nikawrira, caay ko mamalasawad ko sowal Ako.
Awaay ko Mafana'ay toya Romi'ad atoya Toki
(Maroko 13.32-37; Luka 17.26-30, 34-36)
36<<Nikawrira, o pakayniay toya mamaraod a romi'ad atoya tatokian i, awaay ko ccaccay aca a mafana'ay a tamdaw, halocoyocoyoh no kakarayan a caay ka fana', halo Wawa a caay ka fana', dengan o Wama a Kawas ko mafana'ay. 37O nika tayni noya Wawa no Tamdaw i, o mamatiya o dmak toya romi'ad yo ma'oripho ca Nowa. 38I 'ayaw no kalenlenan#24.38 kalenlenan -- o roma i, kafrengan (ka'amis). i, mararid a komaen, mita'owak, cifa'inay, cifafahi ko tamdamdaw tangasa i picomodan na Nowa i tamina toya romi'ad. 39Tangasa i nika iraan no lenlen a mikric i cangraan a ma^min i, caay ka fanafana' cangra. O mamahaen ko nika tayni noya Wawa no Tamdaw. 40Itiya i, yo i omah ko tatosaay a matayal i, o mamaala ko ccay, o mamasiday ko ccay. 41Yo miilang ko tatosaay a fafahiyan i, o mamaala ko ccay, o mamasiday ko ccay.
42<<Orasaka, kapalal kamo, nawhani caay ka fana' kamo to nika ano hacowaay a romi'ad a tayni ko Tapang. 43Kafana' kamo tonini, ano mafana' ko tawki no loma' to nika ano hacowa ko sakaira no mitakaway i, o mamapalal cingra to saka^caaw ka lipalaw no mitakaway a micomod i loma' ningra. 44Orasaka, kararid kamo a mipatala. Nawhani, caayay ka harateng namo a tatokian i, itiya a fahal sa a tayni koya Wawa no Tamdaw.
O Nga'ayay ato Tatiihay a Koli
(Luka 12.41-48)
45<<Ano hatira i, cima ko karahkeran a citanengay a koli saw? Oya nipatirengan no tawki no loma' a papirocek to kakaenen a pafli i kolikoli a misimaway a tamdaw. 46Ano minokay koya tawki, ano ma'araw ningra ko nika haen no dmak noya koli i, o malmeday cingra. 47So'linen Ako a somowal kamo, paconoh wa han noya tawki cingra a papisimaw to dafong ningra a ma^min. 48Nikawrira, ano o tatiihay a koli cingra i, <Latek, caayho ko maminokay ko tawki,> saan ko faloco' ningra. 49Saka, paloen ningra ko kapot ningra a kolikoli. Mikapot cingra to hali^pahay a tamdaw a komaen a mita'owak. 50Kirami, yo caay pisaharaterateng cingra to pinokayan no tawki a romi'ad atoya tatokian i, itiya a ira a minokay koya tawki. 51Itiya i, caay ko sasamadahen noya tawki cingra a mipekpek a mipalo#24.51 caay ko sasamadahen noya tawki cingra a mipekpek a mipalo -- ano^ca i, laplap han noya tawki cingra. a palcad to nika tfoc no roma a misamangahay a tamdaw. Ta itira a tomangic cingra a mingric to wadis.
Dewis Presennol:
Matay 24: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019