Marko 5
5
PANŽ
1Atunči aresle ka e aver rig la maryaki ando them le Gergasenonge. 2Tay kana hulistesas avri anda e ladžiya, avilo pa'l mormuntsi tay maladilya le Isusosa ekh manuš kay sas sa bendžaylo. 3Kodo trayilas maškar le mormuntsi tay khonik našti phandenas les či ekhe lantsosa, či khančesa. 4Butivar phanglesas les le vastendar tay le punřendar numa le lantsuri p'el vas pharadya vo tay kodole p'el punře kerdya prušuka. Tay nas kanikaste e zor te ašavel les. 5Dyesesa tay ratyasa sas maškar le mormuntsi tay p'el playa tay sa tsipilas tay šinelas‐pe bařentsa.
6Tay kana, dural, dikhyla le Isusos, prastaiya tay dya čanga angla leste. 7Tay tsipisardya, “Soste hamis tu mande. Tu san o Isus, o Šav le Čacě Bare Devlesko. Mangav tu, angla o Del, te na tyinuis ma.” 8Ke, aba, motholas o Isus, “Nevuža, av avri anda o manuš.” 9Tay pušlya les o Isus, “Sar bušos?” Tay dya anglal, “Bidyinde, ke but sam.” 10Tay manglya les zurales te na tradel le anda kodo them.
11No, pe playin čaryonas but bale tay le nevuže mangle les, “Trade ame le balende te žas andre ande lende.” 12-13Tay meklya le te žan. Tay line tay avile avri le nevuže tay dine andre ande le bale. Porme le bale, duy miyi sas, šudine‐pe tele ande marya tay tasadile.
14Našline le balyarya tay povinas pa leste vi ando foro vi and el gava, tay le žene avile te dikhen so pelya‐pe. 15Tay avile ka o Isus tay dikhle le manušes kay may anglal bendžaylo sas. Akana manay bendžaylo numa bešlya tay huryado sas. Kado sas o manuš kay sas les le Bidyinde. Tay čudisayle le žene. 16Tay kodole kay dikhlesas mothodine le avren pa o manuš tay vi pa le bale. 17Apo malade te mangen le Isusos te duryol‐pe katar lengo them.
18Tay kay anklelas pe ladžiya o Isus, kodo manuš kay sastilo manglya lestar, “Mek ma te avav tusa.” 19Numa o Isus či meklya les tay mothodya leske, “Ža khere ka tye nyamuri. Phen lenge sode kerdya tuke o Ray ay sar te pelya leske mila tutar.” 20Tay gelo‐tar o manuš tay maladya te povil, ando them kay bušol Le Deš Foruri, so kerdyasas leske o Isus. Tay mirisayle savoŕe.
21Atunči o Isus gelo palpale ka o aver rig la maryaki tay but žene tyidinisayle truyal leste paša e marya. 22Tay avilo leste yekh anda le bare kapuri la sinagogake. Bušolas o Džayros. Kana dikhlya le Isusos, dya čanga angla leste. 23Tay rudžimasa manglya lestar tay phendya, “Merel muŕi šeyoŕi. Te avesa tay te thosa o vas pe late, šay sastyol tay te trayil.” 24Apo, gelo lesa o Isus tay vi but žene geline pala leste tay tyidinine‐pe pe leste tay spidenas les.
25Tay sas ekh nasvali kasko rat thavdyolas de deš‐u‐duy berš. 26But doktorya zumadesas te sastyaren la tay tyinuisardesas la but. Numa makar ke dyasas sa o love kay sas la, či sastili numa may nasvayli. 27Ašundya so phenenas pa o Isus tay pašili ka leste palal tay azbadya leski raxami. 28Phendya peske, “Te azbav feri leski raxami, sastyuvava.” 29Tay, yekhatar, či may thavdyolas o rat tay žanglya ando ilo ke sastili. 30Numa o Isus hačardya ande peste ke meklyasas les voareso anda leski putyarya. Ay, anda yekh, amboldya‐pe karing le žene tay mothodya, “Kon azbadya muŕi raxami?” 31Tay mothodine leske vortača, “Dikhes le narodos sar spidel pe tute tay inke pušes, ‘Kon azbadya ma?’ ” 32Tay sa dikhlya truyal te arakhel kas azbadyasas les. 33Numa e gaži dya‐pe anglal darayimasa tay izdrayimasa ke žanglya so gelo‐pe lake. Dya čanga angla leste tay mothodya leske soŕo čačimos. 34Tay mothodya lake o Isus, “Lyalyo, anda tyo patyayimos sastilyan. Ža le Devlesa. Te ašes sastili.”
35Kay delas duma avile vuni manuš anda o kher le kaposko tay phende, “Muli tyi šey. Sostar may keres bayo le Raske?” 36Numa o Isus či lya sama so phenenas tay mothodya le kaposke, “Na dara, numa patya‐tu.” 37Tay numa le Petros tay le Yakovos tay leske phrales le Yovanos meklya te žan lesa. 38Kana aresle ka o kher dikhlya o Isus ke tsipinas le žene tay ke rovenas tay vačinas‐pe zurales. 39Tay kana gelo andre, mothodya lenge, “Anda soste roven? Nay muli numa sovel.” 40Tay asaye lestar. Numa gonisardya le avri tay lya le dades tay la da tay vi kodolen kay sas lesa tay dya andre kay sas e raklyoŕi. 41Lya la vastestar tay phendya lake, “Talitha kumi,” kay si Ŕomanes, “Raklyoŕiyo, phenav tuke ušti.” 42Tay, anda yekh, uštili e rakli tay lya tay phiradya‐pe. Deš‐u‐duy beršengi‐la. Tay, yekhatar, sa mutsosayle. 43Apo, zurales porunčisardya pe lende te na mothon kanikaske pa kadaleste tay mothodya lenge te den la te xal.
Dewis Presennol:
Marko 5: Kald71
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
maintained by the British and Foreign Bible Society