Rhufeiniaid 10
10
1Frodyr a chwiorydd annwyl, dw i’n dyheu o waelod calon ac yn gweddïo ar Dduw y bydd fy mhobl, yr Iddewon, yn cael eu hachub. 2Galla i dystio eu bod nhw’n frwdfrydig dros Dduw, ond dŷn nhw ddim wedi deall y gwirionedd. 3Yn lle derbyn ffordd Duw o ddod â phobl i berthynas iawn ag e ei hun, maen nhw wedi mynnu ceisio gwneud eu hunain yn iawn gyda Duw drwy gadw’r Gyfraith. Felly maen nhw wedi gwrthod plygu i Dduw. 4Ond y Meseia ydy’r nod mae Cyfraith Duw yn anelu ato! Felly y rhai sy’n credu ynddo fe sy’n cael eu derbyn i berthynas iawn gyda Duw.
5Dyma ddwedodd Moses am y Gyfraith fel ffordd o gael perthynas iawn gyda Duw: “Y sawl sy’n gwneud y pethau yma sy’n cael byw go iawn.”#Lefiticus 18:5
6Ond mae cael perthynas iawn gyda Duw drwy gredu yn dweud: “Paid meddwl: Pwy wnaiff fynd i fyny i’r nefoedd?” #Deuteronomium 30:12 (hynny ydy, i ddod â’r Meseia i lawr) 7neu “Pwy wnaiff fynd i lawr i’r dyfnder”#Deuteronomium 30:13 (hynny ydy, i ddod â’r Meseia yn ôl yn fyw). 8Dyma mae’n ei ddweud: “Mae’r neges yn agos atat ti; mae ar dy wefusau ac yn dy galon di.”#Deuteronomium 30:14 (Hynny ydy, y neges dŷn ni’n ei chyhoeddi, sef mai credu ydy’r ffordd): 9Os wnei di gyffesu ‘â’th wefusau’, “Iesu ydy’r Arglwydd”, a chredu ‘yn dy galon’ fod Duw wedi’i godi yn ôl yn fyw ar ôl iddo farw, cei dy achub. 10Credu yn y galon sy’n dy wneud di’n iawn gyda Duw, a chei dy achub wrth gyffesu hynny’n agored. 11Fel mae’r ysgrifau sanctaidd yn dweud: “Fydd pwy bynnag sy’n credu ynddo ddim yn cael ei siomi.”#Eseia 28:16 (LXX) 12Mae’n union yr un fath i’r Iddew ac i bawb arall. Un Arglwydd sydd, ac mae’n rhoi yn hael o’i fendithion i bwy bynnag sy’n galw arno. 13Achos, “Bydd pwy bynnag sy’n galw ar enw’r Arglwydd yn cael ei achub.”#Joel 2:32
14Ond wedyn, sut mae disgwyl i bobl alw arno os ydyn nhw ddim wedi credu ynddo? A sut maen nhw’n mynd i gredu ynddo heb glywed amdano? Sut maen nhw’n mynd i glywed os ydy rhywun ddim yn dweud wrthyn nhw? 15A phwy sy’n mynd i ddweud wrthyn nhw heb gael ei anfon? Dyna mae’r ysgrifau sanctaidd yn ei olygu wrth ddweud: “Mae mor wych fod y rhai sy’n cyhoeddi’r newyddion da yn dod!”#Eseia 52:7 (cf. Nahum 1:5) 16Ond dydy pawb ddim wedi derbyn y newyddion da. Fel mae’r proffwyd Eseia’n dweud, “Arglwydd, pwy sydd wedi credu ein neges ni?”#Eseia 53:1 (LXX)
17Mae’n rhaid clywed cyn gallu credu – clywed rhywun yn rhannu’r newyddion da am y Meseia. 18Felly ai dweud ydw i fod yr Iddewon heb glywed? Na, fel arall yn hollol:
“Mae pawb wedi clywed beth maen nhw’n ddweud,
a’u neges wedi mynd i ben draw’r byd.” #
Salm 19:4 (LXX)
19Felly, ai’r broblem ydy fod Israel heb ddeall y neges? Na! – Moses ydy’r cyntaf i roi ateb,
“Bydda i’n gwneud i chi fod yn eiddigeddus o rai nad ydyn nhw’n genedl;
a’ch gwneud yn ddig drwy fendithio pobl sy’n deall dim.” #
Deuteronomium 32:21
20Ac roedd y proffwyd Eseia ddigon dewr i gyhoeddi fod Duw yn dweud,
“Daeth pobl oedd ddim yn chwilio amdana i o hyd i fi;
Dangosais fy hun i rai oedd ddim yn gofyn amdana i.” #
Eseia 65:1 (LXX)
21Ond mae’n dweud fel yma am Israel:
“Bues i’n estyn fy llaw atyn nhw drwy’r adeg,
ond maen nhw’n bobl anufudd ac ystyfnig.” #
Eseia 65:2 (LXX)
Dewis Presennol:
Rhufeiniaid 10: bnet
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Cymdeithas y Beibl 2023