Lwiikö 22

Zwidaa ‑yɛ Zezwii Zwiiföwaa kä'mö plɩnɩ

(Matie 26.1-5; Maakö 14.1-2; Zaa 11.45-53)

1 Galɛ'möwlʋfɛtɩɩ ‑ɛnyɩɩ dɔ'wʋ wa liɛ 'fɔlɔ wa'a ngunɩɛ levii, mɛɛ lɛ 'kää ghlɛ. 2‑Lɛ a 'tɛnyɩ 'la 'mö, Zwiiföwaa 'a Lagɔbʋbɔwaa a 'kifiea, wa ‑nyɛ Moyizɩ 'a Gböö a 'cɩawaa 'sɔ, wa pä 'slɛlɛ wa 'kä Zezwii 'lɩbhä ɔ 'kä 'ku. ‑Maa 'bhlɩbhëa 'mö wa guä. 3‑Lɛ a 'tɛnyɩ 'la ‑bhʋlʋ ‑kpɔ 'mö, Zwidaa wa laa Yisikalio, ‑ɔ glɩnɩɛ Zezwii a ‑gänɩwaa kʋgbä'sɔ ‑kpɔ gla'mö a ‑nɔ ‑bhlʋ, 'n Sataa yoo ‑gömö bhlinɩ. 4'N ɔ yiɛ 'wʋ ‑sɔ, Lagɔbʋbɔwaa a 'kifiea, wa ‑nyɛ Lagɔbudu 'Kɔdʋʋ a ‑kʋkʋwa 'kädɩɩ 'sɔ 'n ɔ yuëë ‑mä ghlɩ, sɛ wa 'kää 'zʋ ɔ 'kʋä Zezwii kä'mö plɩnɩɩ, wa 'kä ‑sɩbhä a ylɩ plɛ. 5Ɔ ghlɛɛ ‑mä, wa 'wuë 'mäna a 'yize, wa 'nʋnʋnɩɛ 'möö, wa lɛ wa yo moni 'nyɛ. 6'N ɔ yiɛ 'wʋ nglu. 'Bhöönɩa'a ‑lɛ, 'n ɔ pää 'slɛlɛ ɔ 'kʋä 'wi 'mö Zezwii kä'mö plɩnɩ.

Zezwii yɛ ɔ ‑gänɩwa 'sɔ tie wa 'kä 'fɛtɩ a lilea 'wlu gïganɩ

(Matie 26.17-25; Maakö 14.12-21; Zaa 13.21-30)

7Zwiiföwaa 'a 'fɛtɩ 'kädɛ 'la ‑ɛnyɩɩ dɔ'wʋ wa liɛ 'fɔlɔ wa'a ngunɩɛ levii, 'n ‑ɛnyɩ zlɩɩ 'mö wa kää wa 'kä 'bhlawödɩgbö 'lɩbhä, wa 'kä 'wʋ linɩɩ, mɛɛ ghlɛɛ. 8'N Zezwii yiɛ Piɛlɩ ‑nyɛ Zaa 'sɔ tie, ɔ lɛ naa: «A nɩ mö a 'kä 'fɛtɩɩ a lilea pi ‑a 'kä 'wʋ linɩ.» 9Wa lɛ naa: «‑Atʋ, dɛ ‑a 'ka bhä pinɩɛ mö 'nɩ?» 10Ɔ lɛ naa: «A ‑pʋnɩ 'yukwli, a nɩ mö ‑mä glɔ 'mö. A ‑kä glɔ plɛ cuu, a ‑nyɛ nɩkpɛ ‑bhlʋ yi 'wʋ gbanɩ. Ɔ ‑su 'nyulaki. Nɩkpɛ 'la, a nɩ ‑gänɔ. 'Ligbë ‑ma 'mö ɔ 'kää plɛɛ, a nɩ plɛmö ‑mä. 11'Ligbë 'la a ‑lowlii, a nɩ 'nyɔ 'dɩ nɩɩ: ‑Atʋ lɛ naa, ɔ yɩbhä ɔ ‑nyɛ ‑abhʋa 'ɔ ‑gänɩwaa 'sɔ ‑a 'kä 'fɛtɩɩ a lilea 'gämö linɩ. Zaa, 'pänɩnyɩ ‑budukïbhëa ‑a 'kää 'mö linɩɩ. 12A ‑kɔɔ sa'a 'dɩ 'nyɛɛ, ‑mä 'ɔ ‑buduu a ghäyɩ 'wʋ, ɔ yeanyɩ ‑mä 'kïbhë 'käda ‑bhlʋ 'pänɩ. ‑Mä gïganɩ 'wlu. A ‑kä pi 'wëë, ‑mä ‑a 'kää 'wʋ linɩ.» 13Piɛlɩ ‑nyɛ Zaa 'sɔ wa möä, sɛɛ Zezwii 'nyʋä a‑a 'dɩɩ 'tɩɩ, yɩ 'wuë ‑sɩbhä yɩ 'wlʋnɩɛ 'yli. 'N wa yiɛ 'fɛtɩɩ a lilea pi.

Lagɔlilea a tɛɛnɩda

(Matie 26.26-30; Maakö 14.22-26)

14Lilitɛnyɩɩ ghlɛɛ, Zezwii ‑nyɛ 'ɔ tietiewaa kʋgbä'sɔ ‑kpɔ 'sɔ, 'n wa yiɛ 'wʋ linɩɛ mö. 15Wa lɛ 'kää lie yii, ɔ lɛ naa: «'Fɛtɩɩ a lilea ‑a 'kää dɛ'ɛ lii, sɛɛ 'na dlɩ 'yɩbhä a‑a tenyii, n ‑nyɛ abhʋa 'sɔ, ‑a nɩ linaa 'wʋ 'wë, n 'kä bhäla 'klɩ 'yɩɩ, ‑sɩbhä ma‑a dɛ'ɛ. 16Ɛ'ɛ ‑bhö nyɩasɛ maa, 'fɛtɩɩ n ‑nyɛ abhʋa 'sɔ ‑a sɛɛ dɛ'ɛɛ, 'na 'gbëbhlenɩnɛɛ mɛɛ. ‑Maa 'pɩwʋ mää Lagɔ 'kämanɩɛ, ‑mä yɩ zɛmösɛsaa 'kää 'yli 'wlʋnɩ.»

17Zezwii gbä sa'a 'wëë, 'n ɔ yiɛ duvɛɛkɔpʋ 'wʋ 'libhï, 'n ɔ yiɛ wʋ za Lagɔ bhälɩ 'wë, ɔ lɛ naa: «A 'libhï 'wʋ, a 'kä 'wʋ 'nɩmänɩ. 18‑Maa sɛ'ɛ n nyanyɩɛ 'dɩ nɩɩ, tɛɛnɩ dɛ'ɛ, 'naa 'käa'a ‑sɩkaa duvɛɛ 'nɩmä, 'n 'pɩwʋ mää Lagɔ 'kämanɩɛ 'nɩɛ 'yli 'wlʋnɩ 'wëë.» 19'N ɔ yiɛ 'fɔlɔbhë 'wʋ 'libhï, 'n ɔ yiɛ a za Lagɔ bhälɩ 'wë, 'n ɔ yeaa 'mö ‑dɩdɩnɩ, 'n ɔ yuënyɩɛ yowʋ 'nyɛ. Ɔ lɛ naa: «'Fɔlɔbhë nɩ, 'na kpökpaa n 'kää a za 'mö 'wlʋʋ, ma‑a. A nɩ 'zʋ ‑sɩbhä, 'saa n nʋä a 'wlumö a dɛ, a dila 'kä 'kwädlɩ ‑lɛ 'pö.»

20Wa liɛ 'wëë, sɛ ‑bhlʋ ‑kpɔ 'la 'n ɔ yuëë duvɛɛkɔpʋʋ yowʋ 'nyɛ ɔ lɛ naa: «Duvɛɛ nɩ, 'na dluu muä, mɛnɩnɔluluu a dluu ‑wʋ 'kää a 'wlumö kwlii, muä. 21‑Maa a yɩɛ, a gla'mö a ‑nɔ ‑bhlʋ, n ‑nyɛɛ ‑wʋä dɛ'ɛ 'wʋ linɩmö dɔ'wʋʋ, mɔɔ ‑kaaa 'na ‑gblɩwaa kä'mö plɩnɩ. 22Nɩkpɛ a 'Yu, sɛɛ Lagɔ 'yɩbhää ɔ dɛ, ‑sɩbhä yɩ 'kää yɩ 'wuë 'wʋ 'plɩ ɔ 'kä 'ku. ‑Maa ‑ɔ 'kɔɔ nɩkpa kä'mö plɩnɩɩ, ɔ ‑nɩɩ yi tenyii 'mö 'tɛɛ.» 23Zezwii gbää sa'aa, 'n wa 'yɩbhäyɩbhänɩɛ nimï nɩɩ: «'Ɔ! Zaa, ‑aa gla'mö a ‑mɔ ɔ gaa bhä da'a 'nɩ?»

‑Ɔ kä bhä dɛsɛ ‑ɔ zi ɔ ‑muë'la 'wuë 'wʋ?

(Matie 20.25-28; 19.28; Maakö 10.42-45)

24Zezwii 'a ‑gänɩwaa, wa 'yize 'n wa yiɛ tenyii kpɛnɩ. Wa gla'mö a ‑mɔɔ kää dɛsɛ ‑ɔ ziɛ ‑muë'la 'wuë 'wʋ a wɛlɩɩ, 'mö wa kpɛnɩɛ 'mö. 25'N Zezwii yuëë 'dɩ 'nyɛ, ɔ lɛ naa: «A ‑yi sɛ, mä'ä 'pɩwʋ a dɔ'wʋ, 'bhlɩlowluwaa, 'wa bhlɩɩ 'mö a ‑nʋa 'mö wa nɛmönɩɛ ‑gömö. 'N wa gbää wa nɩ lʋä ‑li a ‑linʋwa. 26‑Maa abhʋa abhlɩ, a nɩ tɩ ‑sɩbhä zʋ. ‑Ɔ kää a gla'mö a dɔ'wʋ dɛsɛ ‑ɔ ziɛ ‑muë'la 'wuë 'wʋʋ, ɔ nɩ 'libhï ɔnyɩ ‑ɔɔdɛsɛkänyɔ 'mö 'wʋ. ‑Ɔ ‑gänanyɩɛ 'yukuu, ɔ nɩ 'libhï ɔnyɩ a 'wuë a 'yliwʋnyɔ 'mö 'wʋ. 27A dɔ'wʋ, ‑ɔ ‑nyɛ ɔ 'bhɩa linɩɛ 'wʋ mɔ, ‑ɔ ‑wuëë 'yli ‑ɔ dlinɩɛ lilea mɔ, wa 'sɔ ‑kpɔ a dɔ'wʋ ‑ɔ kä bhä dɛsɛ, ‑ɔ zi bhä 'wʋ? Ɛ'ɛ ‑bhö bhä ‑ɔ ‑nyɛ ɔ 'bhɩa linɩɛ 'wʋ mɔ ‑a? Sa'a yɩ ‑wʋä, ‑maa a yɩɛ, na'bhë, 'yliwʋnyɔ a sɛ n ‑wʋanyɩɛ dɛ'ɛ jijo'wʋ.

28‑Mä 'na 'zwɩzizee 'mö, abhʋa abhlɩ, a ‑nɩɩɛ 'bɩwʋ 'bhöö. 29Zaa, 'pɩwʋ mää na Dɩba 'kämanɩɛ, sɛ ɔ 'zʋaaa ‑mä a 'kämanɩnyɔ 'kɔdɔɔ 'wʋʋ, n yeanyɩ ‑sɩbhä ‑mä 'bhle 'nyɛ n ‑nyɛ abhʋa 'sɔ ‑a 'kä 'kämanɩ. 30A ‑nya'mö yi ‑mä 'wʋ linɩ, ‑a yi 'nɩmä. N yeanyɩ Yizlaɛlɩ 'a ngëyii a ‑gligbï kʋgbä'sɔ ‑kpɔ a ‑zijlituwa 'wʋ 'zʋa.»

Zezwii lɛ Piɛlɩ yo cɛlɩ

(Matie 26.31-35; Maakö 14.27-31; Zaa 13.37-38)

31'N Zezwii yiɛ Simɔɔ Piɛlɩ 'yi gö, ɔ lɛ naa: «Simɔɔ, ‑pʋnɩ 'yukwli, yɩɛ Sataa, Lagɔ kɔ 'yi 'tatinɩ ɔ 'kanyɩ ‑mä 'pä, sɛɛ 'nglɔ zʋɛ ‑gugobhʋbhʋ ‑tɛmɛ 'mö 'n ɔ ngälu'ɛ 'möö, ɔ 'kanyɩ ‑sɩbhä 'mö gbäzɩ. 32‑Maa n yɛ ‑na za Lagɔ bhibhe, nzɩɩ ‑lɛ a 'tɛnyɩ 'la ‑käa ghlɛɛ, na gbʋ ‑tɩmöa dlɩ 'wʋ bhɩɛ. Zaa, ‑zlɩ ‑n ‑kä ligba ‑n ‑kä ‑tiamö na ‑nɔ 'zʋ 'wëë, ‑na 'bhɩa ‑muë'la, 'pʋä swɩ nyɛmʋ 'mö.» 33Piɛlɩ lɛ naa: «‑Alowli, dɛ n glɩɛ dɛ'ɛɛ, n ‑bhɩɔ 'mö, wa ‑kamö ‑jie 'mö 'pä wa ‑kaa ‑mä 'pämö. Ɛ ‑kä'ɛ kwiee a'bhë mɛɛ, n ‑nyɛmö 'sɔ ‑a ye 'ku.» 34Piɛlɩ gbää sa'aa, Zezwii lɛ naa: «‑Tiamö n nyɩamöä dɛ'ɛ 'dɩ nɩɩ, zɩ'ɛ a sabʋ, ‑kɔkɔbhɛlʋ a'bhë 'naa 'kä ‑bhlɛ wɛlɩ 'pä, ‑nmö Piɛlɩ, n‑n 'kää 'wʋ taa cɛlɩnɩ nɩɩ, ‑n ‑nɩɩɛ ‑yi.»

Zezwii a ‑gänɩgänɩgbʋʋ yɛ 'mö 'tɛmanɩ

35'N Zezwii yuë'ɛɛ 'dɩ 'nyɛ, ɔ lɛ naa: «‑Zlɩ n tianyɩ a‑a a 'kä Lagɔwɛlɩɩ biaa möö, sɛ'ɛ n gbä a‑a nɩɩ, a ‑kä möä yii, a nɩ tɩ moni ‑su, a nɩ tɩ ‑kotoku ‑su, a nɩ tɩ 'siikpli ‑su, ‑lɛ a 'tɛnyɩ 'la 'mö, a mö a‑a, ‑lu a 'pʋa 'lɩbhanyɩ a bhä ‑a?» Wa lɛ naa: «N'nn, ‑lu ‑bhlʋ a'bhë a 'pʋa ‑nɩnyɩɛ a 'lɩbhä.» 36Ɔ lɛ naa: «Miɛ, ‑maa ‑sɩkaa a dɔ'wʋ, ‑ɔ ‑kä 'ɔ moni ‑kä, ɔ nɩ 'libhe 'wʋ. ‑Ɔ ‑kä 'ɔ ‑kotoku ‑kä, ɔ nɩ 'libhu 'wʋ. ‑Ɔ 'nɩ ‑gbälɛ ‑kä, ɔ nɩ 'pä 'ɔ lekwi 'kädɛɛ 'pɛlʋ, ɔ 'kä ‑gbälɛ pɩa. 37Ɛ'ɛ ‑bhö nyɩasɛ ‑maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ: Jɛzlʋnyɔ a sɛ wa 'kɔɔ 'zʋ.#22.37 Ezayii 53.12. ‑Lɛ a wɛlɩ 'la, yɩ yi ‑mä na ‑gömö 'yli 'wlʋnɩ klɩpaa. Yɩ 'yliwlʋnɩdaa yɛ 'dio 'wë.» 38Zezwii gbää sa'aa, wa lɛ naa: «‑Atʋ yɩɛ, ‑a ‑su dɛ'ɛ ‑gbëlie 'sɔ.» Ɔ lɛ: «‑Ɔɔɔ! ‑A nɩ 'tatinɩa'a wɛlɩ nɩ 'yi a'bhë.»

Zezwii yɛ ‑mä Olivieswii a ‑gägaa 'wlu bhibhee mö

(Matie 26.36-46; Maakö 14.32-42)

39'N Zezwii yiɛ 'wʋ ‑sɔ, 'ɔ 'kwädlɩ a saa 'n ɔ yiɛ ‑mä Olivieswii a ‑gägaa 'wlu a 'bɛyɩ mönɩ. 'Ɔ ‑gänɩwaa ‑gänɔ, 'n wa yiɛ mö. 40Wa ghlɛɛ ‑mä, ɔ lɛ naa: «A nɩ bhibhe Lagɔ, ‑mäpäpʋ ‑kaanyɩ ghlɩ a tɩa ‑mä bhlinɩ.» 41'N ɔ yuëë gwë 'dionɩ 'n ɔ yiɛ ‑kokomïladigbï glu 'pä, 'n ɔ yiɛ Lagɔ bhibhe, 42ɔ lɛ naa: «‑Atʋ Lagɔ, ‑n ‑kä 'wʋ nguluu, 'klɩyɩyɛ a ‑dɔkɔ nɩ n 'kää dɛ'ɛ 'nɩmää, 'dianɩ'mu gwë. Miɛ abhlɩ da'a ‑maa, ‑na'a sɛ ‑n yɩbhää, ‑sɩbhä ma‑a nɩ 'wlʋnɩ 'yli, ‑maa ɛ nɩ tɩ 'na dlɩpäsaa ma.» [43Ɔ bhibhee 'wëë, ɔ lɛ zʋ a sɛ'ɛ, Lagɔzuzukwë ‑bhlʋ 'nigboo yɔwʋ, a 'kɔ swɩ nyɛmʋ 'mö 'pä. 44‑Maa ɔ dlɩ zɛmö a nganɔ a za, 'n ɔ yi'ɛɛ tenyii Lagɔ bhibhe, 'n 'bhubhu yoo 'mö kwli. Wʋ taa ‑yɩ bhlinɩɛ ‑lɛ dʋdʋ 'wʋʋ, yɩ 'kä bhɩɛ dlu.] 45Ɔ bhibhee 'wëë, 'n ɔ yiɛ 'wʋ ‑sɔ, 'n ɔ yiɛ ‑mä 'ɔ ‑gänɩwaa ghlɩ. Ɔ lɛ 'bhöö 'lɛ, swɩ kʋä yɔwʋ 'kunɩ zaa, wa ngämö. 46Ɔ lɛ naa: «Sɛ yɩ ‑wʋ ɔ 'mö, 'n a ngämö bhä 'nɩ? A ‑sɔ yɩ 'wʋ a 'kä yɩ Lagɔ bhibhe, ‑mäpäpʋ ‑kaanyɩ ghlɩ a tɩa ‑mä bhlinɩ.»

Wa yɛ Zezwii köbhä

(Matie 26.47-56; Maakö 14.43-50; Zaa 18.3-11)

47Zezwii kä wɛlɩ 'la ngli cuu, 'n nɩkpa a ‑bʋbʋ yiɛ ‑lɛ 'wʋ ghlɛnɩ. Zwidaa ‑ɔ glɩnɩmöä 'ɔ ‑gänɩwaa kʋgbä'sɔ ‑kpɔ gla'mö a ‑nɔ ‑bhlʋʋ, mɔɔ ‑gänɩɛ ‑bʋbʋ 'la 'yuku. Wa ghlɛɛ ‑lɛ, 'n Zwidaa yiɛ Zezwii mönɩ, 'n ɔ yoo dlɩ gbönɩ. 48‑Maa Zezwii lɛ naa: «‑Aa! Zwidaa, dlɩgbönɩgbönɛ, 'mö ‑n plɩnɩ bhä Nɩkpɛ a 'Yu 'ɔ ‑gblɩwaa kä'mö ‑a?» 49Zezwii 'a ‑gänɩwaa 'yɩɛ 'saa lɛ 'kɔɔ ghlɩ 'ylɩmöö, 'n wa yoo nimï 'yɩbhä, wa lɛ: «‑Atʋ, ‑n yɩbhä bhä ‑a nɩ 'lɩbhʋä ‑gbëlie 'mö ‑a?» 50Wa kɩ ngli cuu, wa gla'mö a ‑nɔ ‑bhlʋ, 'n ɔ yiɛ 'ɔ ‑gbälɛɛ 'wʋ 'libhï, 'n ɔ yiɛ Lagɔbʋbɔnyɔ 'kɔdɔɔ a libhonʋnyɔ a luukɛyukwlii ‑lɛ ‑dɩ. 51‑Maa Zezwii lɛ naa: «A nɩ 'nɩgbö, a nɩ ‑sɛ sa'a a ‑li kɛ'mö.» 'N ɔ yiɛ nɩkpɛɛ a yukwlii a ‑gbaa 'mö kɛ zɩ 'n ɔ yoo yɛmanɩ.

52 Lagɔbʋbɔwaa a 'kifiea gla'mö a ‑mumuë ‑nyɛ Zwiiföwaa a 'nɛɛnɩwa 'kädɩɩ a gla'mö a ‑mumuë 'sɔ, Lagɔbudu 'Kɔdʋʋ a ‑kʋkʋwa 'kädɩɩ kökä, mʋa yiɛ Zezwii köbhää. 'N ɔ yuëë nimï yɩbhä, ɔ lɛ naa: «Jɛzlʋnyɔ n glɩnɩ bhä zaa, nza a ‑su ‑gbëlie ‑nyɛ swi 'sɔ 'n a ‑yii köbhä ‑a? 53Zilaa 'wuë 'mö, n ‑nyɛ abhʋa 'sɔ, ‑mä Lagɔbudu 'Kɔdʋʋ 'mö ‑mä a ‑wʋ a‑a, a ‑nɩɩɛ a ‑mä köbhänɩ. ‑Maa zɩ'ɛ a guylukwë nɩ 'mö, ‑lɛ Lagɔ 'tatinaanyɩɛ 'yi a ‑nyɛ zuzukuzoku a 'kifii 'sɔ, a 'kä 'a libhoo nʋ.»

Piɛlɩ yɛ Zezwii cɛlɩ

(Matie 26.57-58,69-75; Maakö 14.53-54,66-72; Zaa 18.12-18,25-27)

54Zezwii gbää sa'a 'wëë, 'n wa yoo köbhä 'n wa yoo ‑mä Lagɔbʋbɔnyɔ 'kɔdɔɔ a 'ligbë 'mö kwä. Wa ‑wɔɔɔ ‑mä kwä dɔ'wʋʋ, Piɛlɩ ‑gä ‑mä nimïnimï, 'n wa yiɛ ‑mä 'ligbë 'mö ghlɛ. 55Wa ghlɛɛ ‑mä 'n ɔ yiɛ ‑mä plɛmö. ‑Lɛ 'ligbëa jijo'wʋ, ‑kosu ganɩɩ ‑lɛ. Nɩkpa ‑binuu, 'n Piɛlɩ yuëë jijo'wʋ sɛ glɩ. 56Ɔ glɩ ‑lɛ, 'n libhonʋnglɔ ‑bhlʋ yoo 'ylɩmö. Ɔ yɩloo 'klʋ ‑këë, ɔ lɛ naa: «Nɩkpɛ nɩ, ɔ ‑gänɩmö a nɩkpɛ wa ‑suä da'a.» 57‑Maa Piɛlɩ lɛ naa: «N'nngöa‑a! Nglɔ nɩmä, ‑n gaaa da'aa, n 'nɔɔa ‑yi.» 58‑Lɛ gwälɛɛ 'tikïyie 'wʋ 'möö, 'n nɩkpɛ ‑mɔmɔɔ yiɛ yi. Ɔ 'yɩɛ Piɛlɩ 'ylɩmöö, ɔ lɛ naa: «‑Nmö nɩ, nɩkpɛ 'la 'a ‑gänɩwaa a gla'mö a ‑nɔ ‑bhlʋ ‑n glɩnɩmöä.» Piɛlɩ lɛ: «‑Gbëaa! Ɛ'ɛ ‑bhö ‑amö.» 59'Gïle ‑bhlʋ a sɛ 'plɩɛ, 'n ‑mɔmɔɔ yi'ɛɛ yi, ɔ lɛ naa: «Nɩkpɛ nɩ 'dɛɛ, ‑tiamö, nɩkpɛ 'la 'mö ɔ ‑gänɩmö a‑a. Ɛ'ɛ ‑bhö nyɩasɛ, ‑maa ‑mä Galilee‑bhölɩɩ 'mö, ‑mä ɔ 'bhöönɩmöä.» 60Piɛlɩ lɛ: «‑Mi ‑n sɛnɩɛ da'a 'mö a'bhë, n 'niɛ tɛkäsɛ ‑yi 'lɩlɩlɩ.» Ɔ kɩ ngli cuu, 'n ‑kɔkɔbhɛlʋ yiɛ gbʋ ‑dɩ. 61'N ‑Alowli yiɛ nimï 'lɛ, 'n ɔ yiɛ Piɛlɩ 'klʋ yɩlɩ ‑pölɩɩ. 'N Piɛlɩ yiɛ wɛlɩɩ Zezwii 'nyɔ a‑a 'wʋ ligbanɩ. Sɛ'ɛ ɔ 'nyɔ a‑a dɩ nɩɩ, ‑kɔkɔbhɛlʋ 'naa 'kä ‑bhlɛ wɛlɩ 'pä, 'n Piɛlɩ 'kää 'wʋ taa cɛlɩnɩ nɩɩ, ɔ 'nɔɔ ‑yi. 62Piɛlɩ a dlɩɩ bhlinɩɛ wɛlɩ 'la a daa, 'n ɔ yiɛ ‑mä 'wlʋ 'n 'mɩɔkɔslʋ yoo 'ylimö ghlɛ.

Slʋjaa yɛ Zezwii ‑di zia

(Matie 26.67-68; Maakö 14.65)

63Nɩkpa ‑wa ‑kʋä Zezwii, nɛpɔ wa nɛpɔɔ 'n wa lɩbhɔɔ. 64'N wa yoo 'yila 'klʋ gwa, 'n wa lɩbhɔɔ ‑kwïli 'mö 'n wa nʋä: «Lagɔ a 'möbhïlanɩnyɔɔ ‑n glɩnɩɛ zaa, ‑ɔ lɩbhamöä, yɩbhlɩnɔɔ ‑n 'kɔ 'nglɩ ‑dɩ.» 65'N wa yiɛ wɛlɩ ‑mimii a ‑bɛ 'mö Zezwii ‑di zianɩ.

Wa yɛ Zezwii ‑mä ‑zijlituwa 'kädɩɩ a 'yila 'klʋ kwä

(Matie 26.59-66; Maakö 14.55-64; Zaa 18.19-24)

66Zlɩ zɩɛ, Zwiiföwaa a ‑zijlituwa 'kädɩɩ 'wuë, 'n wa yiɛ 'wlu 'yɩbhä. 'Wa 'nɛɛnɩwa 'kädɩɩ muë, 'wa Lagɔbʋbɔwaa a 'kifiea muë, 'n Moyizɩ 'a Gböö a 'cɩawaa, wa 'wuë, 'n wa yiɛ 'wlu 'yɩbhä. 'N wa yiɛ Zezwii kie mö wa 'kɔ ‑zijle tu. 67Wa ‑nyɔɔ yiɛ, 'n wa yoo nimï 'yɩbhä, wa lɛ naa: «‑Nmö ‑kä Kliisɩ Puënyɔ Lagɔ ‑sɛɛ ‑lɛ glɩnɩ, nyɩanyɩ 'dɩ!» Ɔ lɛ naa: «N ‑kä nɩɩ, 'mö n glɩnɩɛ nʋʋ, a 'naa 'kɩ dlɩ 'wʋ ‑kä. 68'N n ‑kaanyɩ'ɛ ‑sɩkaa 'kïbhë ‑bhlʋ 'wʋ 'yɩbhänɩ, a 'naa 'ka ‑gömö ‑sɛ. 69‑Maa 'dɩ n nyanyɩɛ dɛ'ɛ nɩɩ: Tɛɛnɩ dɛ'ɛ, Nɩkpɛ a 'Yu, ‑mä 'Lagɔ ‑ɔ tɛɛ 'mö a luukɛ 'wʋ, ɔ yi ‑mä sɛ glɩɛ mö.» 70Ɔ gbää sa'aa, wa 'wuë wa lɛ naa: «N'n! Zaa, Lagɔ 'a Yuu mö ‑n glɩnɩ bhä ‑a?» Ɔ lɛ naa: «A'bhï, ‑sɩbhä a gbäa'aa da'a.» 71Wa lɛ naa: «Wɛlɩ ‑mii 'kɔɔ gbʋ köbhaa, a‑a nɩ tia'a ‑bhlɛ sɛ tɛlɩ. ‑Maa ɔ'bhë a ngli ‑mä ‑a 'nʋä da'a.»

Dewis Presennol:

Lwiikö 22: bet

Uwcholeuo

Rhanna

Copi

Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda

Dysgu mwy am BdG2

Lwiikö 22

Adnodau Beiblaidd Poblogaidd o
Lwiikö 22

Gwranda ar Lwiikö 22

Beibl:

Bété, Guiberoua

Fersiwn: BdG2 - bet

Lwiikö 22

Lwiikö 22

Adnodau Beiblaidd Poblogaidd o Lwiikö 22

Gwranda ar Lwiikö 22

Beibl:

Bété, Guiberoua

Fersiwn: BdG2 - bet

Lwiikö 22

Adnodau Beiblaidd Poblogaidd o
Lwiikö 22